ಏನಿದು ಥೈರಾಯಿಡ್ ಐ ಕಾಯಿಲೆ? ಕಣ್ಣಿನ ಆರೋಗ್ಯದ ಮೇಲೆ ಥೈರಾಯಿಡ್‌ನ ಅಡ್ಡ ಪರಿಣಾಮಗಳಿವು, ನಿರ್ಲಕ್ಷ್ಯ ಮಾಡದಿರಿ

ಕಳಪೆ ಜೀವನಶೈಲಿ, ಅಸಮರ್ಪಕ ಆಹಾರಕ್ರಮ, ಒತ್ತಡ ಈ ಕೆಲವು ಕಾರಣಗಳಿಂದ ಇತ್ತೀಚೆಗೆ ಥೈರಾಯಿಡ್‌ ಸಮಸ್ಯೆ ಹೆಚ್ಚುತ್ತಿದೆ. ಇದು ಮಹಿಳೆಯರಲ್ಲಿ ಹೆಚ್ಚಾಗಿ ಕಾಣಿಸಿದರೂ ಪುರುಷರಿಗೂ ಥೈರಾಯಿಡ್ ಸಮಸ್ಯೆ ಇರುತ್ತದೆ. ಥೈರಾಯಿಡ್ ಎಂದರೆ ನಮ್ಮ ಕುತ್ತಿಗೆಯ ಬಳಿ ಇರುವ ಚಿಟ್ಟೆಯಾಕಾರದ ಗ್ರಂಥಿ. ಇದು ದೇಹದ ಹಲವು ಕೆಲಸಗಳಿಗೆ ನೆರವಾಗುವ ಹಾರ್ಮೋನ್‌ ಬಿಡುಗಡೆ ಮಾಡುತ್ತದೆ. ಥೈರಾಯಿಡ್ ಗ್ರಂಥಿಯ ಥೈರಾಯಿಡ್ ಹಾರ್ಮೋನ್ ಅನ್ನು ಬಿಡುಗಡೆ ಮಾಡುತ್ತದೆ. 

ಈ ಗ್ರಂಥಿಯು ಅಗತ್ಯಕ್ಕಿಂತ ಹೆಚ್ಚು ಅಥವಾ ಕಡಿಮೆ ಹಾರ್ಮೋನುಗಳನ್ನು ಉತ್ಪಾದಿಸಲು ಪ್ರಾರಂಭಿಸಿದಾಗ, ವ್ಯಕ್ತಿಯು ಥೈರಾಯ್ಡ್ ಸಂಬಂಧಿತ ಸಮಸ್ಯೆಗಳನ್ನು ಎದುರಿಸಬೇಕಾಗುತ್ತದೆ. ಥೈರಾಯಿಡ್‌ನಿಂದಾಗಿ ಆಯಾಸ, ತೂಕ ಹೆಚ್ಚಾಗುವುದು, ಶೀತವನ್ನು ತಡೆದುಕೊಳ್ಳಲು ಅಸಮರ್ಥತೆ, ಒಣ ಚರ್ಮ, ಕೂದಲು ಉದುರುವಿಕೆ, ಖಿನ್ನತೆ ಮತ್ತು ಹೃದಯ ಬಡಿತ ನಿಧಾನವಾಗುವುದು ಇಂತಹ ಲಕ್ಷಣಗಳು ಕಾಣಿಸುತ್ತವೆ.  ಇದರೊಂದಿಗೆ ಥೈರಾಯಿಡ್ ಕೆಲವರಿಗೆ ಕಣ್ಣಿನ ಆರೋಗ್ಯದ ಮೇಲೂ ಪರಿಣಾಮ ಬೀರುತ್ತದೆ. 

ಥೈರಾಯ್ಡ್ ಗ್ರಂಥಿಗೆ ಸಂಬಂಧಿಸಿದ ಕಣ್ಣಿನ ಸಮಸ್ಯೆಗಳನ್ನು ಥೈರಾಯಿಡ್ ಐ ಡಿಸೀಸ್ ಎಂದು ಕರೆಯಲಾಗುತ್ತದೆ. ಇದು ಸ್ವಯಂ ನಿರೋಧಕ ಕಾಯಿಲೆಯಾಗಿದೆ. ಇದರಲ್ಲಿ ದೇಹದ ಪ್ರತಿರಕ್ಷಣಾ ವ್ಯವಸ್ಥೆಯು ಕಣ್ಣುಗಳ ಹಿಂದಿನ ಅಂಗಾಂಶಗಳ ಮೇಲೆ ದಾಳಿ ಮಾಡುತ್ತದೆ, ಕಣ್ಣುಗಳಲ್ಲಿ ಊತವನ್ನು ಉಂಟುಮಾಡುತ್ತದೆ ಮತ್ತು ಅನೇಕ ಸಮಸ್ಯೆಗಳನ್ನು ಉಂಟುಮಾಡುತ್ತದೆ. ಥೈರಾಯ್ಡ್ ಕಣ್ಣುಗಳ ಮೇಲೆ ಯಾವ ದುಷ್ಪರಿಣಾಮಗಳನ್ನು ಬೀರಬಹುದು ಎಂಬ ವಿವರ ಇಲ್ಲಿದೆ.

ಕಣ್ಣು ಒಣಗುವುದು: ಥೈರಾಯಿಡ್‌ನಿಂದಾಗಿ ಕಣ್ಣು ಒಣಗುವ ಸಮಸ್ಯೆ ಎದುರಾಗಬಹುದು. ಥೈರಾಯ್ಡ್ ಹಾರ್ಮೋನುಗಳು ಕಣ್ಣೀರಿನ ಉತ್ಪಾದನೆಗೆ ಕಾರಣವಾದ ಲ್ಯಾಕ್ರಿಮಲ್ ಗ್ರಂಥಿಗಳ ಕಾರ್ಯನಿರ್ವಹಣೆಯ ಮೇಲೆ ಪರಿಣಾಮ ಬೀರುವ ಮೂಲಕ ಕಣ್ಣುಗಳಲ್ಲಿ ಶುಷ್ಕತೆ, ತುರಿಕೆ ಅಥವಾ ಸುಡುವಿಕೆಗೆ ಕಾರಣವಾಗಬಹುದು. ಜನರು ಈ ಸಮಸ್ಯೆಯನ್ನು ಸಾಮಾನ್ಯವೆಂದು ಪರಿಗಣಿಸಿ ನಿರ್ಲಕ್ಷಿಸುತ್ತಾರೆ. ಪರಿಣಾಮವಾಗಿ, ಸುಲಭವಾಗಿ ನಿಯಂತ್ರಿಸಬಹುದಾದ ಈ ಸಮಸ್ಯೆಯು ಗಂಭೀರವಾದ ಕಣ್ಣಿನ ಹಾನಿಯನ್ನು ಉಂಟುಮಾಡಬಹುದು.

ಥೈರಾಯ್ಡ್-ಸಂಬಂಧಿತ ಕಣ್ಣಿನ ಅಸ್ವಸ್ಥತೆಗಳು ಹೆಚ್ಚಾಗಿ ಬೆಳಕಿಗೆ ಹೆಚ್ಚಿನ ಸಂವೇದನೆಯನ್ನು ಉಂಟುಮಾಡುತ್ತವೆ, ಪ್ರಕಾಶಮಾನವಾದ ಬೆಳಕಿನಲ್ಲಿ ದೈನಂದಿನ ಚಟುವಟಿಕೆಗಳನ್ನು ಮಾಡಲು ಕಷ್ಟವಾಗುತ್ತದೆ. ಈ ಸಮಸ್ಯೆ ಇರುವವರಿಗೆ ಪ್ರಕಾಶಮಾನದ ಬೆಳಕಿಗೆ ಕಣ್ಣು ಕೊಡುವುದು ಕಷ್ಟವಾಗುತ್ತದೆ.

ಥೈರಾಯ್ಡ್‌ನಿಂದಾಗಿ ಕಣ್ಣುಗಳು ಉಬ್ಬಿಕೊಳ್ಳಬಹುದು. ಥೈರಾಯ್ಡ್ ಐ ಡಿಸೀಸ್ ಅಥವಾ ಗ್ರೇವ್ಸ್ ಐ ಡಿಸೀಸ್‌ನಿಂದಾಗಿ ಕಣ್ಣುಗಳ ಸುತ್ತಲೂ ದ್ರವದ ಶೇಖರಣೆಯಿಂದಾಗಿ ಕಣ್ಣುಗಳು ಮುಂದಕ್ಕೆ ಚಲಿಸುತ್ತವೆ. ಇದನ್ನು ಎಕ್ಸೋಫ್ಥಾಲ್ಮೋಸ್ ಎಂದೂ ಕರೆಯುತ್ತಾರೆ.

ಥೈರಾಯಿಡ್ ಐ ಸಮಸ್ಯೆಯಿಂದಾಗಿ ಕಣ್ಣುಗಳು ಊದಿಕೊಳ್ಳುತ್ತದೆ. ಇದರಿಂದ ದೃಷ್ಟಿ ಮಂಜಾಗುವುದು. ಇದು ಎಲ್ಲಾ ವಸ್ತುಗಳು ಎರಡಾಗಿ ಕಾಣಿಸಲು ಕಾರಣವಾಗುತ್ತದೆ. ಈ ಸಮಸ್ಯೆ ಇರುವ ವ್ಯಕ್ತಿಗೆ ವಿಷಯಗಳ ಮೇಲೆ ಕೇಂದ್ರೀಕರಿಸಲು ಕಷ್ಟವಾಗುತ್ತದೆ. 

ನ್ಯಾಷನಲ್ ಇನ್‌ಸ್ಟಿಟ್ಯೂಟ್ ಆಫ್ ಹೆಲ್ತ್ (NIH)ನ ಅಧ್ಯಯನದ ಪ್ರಕಾರ, ಥೈರಾಯ್ಡ್ ಐ ಡಿಸೀಸ್‌ ಗ್ರೇವ್ಸ್ ಕಾಯಿಲೆಯಂತಹ ಆಟೊಇಮ್ಯೂನ್ ಥೈರಾಯ್ಡ್ ತೊಂದರೆಗೆ ಸಂಬಂಧಿಸಿದೆ ಎಂದು ಹೇಳುತ್ತದೆ. ಇದು ಕಣ್ಣಿನ ದೃಷ್ಟಿಯ ಮೇಲೆ ಗಮನಾರ್ಹ ಪರಿಣಾಮ ಬೀರುತ್ತದೆ. , ಥೈರಾಯ್ಡ್‌ನ ಆರಂಭಿಕ ಚಿಕಿತ್ಸೆಯು ಕಣ್ಣಿನ ಸಮಸ್ಯೆಗಳನ್ನು ಕಡಿಮೆ ಮಾಡಲು ಮತ್ತು ದೃಷ್ಟಿಯನ್ನು ರಕ್ಷಿಸಲು ಸಹಾಯ ಮಾಡುತ್ತದೆ.

(ಗಮನಿಸಿ: ಈ ಮಾಹಿತಿಯು ಸಾಮಾನ್ಯಜ್ಞಾನ ಹಾಗೂ ಅಂತರ್ಜಾಲದಲ್ಲಿ ಸಿಕ್ಕ ಮಾಹಿತಿಯನ್ನ ಆಧರಿಸಿದೆ. ಈ ವಿಚಾರ ಸಂಪೂರ್ಣ ನಿಖರವಾಗಿದೆ ಎಂದು ಹಿಂದೂಸ್ತಾನ್ ಟೈಮ್ಸ್ ಕನ್ನಡ ಪ್ರತಿಪಾದಿಸುವುದಿಲ್ಲ. ಈ ವಿಷಯದ ಕುರಿತ ನಿಖರ ಮಾಹಿತಿಗಾಗಿ ಸಂಬಂಧಪಟ್ಟ ಕ್ಷೇತ್ರದ ತಜ್ಞರನ್ನು ಸಂಪರ್ಕಿಸಿ)

ಆಹಾರ, ಆರೋಗ್ಯ, ಫ್ಯಾಷನ್‌, ರಿಲೇಷನ್‌ಶಿಪ್‌ , ಪೇರೆಂಟಿಂಗ್‌ ಸಂಬಂಧಿಸಿದ ಲೇಖನಗಳಿಗಾಗಿ ಹಿಂದೂಸ್ತಾನ್‌ ಟೈಮ್ಸ್‌ ಕನ್ನಡ ಲೈಫ್‌ಸ್ಟೈಲ್‌ ಪುಟಕ್ಕೆ ಭೇಟಿ ನೀಡಿ