ಜಿಎಸ್ಟಿ ಕೌನ್ಸಿಲ್ ಸಭೆ; ಸರಕು ಮತ್ತು ಸೇವೆಗಳ ಮೇಲಿನ ತೆರಿಗೆ ದರ ಬದಲಾವಣೆ ಕಾರಣ ಯಾವುದು ಅಗ್ಗ- ಇಲ್ಲಿದೆ ವಿವರ

ನವದೆಹಲಿ: ಕೇಂದ್ರದಲ್ಲಿ ಎನ್‌ಡಿಎ ಸರ್ಕಾರ ರಚನೆಯಾದ ಬಳಿಕ ನಡೆದ ಮೊದಲ ಜಿಎಸ್‌ಟಿ ಕೌನ್ಸಿಲ್ ಸಭೆಯಲ್ಲಿ ಕೆಲವು ಮಹತ್ವದ ನಿರ್ಧಾರಗಳನ್ನು ತೆಗೆದುಕೊಳ್ಳಲಾಗಿದೆ. ಇಂದು (ಜೂನ್ 22) ಈ ಸಭೆ ನಡೆದಿದ್ದು, ಕೌನ್ಸಿಲ್ ಶುರುವಾದ ನಂತರದ 53ನೇ ಸಭೆ ಇದಾಗಿದೆ. ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅಧ್ಯಕ್ಷತೆಯಲ್ಲಿ ಸಭೆ ನಡೆಯಿತು. ಇದರಲ್ಲಿ ವಿವಿಧ ರಾಜ್ಯಗಳ ಹಣಕಾಸು ಸಚಿವರು, ಪ್ರತಿನಿಧಿ ಸಚಿವರು ಭಾಗವಹಿಸಿದ್ದರು.

ತೆರಿಗೆದಾರರ ಅನುಸರಣೆ ಹೊರೆ ಮತ್ತು ಕುಂದುಕೊರತೆಗಳನ್ನು ನಿವಾರಿಸಿ ತೆರಿಗೆ ವ್ಯವಸ್ಥೆಯನ್ನು ಸರಾಗಗೊಳಿಸಲು ಜಿಎಸ್ಟಿ ಕೌನ್ಸಿಲ್ ಹಲವಾರು ನಿರ್ಧಾರಗಳನ್ನು ತೆಗೆದುಕೊಂಡಿದೆ. "ಜಿಎಸ್ಟಿ ಕೌನ್ಸಿಲ್ ಸಭೆ ವ್ಯಾಪಾರ ಸೌಲಭ್ಯ, ಅನುಸರಣೆ ಹೊರೆಯನ್ನು ಸರಾಗಗೊಳಿಸುವುದು ಮತ್ತು ಅನುಸರಣೆಯನ್ನು ಸರಾಗಗೊಳಿಸುವ ದೃಷ್ಟಿಯಿಂದ ತೆರಿಗೆದಾರರಿಗೆ ಪರಿಹಾರದ ಬಗ್ಗೆ ಸಾಕಷ್ಟು ನಿರ್ಧಾರಗಳನ್ನು ತೆಗೆದುಕೊಂಡಿದೆ" ಎಂದು ಸಚಿವೆ ನಿರ್ಮಲಾ ಸೀತಾರಾಮನ್‌ ಹೇಳಿದರು.

ಇದನ್ನೂ ಓದಿ| ಪ್ಲಾಟ್‌ಫಾರಂ ಟಿಕೆಟ್‌, ಹಾಲು, ಕಾರ್ಟನ್‌ ಬಾಕ್ಸ್‌ಗೆ ಜಿಎಸ್‌ಟಿ ವಿನಾಯಿತಿ; ಜಿಎಸ್‌ಟಿ ಕೌನ್ಸಿಲ್ ಸಭೆಯ 10 ಮುಖ್ಯ ನಿರ್ಣಯಗಳಿವು

ಜಿಎಸ್ಟಿ ಕೌನ್ಸಿಲ್ ಮಾಡಿದ ಕೆಲವು ಶಿಫಾರಸುಗಳು

2017-18, 2018-19 ಮತ್ತು 2019-20ರ ಹಣಕಾಸು ವರ್ಷಗಳಿಗೆ ಜಿಎಸ್ಟಿ ಕಾಯ್ದೆಯ ಸೆಕ್ಷನ್ 73 ರ ಅಡಿಯಲ್ಲಿ ಹೊರಡಿಸಲಾದ ತೆರಿಗೆ ಬೇಡಿಕೆ ನೋಟಿಸ್ ಮೇಲಿನ ದಂಡದ ಮೇಲಿನ ಬಡ್ಡಿಯನ್ನು ಮನ್ನಾ ಮಾಡಲು ಜಿಎಸ್ಟಿ ಕೌನ್ಸಿಲ್ ಶಿಫಾರಸು ಮಾಡಿದೆ. ಮಾರ್ಚ್ 31, 2025 ರೊಳಗೆ ನೋಟಿಸ್ನಲ್ಲಿ ಕೋರಲಾದ ಪೂರ್ಣ ತೆರಿಗೆ ಮೊತ್ತವನ್ನು ಪಾವತಿಸುವ ತೆರಿಗೆದಾರರು ಈ ಮನ್ನಾದಿಂದ ಪ್ರಯೋಜನ ಪಡೆಯುತ್ತಾರೆ.

ಯಾವುದೇ ಇನ್ವಾಯ್ಸ್ ಅಥವಾ ಡೆಬಿಟ್ ನೋಟ್ ಮೇಲೆ ಇನ್ಪುಟ್ ಟ್ಯಾಕ್ಸ್ ಕ್ರೆಡಿಟ್ (ಐಟಿಸಿ) ಪಡೆಯಲು ವಿಸ್ತರಣೆಗೆ ಜಿಎಸ್ಟಿ ಕೌನ್ಸಿಲ್ ಅನುಮೋದನೆ ನೀಡಿದೆ.

ಜಿಎಸ್ಟಿ ರಿಟರ್ನ್: ಜಿಎಸ್ಟಿ ಕೌನ್ಸಿಲ್ 2024-25ರ ಹಣಕಾಸು ವರ್ಷ ಮತ್ತು ನಂತರದ ವರ್ಷಗಳಿಗೆ ರಿಟರ್ನ್ಸ್ ಸಲ್ಲಿಸುವ ಗಡುವನ್ನು ಏಪ್ರಿಲ್ 30 ರಿಂದ ಜೂನ್ 30 ರವರೆಗೆ ವಿಸ್ತರಿಸಿದೆ.

ಜಿಎಸ್ಟಿ ಕೌನ್ಸಿಲ್ ಶಿಫಾರಸು; ಯಾವುದು ಅಗ್ಗ

ರೈಲ್ವೆ ಸೇವೆಗಳು: ಭಾರತೀಯ ರೈಲ್ವೆ ನೀಡುವ ಸೇವೆಗಳಾದ ಪ್ಲಾಟ್‌ಫಾರಂ ಟಿಕೆಟ್ ಮಾರಾಟ, ವಿಶ್ರಾಂತಿ ಕೊಠಡಿ ಸೌಲಭ್ಯ, ಕಾಯುವ ಕೋಣೆಗಳು, ಕ್ಲಾಕ್‌ರೂಮ್‌ ಸೌಲಭ್ಯ ಮತ್ತು ಬ್ಯಾಟರಿ ಚಾಲಿತ ಕಾರು ಸೇವೆಗಳನ್ನು ಜಿಎಸ್‌ಟಿಯಿಂದ ಹೊರಗೆ ಇಡಲಾಗಿದೆ.

ಹಾಸ್ಟೆಲ್ ಸೇವೆಗಳು: ಶಿಕ್ಷಣ ಸಂಸ್ಥೆಗಳ ಹೊರಗೆ ಇರುವ ಹಾಸ್ಟೆಲ್ ಸೌಕರ್ಯದ ಸೇವೆಗಳಿಗೆ ಜಿಎಸ್‌ಟಿ ಕೌನ್ಸಿಲ್ ಪ್ರತಿ ವ್ಯಕ್ತಿಗೆ ತಿಂಗಳಿಗೆ 20,000 ರೂಪಾಯಿವರೆಗೆ ವಿನಾಯಿತಿ ನೀಡಿದೆ. ಈ ವಸತಿ 90 ದಿನಗಳವರೆಗೆ ಇದ್ದರೆ ಮಾತ್ರ ವಿನಾಯಿತಿ ಪಡೆಯಬಹುದು.

ಕಾರ್ಟನ್ ಬಾಕ್ಸ್ ಗಳ ಮೇಲಿನ ಜಿಎಸ್ ಟಿ: ಎಲ್ಲಾ ರೀತಿಯ ಕಾರ್ಟನ್ ಬಾಕ್ಸ್ ಗಳ ಮೇಲಿನ ಜಿಎಸ್ ಟಿಯನ್ನು ಶೇ 18ರಿಂದ ಶೇ 12ಕ್ಕೆ ಇಳಿಸಲು ಜಿಎಸ್ ಟಿ ಕೌನ್ಸಿಲ್ ಶಿಫಾರಸು ಮಾಡಿದೆ.

ಸೌರ ಕುಕ್ಕರ್ಗಳು: ಏಕ ಅಥವಾ ದ್ವಿ ಶಕ್ತಿ ಮೂಲದ ಸೌರ ಕುಕ್ಕರ್‌ಗಳಿಗೆ ಏಕರೂಪದ ಜಿಎಸ್ಟಿ ದರವನ್ನು ಶೇಕಡಾ 12 ರಷ್ಟು ಶಿಫಾರಸು ಮಾಡಲಾಗಿದೆ -

ಹಾಲಿನ ಕ್ಯಾನ್‌ಗಳು: ಎಲ್ಲ ಹಾಲಿನ ಕ್ಯಾನ್‌ಗಳ ಮೇಲೆ ಅವುಗಳ ವಸ್ತುಗಳನ್ನು (ಉಕ್ಕು, ಕಬ್ಬಿಣ, ಅಲ್ಯೂಮಿನಿಯಂ) ಲೆಕ್ಕಿಸದೆ ಏಕರೂಪದ ಶೇಕಡಾ 12 ರಷ್ಟು ಜಿಎಸ್ಟಿ ದರವನ್ನು ಜಿಎಸ್ಟಿ ಕೌನ್ಸಿಲ್ ಶಿಫಾರಸು ಮಾಡಿದೆ.

ಸ್ಪ್ರಿಂಕ್ಲರ್‌ಗಳು: ಬೆಂಕಿ ಮತ್ತು ನೀರಿನ ಸ್ಪ್ರಿಂಕ್ಲರ್‌ಗಳು ಸೇರಿ ಎಲ್ಲಾ ರೀತಿಯ ಸ್ಪ್ರಿಂಕ್ಲರ್‌ಗಳು ಏಕರೂಪದ ಜಿಎಸ್ಟಿ ದರದ ವ್ಯಾಪ್ತಿಗೆ ಬಂದಿದ್ದು, ಶೇಕಡ 12ರ ದರದಲ್ಲಿ ಇರಲಿದೆ.

ಕರ್ನಾಟಕದ ಮತ್ತಷ್ಟು ತಾಜಾ ಸುದ್ದಿ, ಕ್ರೈಮ್ ಸುದ್ದಿ, ಬೆಂಗಳೂರು ನಗರ ಸುದ್ದಿ, ರಾಜಕೀಯ ವಿಶ್ಲೇಷಣೆ ಓದಿ.