ಭಾರತದ ಒಲಿಂಪಿಕ್ಸ್ ಸ್ಪರ್ಧಿಗಳಲ್ಲಿ ಶಾಸಕಿಯೂ ಒಬ್ಬರು; ಚಿನ್ನಕ್ಕೆ ‘ಶೂಟ್’ ಮಾಡಲು ಬಿಹಾರದ ಎಂಎಲ್​ಎ ಸಜ್ಜು

ಫ್ರಾನ್ಸ್​​ ರಾಜಧಾನಿ ಪ್ಯಾರಿಸ್​​​ನಲ್ಲಿ 33ನೇ ಆವೃತ್ತಿಯ ಒಲಿಂಪಿಕ್ಸ್​​​ ಜುಲೈ 26ರಿಂದ ಅಧಿಕೃತವಾಗಿ ಆರಂಭವಾಗಲಿದೆ. 117 ಕ್ರೀಡಾಪಟುಗಳ ಭಾರತ ತಂಡ ಪದಕ ಬೇಟೆಗೆ ಸಜ್ಜಾಗಿದೆ. ಹಿರಿಯರು-ಕಿರಿಯರಿಂದ ಕೂಡಿದ ತಂಡವು ಈ ಬಾರಿ ಎರಡಂಕಿ ಪದಕಗಳ ಗೆಲುವಿಗೆ ಸಜ್ಜಾಗಿದೆ.

ಆದರೆ ಭಾರತದ ಒಲಿಂಪಿಕ್ಸ್ ಸ್ಪರ್ಧಿಗಳ ಪೈಕಿ ಶಾಸಕಿಯೊಬ್ಬರು ಅವಕಾಶ ಪಡೆದಿರುವುದು ವಿಶೇಷ. ಹೆಸರು ಶ್ರೇಯಸಿ ಸಿಂಗ್. ಬಿಹಾರದ ಜಮಯಿ ಕ್ಷೇತ್ರದಿಂದ ಬಿಜೆಪಿ ಪರ ಸ್ಪರ್ಧಿಸಿ 41 ಮತಗಳಿಂದ ಗೆದ್ದಿದ್ದಾರೆ. 2020ರ ಚುನಾವಣೆಯಲ್ಲಿ ಗೆಲುವು ಸಾಧಿಸಿದ್ದರು.

ಮಹಿಳೆಯರ ಟ್ರ್ಯಾಪ್ ವಿಭಾಗದಲ್ಲಿ (ಶೂಟಿಂಗ್​) ಸ್ಫರ್ಧೆ ಮಾಡಲಿರುವ 32 ವರ್ಷದ ಶ್ರೇಯಸಿ ಅವರ ತಂದೆಯೂ ರಾಜಕಾರಣಿ. ತಂದೆ ದಿಗ್ವಿಜಯ್ ಸಿಂಗ್ ಸಹ ಹಲವು ಸಂಸದರಾಗಿದ್ದರು. ತಾಯಿ ಫತುಲ್ ಕುಮಾರಿ ಸಹ ಎಂಪಿ ಆಗಿದ್ದರು.

2018ರ ಕಾಮನ್​ವೆಲ್ತ್ ಗೇಮ್ಸ್​​ನಲ್ಲಿ ಚಿನ್ನ ಗೆದ್ದಿದ್ದ ಶ್ರೇಯಸಿ ಸಿಂಗ್ ಅವರು 2014ರಲ್ಲಿ ಏಷ್ಯನ್ ಕ್ರೀಡಾಕೂಟದಲ್ಲಿ ಕಂಚಿನ ಪದಕಕ್ಕೆ ಮುತ್ತಿಕ್ಕಿದ್ದರು. 2010ರ ಕಾಮನ್​ವೆಲ್ತ್​ ಗೇಮ್ಸ್​ನಲ್ಲಿ ಅವಳಿ ಬೆಳ್ಳಿ ಪದಕ ಗೆದ್ದಿದ್ದರು. 2018ರಲ್ಲಿ ಅರ್ಜುನ ಪ್ರಶಸ್ತಿಯನ್ನೂ ಜಯಿಸಿದ್ದರು.

ಭಾರತದ ಪರ ಸ್ಪರ್ಧಿಸಲಿರುವ 117 ಕ್ರೀಡಾಪಟುಗಳಲ್ಲಿ ಬಿಹಾರದಿಂದ ಒಲಿಂಪಿಕ್ಸ್​ಗೆ ಆಯ್ಕೆಯಾದ ಏಕೈಕ ಕ್ರೀಡಾಪಟು ಎಂಬ ಹೆಗ್ಗಳಿಕೆಗೆ ಶ್ರೇಯಸಿ ಸಿಂಗ್ ಪಾತ್ರರಾಗಿದ್ದಾರೆ. 17 ವರ್ಷಗಳ ನಂತರ ನನ್ನ ಕನಸು ಈಡೇರಿದೆ ಎಂದು ಶ್ರೇಯಸಿ ಹೇಳಿದ್ದಾರೆ.