ತಿರುಪತಿಯಲ್ಲಿ ವೈಕುಂಠ ದ್ವಾರ ದರ್ಶನ ಆರಂಭ, ತಿರುಮಲ ಬೆಟ್ಟದಲ್ಲಿ ಮೊಳಗಿದೆ ಗೋವಿಂದ ನಾಮಸ್ಮರಣೆ, ಹೀಗಿದೆ ವೈಕುಂಠ ಏಕಾದಶಿ ಸಂಭ್ರಮ
Vaikuntha Ekadashi: ತಿರುಪತಿಯಲ್ಲಿ ವೈಕುಂಠ ಏಕಾದಶಿ ಸಂಭ್ರಮ ಕಳೆಗಟ್ಟಿದೆ. ಗೋವಿಂದ ನಾಮಸ್ಮರಣೆಯು ತಿರುಮಲದ ಬೆಟ್ಟಗಳಲ್ಲಿ ಪ್ರತಿಧ್ವನಿಸುತ್ತಿದೆ. ವೈಕುಂಠ ದ್ವಾರ ದರ್ಶನ ಪಡೆಯಲು ಸಾವಿರಾರು ಭಕ್ತರು ಆಗಮಿಸಿದ್ದಾರೆ. ಕಳೆದ ಮೂರು ದಿನಗಳಿಂದಲೂ ತಿರುಪತಿ ತಿರುಮಲಕ್ಕೆ ವೈಕುಂಠ ದ್ವಾರ ದರ್ಶನ ಪಡೆಯಲು ಬರುತ್ತಿರುವ ಭಕ್ತರು ಸರತಿ ಸಾಲಿನಲ್ಲಿ ಕಾಯುತ್ತಿದ್ದರು.
Vaikuntha Ekadashi: ತಿರುಪತಿ ಕಾಲ್ತುಳಿತ ಪ್ರಕರಣದ ನಡುವೆ ತಿರುಮಲದಲ್ಲಿ ವೈಕುಂಠ ಏಕಾದಶಿಯ ಸಂಭ್ರಮ ಶುರುವಾಗಿದೆ. ವೈಕುಂಠ ಏಕಾದಶಿ ದಿನವಾದ ಇಂದು (ಜನವರಿ 10) ಸಹಸ್ರಾರು ಭಕ್ತರು ವೈಕುಂಠ ದ್ವಾರದ ದರ್ಶನ ಪಡೆಯಲಾರಂಭಿಸಿದ್ದಾರೆ. ಮಧ್ಯರಾತ್ರಿಯಿಂದಲೇ ಶ್ರೀವಾರಿ ದೇವಸ್ಥಾನದಲ್ಲಿ ವೈಕುಂಠದ ದ್ವಾರಗಳನ್ನು ತೆರೆಯಲಾಯಿತು. ಮಧ್ಯರಾತ್ರಿ 12.05ಕ್ಕೆ ವೇದ ವಿದ್ವಾಂಸರ ಮಂತ್ರ ಪಠಣದ ನಡುವೆ ತಿರುಪ್ಪಾವೈ ಪಾಸುರಗಳೊಂದಿಗೆ ದೇವಾಲಯದ ಚಿನ್ನದ ದ್ವಾರಗಳನ್ನು ತೆರೆಯಲಾಯಿತು. ಮಧ್ಯರಾತ್ರಿ 12.25ಕ್ಕೆ ತಿರುಮಲ ವೈಕುಂಠ ದ್ವಾರದಲ್ಲಿ ಅರ್ಚಕರು ಪೂಜೆ ಮತ್ತು ಆರತಿಗಳನ್ನು ನೆರವೇರಿಸಿದರು. ನಂತರ, ಅವರು ತೋಮಲ ನಕ್ಷೆಯನ್ನು ಪ್ರದಕ್ಷಿಣೆ ಹಾಕುವ ಮೂಲಕ ಗರ್ಭಗುಡಿಯನ್ನು ತಲುಪಿದರು. ಶ್ರೀವಾರಿ ಮೂಲವಿರಟ್ಟು ದೇವಾಲಯಕ್ಕೆ ಪುಷ್ಪಾರ್ಚನೆ ಮಾಡಲಾಯಿತು.
ನಂತರ ವಿಶೇಷ ಧನುರ್ಮಾಸ ಕೈಂಕರ್ಯ ಮತ್ತು ನಿತ್ಯ ಕೈಂಕರ್ಯವನ್ನು ಅರ್ಪಿಸಲಾಯಿತು. ಶುಕ್ರವಾರ (ಜನವರಿ 10) ನಸುಕಿನಲ್ಲಿ ಅಭಿಷೇಕ, ಅಲಂಕಾರ, ತೋಮಲ ಅರ್ಚನೆ ಮತ್ತು ನೈವೇದ್ಯ ನೆರವೇರಿಸಲಾಯಿತು ಮತ್ತು ಮುಂಜಾನೆ 4.30ಕ್ಕೆ ವಿಐಪಿ ಬ್ರೇಕ್ ದರ್ಶನ ಪ್ರಾರಂಭವಾಯಿತು. ವೈಕುಂಠ ಏಕಾದಶಿಯ ಹಿಂದಿನ ದಿನದಿಂದಲೇ ತಿರುಮಲದಲ್ಲಿ ವಿಐಪಿಗಳ ದಟ್ಟಣೆ ಇರುತ್ತದೆ. ತಿರುಪತಿಯಲ್ಲಿ ಸರ್ವದರ್ಶನ ಟೋಕನ್ಗಳನ್ನು ನೀಡುವ ಸರತಿ ಸಾಲಿನಲ್ಲಿ ಸಂಭವಿಸಿದ ಕಾಲ್ತುಳಿತದಲ್ಲಿ ಆರು ಭಕ್ತರು ಸಾವನ್ನಪ್ಪಿದ ನಂತರ, ವಿಐಪಿಗಳ ದಟ್ಟಣೆ ಸ್ವಲ್ಪ ಕಡಿಮೆಯಾದಂತೆ ತೋರುತ್ತಿತ್ತು.
ಗುರುವಾರ ಸಂಜೆ 7 ಗಂಟೆಯವರೆಗೂ ತಿರುಮಲ ಎಂದಿನಂತೆ ಜನದಟ್ಟಣೆಯಿಂದ ಕೂಡಿತ್ತು. ಟೋಕನ್ ಮತ್ತು ಟಿಕೆಟ್ ಪಡೆದ ಭಕ್ತರು ಸಹ ಅಪಾರ ಸಂಖ್ಯೆಯಲ್ಲಿ ತಿರುಮಲ ತಲುಪಿದರು. ಹಿಂದೆಂದಿಗಿಂತಲೂ 48 ಗಂಟೆಗಳ ಮುಂಚಿತವಾಗಿ ತಿರುಮಲ ತಲುಪಬೇಕಾಗಿದ್ದರಿಂದ ಭಕ್ತರು ಸುಸ್ತಾಗಿದ್ದರು.
ಜನವರಿ 10 ಶುಕ್ರವಾರದಿಂದ ಪ್ರಾರಂಭವಾಗುವ ವೈಕುಂಠ ದ್ವಾರ ದರ್ಶನ ಜನವರಿ 19ರ ಮಧ್ಯರಾತ್ರಿಯವರೆಗೆ ಮುಂದುವರಿಯಲಿದೆ. ಗುರುವಾರ ಬೆಳಗಿನ ಜಾವದವರೆಗೂ ತಿರುಮಲದಲ್ಲಿ ಸ್ಥಳೀಯರಿಗೆ ದರ್ಶನ ಟೋಕನ್ಗಳನ್ನು ನೀಡಲಾಯಿತು. ಗುರುವಾರ ಮುಂಜಾನೆ 4.50 ರಿಂದ ಸಂಜೆಯವರೆಗೆ 1,700 ಟೋಕನ್ಗಳನ್ನು ನೀಡಲಾಗಿದೆ. ತಿರುಪತಿಯಲ್ಲಿ ಸಂಭವಿಸಿದ ಕಾಲ್ತುಳಿತವನ್ನು ಗಮನದಲ್ಲಿಟ್ಟುಕೊಂಡು, ತಿರುಮಲದಲ್ಲಿರುವ ಟೋಕನ್ ವಿತರಣಾ ಕೌಂಟರ್ ಬಳಿ ಸ್ಥಳೀಯರಲ್ಲದ ಯಾವುದೇ ವ್ಯಕ್ತಿಗಳು ಬರದಂತೆ ಪೊಲೀಸರು ಎಚ್ಚರಿಕೆ ವಹಿಸಿದರು. ವೈಕುಂಠ ಏಕಾದಶಿಯ ನಿಮಿತ್ತವಾಗಿ ತಿರುಮಲ ವಿದ್ಯುತ್ ದೀಪಾಲಂಕಾರ ಮತ್ತು ಪುಷ್ಪಾಲಂಕಾರಗಳಿಂದ ಕಂಗೊಳಿಸುತ್ತಿದೆ.
ತಿರುಪತಿಯಲ್ಲಿ ಕಾಲ್ತುಳಿತ
ವೈಕುಂಠ ಏಕಾದಶಿ ಹಿನ್ನೆಲೆ ತಿರುಪತಿ ತಿರುಮಲ ದೇವಸ್ಥಾನದ ವೈಕುಂಠ ದ್ವಾರ ದರ್ಶನಕ್ಕಾಗಿ ಸಾಹಸ್ರಾರು ಭಕ್ತರು ಕಳೆದ 3 ದಿನಗಳಿಂದ ತಿರುಪತಿಯಲ್ಲಿ ಬೀಡು ಬಿಟ್ಟಿದ್ದರು. ಸರ್ವದರ್ಶನ ಟೋಕನ್ಗಾಗಿ ಸರತಿ ಸಾಲಿನಲ್ಲಿ ಕಾಯುತ್ತಿದ್ದರು. ಈ ನಡುವೆ ಜನವರಿ 8ರ ರಾತ್ರಿ ಟೋಕನ್ ಸಾಲಿನಲ್ಲಿ ನಿಂತಿದ್ದ ಮಹಿಳೆಯನ್ನು ರಕ್ಷಿಸುವುದಕ್ಕಾಗಿ ಪೊಲೀಸರು ಗೇಟ್ ತೆರೆದಾಗ ನೂಕು ನುಗ್ಗಲು ಉಂಟಾಗಿದೆ. ಈ ಸಂದರ್ಭದ ಕಾಲ್ತುಳಿತದಿಂದಾಗಿ 6 ಜನರು ಸಾವನ್ನಪ್ಪಿದ್ದು, 40ಕ್ಕೂ ಹೆಚ್ಚು ಮಂದಿ ಅಸ್ವಸ್ಥರಾಗಿದ್ದರು, ತಿರುಪತಿ ಇತಿಹಾಸದಲ್ಲೇ ನಡೆದ ಅತ್ಯಂತ ಕೆಟ್ಟ ಘಟನೆ ಇದಾಗಿದೆ. ಈಗ ಪರಿಸ್ಥಿತಿ ಸಹಜ ಸ್ಥಿತಿಗೆ ಬಂದಿದ್ದು, ಶ್ರೀವಾರಿ ಹಾಗೂ ವೈಕುಂಠ ದ್ವಾರ ದರ್ಶನಕ್ಕೆ ಜನರು ಸರತಿ ಸಾಲಿನಲ್ಲಿ ನಿಂತಿದ್ದಾರೆ.
