ಅಂಡರ್ 19 ವನಿತೆಯರ ವಿಶ್ವಕಪ್; ಬಾಂಗ್ಲಾದೇಶ ವಿರುದ್ಧವೂ ಭಾರತಕ್ಕೆ 8 ವಿಕೆಟ್‌ ಜಯಭೇರಿ

ಟೂರ್ನಿಯಲ್ಲಿ ಸತತ ಮೂರು ಪಂದ್ಯಗಳನ್ನು ಗೆದ್ದು ಸೂಪರ್‌ ಸಿಕ್ಸ್‌ ಹಂತಕ್ಕೆ ಬಂದ ವನಿತೆಯರು, ಬಾಂಗ್ಲಾದೇಶದ ವಿರುದ್ಧವೂ ಅಬ್ಬರಿಸಿದರು. ವೈಷ್ಣವಿ ಶರ್ಮಾ ಹಾಗೂ ಜಿ ತ್ರಿಶಾ ಅಬ್ಬರದಾಟಕ್ಕೆ ಸುಲಭ ಗೆಲುವು ಒಲಿದಿದೆ.

ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್‌ ನಡೆಸಿದ ಬಾಂಗ್ಲಾದೇಶ 8 ವಿಕೆಟ್‌ ಕಳೆದುಕೊಂಡು ಕೇವಲ 64 ರನ್‌ ಮಾತ್ರ ಗಳಿಸಿತು.

ಇದಕ್ಕೆ ಪ್ರತಿಯಾಗಿ ಭಾರತ ತಂಡವು ಕೇವಲ 7.1 ಓವರ್‌ಗಳಲ್ಲೇ ಚೇಸಿಂಗ್‌ ಪೂರ್ಣಗೊಳಿಸಿತು. ಕೇವಲ 2 ವಿಕೆಟ್‌ ಕಳೆದುಕೊಂಡು 66 ರನ್‌ ಗಳಿಸಿ 8 ವಿಕೆಟ್‌ಗಳ ಜಯ ಸಾಧಿಸಿತು.

ಭಾರತದ ಪರ ಮತ್ತೆ ಅಬ್ಬರಿಸಿದ ತ್ರಿಶಾ 31 ಎಸೆತಗಳಲ್ಲಿ 40 ರನ್‌ ಗಳಿಸಿದರೆ, ಕಮಲಿನಿ 3 ರನ್‌ ಗಳಿಸಿದರು. ಸಾನಿಕಾ ಚಲ್ಕೆ 11 ಹಾಗೂ ನಾಯಕಿ ನಿಕಿ ಪ್ರಸಾದ್‌ ಅಜೇಯ 5 ರನ್‌ ಗಳಿಸಿದರು.

ಕಳೆದ ಪಂದ್ಯದಲ್ಲಿ ಹ್ಯಾಟ್ರಿಕ್‌ ಸಾಧನೆ ಮಾಡಿ ಪಂದ್ಯಶ್ರೇಷ್ಠ ಪ್ರಶಸ್ತಿ ಪಡೆದಿದ್ದ ಬೌಲರ್‌ ವೈಷ್ಣವಿ ಶರ್ಮಾ, ಬಾಂಗ್ಲಾ ವಿರುದ್ಧವೂ ಅಬ್ಬರಿಸಿದರು. 3 ಪ್ರಮುಖ ವಿಕೆಟ್‌ ಪಡೆದು ಮತ್ತೊಮ್ಮೆ ಪಂದ್ಯಶ್ರೇಷ್ಠರಾದರು.

ಭಾರತ ತಂಡವು ಮುಂದೆ ಜನವರಿ 28ರಂದು ನಡೆಯಲಿರುವ ಪಂದ್ಯದಲ್ಲಿ ಸ್ಕಾಟ್ಲೆಂಡ್‌ ತಂಡವನ್ನು ಎದುರಿಸಲಿದೆ.

ಇನ್ನಷ್ಟು ಕ್ರೀಡಾ ಸುದ್ದಿಗಳಿಗೆ ಎಚ್‌ಟಿ ಕನ್ನಡ ಸುದ್ದಿತಾಣಕ್ಕೆ ಭೇಟಿ ನೀಡಿ