ನನ್ನಿಂದ ನನ್ನ ಅಭಿಮಾನಿಗಳಿಗೆ ತುಂಬಾ ಬೇಸರವಾಗಿದೆ; ವಿರಾಟ್ ಕೊಹ್ಲಿ ಬಾಯಲ್ಲಿ ಇಂಥಾ ಮಾತು ಬಂದಿದ್ದೇಕೆ?

ಬೆಂಗಳೂರಿನ ಚಿನ್ನಸ್ವಾಮಿ ಮೈದಾನದಲ್ಲಿ ನಡೆದ ಕೋಲ್ಕತ್ತಾ ನೈಟ್​ ರೈಡರ್ಸ್ ವಿರುದ್ಧದ ಪಂದ್ಯದ ವೇಳೆ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಸ್ಟಾರ್ ಬ್ಯಾಟರ್ ವಿರಾಟ್ ಕೊಹ್ಲಿ ಅವರು ಗೌತಮ್ ಗಂಭೀರ್​ ಅವರನ್ನು ಅಪ್ಪಿಕೊಂಡಿದ್ದರ ಕುರಿತು ಪ್ರತಿಕ್ರಿಯೆ ನೀಡಿದ್ದಾರೆ.

ಕೆಕೆಆರ್​ ಮತ್ತು ಆರ್​ಸಿಬಿ ಪಂದ್ಯದ ನಡುವೆ ಕೊಹ್ಲಿ ಹಾಗೂ ಗಂಭೀರ್‌ ಪರಸ್ಪರ ಅಪ್ಪಿಕೊಂಡಿದ್ದರು. ಇದೀಗ ಈ ಕುರಿತು ವಿರಾಟ್​ ಮೊದಲ ಬಾರಿಗೆ ಮಾತನಾಡಿದ್ದಾರೆ. ಅಭಿಮಾನಿಗಳು ನನ್ನಿಂದ ತುಂಬಾ ಬೇಸರಗೊಂಡಿದ್ದಾರೆ ಎಂದು ಹೇಳಿದ್ದಾರೆ.

2023ರ ಐಪಿಎಲ್​ನಲ್ಲಿ ಆರ್​ಸಿಬಿ ಮತ್ತು ಎಲ್​ಎಸ್​ಜಿ ಪಂದ್ಯದ ನಂತರ ಕೊಹ್ಲಿ ಮತ್ತು ಗಂಭೀರ್‌ ಮಧ್ಯೆ ದೊಡ್ಡ ಜಗಳ ಆಗಿತ್ತು. 2024ರ ಐಪಿಎಲ್‌ಗೂ ಮುನ್ನ ಎಲ್​ಎಸ್​ಜಿಗೆ ಗಂಭೀರ್‌ ಮೆಂಟರ್‌ ಆಗಿದ್ದರು. ಪ್ರಸ್ತುತ ಐಪಿಎಲ್​ನಲ್ಲಿ ಕೆಕೆಆರ್​ ಮೆಂಟರ್​ ಆಗಿದ್ದಾರೆ.

ಕಳೆದ ವರ್ಷದ ಜಗಳ ಮಾಡಿಕೊಂಡಿದ್ದ ಕಾರಣ ಈ ವರ್ಷವೂ ಅಭಿಮಾನಿಗಳು ಅಂತಹದ್ದೇ ಏನಾದರೂ ನಡೆಯುತ್ತದೆ ಎಂದು ಅಭಿಮಾನಿಗಳು ನಿರೀಕ್ಷಿಸಿದ್ದರು. ಆದರೆ ಆಗಿದ್ದೇ ಬೇರೆ. ಕೊಹ್ಲಿ ಮತ್ತು ಗಂಭೀರ್​ ಇಬ್ಬರು ಅಪ್ಪಿಕೊಂಡು ಉತ್ತಮ ಸಂದೇಶ ರವಾನಿಸಿದ್ದರು.

ಕೆಕೆಆರ್​ ವಿರುದ್ಧ ಮೊದಲು ಬ್ಯಾಟಿಂಗ್ ನಡೆಸಿದ್ದ ಆರ್‌ಸಿಬಿ ಪರ ವಿರಾಟ್‌, ಅರ್ಧಶತಕ ಬಾರಿಸಿದ್ದರು. ಡ್ರಿಂಕ್ಸ್ ಬ್ರೇಕ್‌ ವೇಳೆ ಕೆಕೆಆರ್​​ ಆಟಗಾರರಿಗೆ ಸಲಹೆ ನೀಡಲು ಬಂದಿದ್ದ ಗಂಭೀರ್‌, ಪಕ್ಕದಲ್ಲಿದ್ದ ಕೊಹ್ಲಿಯನ್ನು ಅಭಿನಂದಿಸಿ ಅಪ್ಪಿಕೊಂಡಿದ್ದರು.

ಈ ಘಟನೆ ಕುರಿತು ಪ್ರತಿಕ್ರಿಯಿಸಿದ ಕೊಹ್ಲಿ, ನನ್ನಿಂದ ನನ್ನ ಅಭಿಮಾನಿಗಳಿಗೆ ತೀವ್ರ ಬೇಸರವಾಗಿದೆ. ನನ್ನ ಮತ್ತು ಗಂಭೀರ್ ಅವರಿಂದ ಅಭಿಮಾನಿಗಳು 'ಮಸಾಲಾ' ಸಂಗತಿಗಳನ್ನು ನಿರೀಕ್ಷಿಸಿದ್ದರು. ಆದರೆ, ನಮ್ಮ ನಡೆಯಿಂದ ಅಭಿಮಾನಿಗಳಿಗೆ ಬೇಸರವಾಯಿತು ಎಂದು ಹೇಳಿದ್ದಾರೆ.

ಈ ಹಿಂದೆ ನವೀನ್ ಉಲ್ ಹಕ್ ಅವರನ್ನೂ ಹಗ್ ಮಾಡಿದ್ದೆ. ಗಂಭೀರ್​ ಬಾಯ್ ಅವರನ್ನು ಅಪ್ಪಿಕೊಂಡೆ. ಇದರಿಂದಾಗಿ ಜನರಿಗೆ ಮಸಾಲೆ ಸಿಗದಂತಾಗಿದೆ ಎಂದು ಕೊಹ್ಲಿ ಹೇಳಿಕೆ ನೀಡಿದ್ದಾರೆ.

ಪ್ರಸಕ್ತ ಐಪಿಎಲ್​ನಲ್ಲಿ ವಿರಾಟ್ ಕೊಹ್ಲಿ ಆರೆಂಜ್ ಕ್ಯಾಪ್ ಹೋಲ್ಡರ್​ ಆಗಿದ್ದಾರೆ. ಅಡಿರುವ 6 ಪಂದ್ಯಗಳಲ್ಲಿ 2 ಅರ್ಧಶತಕ ಮತ್ತು 1 ಶತಕ ಸಹಿತ 319 ರನ್ ಗಳಿಸಿದ್ದಾರೆ.

ಕ್ಷಣಕ್ಷಣದ ಅಪ್ಡೇಟ್ಸ್​ಗಾಗಿ ಹಿಂದೂಸ್ತಾನ್ ಟೈಮ್ಸ್ ಕನ್ನಡದ ಓದಿ.