IPL Points Table: ಸತತ 4 ಗೆಲುವು ದಾಖಲಿಸಿದ ರಾಜಸ್ಥಾನ್​ ರಾಯಲ್ಸ್​​ಗೆ ರಾಜಪಟ್ಟ; ಸೋತರೂ ಎಲ್ಲಿತ್ತೋ ಅಲ್ಲೇ ಇದೆ ಆರ್​​ಸಿಬಿ

ಐಪಿಎಲ್ 2024ರ 19ನೇ ಪಂದ್ಯದಲ್ಲಿ ಆರ್​​ಸಿಬಿ ತಂಡವನ್ನು ರಾಜಸ್ಥಾನ್ ರಾಯಲ್ಸ್ 6 ವಿಕೆಟ್​ಗಳಿಂದ ಸೋಲಿಸಿತು. ರಾಜಸ್ಥಾನ ತಂಡದ ಗೆಲುವು ಅಂಕಪಟ್ಟಿಯಲ್ಲಿ ಹಲವು ಬದಲಾವಣೆ ಮಾಡಿದೆ. ಸತತ ನಾಲ್ಕನೇ ಜಯಿಸಿದ ಆರ್​​ಆರ್​ ಅಗ್ರಸ್ಥಾನಕ್ಕೆ ಲಗ್ಗೆ ಇಟ್ಟರೆ, ಸೋತ ಆರ್​ಸಿಬಿ 8ನೇ ಸ್ಥಾನದಲ್ಲೇ ಮುಂದುವರೆದಿದೆ.

ರಾಜಸ್ಥಾನ್ ರಾಯಲ್ಸ್ ಸತತ 4ರಲ್ಲಿ ಜಯಿಸಿದೆ. ಸಂಜು ಸ್ಯಾಮ್ಸನ್ ನೇತೃತ್ವದ ತಂಡವು 8 ಅಂಕ ಪಡೆದಿದ್ದು, ಕೋಲ್ಕತಾ ನೈಟ್ ರೈಡರ್ಸ್ಅನ್ನು ಹಿಂದಿಕ್ಕಿ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರಿತು. ಕೆಕೆಆರ್ 3ಕ್ಕೆ 3 ಗೆದ್ದು​ 6 ಅಂಕ ಸಂಪಾದಿಸಿ 2ನೇ ಸ್ಥಾನದಲ್ಲಿದೆ.

ರಾಜಸ್ಥಾನ್ ರಾಯಲ್ಸ್ ಅಗ್ರಸ್ಥಾನಕ್ಕೇರಿದ ನಂತರ ಕೋಲ್ಕತಾ ನೈಟ್ ರೈಡರ್ಸ್ 2ನೇ ಸ್ಥಾನಕ್ಕೆ ಕುಸಿದಿದೆ. ಶ್ರೇಯಸ್ ಅಯ್ಯರ್ ಸಾರಥ್ಯದ ತಂಡವು ಅಜೇಯವಾಗಿದ್ದು, ಮೂರಕ್ಕೆ ಮೂರು ಜಯಿಸಿದೆ. ಕೋಲ್ಕತಾ ತನ್ನ ಮುಂದಿನ ಪಂದ್ಯದಲ್ಲಿ ಗೆದ್ದರೆ ಆರ್​ಆರ್ ತಂಡವನ್ನು ಹಿಂದಿಕ್ಕಿ ಮತ್ತೆ ಅಗ್ರಸ್ಥಾನಕ್ಕೇರಲಿದೆ. ಏಕೆಂದರೆ ಆರ್​​ಆರ್​ಗಿಂತ ಕೆಕೆಆರ್ ನೆಟ್​ರನ್ ರೇಟ್ ಉತ್ತಮವಾಗಿದೆ.

ಫಾಫ್ ಡು ಪ್ಲೆಸಿಸ್ ನೇತೃತ್ವದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ 8ನೇ ಸ್ಥಾನದಲ್ಲಿದೆ. ಆಡಿದ 5ರಲ್ಲಿ 1 ಗೆಲುವು, 4 ಸೋಲು ಕಂಡಿದೆ. ಕೇವಲ 2 ಅಂಕ ಸಂಪಾದಿಸಿದೆ.

ಡೆಲ್ಲಿ ಕ್ಯಾಪಿಟಲ್ಸ್ ಮತ್ತು ಮುಂಬೈ ಇಂಡಿಯನ್ಸ್ ತಂಡಗಳು ಕ್ರಮವಾಗಿ 9 ಮತ್ತು 10ನೇ ಸ್ಥಾನದಲ್ಲಿವೆ. ಡೆಲ್ಲಿ ಒಂದಾದರೂ 2 ಅಂಕ ಸಂಪಾದಿಸಿದ್ದರೆ, ಮುಂಬೈ ಇನ್ನೂ ಗೆಲುವಿನ ಖಾತೆ ತೆರೆದಿಲ್ಲ. ಹಾಗಾಗಿ ಏಪ್ರಿಲ್ 7ರಂದು ಉಭಯ ತಂಡಗಳು ಸೆಣಸಾಟ ನಡೆಸಲಿದ್ದು, ಯಾರಿಗೆ ಗೆಲುವು ಸಿಗುತ್ತದೋ ಎಂಬುದನ್ನು ಕಾದು ನೋಡಬೇಕಿದೆ.

ಉಳಿದಂತೆ ಸಿಎಸ್​ಕೆ 3ನೇ ಸ್ಥಾನ, ಲಕ್ನೋ 4ನೇ ಸ್ಥಾನ ಹಾಗೂ ಹೈದರಾಬಾದ್ 5ನೇ ಸ್ಥಾನದಲ್ಲಿದೆ. ಪಂಜಾಬ್ ಕಿಂಗ್ಸ್ ಆರನೇ ಸ್ಥಾನದಲ್ಲಿದ್ದರೆ, ಗುಜರಾತ್ ಟೈಟಾನ್ಸ್ ಏಳನೇ ಸ್ಥಾನದಲ್ಲಿದೆ.