ಡಬ್ಲ್ಯುಟಿಸಿ 2025-27ರಲ್ಲಿ 18 ಪಂದ್ಯ ಆಡಲಿದೆ ಭಾರತ; ಮುಂದಿನ ಆವೃತ್ತಿಯ ಸಂಪೂರ್ಣ ವೇಳಾಪಟ್ಟಿ ಹೀಗಿದೆ

ಪ್ರಸಕ್ತ ಋತುವಿನಲ್ಲಿ ಆಡಿದ ಕೊನೆಯ 8 ಟೆಸ್ಟ್ ಪಂದ್ಯಗಳಲ್ಲಿ 6ರಲ್ಲಿ ಸೋಲುವ ಮೂಲಕ ಭಾರತ ತಂಡ ಭಾರಿ ನಿರಾಶೆ ಅನುಭವಿಸಿತು. ಕೇವಲ ಒಂದು ಪಂದ್ಯ ಮಾತ್ರ ಗೆದ್ದು ಕಳಪೆ ಪ್ರದರ್ಶನ ನೀಡಿತು. ಈ ಆವೃತ್ತಿಯ ಪಂದ್ಯಗಳು ಮುಕ್ತಾಯವಾಗಿದ್ದು, ಭಾರತವು ಮುಂದೆ ಈ ವರ್ಷದ ಕೊನೆಯಲ್ಲಿ 2025-27ರ ಡಬ್ಲ್ಯುಟಿಸಿ ಚಕ್ರದ ಪಂದ್ಯಗಳನ್ನು ಆಡಲಿದೆ.

ನೂತನ ಡಬ್ಲ್ಯುಟಿಸಿ ಅಭಿಯಾನದಲ್ಲಿ ಭಾರತವು ಒಟ್ಟು 18 ಟೆಸ್ಟ್ ಪಂದ್ಯಗಳಲ್ಲಿ ಆಡಲಿದೆ. ಮುಂದಿನ ಆವೃತ್ತಿಯಲ್ಲಿ ಫೈನಲ್‌ ಪ್ರವೇಶಿಸಲು ಆರಂಭದಿಂದಲೇ ಶ್ರಮ ಹಾಕಬೇಕಾಗಿದೆ. 2025ರಲ್ಲಿ ಇಂಗ್ಲೆಂಡ್‌ನಲ್ಲಿ ಐದು ಪಂದ್ಯಗಳ ಸರಣಿಯೊಂದಿಗೆ ಭಾರತ ಮುಂದಿನ ಆವೃತ್ತಿಯ ಅಭಿಯಾನ ಆರಂಭಿಸಲಿದೆ. 

2025ರ ಅಕ್ಟೋಬರ್-ನವೆಂಬರ್‌ಲ್ಲಿ ಎರಡು ಪಂದ್ಯಗಳ ತವರು ಟೆಸ್ಟ್ ಸರಣಿ ನಡೆಯಲಿದ್ದು, ವೆಸ್ಟ್ ಇಂಡೀಸ್ ಮತ್ತು ದಕ್ಷಿಣ ಆಫ್ರಿಕಾ ಭಾರತಕ್ಕೆ ಪ್ರಯಾಣಿಸಲಿವೆ. 

2026ರ ಆಗಸ್ಟ್ ತಿಂಗಳಲ್ಲಿ ಎರಡು ಟೆಸ್ಟ್ ಪಂದ್ಯಗಳಿಗಾಗಿ ಶ್ರೀಲಂಕಾ ಪ್ರವಾಸ ಮಾಡಲಿದೆ. ಅಕ್ಟೋಬರ್ ಮತ್ತು ಡಿಸೆಂಬರ್ ತಿಂಗಳ ನಡುವೆ ಕಿವೀಸ್ ಪ್ರವಾಸ ಇರಲಿದ್ದು, ಎರಡು ಪಂದ್ಯಗಳ ಸರಣಿ ನಡೆಯಲಿದೆ.

2027ರಲ್ಲಿ ತವರು ನೆಲದಲ್ಲಿ ಬಾರ್ಡರ್-ಗವಾಸ್ಕರ್ ಟ್ರೋಫಿ ಸರಣಿ ನಡೆಯಲಿದ್ದು, ಆಸ್ಟ್ರೇಲಿಯಾವನ್ನು ಎದುರಿಸಲಿದೆ. ದಶಕದಲ್ಲಿ ಇದೇ ಮೊದಲ ಬಾರಿಗೆ ಬಿಜಿಟಿ ಕಳೆದುಕೊಂಡ ನಂತರ, ಅದನ್ನು ಮರಳಿ ಪಡೆಯಲು ಟೀಮ್‌ ಇಂಡಿಯಾ ಹೋರಾಡಲಿದೆ.

ಭಾರತದ ಇಂಗ್ಲೆಂಡ್‌ ಪ್ರವಾಸ: 5 ಟೆಸ್ಟ್ (ಜೂನ್-ಆಗಸ್ಟ್ 2025)

ಭಾರತಕ್ಕೆ ವೆಸ್ಟ್ ಇಂಡೀಸ್ ಪ್ರವಾಸ: 2 ಟೆಸ್ಟ್ (ಅಕ್ಟೋಬರ್ 2025)

ಭಾರತಕ್ಕೆ ದಕ್ಷಿಣ ಆಫ್ರಿಕಾ ಪ್ರವಾಸ: 2 ಟೆಸ್ಟ್ (ನವೆಂಬರ್-ಡಿಸೆಂಬರ್ 2025)

ಭಾರತದ ಶ್ರೀಲಂಕಾ ಪ್ರವಾಸ: 2 ಟೆಸ್ಟ್ (ಆಗಸ್ಟ್ 2026)

ಭಾರತದ ನ್ಯೂಜಿಲೆಂಡ್ ಪ್ರವಾಸ: 2 ಟೆಸ್ಟ್ (ಅಕ್ಟೋಬರ್-ಡಿಸೆಂಬರ್ 2026)

ಭಾರತಕ್ಕೆ ಆಸ್ಟ್ರೇಲಿಯಾ ಪ್ರವಾಸ: 5 ಟೆಸ್ಟ್ (ಜನವರಿ-ಫೆಬ್ರವರಿ 2027)

ಕ್ರಿಕೆಟ್ ಸುದ್ದಿಗಳ ಕ್ಷಣಕ್ಷಣದ ಅಪ್ಡೇಟ್ಸ್​​ಗಾಗಿ ಹಿಂದೂಸ್ತಾನ್ ಟೈಮ್ಸ್ ಕನ್ನಡ ಓದಿ.