ಗುಡುಗು ಮಿಂಚಿನ ಸಂಚಿಗೆ ಬಲಿಯಾಗದಿರಿ; ಸಿಡಿಲಿನ ಹೊಡೆತದಿಂದ ತಪ್ಪಿಸಿಕೊಳ್ಳಲು ಈ ನಿಯಮಗಳನ್ನು ಅನುಸರಿಸಿ

ಇತ್ತೀಚಿನ ವರ್ಷಗಳಿಗೆ ಹೋಲಿಸಿದರೆ ಈ ವರ್ಷ ಬಿಸಿಲಿನ ತಾಪ ಬಹಳ ಜೋರಾಗಿದೆ. ಕೆಲವೆಡೆ ಮಳೆ ಸುರಿದರೂ ಕೆಲವು ಸ್ಥಳಗಳಲ್ಲಿ ಹನಿ ಮಳೆಯೂ ಬಂದಿಲ್ಲ. ಆದರೆ ಬಿಸಿಲಿನಷ್ಟೇ ಈ ವರ್ಷ ಸಿಡಿಲಿನ ಅಬ್ಬರವೂ ಜೋರಿದೆ. ರಾಜ್ಯದಲ್ಲಿ ಈಗಾಗಲೇ ಹಲವರು ಸಿಡಿಲಿನ ಹೊಡೆತಕ್ಕೆ ಸಿಕ್ಕು ಪ್ರಾಣ ಕಳೆದುಕೊಂಡಿದ್ದಾರೆ. ರಾಜ್ಯ ವಿಪತ್ತು ನಿರ್ವಹಣಾ ಕೇಂದ್ರವು ಈ ವರ್ಷ ಗುಡುಗು, ಮಿಂಚು, ಸಿಡಿಲಿನ ಪ್ರಭಾವ ಹೆಚ್ಚಿರುವ ಬಗ್ಗೆ ಮಾಹಿತಿ ನೀಡಿದ್ದು ಎಚ್ಚರಿಕೆ ಸೂಚಿಸಿದೆ. 

ಸಿಡುಲು ನೈಸರ್ಗಿಕವಾದರೂ ಕೂಡ ಸಿಡಿಲಿನ ಅಬ್ಬರದಿಂದ ನಮ್ಮನ್ನ ಕಾಪಾಡಿಕೊಳ್ಳಲು ಕೆಲವು ನಿಯಮಗಳನ್ನು ಅನುಸರಿಸಬೇಕು. ಸಿಡಿಲಿನಿಂದ ಕೇವಲ ಮನುಷ್ಯರು ಮಾತ್ರ ದನ-ಕರು, ಪ್ರಾಣಿ, ಪಕ್ಷಿಗಳು ಪ್ರಾಣ ಕಳೆದುಕೊಳ್ಳುತ್ತಿವೆ. ಹಾಗಾಗಿ ಈ ನಿಯಮಗಳನ್ನು ತಪ್ಪದೇ ಪಾಲನೆ ಮಾಡಬೇಕು. 

ಗುಡುಗು-ಮಿಂಚು ಬರುವಾಗ ಸೂಚನೆ ಸಿಗುತ್ತದೆ. ವಾತಾವರಣ ಬದಲಾಗಿ ಗುಡುಗು ಮಿಂಚು ಬರುತ್ತದೆ ಎನ್ನಿಸಿದಾಕ್ಷಣ ನೀವು ಸೂಕ್ತ ಜಾಗವನ್ನು ಕಂಡುಕೊಳ್ಳಬೇಕು. ನೀವು ಬಯಲು ಪ್ರದೇಶದಲ್ಲಿದ್ದರೆ, ತಕ್ಷಣವೇ ಇರುವುದರಲ್ಲಿ ತಗ್ಗು ಪ್ರದೇಶಕ್ಕೆ ಹೋಗಿ ಕುಳಿತುಕೊಳ್ಳಿ, ನಿಲ್ಲಬೇಡಿ.

ತಗ್ಗು ಪ್ರದೇಶ ಇಲ್ಲದೆ ಬಯಲಿನಲ್ಲೆ ಇರಬೇಕಾದರೆ. ನಿಮ್ಮ ತಲೆಯನ್ನು ಮೊಣಕಾಲುಗಳ ನಡುವೆ ಹುದುಗಿಸಿಕೊಳ್ಳಿ, ಇದು ಮಿಂಚಿನಿಂದ ಮೆದುಳಿಗೂ, ಹೃದಯಕ್ಕೂ ಆಗುವ ಹಾನಿಯನ್ನು ತಪ್ಪಿಸುತ್ತದೆ.

ಮಳೆಯಿಂದ ತಪ್ಪಿಸಿಕೊಳ್ಳಲು ಮರದ ಅಡಿಗೆ ನಿಲ್ಲುವುದು ಸಹಜ. ಆದರೆ ಸಿಡಿಲು, ಗುಡುಗು ಇರುವಾಗ ತಪ್ಪಿಯೂ ಮರದಡಿಗೆ ನಿಲ್ಲಬೇಡಿ. ಯಾಕೆಂದರೆ ಸಿಡಿಲು ಮೋಡದಿಂದ ಭೂಮಿಗೆ ಹರಿಯಲು ಮರದಂತಹ ಹಸಿ, ಒದ್ದೆ ವಸ್ತುವನ್ನೇ ಆರಿಸಿಕೊಳ್ಳುತ್ತದೆ.

ಕುರಿ ಮಂದೆ ಅಥವಾ ಜಾನುವಾರುಗಳ ಮಧ್ಯ ನಿಂತಿದ್ದರೆ, ಅವುಗಳ ಮಧ್ಯದಲ್ಲಿ ಬಗ್ಗಿ ಕುಳಿತುಕೊಳ್ಳಿ. ಯಾಕೆಂದರೆ ಮಿಂಚು ಪ್ರಾಣಿಗಳಿಗಿಂತ ಎತ್ತರವಿರುವ ಮನುಷನನ್ನೇ ಆರಿಸಿಕೊಳ್ಳುತ್ತದೆ. 

ಮಳೆ, ಗುಡುಗು, ಸಿಡಿಲು ಬರುವ ಮುನ್ಸೂಚನೆ ಸಿಕ್ಕರೆ ನೀವು ಕೆರೆಯಲ್ಲಿ ಈಜುವುದು, ಸ್ನಾನ ಮಾಡುವುದು ಅಥವಾ ಗದ್ದೆಯಲ್ಲಿ ಕೆಲಸ ಮಾಡುವುದು ಹೀಗೆ ನೀರಿನಲ್ಲಿ ಇದ್ದರೆ ಕೂಡಲೇ ಅಲ್ಲಿಂದ ದೂರ ಬನ್ನಿ. 

ವಿದ್ಯುತ್ ಕಂಬ, ಎಲಕ್ಟ್ರಿಕಲ್ ಟವರ್, ಮೊಬೈಲ್ ಟವರ್, ಟ್ರಾನ್ಸ್ ಫಾರ್ಮರ್ ಮುಂತಾದವುಗಳ ಹತ್ತಿರವೂ ಇರಬೇಡಿ. ಇಂತಹ ವಸ್ತುಗಳ ಮೇಲೆ ಸಿಡಿಲು ಎರಗುವ ಸಾಧ್ಯತೆ ಹೆಚ್ಚು. 

ತಂತಿಬೇಲಿ, ಬಟ್ಟೆ ಒಣಹಾಕುವ ತಂತಿ, ಇವುಗಳಿಂದ ದೊರವಿರಿ. ಯಾಕೆಂದರೆ ಕಬ್ಬಿಣದ ವಸ್ತುಗಳಿಗೆ ಸಿಡಿಲು ಬಡಿಯುವ ಸಂಭವ ಅಧಿಕ. 

ಮಳೆ ಬರುವ ಸಮಯದಲ್ಲಿ ಟೆರೇಸ್‌ ಮೇಲೆ ಹೋಗಿ ಸ್ವಚ್ಛ ಮಾಡುವ ಅಭ್ಯಾಸ ಹಲವರಿಗಿರುತ್ತದೆ. ಆದರೆ ನಿಮಗೆ ಇದು ಸಾವಿನ ಬಾಗಿಲು ತೆರೆಯುವಂತೆ ಮಾಡಬಹುದು. 

ಸಿಡಿಲು ಬರುವಾಗ ಸಾಧ್ಯವಾದಷ್ಟು ಮನೆಯೊಳಗೆ ಇರಿ. ಮಳೆ ನೋಡುವ ಸಲುವಾಗಿ ಕಿಟಕಿ ಬಳಿ ನಿಲ್ಲುವುದು ಸರಿಯಲ್ಲ. ಕಿಟಕಿಯಂತಹ ಕಬ್ಬಿಣದ ವಸ್ತುಗಳಿಗೆ ಸಿಡಿಲು ಎರಗುತ್ತದೆ. 

ಗುಡುಗು-ಸಿಡಿಲಿನ ಸಂದರ್ಭದಲ್ಲಿ ಫೋನ್ ಬಳಕೆ ಮಾಡಬೇಡಿ. ಅದನ್ನು ಚಾರ್ಜ್ ಮಾಡುವ ಸಾಹಸವೂ ಬೇಡ. ಸಾಧ್ಯವಾದಷ್ಟು ಗುಡುಗು, ಸಿಡಿಲಿನ ಸಂದರ್ಭ ಎಲೆಕ್ಟ್ರಾನಿಕ್‌ ವಸ್ತುಗಳ ಬಳಕೆ ಕಡಿಮೆ ಮಾಡುವುದು ಉತ್ತಮ. 

ಕಾರಿನಲ್ಲಿ ಪ್ರಯಾಣಿಸುತ್ತಿದ್ದರೆ ಗಾಜನ್ನು ಮುಚ್ಚಿಕೊಳ್ಳಿ. ಕಾರಿನ ಬಾಡಿಯನ್ನು ಸಾಧ್ಯವಾದಷ್ಟು ಸ್ಪರ್ಶಿಸದೆ ಮಧ್ಯದಲ್ಲಿ ಕುಳಿತುಕೊಳ್ಳುವುದು ಒಳ್ಳೆಯದು.

ಆಹಾರ, ಆರೋಗ್ಯ, ಫ್ಯಾಷನ್‌, ರಿಲೇಷನ್‌ಶಿಪ್‌ , ಪೇರೆಂಟಿಂಗ್‌ ಸಂಬಂಧಿಸಿದ ಲೇಖನಗಳಿಗಾಗಿ ಹಿಂದೂಸ್ತಾನ್‌ ಟೈಮ್ಸ್‌ ಕನ್ನಡ ಲೈಫ್‌ಸ್ಟೈಲ್‌ ಪುಟಕ್ಕೆ ಭೇಟಿ ನೀಡಿ