ಟೆಸ್ಟ್ ಕ್ರಿಕೆಟ್: ಅತಿ ಕಡಿಮೆ ಎಸೆತಗಳಲ್ಲಿ 200 ವಿಕೆಟ್ ಪಡೆದ ಟಾಪ್​-5 ಬೌಲರ್ಸ್ ಯಾರು; ಬುಮ್ರಾಗೆ ಎಷ್ಟನೇ ಸ್ಥಾನ?

ಮೆಲ್ಬೋರ್ನ್ ಕ್ರಿಕೆಟ್ ಮೈದಾನದಲ್ಲಿ ನಡೆಯುತ್ತಿರುವ ನಾಲ್ಕನೇ ಟೆಸ್ಟ್​ ಪಂದ್ಯದಲ್ಲಿ ಆಸ್ಟ್ರೇಲಿಯಾದ 2ನೇ ಇನ್ನಿಂಗ್ಸ್​ನಲ್ಲಿ ಟೀಮ್ ಇಂಡಿಯಾ ವೇಗಿ ಜಸ್ಪ್ರೀತ್ ಬುಮ್ರಾ ಅವರು ಟೆಸ್ಟ್​ ಕ್ರಿಕೆಟ್​ನಲ್ಲಿ 200 ವಿಕೆಟ್​​ಗಳ ಸಾಧನೆ ಮಾಡಿದ್ದಾರೆ. 2018ರಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧದ ಟೆಸ್ಟ್​ ಕ್ರಿಕೆಟ್​ಗೆ ಪದಾರ್ಪಣೆ ಮಾಡಿದ್ದ ಬುಮ್ರಾ, ಕೇವಲ 44 ಟೆಸ್ಟ್​​ಗಳಲ್ಲಿ ಇನ್ನೂರು ವಿಕೆಟ್​​ಗಳನ್ನು ಪೂರೈಸಿ ದಾಖಲೆ ನಿರ್ಮಿಸಿದ್ದಾರೆ.

ಟ್ರಾವಿಸ್ ಹೆಡ್ ಅವರನ್ನು ಔಟ್ ಮಾಡಿದ್ದು ಬುಮ್ರಾರ 200ನೇ ಟೆಸ್ಟ್​ ವಿಕೆಟ್. ಟೆಸ್ಟ್​ ಕ್ರಿಕೆಟ್​​ನಲ್ಲಿ ಅತಿ ಕಡಿಮೆ ಪಂದ್ಯಗಳಲ್ಲಿ 200 ವಿಕೆಟ್​​ಗಳ ಸಾಧನೆ ಮಾಡಿರುವ ಬುಮ್ರಾ ಮತ್ತೊಂದು ಸಾಧನೆ ಕೂಡ ಮಾಡಿದ್ದಾರೆ ಎಂಬುದನ್ನು ನಾವು ತಿಳಿಯಲೇಬೇಕು. ಅಂದರೆ ಕೇವಲ 8484 ಬಾಲ್​​ಗಳಲ್ಲಿ ಇಷ್ಟು ವಿಕೆಟ್ ಉರುಳಿಸಿ ಗಮನ ಸೆಳೆದಿದ್ದಾರೆ. ಪ್ರಸ್ತುತ ನಾವು ಟೆಸ್ಟ್ ಕ್ರಿಕೆಟ್​ನಲ್ಲಿ ಅತಿ ಕಡಿಮೆ ಎಸೆತದಲ್ಲಿ 200 ವಿಕೆಟ್ ಪಡೆದ ಬೌಲರ್​ಗಳು ಯಾರು ಎಂಬುದನ್ನು ಈ ಮುಂದೆ ನೋಡೋಣ.

ವಕಾರ್ ಯೂನಿಸ್ - 7725 ಎಸೆತಗಳು: ಪಾಕಿಸ್ತಾನದ ಮಾಜಿ ವೇಗದ ಬೌಲರ್ ವಕಾರ್ ಯೂನಿಸ್ ಟೆಸ್ಟ್ ಕ್ರಿಕೆಟ್​​ನಲ್ಲಿ 200 ವಿಕೆಟ್ ಪಡೆದ ಅತ್ಯಂತ ಕಿರಿಯ ಬೌಲರ್ ಆಗಿದ್ದಾರೆ. ವಕಾರ್ 1989ರಲ್ಲಿ ಸಚಿನ್ ತೆಂಡೂಲ್ಕರ್ ಅವರೊಂದಿಗೆ ಟೆಸ್ಟ್ ಕ್ರಿಕೆಟ್​ಗೆ ಪದಾರ್ಪಣೆ ಮಾಡಿದ್ದರು ವಕಾರ್​, 1995ರಲ್ಲಿ 200ನೇ ವಿಕೆಟ್ ಪಡೆದಿದ್ದರು. ಇವರು 7725 ಎಸೆತಗಳಲ್ಲಿ ಇನ್ನೂರು ವಿಕೆಟ್ ಪಡೆದಿದ್ದರು.

ಡೇಲ್ ಸ್ಟೇನ್- 7848 ಎಸೆತಗಳು: ಸೌತ್ ಆಫ್ರಿಕಾದ ಡೇಲ್ ಸ್ಟೇನ್ ಟೆಸ್ಟ್ ಇತಿಹಾಸದ ಅತ್ಯುತ್ತಮ ಬೌಲರ್​ಗಳಲ್ಲಿ ಒಬ್ಬರು. ಹಲವು ವರ್ಷಗಳ ಕಾಲ ನಂಬರ್ 1 ಶ್ರೇಯಾಂಕದಲ್ಲಿದ್ದ ಸ್ಟೇನ್ ಟೆಸ್ಟ್ ಕ್ರಿಕೆಟ್​ನಲ್ಲಿ 7,848 ಎಸೆತಗಳಲ್ಲಿ 200 ವಿಕೆಟ್ ಪೂರೈಸಿದ್ದಾರೆ. 2019ರಲ್ಲಿ ಸ್ಟೇನ್ ನಿವೃತ್ತಿ ಘೋಷಿಸಿದ್ದರು.

ಕಗಿಸೊ ರಬಾಡ - 8154 ಎಸೆತಗಳು: ದಕ್ಷಿಣ ಆಫ್ರಿಕಾದ ಕಗಿಸೊ ರಬಾಡ 8154 ಎಸೆತಗಳಲ್ಲಿ 200 ವಿಕೆಟ್ ಪಡೆದ ದಾಖಲೆ ಹೊಂದಿದ್ದಾರೆ. 

ಜಸ್ಪ್ರೀತ್ ಬುಮ್ರಾ - 8484 ಎಸೆತಗಳು: ಕಡಿಮೆ ಎಸೆತಗಳಲ್ಲಿ 200 ವಿಕೆಟ್ ಪಡೆದ ಬೌಲರ್​ಗಳ ಪಟ್ಟಿಯಲ್ಲಿ 4ನೇ ಸ್ಥಾನದಲ್ಲಿದ್ದಾರೆ ಬುಮ್ರಾ. ತಮ್ಮ ವೃತ್ತಿಜೀವನದ 8484ನೇ ಎಸೆತದಲ್ಲಿ 200ನೇ ವಿಕೆಟ್ ಪಡೆದರು. ಕಡಿಮೆ ಎಸೆತಗಳಲ್ಲಿ 200 ವಿಕೆಟ್ ಕಿತ್ತಿರುವ ಭಾರತದ ಮೊದಲ ಬೌಲರ್​ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ ಬುಮ್ರಾ.

ಮಾಲ್ಕಮ್ ಮಾರ್ಷಲ್ - 9234 ಎಸೆತಗಳು: ವೆಸ್ಟ್​​ ಇಂಡೀಸ್​ ಬೌಲರ್​ ಮಾಲ್ಕಮ್ ಮಾರ್ಷಲ್ ಅವರು 80ರ ದಶಕದಲ್ಲೇ ಅತ್ಯಂತ ಅಪಾಯಕಾರಿ ಬೌಲರ್​​ ಆಗಿದ್ದರು. ಮಾರ್ಷಲ್ 9234 ಎಸೆತಗಳಲ್ಲಿ 200 ವಿಕೆಟ್​​ಗಳನ್ನು ಪೂರ್ಣಗೊಳಿಸಿದ್ದರು.