ಆಪರೇಷನ್ ಸಿಂದೂರ: ಸೇನೆಯ ವಿಶ್ವಾಸ ಮತ್ತೊಮ್ಮೆ ಸಾಬೀತುಪಡಿಸಿದ ಭಾರತೀಯ ಸೇನಾಪಡೆಗಳಿಗೆ ಸಲ್ಯೂಟ್- ರಾಜಾರಾಂ ತಲ್ಲೂರು ಬರಹ

ಭಾರತೀಯ ಸೇನಾಪಡೆಯ ಆಪರೇಷನ್ ಸಿಂದೂರ ಕಾರ್ಯಾಚರಣೆಯ ಬಗ್ಗೆ ರಾಜರಾಮ್‌ ತಲ್ಲೂರು ಅವರು ಸೋಷಿಯಲ್‌ ಮೀಡಿಯಾದಲ್ಲಿ ಬರೆದ ಬರಹ ಗಮನ ಸೆಳೆಯುತ್ತದೆ. ತನ್ನ ಕಾರ್ಯಾಚರಣೆಯನ್ನು ಇಷ್ಟೊಂದು ಸ್ಪಷ್ಟತೆಯಿಂದ, ಫಲಿತಾಂಶ ಸಹಿತ ಪ್ರಸ್ತುತಪಡಿಸಿದ ಮತ್ತು ಸೇನೆಯ ಕುರಿತು ದೇಶದ ಜನರ ವಿಶ್ವಾಸವನ್ನು ಮತ್ತೊಮ್ಮೆ ಸಾಬೀತುಪಡಿಸಿದ ಭಾರತೀಯ ಸೇನಾಪಡೆಗಳಿಗೆ “ಸಲ್ಯೂಟ್!” ಎಂದು ಅವರು ಹೇಳಿದ್ದಾರೆ.

ರಾಜಾರಾಂ ತಲ್ಲೂರು ಬರಹ

ಈ ಡಿಟೇಲಿಂಗ್ – ಇಷ್ಟವಾಯಿತು... ಭಾರತೀಯ ಸೇನೆ ತನ್ನ ಪಾಡಿಗೆ ತನ್ನ ಕೆಲಸವನ್ನು ಬಹಳ ತಂತ್ರಗಾರಿಕೆಯೊಂದಿಗೆ, ನಿಖರವಾಗಿ, ಫಲಿತಾಂಶ ಸಹಿತ ಮಾಡಿ ಮುಗಿಸಿದೆ. ಮಾತ್ರವಲ್ಲ, ತನ್ನ ಈ ಕಾರ್ಯಾಚರಣೆಯ ಬಗ್ಗೆ ದೇಶದ ಜನರನ್ನು ವಿಶ್ವಾಸಕ್ಕೆ ತೆಗೆದುಕೊಳ್ಳುವಲ್ಲಿ, ದೇಶದಿಂದ ಹೊರಗೆ ಜಗತ್ತಿಗೆ ಕಳುಹಿಸಬೇಕಾಗಿರುವ ಸಂದೇಶವನ್ನು ಗೊಂದಲಕ್ಕೆಡೆಯಿಲ್ಲದಂತೆ ಕಳುಹಿಸುವಲ್ಲಿ ವಹಿಸಿದ ಎಚ್ಚರ ಕೂಡ ಶ್ಲಾಘನಾರ್ಹ.

ಇಂತಹ ಸೇನಾ ಕಾರ್ಯಾಚರಣೆಯ ಸುದ್ದಿಗಳನ್ನು ಸಾಂಪ್ರದಾಯಿಕವಾಗಿ ನೀಡುವುದು ಭಾರತ ಸರ್ಕಾರದ ರಕ್ಷಣಾ ಇಲಾಖೆ (MoD) ಮತ್ತು ಸೇನೆಯ ವಕ್ತಾರರು. ನಿನ್ನೆ ತಡರಾತ್ರಿಯ ಕಾರ್ಯಾಚರಣೆಯ ಬಳಿಕ, ಇಂದು ಬೆಳಗ್ಗೆ ಪ್ರೆಸ್ ಬ್ರೀಫಿಂಗ್ ಇದೆ ಎಂದು ಪ್ರಕಟಿಸಿದ್ದು, ಎಂದಿನಂತೆ MoD. ಆದರೆ, ಬ್ರೀಫಿಂಗ್ ವೇಳೆ ಅಚ್ಚರಿ ಕಾದಿತ್ತು.

ಮಾಧ್ಯಮ ಬ್ರೀಫಿಂಗ್ ಹೊಣೆ ಹೊತ್ತದ್ದು MoD ಅಧಿಕಾರಿಗಳಲ್ಲ, ಬದಲಾಗಿ ದೇಶದ ವಿದೇಶಾಂಗ ಕಾರ್ಯದರ್ಶಿ ವಿಕ್ರಮ್ ಮಿಸ್ರಿ. ಅವರು ಈ ಹಿಂದೆ ಚೀನಾಕ್ಕೆ ಭಾರತದ ರಾಯಭಾರಿ ಆಗಿದ್ದವರು. ಇದು ಬಲುದೊಡ್ಡ ಸಂದೇಶ. ಏಕೆಂದರೆ, ನಡೆದಿರುವುದು ಯುದ್ಧ ಅಲ್ಲ, ಬದಲಾಗಿ ದೇಶದ ಭದ್ರತೆಯನ್ನು ಭೇದಿಸಿ, ದೇಶಕ್ಕೆ ಹಾನಿ ಮಾಡಿದ ಭಯೋತ್ಪಾದಕರ ಮೂಲಸ್ಥಾನಗಳ ಮೇಲೆ, ಅವರನ್ನು ಶಿಕ್ಷಿಸುವುದಕ್ಕಾಗಿ ನಡೆದ ಪ್ರತಿ ದಾಳಿ. ಶತ್ರು ದೇಶದ ಸಿವಿಲಿಯನ್, ಮಿಲಿಟರಿ ನೆಲೆಗಳು ಈ ದಾಳಿಯ ಗುರಿ ಅಲ್ಲ. ಹಾಗಾಗಿ, ಇಲ್ಲಿ ಯುದ್ಧದ ಪ್ರಶ್ನೆ ಏಳುವುದಿಲ್ಲ. ಈ ಕಾರಣಕ್ಕಾಗಿ, ಜಗತ್ತಿಗೆ ಈ ಸಂದೇಶ ಸಾರಲು ವಿದೇಶಾಂಗ ಕಾರ್ಯದರ್ಶಿಗಳು ಸಮರ್ಪಕವಾದ ಆಯ್ಕೆ.

ನಡೆದಿರುವ ಕಾರ್ಯಾಚರಣೆಗಳನ್ನು ವಿವರಿಸಿದ್ದು, ಕರ್ನಲ್ ಸೋಫಿಯಾ ಖುರೇಷಿ ಮತ್ತು ವಿಂಗ್ ಕಮಾಂಡರ್ ವ್ಯೋಮಿಕಾ ಸಿಂಗ್ ಎಂಬ ಇಬ್ಬರು ಮಹಿಳಾ ಸೇನಾಧಿಕಾರಿಗಳು. ಸಾಮಾನ್ಯವಾಗಿ ಭೂಸೇನೆಯ ಹಿರಿಯ ಅಧಿಕಾರಿಯೊಬ್ಬರು ಇಂತಹವನ್ನು ನಿಭಾಯಿಸುವುದು ವಾಡಿಕೆ. ಆದರೆ, 2020ರಲ್ಲಿ ಸೇನೆಯ ಮೂರೂ ವಿಭಾಗಗಳನ್ನು ಏಕತ್ರಗೊಳಿಸಿ, “ಚೀಫ್ ಆಫ್ ಡಿಫೆನ್ಸ್ ಸ್ಟಾಫ್” ಎಂಬ ಮೂರೂ ಪಡೆಗಳ ಮುಖ್ಯಸ್ಥರ ಹುದ್ದೆ (ಈಗ ಈ ಹುದ್ದೆಯಲ್ಲಿರುವವರು ಜ| ಅನಿಲ್ ಚೌಹಾಣ್) ನೇಮಕ ಆದ ಬಳಿಕ, ಸೇನಾಪಡೆಗಳ ನಡುವಿನ “ಥಿಯೇಟರೈಸೇಷನ್” ಸಮನ್ವಯ ಮುಪ್ಪುರಿಗೊಳ್ಳತೊಡಗಿದೆ. ಈ ಪ್ರಕ್ರಿಯೆಯ ಫಲಿತಾಂಶವಾಗಿ ಕಾರ್ಪ್ಸ್ ಆಫ್ ಸಿಗ್ನಲ್ಸ್‌ (ಮಿಲಿಟರಿ ಸಂವಹನ) ಪಡೆಯ ಕರ್ನಲ್ ದರ್ಜೆಯ ಅಧಿಕಾರಿ ಮತ್ತು ವಾಯಪಡೆಯ ಹೆಲಿಕಾಪ್ಟರ್ ಪೈಲಟ್ ಆಗಿರುವ ವಿಂಗ್ ಕಮಾಂಡರ್ ಇಬ್ಬರೂ ಒಂದೇ ಸ್ವರದಲ್ಲಿ ತಮ್ಮ ಸೇನಾಪಡೆಗಳ ಕಾರ್ಯಾಚರಣೆಯನ್ನು ಜಗತ್ತಿಗೆ ವಿವರಿಸುವುದು ಸಾಧ್ಯವಾಯಿತು.

ವಿವರಣೆ ನೀಡಿದ ಬಳಿಕ, ವಿದೇಶಾಂಗ ಕಾರ್ಯದರ್ಶಿಗಳು, ಪತ್ರಕರ್ತರ ಪ್ರಶ್ನೆಗಳಿಗೂ ಅವಕಾಶ ನೀಡದೇ, ಈಗಿನ್ನೂ ಪರಿಸ್ಥಿತಿ “ಬೆಳವಣಿಗೆಯ ಹಂತದಲ್ಲಿದೆ” ಎಂದು ಹೇಳಿ ಗೋಷ್ಠಿಯನ್ನು ಮುಗಿಸಿದ್ದು ಕೂಡ – ಇದೆಲ್ಲವೂ ಸುಯೋಜಿತ ಎಂಬುದನ್ನು ಖಚಿತಪಡಿಸುತ್ತದೆ. ತನ್ನ ಕಾರ್ಯಾಚರಣೆಯನ್ನು ಇಷ್ಟೊಂದು ಸ್ಪಷ್ಟತೆಯಿಂದ, ಫಲಿತಾಂಶ ಸಹಿತ ಪ್ರಸ್ತುತಪಡಿಸಿದ ಮತ್ತು ಸೇನೆಯ ಕುರಿತು ದೇಶದ ಜನರ ವಿಶ್ವಾಸವನ್ನು ಮತ್ತೊಮ್ಮೆ ಸಾಬೀತುಪಡಿಸಿದ ಭಾರತೀಯ ಸೇನಾಪಡೆಗಳಿಗೆ “ಸಲ್ಯೂಟ್!”

• ಬರಹ: ರಾಜಾರಾಂ ತಲ್ಲೂರು

ಇದನ್ನೂ ಓದಿ: ವಿದೇಶಿ ಮಾಧ್ಯಮಗಳಿಗೆ ಆಪರೇಷನ್‌ ಸಿಂಧೂರ ಹೇಗೆ ಕಾಣಿಸ್ತು? ಭಾರತ-ಪಾಕಿಸ್ತಾನದ ನಡುವೆ ಯುದ್ಧದ ಕಾರ್ಮೋಡ, ಪಹಲ್ಗಾಮ್‌ಗೆ ಪ್ರತೀಕಾರ

ಹ್ಯಾಪಿ ದೀಪಾವಳಿ ಪಾಕಿಸ್ತಾನ, ಇಂಡಿಯನ್ ಆರ್ಮಿ ಜೈ ಹಿಂದ್‌; ಆಪರೇಷನ್‌ ಸಿಂಧೂರ್‌ಗೆ ಸಾಮಾಜಿಕ ಜಾಲತಾಣದಲ್ಲಿ ಭಾರತೀಯರ ಹರ್ಷ