Republic Day 2023: ಕರ್ತವ್ಯಪಥದಲ್ಲಿ ಕುಳಿತು ಗಣತಂತ್ರ ದಿನದ ಪರೇಡ್‌ ನೋಡುವಾಸೆಯೇ?; ಆನ್‌ಲೈನಲ್ಲಿ ಟಿಕೆಟ್‌ ಬುಕ್‌ ಮಾಡಿ! ಇಲ್ಲಿದೆ ವಿವರ

ಆನ್‌ಲೈನ್‌ ಇನ್ವಿಟೇಶನ್‌ ಮ್ಯಾನೇಜ್‌ಮೆಂಟ್‌ ಪೋರ್ಟಲ್‌ (www.aamantran.mod.gov.in) ಅನ್ನು ಕೇಂದ್ರ ಸರ್ಕಾರ ಶುಕ್ರವಾರ ಲೋಕಾಪರ್ಣೆ ಮಾಡಿದೆ. ಗಣರಾಜ್ಯ ದಿನ ಮತ್ತು ಸ್ವಾತಂತ್ರ್ಯ ದಿನದ ಕಾರ್ಯಕ್ರಮಗಳನ್ನು ವೀಕ್ಷಿಸುವುದಕ್ಕೆ ಸಾರ್ವಜನಿಕರಿಗೆ ಈ ಪೋರ್ಟಲ್‌ ಇಂದಿನಿಂದ ನೆರವಾಗುತ್ತದೆ.

ರಕ್ಷಣಾ ಖಾತೆ ರಾಜ್ಯ ಸಚಿವ ಅಜಯ್‌ ಭಟ್‌ ಈ ಪೋರ್ಟಲ್‌ ಅನ್ನು ಇಂದು ನವದೆಹಲಿಯಲ್ಲಿ ಲೋಕಾರ್ಪಣೆ ಮಾಡಿದರು. ಇದು ಸರ್ಕಾರದ ಇ-ಗವರ್ನೆನ್ಸ್‌ ಉಪಕ್ರಮವಾಗಿದೆ.

ಕಾರ್ಯಕ್ರಮಕ್ಕೆ ಆಹ್ವಾನಿತ ಗಣ್ಯರು ಮತ್ತು ಅತಿಥಿಗಳು ತಮ್ಮ ಇ-ಆಹ್ವಾನ ಪತ್ರಿಕೆಯನ್ನು ಈ ಪೋರ್ಟಲ್‌ನಿಂದ ಡೌನ್‌ಲೋಡ್‌ ಮಾಡಿಕೊಳ್ಳಬಹುದು. ಕರ್ತವ್ಯ ಪಥದಲ್ಲಿ ಕುಳಿತು ಪರೇಡ್‌ ಮತ್ತು ಕಾರ್ಯಕ್ರಮ ವೀಕ್ಷಿಸಲು ಬಯಸುವ ಸಾರ್ವಜನಿಕರು ಕೂಡ ಆನ್‌ಲೈನ್‌ ಮೂಲಕ ಟಿಕೆಟ್‌ ಖರೀದಿಸಲು ಈ ಪೋರ್ಟಲ್‌ ನೆರವಾಗುತ್ತದೆ. ಯಾವುದೇ ಭೌಗೋಳಿಕ ಮಿತಿ ಇಲ್ಲದೆ ಸಾರ್ವಜನಿಕರು ಈ ಪೋರ್ಟಲನ್ನು ಬಳಸಬಹುದು. ಗಣತಂತ್ರ ಪರೇಡ್‌, ಸ್ವಾತಂತ್ರ್ಯ ದಿನದ ಕಾರ್ಯಕ್ರಮ ವೀಕ್ಷಣೆಗೆ ಟಿಕೆಟ್‌ ಖರೀದಿಸಬಹುದು. ಒಬ್ಬರು 10 ಟಿಕೆಟ್‌ ತನಕ ಖರೀದಿಸಬಹುದು.

ಟಿಕೆಟ್‌ ಖರೀದಿ, ಪಾಸ್‌ ಪಡೆಯುವ ಪ್ರಕ್ರಿಯೆಯನ್ನು ಈ ಪೋರ್ಟಲ್‌ ಬಹಳ ಸರಳಗೊಳಿಸಿದೆ. ಬಳಕೆದಾರ ಸ್ನೇಹಿ ಪ್ರಕ್ರಿಯೆಯನ್ನಾಗಿಸಿದೆಯಲ್ಲದೆ, ಸರ್ಕಾರ ಮತ್ತು ಜನರ ನಡುವಿನ ಅಂತರವನ್ನು ಕಡಿಮೆ ಮಾಡಿದೆ.

ಆಮಂತ್ರಣ ಪೋರ್ಟಲ್‌ನಲ್ಲಿರುವ ಫೀಚರ್ಸ್‌ ಏನೇನು?

ಆಮಂತ್ರಣ ಪೋರ್ಟಲ್‌ನಲ್ಲಿ ಈ ಕೆಳಗಿನ ಫೀಚರ್ಸ್‌ ಇವೆ.

• ಕ್ಯೂಆರ್‌ ಕೋಡ್‌ ಆಧಾರಿತ ದೃಢೀಕರಣ ವ್ಯವಸ್ಥೆ. ಇದು ಸುಧಾರಿತ ಸುರಕ್ಷತೆಯನ್ನು ಖಾತರಿಗೊಳಿಸುತ್ತದೆ.
• ಪಾಸ್‌/ ಟಿಕೆಟ್‌ಗಳನ್ನು ಇಮೇಲ್‌/ ಎಸ್‌ಎಂಎಸ್‌ ಮೂಲಕ ಡಿಜಿಟಲ್‌ ಆಗಿ ರವಾನಿಸುತ್ತದೆ.
• ಟಿಕೆಟ್‌ ಅನ್ನು ಕ್ಯಾನ್ಸಲ್‌ ಅಥವಾ ವರ್ಗಾವಣೆ ಮಾಡುವುದು ಸಾಧ್ಯವಿಲ್ಲ.
• ಆಹ್ವಾನಿತರಿಂದ ಪಾಸ್‌ ಸ್ವೀಕೃತಿ ದೃಢೀಕರಿಸುವ ಆರ್‌ಎಸ್‌ವಿಪಿ ಆಯ್ಕೆಯೂ ಇದೆ.
• ಭವಿಷ್ಯದ ಕಾರ್ಯಕ್ರಮಗಳ ಉತ್ತಮ ನಿರ್ವಹಣೆಗಾಗಿ ಪೋಸ್ಟ್‌ ಇವೆಂಟ್‌ ಡೇಟಾ ಸಿಗಲಿದೆ.
• ಇ- ಆಹ್ವಾನ ಪತ್ರಗಳನ್ನು ಈ ಪೋರ್ಟಲ್‌ ಮೂಲಕ ಒದಗಿಸುವುದಲ್ಲದೆ, ಗೃಹ ಸಚಿವಾಲಯವು ಸೇನಾ ಭವನ (ಗೇಟ್‌ ನಂ.2), ಶಾಸ್ತ್ರಿ ಭವನ (ಗೇಟ್‌ ನಂ.3), ಜಂತರ್‌ ಮಂತರ್‌ (ಮುಖ್ಯದ್ವಾರದ ಬಳಿ), ಪ್ರಗತಿ ಮೈದಾನ (ಗೇಟ್‌ ನಂ.1)ಗಳಲ್ಲಿ ಟಿಕೆಟ್‌ ಖರೀದಿಗೆ ಬೂತ್‌/ಕೌಂಟರ್‌ಗಳನ್ನು ಸ್ಥಾಪಿಸಲಿದೆ.

ಇದಲ್ಲದೆ, ಸಂಸದರಿಗಾಗಿ ಪಾರ್ಲಿಮೆಂಟ್‌ ಹೌಸ್‌ (ರಿಸೆಪ್ಶನ್‌ ಆಫೀಸ್‌) ನಲ್ಲಿ ವಿಶೇಷ ಕೌಂಟರ್‌ ತೆರೆಯಲಿದೆ. ಈ ಕೌಂಟರ್‌ ಜನವರಿ 18ರಂದು ತೆರೆಯಲಿದೆ. ಇದು ಪೂರ್ವಾಹ್ನ 10ರಿಂದ ಮಧ್ಯಾಹ್ನ 12.30ರ ತನಕ, ಅಪರಾಹ್ನ 2 ಗಂಟೆಯಿಂದ ಸಂಜೆ 4.30ರ ತನಕ ತೆರೆದಿರಲಿದೆ. ಹೆಚ್ಚಿನ ಮಾಹಿತಿಗೆ www.mod.gov.in, www.indianrdc.mod.gov.in ಗಳನ್ನು ಗಮನಿಸಬಹುದು.

ಆನ್‌ಲೈನ್‌ನಲ್ಲಿ ಟಿಕೆಟ್‌ ಬುಕ್‌ ಮಾಡುವುದು ಹೇಗೆ?

ಹಂತ 1 - ಆಮಂತ್ರಣ ವೆಬ್‌ಸೈಟ್‌ (https://aamantran.mod.gov.in/login) ಓಪನ್‌ ಮಾಡುವುದು.

ಹಂತ 2 - “Don't have an Account? Sign Up for Buying tickets” ಎಂದು ಬರೆದಿರುವಲ್ಲಿ ಸೈನ್‌ ಅಪ್‌ ಫಾರ್‌ ಬೈಯಿಂಗ್‌ ಟಿಕೆಟ್‌ ಕ್ಲಿಕ್‌ ಮಾಡಿ.

ಹಂತ 3 - ಹೊಸ ಪುಟ ತೆರೆದುಕೊಳ್ಳುತ್ತದೆ. ಅಲ್ಲಿ ನಿಮ್ಮ ಹೆಸರು, ಜನ್ಮ ದಿನಾಂಕ, ವಿಳಾಸ ಮತ್ತು ಇತರೆ ಅಗತ್ಯ ದಾಖಲೆಗಳನ್ನು ಭರ್ತಿ ಮಾಡಿ ಖಾತೆ ತೆರೆಯಬೇಕು. ಅದಾದ ಬಳಿಕ ಮತ್ತೆ ಮೇನ್‌ಪೇಜ್‌ಗೆ ಬರಬೇಕು.

ಹಂತ 4 - ಇಲ್ಲಿ ನಿಮ್ಮ ಮೊಬೈಲ್‌ ನಂಬರ್‌ ನಮೂದಿಸಿ, ಕ್ಯಾಪ್ಚಾ ನಮೂದಿಸಿ ರಿಕ್ವೆಸ್ಟ್‌ ಒಟಿಪಿ ಕ್ಲಿಕ್‌ ಮಾಡಿ.

ಹಂತ 5 - ಒಟಿಪಿ ನಮೂದಿಸಿ ಉಳಿದ ಪ್ರಕ್ರಿಯೆಗಳನ್ನು ಪೂರೈಸಿ.

ರಕ್ಷಣಾ ಇಲಾಖೆಯ ವಕ್ತಾರರ ಈ ಕೆಳಗಿನ ಟ್ವೀಟ್‌ನಲ್ಲಿರುವ ವಿಡಿಯೋವನ್ನು ವೀಕ್ಷಿಸಬಹುದು. ಆ ಮೂಲಕವೂ ಪ್ರಕ್ರಿಯೆಯನ್ನು ಅರ್ಥಮಾಡಿಕೊಳ್ಳಬಹುದು.