ಐಟಿ ಆಫೀಸರ್‌ ಪ್ರಿಯಾಂಕಾ ಇಂಗ್ಳೆ ನಾಯಕತ್ವದಲ್ಲಿ ಖೋ ಖೋ ವಿಶ್ವಕಪ್ ಗೆದ್ದ ಭಾರತ; ಮರಾಠಿ ಸುಂದರಿ ಈಗ ಮನೆಮಾತು

ವಿಶ್ವಕಪ್‌ನಲ್ಲಿ ಭಾರತ ಖೋ ಖೋ ತಂಡ ಇತಿಹಾಸ ನಿರ್ಮಿಸಿತು. ಭಾರತ ತಂಡವು ಚೊಚ್ಚಲ ಖೋ-ಖೋ ವಿಶ್ವಕಪ್‌ನಲ್ಲಿ ಇತಿಹಾಸ ಸೃಷ್ಟಿಸಿದೆ. ಮಹಿಳಾ ಮತ್ತು ಪುರುಷರ ತಂಡಗಳು ವಿಶ್ವಕಪ್ ಗೆದ್ದಿವೆ. ಈ ನಡುವೆ ಭಾರತೀಯ ಮಹಿಳಾ ತಂಡದ ನಾಯಕಿ, ಮಹಾರಾಷ್ಟ್ರದ ಪ್ರಿಯಾಂಕಾ ಗಮನ ಸೆಳೆದರು.

ಮರಾಠಿ ಹುಡುಗಿ ಪ್ರಿಯಾಂಕಾ ಇಂಗ್ಳೆ ನೇತೃತ್ವದ ಭಾರತೀಯ ಮಹಿಳಾ ತಂಡವು 2025ರ ಖೋ-ಖೋ ವಿಶ್ವಕಪ್ ಗೆದ್ದ ಬೆನ್ನಲ್ಲೇ ಪ್ರಶಂಸೆಗಳ ಮಹಾಪೂರವೇ ಹರಿದು ಬರುತ್ತಿದೆ.

ಪ್ರಿಯಾಂಕಾ ಅವರ ತಂದೆ ಬೀಡ್ ಜಿಲ್ಲೆಯ ಕೇಜ್ ತಾಲ್ಲೂಕಿನ ಕಲಾಂಬ ಗ್ರಾಮದವರು. ಕುಟುಂಬವನ್ನು ಆರ್ಥಿಕವಾಗಿ ಮುನ್ನಡೆಸಲು ಅವರು ಪುಣೆಗೆ ತೆರಳಿದರು. ಪ್ರಿಯಾಂಕಾ ಜನಿಸಿದ್ದು ಕೂಡಾ ಪುಣೆಯಲ್ಲೇ.

ಪುಣೆಯ ಪಿಂಪ್ರಿ ಚಿಂಚ್‌ವಾಡ್‌ನಲ್ಲಿ ಪ್ರಿಯಾಂಕಾ ತಮ್ಮ ಪ್ರಾಥಮಿಕ ಶಿಕ್ಷಣ ಪೂರೈಸಿದರು. ಪ್ರಿಯಾಂಕಾ ಅವರ ಓಟದ ವೇಗ ಮತ್ತು ಚುರುಕುತನದಿಂದಾಗಿ ಅವರು ವಿವಿಧ ಸ್ಪರ್ಧೆಗಳಿಗೆ ಆಯ್ಕೆಯಾದರು. ಇದುವೇ ಅವರನ್ನು ಖೋ ಖೋ ಆಡುವಂತೆ ಪ್ರೇರೇಪಿಸಿತು.

2023ರಲ್ಲಿ ನಡೆದ 4ನೇ ಏಷ್ಯನ್ ಖೋ ಖೋ ಚಾಂಪಿಯನ್‌ಶಿಪ್‌ನಲ್ಲಿ ಪ್ರಿಯಾಂಕಾ ಚಿನ್ನದ ಪದಕ ಗೆದ್ದರು. 2022ರ ಆರಂಭದಲ್ಲಿ ಅವರಿಗೆ ರಾಷ್ಟ್ರಮಟ್ಟದಲ್ಲಿ ರಾಣಿ ಲಕ್ಷ್ಮೀಬಾಯಿ ಪ್ರಶಸ್ತಿಯೂ ಸಿಕ್ಕಿತು.

15 ವರ್ಷ ವಯಸ್ಸಿನಲ್ಲೇ ಖೋ-ಖೋದಲ್ಲಿ ಗಮನಾರ್ಹ ಪ್ರದರ್ಶನ ನೀಡಿದ ಅವರು ತಮ್ಮ ವೃತ್ತಿಜೀವನದಲ್ಲಿ 23 ರಾಷ್ಟ್ರೀಯ ಸ್ಪರ್ಧೆಗಳಲ್ಲಿ ಭಾಗವಹಿಸಿದ್ದಾರೆ. ಅವರು ವಾಣಿಜ್ಯದಲ್ಲಿ ಸ್ನಾತಕೋತ್ತರ ಪದವಿ ಪಡೆದಿದ್ದಾರೆ.

ಪ್ರಿಯಾಂಕಾ ಪ್ರಸ್ತುತ ಮುಂಬೈನ ಆದಾಯ ತೆರಿಗೆ ಇಲಾಖೆಯಲ್ಲಿ ಕೆಲಸ ಮಾಡುತ್ತಿದ್ದಾರೆ. ಪ್ರಿಯಾಂಕಾ ಆದಾಯ ತೆರಿಗೆ ಇಲಾಖೆಯಲ್ಲಿ ಸಹಾಯಕರಾಗಿ ಕೆಲಸ ಮಾಡುತ್ತಿದ್ದಾರೆ.

ಪ್ರಿಯಾಂಕಾ ಅವರಿಗೆ ಇತ್ತೀಚೆಗೆ ಮಹಾರಾಷ್ಟ್ರ ಸರ್ಕಾರವು ಕ್ರೀಡಾ ಇಲಾಖೆಯಲ್ಲಿ ಗ್ರೇಡ್ 2 ಮಟ್ಟದ ಕೆಲಸವನ್ನು ನೀಡಿದೆ.