ತನ್ನ ನೆಚ್ಚಿನ ಆಟಗಾರ ವಿರಾಟ್ ಕೊಹ್ಲಿ ಕೆಣಕಿದ್ದರ ಬಗ್ಗೆ ಕೊನೆಗೂ ಮೌನ ಮುರಿದ ಸ್ಯಾಮ್ ಕಾನ್ಸ್ಟಾಸ್

ಬಾರ್ಡರ್​ ಗವಾಸ್ಕರ್ ಟ್ರೋಫಿಯಲ್ಲಿ 4ನೇ ಟೆಸ್ಟ್​ ಅಥವಾ ಬಾಕ್ಸಿಂಗ್ ಡೇ ಟೆಸ್ಟ್ ಪಂದ್ಯದಲ್ಲಿ ಭಾರತ ವಿರುದ್ಧ ಆಸ್ಟ್ರೇಲಿಯಾ ಪರ ಪದಾರ್ಪಣೆ ಮಾಡಿದ 19 ವರ್ಷದ ಸ್ಯಾಮ್​ ಕಾನ್ಸ್ಟಾಸ್ ಅವರು ಸೂಪರ್​ ಸ್ಟಾರ್ ವಿರಾಟ್ ಕೊಹ್ಲಿ ಜತೆಗಿನ ವಾಗ್ವಾದದ ಕುರಿತು ಪ್ರತಿಕ್ರಿಯೆ ನೀಡಿದ್ದಾರೆ.

ಪದಾರ್ಪಣೆ ಪಂದ್ಯದಲ್ಲೇ ಅರ್ಧಶತಕ ಸಿಡಿಸಿದ ಆಸ್ಟ್ರೇಲಿಯಾದ 2ನೇ ಕಿರಿಯ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾದ ಹದಿಹರೆಯದ ಸ್ಯಾಮ್ ಕಾನ್ಸ್ಟಾಸ್ ಅವರ ಫೇವರಿಟ್ ಕ್ರಿಕೆಟರ್ ಕೊಹ್ಲಿ ಅಂತೆ. ಸ್ಯಾಮ್ 60 ರನ್ (65 ಎಸೆತ, 6 ಫೋರ್, 2 ಸಿಕ್ಸರ್) ಗಳಿಸಿ ಔಟಾದರು.

ಮೆಲ್ಬೋರ್ನ್ ಕ್ರಿಕೆಟ್ ಮೈದಾನದಲ್ಲಿ ನಡೆಯುತ್ತಿರುವ ಈ ಪಂದ್ಯದಲ್ಲಿ 10ನೇ ಓವರ್​​ ವೇಳೆ ವಿರಾಟ್ ಕೊಹ್ಲಿ ಉದ್ದೇಶಪೂರ್ವಕವಾಗಿ ಗುದ್ದಿ ಕಾನ್ಸ್ಟಾಸ್​ರನ್ನು ಕೆಣಕಿದ್ದರು. ಇದು ಇಬ್ಬರ ನಡುವಿನ ವಾಗ್ವಾದಕ್ಕೂ ಕಾರಣವಾಯಿತು. ಕೊಹ್ಲಿ ನಡೆ ಆಕ್ರೋಶಕ್ಕೆ ಕಾರಣವಾಗಿತ್ತು.

ಘಟನೆಯ ಬೆನ್ನಲ್ಲೇ ವಿರಾಟ್ ಕೊಹ್ಲಿ ಅವರಿಗೆ ಅಂತಾರಾಷ್ಟ್ರೀಯ ಕ್ರಿಕೆಟ್ ಕೌನ್ಸಿಲ್​ ದಂಡದ ಶಿಕ್ಷೆ ವಿಧಿಸಿದೆ. ಪಂದ್ಯದ ಶುಲ್ಕದ ಶೇ 20 ರಷ್ಟು ದಂಡದ ಜೊತೆಗೆ ಒಂದು ಡಿಮೆರಿಟ್​ ಅಂಕವನ್ನು ನೀಡಿದೆ. ಅಂಪೈರ್​ಗಳು ಶಿಕ್ಷೆಗೆ ಮ್ಯಾಚ್​ ರೆಫ್ರಿಗೆ ದೂರು ನೀಡಿದ್ದರು.

ವಿರಾಟ್ ಕೊಹ್ಲಿ ತನ್ನ ಕೆಣಕಿದ್ದರ ನಡುವೆಯೂ ಸ್ಯಾಮ್ ಕಾನ್ಸ್ಟಾಸ್​, ತನ್ನ ನೆಚ್ಚಿನ ಆಟಗಾರ ಎಂದು ಹೇಳಿದ್ದಾರೆ. ಅಲ್ಲದೆ, ಕೊಹ್ಲಿ ಮತ್ತು ತನ್ನ ನಡುವಿನ ಏನಾಯಿತು ಎಂಬುದರ ಕುರಿತು ಕಾನ್ಸ್ಟಾಸ್ ವಿವರಣೆ ನೀಡಿದ್ದಾರೆ. ಅದರ ಬಗ್ಗೆ ಇಲ್ಲಿದೆ ನೋಡಿ.

ವಿರಾಟ್ ಕೊಹ್ಲಿ ಸ್ಲೆಡ್ಜಿಂಗ್ ಮಾಡಿದ್ದರೂ ಯಾವುದೇ ದೂರುಗಳನ್ನು ನೀಡದ ಕಾನ್ಸ್ಟಾಸ್, ಆಟದಲ್ಲಿ ಇದೆಲ್ಲವೂ ಸಹಜ ಎಂದು ಹೇಳಿದ್ದಾರೆ. ಇಬ್ಬರಿಗೂ ಒಂದೇ ರೀತಿಯ ಭಾವನೆಗಳಿವೆ ಎಂದು ಭಾವಿಸುತ್ತೇನೆ. ನನಗೆ ಆ ಕ್ಷಣದಲ್ಲಿ ಏನಾಗ್ತಿದೆ ಎಂದು ಅರ್ಥವಾಗಲಿಲ್ಲ ಎಂದು  ಕಾನ್ಸ್ಟಾಸ್ ಚಾನೆಲ್​-7 ಕ್ರಿಕೆಟ್‌ಗೆ ತಿಳಿಸಿದ್ದಾರೆ. ಈ ವೇಳೆ ನಿರೂಪಕ ನಿಮ್ಮ ಫೇವರಿಟ್ ಕ್ರಿಕೆಟರ್​ ಜೊತೆಗಿನ ವಾಗ್ವಾದಕ್ಕೆ ಏನು ಹೇಳುತ್ತೀರಿ ಎಂದು ಪ್ರಶ್ನೆ ಕೇಳಿದ್ದಾರೆ.

ಇದೇ ವೇಳೆ ಬುಮ್ರಾ ವಿರುದ್ಧ ಆಡಿದ್ದರ ಕುರಿತು ಮಾತನಾಡಿದ ಕಾನ್ಸ್ಟಾಸ್, ಖಂಡಿತವಾಗಿಯೂ ಬುಮ್ರಾ ವಿಶ್ವದರ್ಜೆಯ ಬೌಲರ್​ ಎನ್ನುವುದರಲ್ಲಿ ಅನುಮಾನವೇ ಇಲ್ಲ. ಆದರೆ ಅವರ (ಬುಮ್ರಾ) ತಂತ್ರಗಳನ್ನು ಬದಲಿಸಲು ನಾನು ಒತ್ತಡ ಹೇರಲು ಪ್ರಯತ್ನಿಸಿದ್ದು ತುಂಬಾ ಖುಷಿ ಕೊಟ್ಟಿತು ಎಂದು ಪ್ರತಿಕ್ರಿಯಿಸಿದ್ದಾರೆ.

ಬುಮ್ರಾರ ಒಂದೇ ಓವರ್​​​ನಲ್ಲಿ ಕಾನ್ಸ್ಟಾಸ್ ಅವರು 18 ರನ್ ಸಿಡಿಸಿದರು. ಕಾನ್ಸ್ಟಾಸ್ ಅವರು ಸಿಡಿಸಿದ 60 ರನ್​ಗಳ ಪೈಕಿ ಬುಮ್ರಾ ಅವರ ಬೌಲಿಂಗ್​​ನಲ್ಲೇ 34 ರನ್ ಬಂದಿರುವುದು ವಿಶೇಷ.

4ನೇ ಟೆಸ್ಟ್​​ನ ಮೊದಲ ದಿನದ ಅಂತ್ಯಕ್ಕೆ ಆಸ್ಟ್ರೇಲಿಯಾ 86 ಓವರ್​​ಗಳಲ್ಲಿ 6 ವಿಕೆಟ್ ನಷ್ಟಕ್ಕೆ 311 ರನ್ ಪೇರಿಸಿದೆ. ಸ್ಯಾಮ್ ಕಾನ್ಸ್ಟಾಸ್ 60, ಉಸ್ಮಾನ್ ಖವಾಜ 57, ಮಾರ್ನಸ್ ಲಬುಶೇನ್ 72 ರನ್ ಗಳಿಸಿದ್ದಾರೆ. ಆದರೆ, ಸ್ಟೀವ್ ಸ್ಮಿತ್ ಅಜೇಯ 68 ರನ್ ಸಿಡಿಸಿ 2ನೇ ದಿನಕ್ಕೆ ಬ್ಯಾಟಿಂಗ್ ಕಾಯ್ದುಕೊಂಡಿದ್ದಾರೆ.