ಕರ್ನಾಟಕ ಐಎಫ್‌ಎಸ್‌ ದಂಪತಿ ಪುತ್ರಿಯ ಅಮೋಘ ಸಾಧನೆ; ಅಂಡರ್​-14 ಏಷ್ಯನ್ ಟೆನಿಸ್ ಪ್ರಶಸ್ತಿ ಗೆದ್ದ ಪದ್ಮ ಪ್ರಿಯ

ಬೆಂಗಳೂರಿನ ಕರ್ನಾಟಕ ರಾಜ್ಯ ಲಾನ್ ಟೆನಿಸ್ ಸಂಸ್ಥೆಯಲ್ಲಿ ನಡೆದ ಅಂಡರ್​-14 ಏಷ್ಯನ್ ಜೂನಿಯರ್​ ಟೂರ್ನಮೆಂಟ್ ಫೈನಲ್ ಪಂದ್ಯದಲ್ಲಿ ಗೆದ್ದ ಐಎಫ್​​ಎಸ್ ಅಧಿಕಾರಿ ರಮೇಶ್​ ಕುಮಾರ್ ಅವರ ಪುತ್ರಿ ಪದ್ಮ ಪ್ರಿಯ​ ಚಾಂಪಿಯನ್ ಪಟ್ಟ ಅಲಂಕರಿಸಿದ್ದಾರೆ.

ಕೆಎಸ್​​ಎಲ್​ಟಿಎ ಟೆನಿಸ್ ಸ್ಟೇಡಿಯಂ ಕೋರ್ಟ್​ 1ರಲ್ಲಿ ಜರುಗಿದ ಫೈನಲ್ ಪಂದ್ಯದಲ್ಲಿ ದಿಯಾ ರವಿಕುಮಾರ್​ ಜಾನಕಿ ವಿರುದ್ಧ 2-6, 3-6 ನೇರ ಸೆಟ್​ಗಳ ಅಂತರದಿಂದ ಗೆದ್ದ ಪದ್ಮ ಪ್ರಿಯ ತನ್ನ ಕನಸಿನ ಪ್ರಶಸ್ತಿಗೆ ಮುತ್ತಿಕ್ಕುವಲ್ಲಿ ಯಶಸ್ವಿಯಾಗಿದ್ದಾರೆ.

ಪ್ರಶಸ್ತಿ ಸುತ್ತಿನ ಪಂದ್ಯದಲ್ಲಿ ಪದ್ಮ ಪ್ರಿಯ ಅವರ ಆಕ್ರಮಣಕಾರಿ ಆಟದ ಎದುರು ರನ್ನರ್​ಅಪ್ ಸ್ಥಾನಕ್ಕೆ ತೃಪ್ತಿಪಟ್ಟ ಜಾನಕಿ ದಿವ್ಯ ಯಾವುದೇ ಹಂತದಲ್ಲೂ ಪ್ರತಿರೋಧ ತೋರಲಿಲ್ಲ. ಇದು ಪದ್ಮ ಪ್ರಿಯ ಮೇಲುಗೈ ಸಾಧಿಸಲು ನೆರವಾಯಿತು.

ಫೈನಲ್ ಪಂದ್ಯಕ್ಕೂ ಮುನ್ನ 2ನೇ ಶ್ರೇಯಾಂಕದಲ್ಲಿದ್ದ ಪದ್ಮ ಪ್ರಿಯ ಅವರು ಇದೀಗ ಪ್ರಶಸ್ತಿಗೆ ಮುತ್ತಿಕ್ಕಿದ ಬೆನ್ನಲ್ಲೇ ಅಗ್ರಸ್ಥಾನಕ್ಕೇರಿದ್ದಾರೆ. ಇದರೊಂದಿಗೆ ಪ್ರಶಸ್ತಿಯ ಜೊತೆಗೆ ನಂಬರ್ 1 ಸ್ಥಾನವೂ ಬೋನಸ್ ಆಗಿ ಸಿಕ್ಕಿದೆ.

ಗುರುವಾರ (ಡಿಸೆಂಬರ್ 12) ನಡೆದಿದ್ದ ಸೆಮಿಫೈನಲ್ ಪಂದ್ಯವು ಮಳೆಯಿಂದ ರದ್ದಾಗಿತ್ತು. ರದ್ದಾದ ಅವಧಿಯಲ್ಲಿ ಕೃಶಿಕಾ ಗೌತಮ್ ವಿರುದ್ಧ 4-0 ಮುನ್ನಡೆ ಸಾಧಿಸಿದ್ದ ಪದ್ಮ ಪ್ರಿಯ ಫೈನಲ್​ಗೆ ಅರ್ಹತೆ ಪಡೆದುಕೊಂಡರು.

ಮತ್ತೊಂದು ಸೆಮೀಸ್​​ನಲ್ಲಿ ನೀಶಾ ಎಂಜಾ ವಿರುದ್ಧ ದಿಯಾ ಜಾನಕಿ  5-1 ಅಂತರದಲ್ಲಿ ಮುನ್ನಡೆ ಸಾಧಿಸಿ ಅಂತಿಮ ಘಟ್ಟಕ್ಕೆ ಅರ್ಹತೆ ಪಡೆದುಕೊಂಡಿದ್ದರು. ಆದರೆ ಫೈನಲ್​ನಲ್ಲಿ ದಿಯಾ ಅವರ​ ಪ್ರಶಸ್ತಿ ಕನಸು ಭಗ್ನಗೊಂಡಿತು.

ಪ್ರಸ್ತುತ ಚಾಂಪಿಯನ್ ಪದ್ಮ ಪ್ರಿಯ ಅವರ ತಂದೆ-ತಾಯಿ ಐಎಫ್​ಎಸ್ ಅಧಿಕಾರಿಗಳು.​ ತಂದೆ ಡಾ. ರಮೇಶ್ ಕುಮಾರ್​. ಅವರು ಮೈಸೂರಿನ ಟೈಗರ್ ಪ್ರಾಜೆಕ್ಟ್​ ನಿರ್ದೇಶಕರಾಗಿ ಸೇವೆ ಸಲ್ಲಿಸುತ್ತಿದ್ದಾರೆ. ತಾಯಿ ಡಾ. ಮಾಲತಿ ಪ್ರಿಯ. ಇವರು ಮೈಸೂರು ಅರಣ್ಯ ವೃತ್ತದ ಸಂರಕ್ಷಣಾಧಿಕಾರಿಯಾಗಿದ್ದಾರೆ.

ಬಾಲ್ಯದಿಂದಲೇ ಟೆನಿಸ್​ನಲ್ಲಿ ಒಲವು. ರಾಜ್ಯ, ದೇಶದ ಹಲವು ಟೂರ್ನಿಗಳಲ್ಲಿ ಗೆದ್ದಿರುವ ಪದ್ಮ ಪ್ರಿಯ, ಭಾರತದ ಭವಿಷ್ಯದ ಟೆನ್ನಿಸ್‌ ಆಟಗಾರ್ತಿಯಾಗುವ ವಿಶ್ವಾಸ ಮೂಡಿಸಿದ್ದಾರೆ.