Travis Head Birthday: ತಂದೆಯಾದ ಬಳಿಕ ಮದುವೆಯಾಗಿದ್ದ ಟ್ರಾವಿಸ್ ಹೆಡ್; ಅಂದು ಸಾವಿನ ದವಡೆಯಿಂದ ಪಾರಾಗಿದ್ದರು!

ಭಾರತದ ವಿರುದ್ಧ ಪ್ರತಿ ಬಾರಿಯೂ ಅಬ್ಬರಿಸುವ ಟ್ರಾವಿಸ್‌ ಹೆಡ್‌, ಈ ಬಾರಿ ಬಾರ್ಡರ್‌-ಗವಾಸ್ಕರ್‌ ಟ್ರೋಫಿ ಸರಣಿಯಲ್ಲಿಯೂ ಅತಿ ಹೆಚ್ಚು ರನ್ ಗಳಿಸಿದ ಆಟಗಾರರಾಗಿದ್ದಾರೆ, ನಾಲ್ಕು ಟೆಸ್ಟ್ ಪಂದ್ಯಗಳ ಎಂಟು ಇನ್ನಿಂಗ್ಸ್‌ಗಳಲ್ಲಿ ಎರಡು ಶತಕ ಸಹಿತ 411 ರನ್ ಗಳಿಸಿದ್ದಾರೆ. ಭಾರತದ ವಿರುದ್ಧ ಹೆಡ್ ಅವರ ದಾಖಲೆ ಅತ್ಯುತ್ತಮವಾಗಿದೆ.

ಆಸ್ಟ್ರೇಲಿಯಾದ ಕ್ರಿಕೆಟಿಗ ಟ್ರಾವಿಸ್ ಹೆಡ್ ಮತ್ತು ರೂಪದರ್ಶಿ ಜೆಸ್ಸಿಕಾ ಡೇವಿಸ್ ದೀರ್ಘಕಾಲದ ಡೇಟಿಂಗ್ ನಂತರ 2023ರ ಏಪ್ರಿಲ್ 15ರಂದು ಅಡಿಲೇಡ್‌ನಲ್ಲಿ ವಿವಾಹವಾದರು.

ಟ್ರಾವಿಸ್ ಮತ್ತು ಜೆಸ್ಸಿಕಾ 2021ರ ಮಾರ್ಚ್ ತಿಂಗಳಲ್ಲಿಯೇ ನಿಶ್ಚಿತಾರ್ಥ ಮಾಡಿಕೊಂಡಿದ್ದರು. 2022ರ ಸೆಪ್ಟೆಂಬರ್ ತಿಂಗಳಲ್ಲಿ, ಅವರಿಬ್ಬರೂ ಮುದ್ದಾದ ಹೆಣ್ಣು ಮಗುವಿನ ಪೋಷಕರಾದರು.

ಟ್ರಾವಿಸ್ ಹೆಡ್ ಮತ್ತು ಜೆಸ್ಸಿಕಾ ಡೇವಿಸ್ 2022ರ ಮೇ ತಿಂಗಳಲ್ಲಿ ವಿಮಾನ ದುರಂತದಿಂದ ಪಾರಾಗಿದ್ದರು. ಜೆಸ್ಸಿಕಾ ಗರ್ಭಿಣಿಯಾಗಿದ್ದಾಗ ಮಾಲ್ಡೀವ್ಸ್‌ ಪ್ರವಾಸದಿಂದ ಮರಳುತ್ತಿದ್ದಾಗ ಘಟನೆ ನಡೆದಿತ್ತು. ತಾವು ಪ್ರಾಣಾಪಾಯದಿಂದ ಪಾರಾಗಿದ್ದಾಗಿ ಖುದ್ದು ಡೇವಿಸ್ ಹೇಳಿಕೊಂಡಿದ್ದಾರೆ.

ಈ ಘಟನೆಯನ್ನು ಸಾಮಾಜಿಕ ಮಾಧ್ಯಮದಲ್ಲಿ ಬಹಿರಂಗಪಡಿಸಿದ ಜೆಸ್ಸಿಕಾ, ಮಾಲ್ಡೀವ್ಸ್‌ನಿಂದ ಹಿಂದಿರುಗುವಾಗ ವಿಮಾನದಲ್ಲಿ ಏನೋ ದೋಷವಿದೆ ಎಂದು ಹೇಳಿದರು. ಹೀಗಾಗಿ ಟೇಕ್ ಆಫ್ ಆದ ಅರ್ಧ ಗಂಟೆಯ ನಂತರ, ವಿಮಾನವು ಮತ್ತೆ ತುರ್ತು ಭೂಸ್ಪರ್ಶ ಮಾಡಿತು.

ಟ್ರಾವಿಸ್‌ ಹೆಡ್‌ ಈವರೆಗೆ 53 ಟೆಸ್ಟ್‌ ಪಂದ್ಯಗಳಲ್ಲಿ ಆಡಿದ್ದು, 43.17ರ ಸರಾಸರಿಯಲ್ಲಿ 3583 ರನ್‌ ಗಳಿಸಿದ್ದಾರೆ. ಏಕದಿನ ಸ್ವರೂಪದಲ್ಲಿ 69 ಪಂದ್ಯಗಳಿಂದ 2645 ರನ್‌ ಗಳಿಸಿದ್ದಾರೆ.