leopard in Infosys: ಹೈಟೆಕ್‌ ತಂತ್ರಜ್ಞಾನ ವಿಚಕ್ಷಣೆಗೂ ಜಗ್ಗದ ಚಿರತೆ; ಮೈಸೂರು ಇನ್ಫೋಸಿಸ್‌ ಕ್ಯಾಂಪಸ್‌ನಲ್ಲಿ ಮತ್ತೆ ರಾತ್ರಿ ವೇಳೆ ಸಂಚಾರ

ಮೈಸೂರು ಇನ್ಫೋಸಿಸ್‌ನ ಹಸಿರು ಕ್ಯಾಂಪಸ್‌ ನಲ್ಲಿ ಚಿರತೆ ಪ್ರವೇಶಿಸಿದ್ದು, ನಾಲ್ಕು ದಿನದ ನಂತರ ರಾತ್ರಿ ಸಿಬ್ಬಂದಿಯೊಬ್ಬರಿಗೆ ಕಾಣಿಸಿಕೊಂಡಿದೆ. ಇದರಿಂದ ಅರಣ್ಯ ಇಲಾಖೆ ಮತ್ತಷ್ಟು ಅಲರ್ಟ್‌ ಆಗಿದೆ.

ನಾಲ್ಕು ದಿನದ ಹಿಂದೆ ಚಿರತೆ ಕ್ಯಾಂಪಸ್‌ನಲ್ಲಿ ಇದ್ದುದು ಸಿಸಿಟಿವಿ ಕ್ಯಾಮರಾದಲ್ಲಿ ಸೆರೆಯಾಗಿತ್ತು. ಆನಂತರ ಅರಣ್ಯ ಇಲಾಖೆ ಕಾರ್ಯಾಚರಣೆ ತೀವ್ರಗೊಳಿಸಿದೆ.

ಶನಿವಾರ ಮಧ್ಯರಾತ್ರಿ ಇನ್ಪೋಸಿಸ್‌ ನ ಆವರಣದಲ್ಲಿ ಕಾರಿನಲ್ಲಿ ಹೋಗುವ ಚಿರತ ಕಂಡ ವಿಡಿಯೋ ದಾಖಲಿಸಿದ್ದು, ಈ ಕಾರಣದಿಂದ ಸಿಬ್ಬಂದಿ ಕ್ಯಾಂಪಸ್‌ ಸುತ್ತಮುತ್ತಲೂ ಹುಡುಕಾಟ ನಡೆಸಿದ್ದಾರೆ.

ಥರ್ಮಲ್‌ ಡ್ರೋಣ್‌ ಅನ್ನು ಬಳಸಿ ಇಡೀ ಪ್ರದೇಶದಲ್ಲಿ ಚಿರತೆ ಎಲ್ಲಿದೆ ಎನ್ನುವುದನ್ನು ಪತ್ತೆ ಮಾಡುವ ಕಾರ್ಯದಲ್ಲಿ ಸಿಬ್ಬಂದಿ ನಿರತರಾಗಿದ್ದಾರೆ. ಆದರೆ ತಂತ್ರಜ್ಞಾನದ ವಿಚಕ್ಷಣೆ ಮೀರಿ ಚಿರತೆ ತಪ್ಪಿಸಿಕೊಂಡು ಅಲ್ಲಿಯೇ ಅಡಗಿರುವುದು ಕಂಡು ಬಂದಿದೆ.

ಮೈಸೂರಿನಲ್ಲಿ  ಚಿರತೆ ಸೆರೆ ಕಾರ್ಯಾಚರಣೆಯಲ್ಲಿ  ಅರಣ್ಯ ಇಲಾಖೆಯ ಚಿರತೆ ಕಾರ್ಯ ಪಡೆ, ಆನೆ ಕಾರ್ಯ ಪಡೆ ಸಿಬ್ಬಂದಿ ಹಾಗೂ ಮೈಸೂರು ಪ್ರಾದೇಶಿಕ ವಲಯದ ಒಟ್ಟು  80 ಸಿಬ್ಬಂದಿಗಳು ಸಂಪೂರ್ಣವಾಗಿ ಸ್ವೀಪ್‌ ಕಾರ್ಯಾಚರಣೆಯಲ್ಲಿ ನಿರತರಾಗಿದ್ದಾರೆ.

ಒಂದು ಚಿರತೆ ಕಾರ್ಯಪಡೆ ತಂಡವನ್ನು ಕ್ಯಾಂಪಸ್ ನಲ್ಲಿಯೇ ನಿಯೋಜಿಸಲಾಗಿದ್ದು, ಕ್ಯಾಮೆರಾ ಟ್ರ್ಯಾಪ್ ಹಾಗೂ ಸಿಸಿಟಿವಿ ಕ್ಯಾಮೆರಾ ಮಾನಿಟರಿಂಗ್ ಮುಂದುವರಿಸಲಾಗುತ್ತಿದೆ ಎಂದು ಅರಣ್ಯ ಇಲಾಖೆ ಮೈಸೂರು ವಿಭಾಗದ ಅಧಿಕಾರಿಗಳು ತಿಳಿಸಿದ್ದಾರೆ.

ಅದರಲ್ಲೂ ಅರಣ್ಯ ಇಲಾಖೆಯ ವಿಶೇಷ ಕಾರ್ಯಪಡೆ ಸಿಬ್ಬಂದಿ, ಇನ್ಫೋಸಿಸ್‌ ನ ಭದ್ರತಾ ಸಿಬ್ಬಂದಿ ಕೂಡ 350 ಎಕರೆ ವಿಶಾಲ ಪ್ರದೇಶದಲ್ಲಿರುವ ಮೈಸೂರು ಇನ್ಫೋಸಿಸ್‌ ಕ್ಯಾಂಪಸ್‌ನಲ್ಲಿ ಗಸ್ತು ನೆಡಸುತ್ತಿದ್ದಾರೆ.