ಪ್ರಮಾಣೀಕರಿಸದ ಉತ್ಪನ್ನಗಳ ಮಾರಾಟ, ಇ–ಕಾಮರ್ಸ್‌ ತಾಣಗಳ ಮೇಲೆ ಕಠಿಣ ಕ್ರಮ; ಅಮೆಜಾನ್–ಫ್ಲಿಪ್‌ಕಾರ್ಟ್ ಗೋದಾಮುಗಳ ಮೇಲೆ ಬಿಐಎಸ್ ದಾಳಿ

BIS Raids on Amazon Flipkart: ಕಡ್ಡಾಯ ಪ್ರಮಾಣೀಕರಣ ಮಾನದಂಡಗಳನ್ನು ಉಲ್ಲಂಘಿಸಿದ್ದಕ್ಕಾಗಿ ಭಾರತೀಯ ಮಾನದಂಡಗಳ ಬ್ಯೂರೋ (ಬಿಐಎಸ್) ಅಮೆಜಾನ್, ಬಿಗ್‌ಬಾಸ್ಕೆಟ್ ಮತ್ತು ಫ್ಲಿಪ್‌ಕಾರ್ಟ್ ಸೇರಿದಂತೆ ಪ್ರಮುಖ ಇ-ಕಾಮರ್ಸ್ ತಾಣಗಳಿವೆ ನೋಟಿಸ್‌ ನೀಡಿದೆ. ಗ್ರಾಹಕ ವ್ಯವಹಾರಗಳು, ಆಹಾರ ಮತ್ತು ಸಾರ್ವಜನಿಕ ವಿತರಣಾ ಸಚಿವಾಲಯದ ಅಡಿಯಲ್ಲಿ ಕಾರ್ಯನಿರ್ವಹಿಸುವ ಬಿಐಎಸ್, ಅಮೆಜಾನ್ ಮತ್ತು ಫ್ಲಿಪ್‌ಕಾರ್ಟ್ ಗೋದಾಮುಗಳ ಮೇಲೆ ದಾಳಿ ಮಾಡಿ ಬಿಐಎಸ್ ಪ್ರಮಾಣೀಕರಣದ ಕೊರತೆಯಿರುವ ಉತ್ಪನ್ನಗಳನ್ನು ವಶಪಡಿಸಿಕೊಂಡಿದೆ.

ವಸ್ತುಗಳನ್ನು ವಶಪಡಿಸಿಕೊಂಡ ನಂತರ ಬಿಎಸ್‌ಐ ಸಂಸ್ಥೆಯು ಬಿಎಸ್‌ಐ ಕಾಯ್ದೆ 2016ರ ಪ್ರಕಾರ ಇ–ಕಾಮರ್ಸ್‌ ತಾಣಗಳನ್ನು ಹೊಣೆ ಮಾಡಲು ಕಾನೂನು ಕ್ರಮ ಕೈಗೊಳ್ಳಲು ಮುಂದಾಗಿದೆ. ಬಿಐಎಸ್ ಕಾಯ್ದೆ, 2016 ರ ಸೆಕ್ಷನ್ 17(1) ಮತ್ತು 17(3) ರ ಉಲ್ಲಂಘನೆಗಾಗಿ ಈ ವೇದಿಕೆಗಳ ವಿರುದ್ಧ 2 ಪ್ರಕರಣಗಳನ್ನು ದಾಖಲಿಸಿದೆ.

ಎಲ್ಲಾ ಉತ್ಪನ್ನಗಳ ಮಾರಾಟಗಾರರು ಅನ್ವಯವಾಗುವ ಕಾನೂನುಗಳು, ನಿಯಮಗಳು ಮತ್ತು ಅಮೆಜಾನ್ ನೀತಿಗಳನ್ನು ಪಾಲಿಸಬೇಕು ಎಂದು ಅಮೆಜಾನ್ ಸಂಸ್ಥೆ ಹೇಳಿಕೆ ಹೇಳಿದೆ.

‘ನಮ್ಮ ಆಯ್ಕೆಯು ಉದ್ಯಮ-ಸ್ವೀಕರಿಸಲ್ಪಟ್ಟ ಮಾನದಂಡಗಳನ್ನು ಪೂರೈಸುತ್ತದೆ ಎಂದು ನಾವು ಖಚಿತಪಡಿಸಿಕೊಳ್ಳುತ್ತೇವೆ ಮತ್ತು ಅಸುರಕ್ಷಿತ ಉತ್ಪನ್ನಗಳ ಮಾರಾಟವನ್ನು ತಡೆಯಲು ನಾವು ನವೀನ ಸಾಧನಗಳನ್ನು ಅಭಿವೃದ್ಧಿಪಡಿಸುತ್ತೇವೆ. ಅನುಸರಣೆಯಿಲ್ಲದ ಉತ್ಪನ್ನಗಳನ್ನು ತೆಗೆದುಹಾಕುವುದು ಮತ್ತು ಸೂಕ್ತವಾದಾಗ ಹೆಚ್ಚುವರಿ ಮಾಹಿತಿಗಾಗಿ ಮಾರಾಟಗಾರರು, ತಯಾರಕರು ಮತ್ತು ಸರ್ಕಾರಿ ಸಂಸ್ಥೆಗಳನ್ನು ಸಂಪರ್ಕಿಸುವುದು ಸೇರಿದಂತೆ ನಮ್ಮ ಗ್ರಾಹಕರಿಗೆ ಸುರಕ್ಷಿತ ಆಯ್ಕೆಯನ್ನು ಕಾಪಾಡಿಕೊಳ್ಳಲು ನಾವು ಕ್ರಮಗಳನ್ನು ತೆಗೆದುಕೊಳ್ಳುತ್ತೇವೆ‘ ಎಂದು ಕೂಡ ಅಮೆಜಾನ್ ಹೇಳಿದೆ.

ಇದನ್ನೂ ಓದಿ: 9 ತಿಂಗಳ ಬಳಿಕ ಭೂಮಿಗೆ ಮರಳುತ್ತಿರುವ ಸುನಿತಾ ವಿಲಿಯಮ್ಸ್‌, ಬುಚ್‌; ನೇರಪ್ರಸಾರಕ್ಕೆ ನಾಸಾ+ ಸಿದ್ದತೆ, ಲೈವ್ ವೀಕ್ಷಣೆಗೆ ಇಲ್ಲಿದೆ ಲಿಂಕ್

ಬಿಐಎಸ್ ದಾಳಿ ವೇಳೆ ಅಮೆಜಾನ್ ಪಿಫ್‌ಕಾರ್ಟ್‌ನಿಂದ ವಶಪಡಿಸಿಕೊಂಡ ಉತ್ಪನ್ನಗಳು

ಮಾರ್ಚ್ 7 ರಂದು ಲಕ್ನೋದ ಅಮೆಜಾನ್ ಗೋದಾಮಿನ ಮೇಲೆ ನಡೆದ ದಾಳಿಯಲ್ಲಿ, ಬಿಐಎಸ್ ಕಡ್ಡಾಯ ಬಿಐಎಸ್ ಪ್ರಮಾಣೀಕರಣವಿಲ್ಲದ 215 ಆಟಿಕೆಗಳು ಮತ್ತು 24 ಹ್ಯಾಂಡ್ ಬ್ಲೆಂಡರ್‌ಗಳನ್ನು ವಶಪಡಿಸಿಕೊಂಡಿದೆ. ಫೆಬ್ರುವರಿಯಲ್ಲಿ ಗುರುಗ್ರಾಮದಲ್ಲಿರುವ ಗೋದಾಮಿನ ಮೇಲಿನ ದಾಳಿಯಲ್ಲಿ ಸರಿಯಾದ ಪ್ರಮಾಣೀಕರಣವಿಲ್ಲದ 58 ಅಲ್ಯೂಮಿನಿಯಂ ಫಾಯಿಲ್‌ಗಳು, 34 ಲೋಹೀಯ ನೀರಿನ ಬಾಟಲಿಗಳು, 25 ಆಟಿಕೆಗಳು, 20 ಹ್ಯಾಂಡ್ ಬ್ಲೆಂಡರ್‌ಗಳು, ಏಳು ಪಿವಿಸಿ ಕೇಬಲ್‌ಗಳು, ಎರಡು ಆಹಾರ ಮಿಕ್ಸರ್‌ಗಳು ಮತ್ತು 1 ಸ್ಪೀಕರ್ ಪತ್ತೆಯಾಗಿವೆ.

ಗುರುಗ್ರಾಮದಲ್ಲಿರುವ ಇನ್‌ಸ್ಟಾಕಾರ್ಟ್ ಸರ್ವೀಸಸ್ ಪ್ರೈವೇಟ್ ಲಿಮಿಟೆಡ್ ನಿರ್ವಹಿಸುವ ಫ್ಲಿಪ್‌ಕಾರ್ಟ್ ಗೋದಾಮಿನಲ್ಲಿ, ಅಗತ್ಯ ಮಾನದಂಡಗಳನ್ನು ಪೂರೈಸದ 534 ಸ್ಟೇನ್‌ಲೆಸ್ ಸ್ಟೀಲ್ ವ್ಯಾಕ್ಯೂಮ್-ಇನ್ಸುಲೇಟೆಡ್ ಬಾಟಲಿಗಳು, 134 ಆಟಿಕೆಗಳು ಮತ್ತು 41 ಸ್ಪೀಕರ್‌ಗಳನ್ನು ಅಧಿಕಾರಿಗಳು ಮುಟ್ಟುಗೋಲು ಹಾಕಿಕೊಂಡರು. ಪ್ರಮಾಣೀಕರಿಸದ ಅನೇಕ ಉತ್ಪನ್ನಗಳು ಟೆಕ್‌ವಿಷನ್ ಇಂಟರ್ನ್ಯಾಷನಲ್ ಪ್ರೈವೇಟ್ ಲಿಮಿಟೆಡ್‌ಗೆ ಸಂಬಂಧಿಸಿವೆ ಎಂದು ಬಿಐಎಸ್ ತನಿಖೆಗಳು ಬಹಿರಂಗಪಡಿಸಿವೆ.

ಈ ಸುಳಿವು ದೊರೆತ ಬೆನ್ನಲ್ಲೇ, ಕಂಪನಿಯ ದೆಹಲಿಯ ಎರಡು ಸೌಲಭ್ಯಗಳ ಮೇಲೆ ನಡೆಸಿದ ದಾಳಿಯಲ್ಲಿ ಬಿಐಎಸ್ ಪ್ರಮಾಣೀಕರಣವಿಲ್ಲದ ಸುಮಾರು 7,000 ಎಲೆಕ್ಟ್ರಿಕ್ ವಾಟರ್ ಹೀಟರ್‌ಗಳು, 4,000 ಎಲೆಕ್ಟ್ರಿಕ್ ಫುಡ್ ಮಿಕ್ಸರ್‌ಗಳು, 95 ಎಲೆಕ್ಟ್ರಿಕ್ ರೂಮ್ ಹೀಟರ್‌ಗಳು ಮತ್ತು 40 ಗ್ಯಾಸ್ ಸ್ಟೌವ್‌ಗಳು ಪತ್ತೆಯಾಗಿವೆ.

ಸಚಿವಾಲಯದ ಪ್ರಕಾರ, ವಶಪಡಿಸಿಕೊಂಡ ವಸ್ತುಗಳಲ್ಲಿ ಡಿಜಿಸ್ಮಾರ್ಟ್, ಆಕ್ಟಿವಾ, ಇನಾಲ್ಸಾ, ಸೆಲ್ಲೊ ಸ್ವಿಫ್ಟ್ ಮತ್ತು ಬಟರ್‌ಫ್ಲೈನಂತಹ ಬ್ರಾಂಡ್‌ಗಳ ಉತ್ಪನ್ನಗಳು ಸೇರಿವೆ. ‘ಬಿಐಎಸ್ ಟೆಕ್ವಿಷನ್ ಇಂಟರ್‌ನ್ಯಾಷನಲ್ ವಿರುದ್ಧ ಬಿಐಎಸ್ ಕಾಯ್ದೆ, 2016ರ ಉಲ್ಲಂಘನೆಗಾಗಿ ಎರಡು ನ್ಯಾಯಾಲಯ ಪ್ರಕರಣಗಳನ್ನು ದಾಖಲಿಸಿದೆ. ಇತರ ವಶಪಡಿಸಿಕೊಳ್ಳುವ ಕಾರ್ಯಾಚರಣೆಗಳಿಗಾಗಿ ಹೆಚ್ಚುವರಿ ಪ್ರಕರಣಗಳನ್ನು ದಾಖಲಿಸುವ ಪ್ರಕ್ರಿಯೆಯಲ್ಲಿದೆ‘ ಎಂದು ಸಚಿವಾಲಯ ತಿಳಿಸಿದೆ.

ಇದನ್ನೂ ಓದಿ: ಅಮೆರಿಕ ಪ್ರಯಾಣಕ್ಕೆ 41 ದೇಶಗಳ ಮೇಲೆ ನಿಷೇಧ ಹೇರಲು ಮುಂದಾದ ಟ್ರಂಪ್ ಸರ್ಕಾರ; ಪಟ್ಟಿಯಲ್ಲಿರುವ ರಾಷ್ಟ್ರಗಳಿವು

ನಿಯಮ ಉಲ್ಲಂಘನೆ ಶಿಕ್ಷೆ ವಿವರ 

ನಿಯಮ ಉಲ್ಲಂಘನೆಗಾಗಿ ಸರ್ಕಾರ ಇ-ಕಾಮರ್ಸ್‌ ನಿರ್ವಾಹಕರಿಗೆ ದಂಡ ವಿಧಿಸುತ್ತದೆ. ಇದರಲ್ಲಿ 2 ಲಕ್ಷದಿಂದ ದಂಡ ಆರಂಭವಾಗುತ್ತದೆ. ಇದು ಮಾರಾಟವಾದ ಅಥವಾ ಮಾರಾಟಕ್ಕೆ ನೀಡಲಾಗುವ ನಿಯಮಗಳಿಗೆ ಅನುಸಾರವಾಗಿರದ ಸರಕುಗಳ ಮೌಲ್ಯಕ್ಕಿಂತ ಹತ್ತು ಪಟ್ಟು ಹೆಚ್ಚಾಗಬಹುದು. ಇನ್ನೂ ಹೆಚ್ಚಿನ ಪ್ರಕರಣಗಳಲ್ಲಿ ನಿಯಮ ಉಲ್ಲಂಘಟನೆ ಮಾಡಿದವರು ಬಿಐಎಸ್‌ ಕಾಯ್ದೆಯ ಸೆಕ್ಷನ್ 17ರ ಅಡಿಯಲ್ಲಿ ಎರಡು ವರ್ಷಗಳವರೆಗೆ ಜೈಲು ಶಿಕ್ಷೆಯನ್ನು ಎದುರಿಸಬೇಕಾಗುತ್ತದೆ.

ಈ ಎಲ್ಲಾ ತಾಣಗಳಿಗೆ ನೋಟಿಸ್ 

ಪ್ರಮಾಣೀಕರಣ ಪ್ರಾಧಿಕಾರವು ಅಮೆಜಾನ್, ಫ್ಲಿಪ್‌ಕಾರ್ಟ್, ಮೀಶೋ, ಮೈಂತ್ರಾ ಮತ್ತು ಬಿಗ್‌ಬಾಸ್ಕೆಟ್ ಸೇರಿದಂತೆ ಪ್ರಮುಖ ಇ-ಕಾಮರ್ಸ್ ಪ್ಲಾಟ್‌ಫಾರ್ಮ್‌ಗಳಿಗೆ ನೋಟಿಸ್‌ಗಳನ್ನು ಜಾರಿ ಮಾಡಿದ್ದು, ಪ್ರಮಾಣೀಕರಣ ಕಡ್ಡಾಯವಾಗಿರುವ ಸ್ಥಳಗಳಲ್ಲಿ ಬಿಐಎಸ್-ಪ್ರಮಾಣೀಕೃತ ಉತ್ಪನ್ನಗಳನ್ನು ಮಾತ್ರ ಪಟ್ಟಿ ಮಾಡಲಾಗಿದೆಯೆ ಎಂದು ಖಚಿತಪಡಿಸಿಕೊಳ್ಳಲು ನಿರ್ದೇಶಿಸಿದೆ. ತನ್ನ ಕಣ್ಗಾವಲು ಚಟುವಟಿಕೆಗಳ ಸಮಯದಲ್ಲಿ, ಬಿಐಎಸ್ ಈ ಇ-ಕಾಮರ್ಸ್ ಪ್ಲಾಟ್‌ಫಾರ್ಮ್‌ಗಳಲ್ಲಿ ಮಾರಾಟವಾಗುವ ಹಲವಾರು ಪ್ರಮಾಣೀಕರಿಸದ ಉತ್ಪನ್ನಗಳನ್ನು ಗುರುತಿಸಿದೆ.

ಪ್ರೆಶರ್ ಕುಕ್ಕರ್‌ಗಳು, ವಿದ್ಯುತ್ ಉಪಕರಣಗಳು ಮತ್ತು ಮಕ್ಕಳ ಆಟಿಕೆಗಳಂತಹ ವಸ್ತುಗಳಿಗೆ ಕಡ್ಡಾಯ ಪ್ರಮಾಣೀಕರಣದ ಅಗತ್ಯವಿರುವ ಸರ್ಕಾರಿ ನಿಯಮಗಳ ಹೊರತಾಗಿಯೂ ಹಲವಾರು ಪ್ರಮಾಣೀಕರಿಸದ ಉತ್ಪನ್ನಗಳು ಆನ್‌ಲೈನ್‌ನಲ್ಲಿ ಮಾರಾಟವಾಗುತ್ತಲೇ ಇರುವುದರಿಂದ ಇದು ಗ್ರಾಹಕರ ಸುರಕ್ಷತೆಯ ಬಗ್ಗೆ ಹೆಚ್ಚುತ್ತಿರುವ ಕಳವಳಗಳನ್ನು ಎತ್ತಿ ತೋರಿಸುತ್ತವೆ. ಗ್ರಾಹಕರ ಹಿತಾಸಕ್ತಿಗಳನ್ನು ರಕ್ಷಿಸಲು ಮತ್ತು ಸುರಕ್ಷತಾ ಮಾನದಂಡಗಳ ಅನುಸರಣೆಯನ್ನು ಖಚಿತಪಡಿಸಿಕೊಳ್ಳಲು ನಡೆಯುತ್ತಿರುವ ಪ್ರಯತ್ನಗಳ ಭಾಗವಾಗಿ ಮಾರುಕಟ್ಟೆ ಕಣ್ಗಾವಲು ಚಟುವಟಿಕೆಗಳು ಮುಂದುವರಿಯುತ್ತವೆ ಎಂದು ಬಿಐಎಸ್ ಒತ್ತಿ ಹೇಳಿದೆ.

ಇದನ್ನೂ ಓದಿ: ಭಾರತಕ್ಕೆ ಚಿನ್ನ ಕಳ್ಳಸಾಗಣೆ ಹೆಚ್ಚುತ್ತಿರಲು ಕಾರಣಗಳೇನು, ಅದು ಅಷ್ಟೊಂದು ಲಾಭದಾಯಕವೇ, ಬೆಲೆ ಏರಿದರೂ ಬೇಡಿಕೆ ಕುಸಿದಿಲ್ಲವೇಕೆ