ಭಾರತ vs ಕೆನಡಾ ಮುಖಾಮುಖಿ ದಾಖಲೆ; ಟಿ20 ವಿಶ್ವಕಪ್‌ ಪಂದ್ಯದ ಲೈವ್‌ ಸ್ಟ್ರೀಮಿಂಗ್‌ ವಿವರ

ಭಾರತ ತಂಡವು ಟೂರ್ನಿಯಲ್ಲಿ ಇದುವರೆಗೆ ಆಡಿದ ಎಲ್ಲಾ ಮೂರು ಪಂದ್ಯಗಳಲ್ಲಿ ಗೆದ್ದು ಉತ್ತಮ ಫಾರ್ಮ್‌ನಲ್ಲಿದೆ. ಕೊನೆಯ ಪಂದ್ಯದಲ್ಲಿ ಸಹ-ಆತಿಥೇಯ ಯುಎಸ್ಎ ತಂಡವನ್ನು ಸೋಲಿಸಿ ರೋಹಿತ್‌ ಶರ್ಮಾ ಬಳಗವು, ಇಂದು ತನಗಿಂತ ಕೆಳ ಶ್ರೇಯಾಂಕದ‌ ಕೆನಡಾ ಮಣಿಸಲು ಸಜ್ಜಾಗಿದೆ.

ಭಾರತ ಮತ್ತು ಕೆನಡಾ ದೇಶಗಳು ಇದೇ ಮೊದಲ ಬಾರಿಗೆ ಪರಸ್ಪರ ಮುಖಾಮುಖಿಯಾಗುತ್ತಿವೆ. ಇದುವರೆಗೂ ಟಿ20ಯಲ್ಲಿ ಈ ಎರಡು ತಂಡಗಳು ಪರಸ್ಪರ ಸೆಣಸಿಲ್ಲ.

ಭಾರತ ತಂಡವು ಫ್ಲೋರಿಡಾದಲ್ಲಿ ಈವರೆಗೆ ಎಂಟು ಟಿ20 ಪಂದ್ಯಗಳನ್ನು ಆಡಿದೆ. ಇದರಲ್ಲಿ ಐದು ಪಂದ್ಯಗಳಲ್ಲಿ ಗೆಲುವು ಸಾಧಿಸಿದರೆ, ಎರಡರಲ್ಲಿ ಸೋಲು ಕಂಡಿದೆ.

ಈ ಮೈದಾನಲ್ಲಿ ಟೀಮ್‌ ಇಂಡಿಯಾ ನಾಯಕ ರೋಹಿತ್ ಶರ್ಮಾ ಭಾರತದ ಪರ ಹೆಚ್ಚು ರನ್ ಗಳಿಸಿದ ಆಟಗಾರನಾಗಿದ್ದಾರೆ. ಎರಡು ಅರ್ಧ ಶತಕಗಳೊಂದಿಗೆ 49ರ ಸರಾಸರಿ ಹಾಗೂ 153.12ರ ಸ್ಟ್ರೈಕ್ ರೇಟ್‌ನಲ್ಲಿ ಬ್ಯಾಟ್‌ ಬೀಸಿ ಒಟ್ಟು 196 ರನ್ ಕಲೆ ಹಾಕಿದ್ದಾರೆ. 

ಫ್ಲೋರಿಡಾದಲ್ಲಿ ಆಡಿದ ಕೊನೆಯ ನಾಲ್ಕು ಟಿ20 ಪಂದ್ಯಗಳಲ್ಲಿ ಭಾರತವು ಮೂರರಲ್ಲಿ ಗೆದ್ದಿದೆ. ಕೊನೆಯ ಪಂದ್ಯದಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧದ ಸೋಲು ಕಂಡಿದೆ.

ಭಾರತ ಮತ್ತು ಕೆನಡಾ ತಂಡಗಳ ನಡುವಿನ ಪಂದ್ಯವನ್ನು ಭಾರತದಲ್ಲಿ ಸ್ಟಾರ್ ಸ್ಪೋರ್ಟ್ಸ್ ನೆಟ್‌ವರ್ಕ್ ಮೂಲಕ ನೇರ ಪ್ರಸಾರದಲ್ಲಿ ವೀಕ್ಷಿಸಬಹುದು. ಇದೇ ವೇಳೆ ಮೊಬೈಲ್‌ ಮೂಲಕ ಡಿಸ್ನಿ+ ಹಾಟ್‌ಸ್ಟಾರ್ ಅಪ್ಲಿಕೇಶನ್ ಮತ್ತು ವೆಬ್‌ಸೈಟ್ ಮೂಲಕ ಲೈವ್ ಸ್ಟ್ರೀಮಿಂಗ್ ಅನ್ನು ವೀಕ್ಷಿಸಬಹುದು.