ದೆಹಲಿ ಚುನಾವಣೆ ಫಲಿತಾಂಶ; ನವದೆಹಲಿಯಲ್ಲಿ ಅರವಿಂದ್ ಕೇಜ್ರಿವಾಲ್ ಅವರನ್ನು ಸೋಲಿಸಿದ ಪರ್ವೇಶ್ ವರ್ಮಾ ಯಾರು, ಮುಂದಿನ ಸಿಎಂ ಆಗ್ತಾರಾ

New Delhi election results: ದೆಹಲಿ ವಿಧಾನ ಸಭಾ ಚುನಾವಣೆಯ ಫಲಿತಾಂಶ ಪ್ರಕಟವಾಗಿದ್ದು, ಆಡಳಿತಾರೂಢ ಎಎಪಿ ಸೋಲು ಕಂಡಿದೆ. 3 ಸಲ ಮುಖ್ಯಮಂತ್ರಿಯಾಗಿದ್ದ ಅರವಿಂದ್ ಕೇಜ್ರಿವಾಲ್ ಅವರನ್ನು ಬಿಜೆಪಿ ಅಭ್ಯರ್ಥಿ ಪರ್ವೇಶ್ ವರ್ಮಾ ಅವರು 4000ಕ್ಕೂ ಹೆಚ್ಚು ಮತಗಳ ಅಂತರದಲ್ಲಿ ಸೋಲಿಸಿದ್ದಾರೆ. ಇದರೊಂದಿಗೆ ಜೇಂಟ್ ಕಿಲ್ಲರ್ ಎನಿಸಿಕೊಂಡಿರುವ ಪರ್ವೇಶ್‌ ವರ್ಮಾ ಯಾರು, ಅವರು ದೆಹಲಿಯ ಮುಂದಿನ ಮುಖ್ಯಮಂತ್ರಿಯಾಗುತ್ತಾರಾ ಎಂಬ ಕುತೂಹಲ ಸದ್ಯ ಹೆಚ್ಚಾಗಿದೆ.

ಪರ್ವೇಶ್ ವರ್ಮಾ ಯಾರು, ಮುಂದಿನ ದೆಹಲಿ ಸಿಎಂ ಆಗ್ತಾರಾ

ನವದೆಹಲಿ ವಿಧಾನಸಭಾ ಕ್ಷೇತ್ರದಲ್ಲಿ ಬಿಜೆಪಿ ಅಭ್ಯರ್ಥಿಯಾಗಿ ಕಣಕ್ಕೆ ಇಳಿದಿದ್ದ ಪರ್ವೇಶ್ ವರ್ಮಾ, ಆಮ್ ಆದ್ಮಿ ಪಾರ್ಟಿ ನಾಯಕ, 3 ಸಲ ಮುಖ್ಯಮಂತ್ರಿಯಾಗಿದ್ದ ಅರವಿಂದ್ ಕೇಜ್ರಿವಾಲ್ ಅವರನ್ನು 4089 ಮತಗಳ ಅಂತರದಿಂದ ಸೋಲಿಸಿದ್ದಾರೆ. ಅವರ ಈ ದೊಡ್ಡ ಗೆಲುವಿನ ಕಾರಣ, ದೆಹಲಿಯ ಮುಖ್ಯಮಂತ್ರಿ ಸ್ಥಾನಕ್ಕೆ ಅವರ ಹೆಸರು ಪೈಪೋಟಿಗೆ ಬರುವಂತಾಗಿದೆ. ಈ ಹಿನ್ನೆಲೆಯಲ್ಲಿ ಪರ್ವೇಶ್ ವರ್ಮಾ ಅವರ ಕಿರು ಪರಿಚಯ ಇಲ್ಲಿದೆ.

ಪರ್ವೇಶ್ ವರ್ಮಾ ಅವರು ಕಳೆದ 10 ವರ್ಷಗಳಿಂದ ಪಶ್ಚಿಮ ದೆಹಲಿಯ ಸಂಸದರಾಗಿದ್ದರು. ದೆಹಲಿಯ ಮಾಜಿ ಮುಖ್ಯಮಂತ್ರಿ ಸಾಹಿಬ್ ಸಿಂಗ್ ವರ್ಮಾ ಅವರ ಪುತ್ರ. ದೆಹಲಿಯ ರಾಜಕಾರಣದಲ್ಲಿ ರಾಜಕೀಯವಾಗಿ ಅತ್ಯಂತ ಪ್ರಭಾವಿ ಮನೆತನದ ಹಿನ್ನೆಲೆ ಇರುವಂಥವರು. ಪರ್ವೇಶ್ ವರ್ಮಾ ಅವರ ಚಿಕ್ಕಪ್ಪ ಆಜಾದ್‌ ಸಿಂಗ್ ಉತ್ತರ ದೆಹಲಿ ಮಹಾನಗರ ಪಾಲಿಕೆಯ ಮೇಯರ್ ಆಗಿದ್ದವು. 2013ರ ವಿಧಾನ ಸಭಾ ಚುನಾವಣೆಯಲ್ಲಿ ಪರ್ವೇಶ್ ವರ್ಮಾ ಕಾಂಗ್ರೆಸ್ ಅಭ್ಯರ್ಥಿ ಯೋಗಾನಂದ ಶಾಸ್ತ್ರಿ (ಅಂದಿನ ವಿಧಾನ ಸಭಾ ಸ್ಪೀಕರ್‌) ಅವರನ್ನು ಸೋಲಿಸಿದ್ದರು. ಅದಾಗಿ 2014ರಲ್ಲಿ ಪಶ್ಚಿಮ ದೆಹಲಿ ಲೋಕಸಭಾ ಕ್ಷೇತ್ರದಿಂದ ಕಣಕ್ಕೆ ಇಳಿದು ಲೋಕಸಭೆ ಪ್ರವೇಶಿಸಿದ್ದರು. 2019ರಲ್ಲಿ ಇದೇ ಕ್ಷೇತ್ರದಿಂದ ಲೋಕಸಭೆಗೆ ಮರು ಆಯ್ಕೆಯಾದರು. ಹತ್ತು ವರ್ಷ ಸಂಸದರಾಗಿದ್ದ ಪರ್ವೇಶ್ ಶರ್ಮಾ ಅವರು ನಗರಾಭಿವೃದ್ಧಿ ಹಾಗೂ ಎಂಪಿಗಳ ವೇತನ ಮತ್ತು ಭತ್ಯೆಗೆ ಸಂಬಂಧಿಸಿದ ಸ್ಥಾಯೀ ಸಮಿತಿಯ ಸದಸ್ಯರಾಗಿದ್ದರು. 2025ರ ವಿಧಾನ ಸಭಾ ಚುನಾವಣೆಗೆ ತಯಾರಿ ನಡೆಸಿದ್ದ ಕಾರಣ 2024ರಲ್ಲಿ ಲೋಕಸಭೆಗೆ ಸ್ಪರ್ಧಿಸಿರಲಿಲ್ಲ.

ಅರವಿಂದ್ ಕೇಜ್ರಿವಾಲ್ ಅವರನ್ನು ಟೆರರಿಸ್ಟ್ ಎಂದಿದ್ದ ಪರ್ವೇಶ್‌

ತುಸು ಪ್ರಚೋದನಕಾರಿ ಮನೋಭಾವದ ಪರ್ವೇಶ್‌ ವರ್ಮಾ ಅವರು 2020ರ ಚುನಾವಣೆ ಪ್ರಚಾರದ ವೇಳೆ ಅರವಿಂದ್ ಕೇಜ್ರಿವಾಲ್ ಅವರನ್ನು ಟೆರರಿಸ್ಟ್ ಎಂದು ಕರೆದಿದ್ದರು. ಈ ದ್ವೇಷ ಭಾಷಣಕ್ಕಾಗಿ ಪರ್ವೇಶ್ ವರ್ಮಾ ಅವರನ್ನು ಚುನಾವಣಾ ಆಯೋಗ ಒಂದು ದಿನದ ಮಟ್ಟಿಗೆ ಪ್ರಚಾರ ಮಾಡದಂತೆ ನಿರ್ಬಂಧಿಸಿತ್ತು.

2019ರ ಲೋಕಸಭಾ ಚುನಾವಣೆಯಲ್ಲಿ ಪರ್ವೇಶ್ ವರ್ಮಾ ಅವರು ಕಾಂಗ್ರೆಸ್ ಅಭ್ಯರ್ಥಿ ಮಹಾಬಲ್ ಮಿಶ್ರಾ ಅವರನ್ನು 5,78,486 ಮತಗಳ ಅಂತರದಲ್ಲಿ ಸೋಲಿಸಿದ್ದರು. ಇದು ದೆಹಲಿಯಲ್ಲಿ ಅತಿದೊಡ್ಡ ಅಂತರದ ಗೆಲುವು. ಪರ್ವೇಶ್ ವರ್ಮಾ ಅವರ ಈ ಹಿಂದಿನ ದಾಖಲೆಯನ್ನೂ ಮುರಿದಿದ್ದರು.

1977ರ ನವೆಂಬರ್ 7 ರಂದು ಜನಿಸಿದ ಅವರು ಆರ್‌ಕೆ ಪುರಂನ ಡೆಲ್ಲಿ ಪಬ್ಲಿಕ್ ಸ್ಕೂಲ್‌ನಲ್ಲಿ ಶಾಲಾ ಶಿಕ್ಷಣ ಪಡೆದರು. ದೆಹಲಿ ವಿವಿಯ ಕಿರೋರಿ ಮಲ್ ಕಾಲೇಜ್‌ನಲ್ಲಿ ವ್ಯಾಸಂಗ ಮಾಡಿದರು. ಫೋರ್ ಸ್ಕೂಲ್ ಆಫ್ ಮ್ಯಾನೇಜ್‌ಮೆಂಟ್‌ನಲ್ಲಿ ಎಂಬಿಎ ಮಾಡಿದರು.

ಪರ್ವೇಶ್‌ ವರ್ಮಾ ಅವರು ಮಧ್ಯಪ್ರದೇಶದ ಬಿಜೆಪಿ ನಾಯಕ,ಕೇಂದ್ರದ ಮಾಜಿ ಸಚಿವ ವಿಕ್ರಮ್ ವರ್ಮಾ ಅವರ ಪುತ್ರಿ ಸ್ವಾತಿ ಸಿಂಗ್ ಅವರನ್ನು ವಿವಾಹವಾಗಿದ್ದಾರೆ. ದಂಪತಿಗೆ ಸನ್ನಿಧಿ ಸಿಂಗ್‌, ಪ್ರಿಶಾ ಸಿಂಗ್ ಎಂಬ ಇಬ್ಬರು ಪುತ್ರಿಯರು ಹಾಗೂ ಶಿವೆನ್ ಸಿಂಗ್ ಎಂಬ ಪುತ್ರ ಇದ್ದಾನೆ.