ಸಾರಾ ತೆಂಡೂಲ್ಕರ್​ ಮತ್ತು ಸನಾ ಗಂಗೂಲಿ: ಸಚಿನ್-ಸೌರವ್ ಪುತ್ರಿಯರ ವಿದ್ಯಾರ್ಹತೆ ಏನು? ಇಬ್ಬರ ಪರಿಚಯ ಇಲ್ಲಿದೆ

ಸಚಿನ್ ತೆಂಡೂಲ್ಕರ್​ ಮತ್ತು ಸೌರವ್ ಗಂಗೂಲಿ ಭಾರತೀಯ ಕ್ರಿಕೆಟ್​ನ ದಿಗ್ಗಜರು. ಅವರಿಬ್ಬರ ಸಾಧನೆಗಳು ಅನನ್ಯ, ಅಮೋಘ.

ನಿವೃತ್ತರಾಗಿ ಹಲವು ವರ್ಷಗಳಾದರೂ, ಅವರ ಹೆಸರುಗಳು ಆಗಾಗ್ಗೆ ಸದ್ದು ಮಾಡುತ್ತಿರುತ್ತವೆ. ಹೆಚ್ಚಾಗಿ ಅವರ ಮಕ್ಕಳಿಂದ. ಈಗ ದಿಗ್ಗಜ ಕ್ರಿಕೆಟಿಗರಿಬ್ಬರ ಹೆಣ್ಣು ಮಕ್ಕಳ ಪರಿಚಯ ನೋಡೋಣ.

ಸಚಿನ್ ಅವರ 27 ವರ್ಷದ ಮಗಳು ಸಾರಾ ತೆಂಡೂಲ್ಕರ್. ಸೌರವ್ ಗಂಗೂಲಿ ಅವರ 23 ವರ್ಷದ ಮಗಳ ಹೆಸರು ಸನಾ. ಸಾರಾ ಮತ್ತು ಸನಾ ವಿದ್ಯಾರ್ಹತೆ ಏನಿದೆ? ಇಲ್ಲಿದೆ ವಿವರ.

1997ರ ಅಕ್ಟೋಬರ್​​ 12ರಂದು ಸಾರಾ ಮುಂಬೈನಲ್ಲಿ ಹುಟ್ಟಿದರು. ಸಾರಾ ತಮ್ಮ ಪ್ರಾಥಮಿಕ ಶಿಕ್ಷಣ ಮುಗಿಸಿದ್ದು ಧೀರೂಭಾಯಿ ಅಂಬಾನಿ ಇಂಟರ್ನ್ಯಾಷನಲ್ ಸ್ಕೂಲ್​​ನಲ್ಲಿ.

ತನ್ನ ತಾಯಿಯ ವೈದ್ಯಕೀಯ ವೃತ್ತಿಯಿಂದ ಪ್ರೇರಿತವಾದ ಸಾರಾ, ಆರೋಗ್ಯ ಕ್ಷೇತ್ರದಲ್ಲಿ ಆಸಕ್ತಿ ತೋರಿದರು. ನಂತರ ಬಯೋಮೆಡಿಕಲ್ ಸೈನ್ಸ್​​ನಲ್ಲಿ ಪದವಿ ಪಡೆದರು.

ಬಳಿಕ ಲಂಡನ್‌ನಲ್ಲಿ ತನ್ನ ಶೈಕ್ಷಣಿಕ ಪ್ರಯಾಣ ಪ್ರಾರಂಭಿಸಿದರು. ಯೂನಿವರ್ಸಿಟಿ ಕಾಲೇಜ್ ಲಂಡನ್‌ನಿಂದ ಕ್ಲಿನಿಕಲ್ ಮತ್ತು ಪಬ್ಲಿಕ್ ಹೆಲ್ತ್ ನ್ಯೂಟ್ರಿಷನ್‌ನಲ್ಲಿ ಸ್ನಾತಕೋತ್ತರ ಪದವಿ ಪಡೆದರು.

ಸನಾ ಗಂಗೂಲಿ ಕೋಲ್ಕತ್ತಾದ ಲೊರೆಟೊ ಹೌಸ್ ಸ್ಕೂಲ್​ನಲ್ಲಿ ತಮ್ಮ ಶಾಲಾ ಶಿಕ್ಷಣವನ್ನು ಮುಗಿಸಿದರು. ಬಳಿಕ ಇಂಗ್ಲೆಂಡ್​ನ ಆಕ್ಸ್​ಫರ್ಡ್​ ಕಾಲೇಜಿನಲ್ಲಿ ಕಾಲೇಜು ಶಿಕ್ಷಣ ಮುಂದುವರೆಸಿದರು.

ಬಳಿಕ ಲಂಡನ್​ನ ಯೂನಿವರ್ಸಿಟಿ ಕಾಲೇಜ್ ಲಂಡನ್​ನಲ್ಲಿ ಅರ್ಥಶಾಸ್ತ್ರದಲ್ಲಿ (ಬಿಎಸ್ಸಿ) ಪದವಿ ಪಡೆದರು. ಇದೇ ಅವಧಿಯಲ್ಲಿ ದೊಡ್ಡ ದೊಡ್ಡ ಕಂಪನಿಗಳಲ್ಲಿ ವಿವಿಧ ಇಂಟರ್ನ್‌ಶಿಪ್‌ ಮಾಡಿದ್ದರು.

ರೂಪದರ್ಶಿಯಾಗಿರುವ ಸಾರಾ ಅವರು ಸಚಿನ್ ತೆಂಡೂಲ್ಕರ್ ಫೌಂಡೇಶನ್‌ ನಿರ್ದೇಶಕಿಯೂ ಆಗಿದ್ದಾರೆ. 2021ರಲ್ಲಿ ಮಾಡೆಲಿಂಗ್‌ಗೆ ಧುಮುಕಿದ್ದರು. ಅಂತಾರಾಷ್ಟ್ರೀಯ ಫ್ಯಾಷನ್ ಈವೆಂಟ್​ಗಳಲ್ಲೂ ತಮ್ಮ ಪ್ರತಿಭೆಯನ್ನು ಪ್ರದರ್ಶಿಸಿದ್ದಾರೆ.

ಸನಾ ಗಂಗೂಲಿ, ಪ್ರಸ್ತುತ INNOVERVನಲ್ಲಿ ಸಲಹೆಗಾರರಾಗಿ ಕೆಲಸ ಮಾಡುತ್ತಿದ್ದಾರೆ ಎಂದು ಅವರ ಲಿಂಕ್ಡ್‌ಇನ್ ಪ್ರೊಫೈಲ್‌ನಲ್ಲಿ ತಿಳಿಸಲಾಗಿದೆ. ಇಲ್ಲಿ ಅವರ ತಿಂಗಳ ಸಂಬಳ ಲಕ್ಷಗಟ್ಟಲೇ ಇದೆ ಎಂದು ತಿಳಿದು ಬಂದಿದೆ.

ಕ್ಷಣ ಕ್ಷಣದ ಕ್ರಿಕೆಟ್ ಸುದ್ದಿಗಳ ಅಪ್ಡೇಟ್ಸ್​ಗಾಗಿ ಹಿಂದೂಸ್ತಾನ್ ಟೈಮ್ಸ್ ಕನ್ನಡ ಓದಿ.