ಮಹಾ ಕುಂಭಮೇಳಕ್ಕೆ 2 ದಿನಗಳು ಬಾಕಿ, ತಂಡೋಪತಂಡವಾಗಿ ಪ್ರಯಾಗ್‌ರಾಜ್‌ಗೆ ಆಗಮಿಸುತ್ತಿರುವ ನಾಗಾ ಸಾಧುಗಳು; ಫೋಟೋಗಳು

ಮಹಾಕುಂಭಕ್ಕೆ 2 ದಿನಗಳು ಬಾಕಿ ಉಳಿದಿರುವಂತೆ ನಾಗಾಸಾಧುಗಳು ಪ್ರಯಾಗ್‌ರಾಜ್‌ಗೆ ಬಂದು ಸೇರುತ್ತಿದ್ದಾರೆ. ಕಾಳಿ ವೇಷ ಧರಿಸಿ ಬಂದ ನಾಗಾಸಾಧು ಫೋಟೋವೊಂದು ಸೋಷಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗುತ್ತಿದೆ. 
 

ಮತ್ತೊಬ್ಬರು ಸಾಧು ಕಾಲಿಗೆ ಬೂಟುಗಳನ್ನು ಧರಿಸಿ, ರಸ್ತೆಯಲ್ಲಿ ಕತ್ತಿ ವರಸೆ ಮಾಡುತ್ತಿದ್ದದ್ದು ಕೂಡಾ ಎಲ್ಲರ ಗಮನ ಸೆಳೆಯಿತು. ಈ ಬಾರಿಯ ಕುಂಭಮೇಳ ಸುಮಾರು 44 ದಿನಗಳ ಕಾಲ ನಡೆಯಲಿದೆ. 

ಕೆಲವರು ಕುದುರೆ ಮೇಲೆ ಕುಳಿತು ಗದೆ ಹಾಗೂ ಕತ್ತಿಯನ್ನು ಹಿಡಿದಿರುವುದು ಗಮನ ಸೆಳೆಯಿತು. ಕುಂಭಮೇಳವನ್ನು ವೀಕ್ಷಿಸಲು ನಾಗಾಸಾಧುಗಳು ಮಾತ್ರವಲ್ಲದೆ, ವಿಐಪಿಗಳು ಕೂಡಾ ಆಗಮಿಸಲಿದ್ದಾರೆ. 

ಬಹುತೇಕ ನಾಗಾಸಾಧುಗಳು ಹುಲಿ ಚರ್ಮ ಧರಿಸಿ, ಹೂವಿನ ಹಾರಗಳನ್ನು ಹಾಕಿಕೊಂಡ ಮೈಗೆಲ್ಲಾ ವಿಭೂತಿ ಬಳಿದುಕೊಂಡು ಡಮರುಗ ಬಾರಿಸುತ್ತಾ, ಮಹಾಕುಂಭ ನಡೆಯುವ ಸ್ಥಾನಕ್ಕೆ ಆಗಮಿಸುತ್ತಿದ್ದಾರೆ. 

ಬಿಹಾರ್‌, ಜಾರ್ಖಂಡ್‌, ಉತ್ತರಾಖಂಡ್‌ ಸೇರಿದಂತೆ ವಿವಿಧ ಕಡೆಗಳಿಂದ ಮಹಿಳಾ ಕಲ್ಪವಾಸಿಗಳು ಕೂಡಾ ಕುದುರೆ ಮೇಲೆ ಮಹಾಕುಂಭಕ್ಕೆ ಆಗಮಿಸುತ್ತಿರುವುದು ಕಂಡುಬಂತು.

ಹಿರಿಯ ನಾಗಾಸಾಧುವೊಬ್ಬರು ಕುದುರೆ ಮೇಲೆಯೇ ಡೋಲು ಬಾರಿಸುತ್ತಾ, ಕಪ್ಪು ಕನ್ನಡಕ ಧರಿಸಿ ಕುದುರೆ ಏರಿ ಬಂದರು. ಮಹಾಕುಂಭಕ್ಕೆ  ಆಪಲ್‌ನ ಸಹ-ಸಂಸ್ಥಾಪಕ ಮತ್ತು ಮಾಜಿ ಸಿಇಒ ಸ್ಟೀವ್ ಜಾಬ್ಸ್ ಪತ್ನಿ ಲ್ಯೂರೆನ್ ಪೊವೆಲ್ ಜಾಬ್ಸ್ ಕೂಡ ಭಾಗವಹಿಸುತ್ತಿದ್ದಾರೆ ಎನ್ನಲಾಗಿದೆ. 

ಪುಷ್ಯ ಹುಣ್ಣಿಮೆಯಿಂದ ಮಾಘಿ ಹುಣ್ಣಿಮೆಯವರೆಗೆ ಒಂದು ತಿಂಗಳ ಕಾಲ ಕಲ್ಪವಾಸ್‌ ನಡೆಯುತ್ತದೆ. ಈ ಸಮಯದಲ್ಲಿ ಸಾಧು, ಸಂತರು ಬೆಳಗ್ಗೆ ಗಂಗಾನೀರಿನಲ್ಲಿ ಸ್ನಾನ ಮಾಡಿ ಪೂಜೆ, ಭಜನೆಯಲ್ಲಿ ಪಾಲ್ಗೊಳ್ಳಲಿದ್ದಾರೆ. 

ಪ್ರತಿ 12 ವರ್ಷಗಳಿಗೊಮ್ಮೆ ಕುಂಭಮೇಳ ನಡೆಯುತ್ತದೆ, ಆದರೆ 144 ವರ್ಷಗಳಿಗೆ ಒಮ್ಮೆ ಮಹಾಕುಂಭ ಮೇಳ ನಡೆಯಲಿದೆ, ಈ ಬಾರಿ ಪ್ರಯಾಗ್‌ರಾಜ್‌ನಲ್ಲಿ ಮಹಾ ಕುಂಭಮೇಳ ನಡೆಯುತ್ತಿದೆ. 

 ಮಹಾಕುಂಭದಲ್ಲಿ ಗಂಗಾ, ಯುಮನಾ, ಸರಸ್ವತಿ ನದಿಗಳ ತ್ರಿವೇಣಿ ಸಂಗಮದಲ್ಲಿ ಸ್ನಾನ ಮಾಡಿದರೆ ಪಾಪಗಳು ಕಳೆದು ಮೋಕ್ಷ ಪ್ರಾಪ್ತಿಯಾಗಲಿದೆ ಎಂಬ ನಂಬಿಕೆ ಇದೆ. 

ಪ್ರಯಾಗ್‌ರಾಜ್‌ಗೆ ಆಗಮಿಸುತ್ತಿರುವ ನಾಗಾ ಸಾಧುಗಳು