ಭಾರತದಲ್ಲಿ ಇಂದಿನ ಬೆಳ್ಳಿ ಬೆಲೆಗಳು

ಅಮೂಲ್ಯ ಲೋಹ ಎನಿಸಿಕೊಂಡರೂ ಚಿನ್ನಕ್ಕೆ ಹೋಲಿಸಿದರೆ ಬೆಳ್ಳಿಯ ಬೆಲೆ ಅಗ್ಗ. ಒಂದು ಗ್ರಾಂ ಬೆಳ್ಳಿಯು 100 ರೂಪಾಯಿ ಒಳಗೆ ಸಿಗುತ್ತದೆ. ನೀವು ಒಂದು ಕೆಜಿ ಬೆಳ್ಳಿಯನ್ನು 1 ಲಕ್ಷ ರೂಪಾಯಿಗಿಂತಲೂ ಕಡಿಮೆ ಬೆಲೆಯಲ್ಲಿ ಖರೀದಿಸಬಹುದು. ಒಂದು ಕೆಜಿ ಬೆಳ್ಳಿಯ ಧಾರಣೆಗೆ 10 ಗ್ರಾಮ್ ಅಷ್ಟೇ ಚಿನ್ನ ಖರೀದಿಸಲು ಸಾಧ್ಯವಿದೆ.

ಚಿನ್ನಕ್ಕಿಂತ ಬೆಳ್ಳಿಗೆ ಯಾವಾಗಲೂ ಹೆಚ್ಚಿನ ಬೇಡಿಕೆ ಇರುತ್ತದೆ. ಏಕೆಂದರೆ ಇದರ ಬಳಕೆ ಕೇವಲ ಆಭರಣ ವಸ್ತುಗಳಿಗೆ ಸೀಮಿತವಾಗಿಲ್ಲ. ಕೈಗಾರಿಕಾ ಮತ್ತು ವಾಣಿಜ್ಯ ಸಂಸ್ಥೆಗಳು ಕೆಲವು ಉತ್ಪನ್ನಗಳನ್ನು ತಯಾರಿಸಲು ಸಹ ಬೆಳ್ಳಿಯನ್ನು ಬಳಸುತ್ತವೆ. ಬೆಳ್ಳಿಗೆ ಬೇಡಿಕೆ ಹೆಚ್ಚಿರುವುದರಿಂದ ಈ ಲೋಹದ ಲಭ್ಯತೆ ಕಡಿಮೆಯಾಗುತ್ತಿದೆ. ಬೆಳ್ಳಿಯಲ್ಲಿ ಹೂಡಿಕೆ ಮಾಡಿದರೆ ಮುಂದಿನ ದಿನಗಳಲ್ಲಿ ಆರ್ಥಿಕವಾಗಿ ಲಾಭ ಪಡೆಯುವ ಸಾಧ್ಯತೆಗಳಿವೆ. ಭಾರತದಲ್ಲಿ ಬೆಳ್ಳಿ ಬೆಲೆಯು ಚಿನ್ನದ ದರಗಳು ಸೇರಿದಂತೆ ವಿವಿಧ ಅಂಶಗಳಿಂದ ಪ್ರಭಾವಿತವಾಗಿರುತ್ತದೆ. ಚಿನ್ನದ ಬೆಲೆ ಏರಿಕೆಯಾದರೆ ಬೆಳ್ಳಿ ಬೆಲೆಯೂ ಅದೇ ಅನುಪಾತದಲ್ಲಿ ಹೆಚ್ಚಾಗುತ್ತದೆ. ದೊಡ್ಡಮಟ್ಟದ ಸಗಟು ಖರೀದಿಗಳು ಬೆಳ್ಳಿ ಬೆಲೆಯ ಮೇಲೂ ಪರಿಣಾಮ ಬೀರುತ್ತವೆ.

ಬ್ಯಾಂಕ್‌ಗಳು, ಆಭರಣ ವ್ಯಾಪಾರಿಗಳು, ಆನ್‌ಲೈನ್ ಏಜೆಂಟ್‌ಗಳ ಮೂಲಕ ಬೆಳ್ಳಿಯನ್ನು ಖರೀದಿಸಬಹುದು. ನೀವು ಬ್ಯಾಂಕಿನಿಂದ ಬೆಳ್ಳಿಯನ್ನು ಖರೀದಿಸುತ್ತಿದ್ದರೆ, ಬ್ಯಾಂಕರ್ ಶುದ್ಧತೆಯ ತಪಾಸಣೆ ನಡೆಸಿ ಖರೀದಿದಾರರಿಗೆ ಭರವಸೆ ನೀಡುವುದರಿಂದ ದರಗಳು ಹೆಚ್ಚಿರುತ್ತವೆ. ಆಭರಣ ತಯಾರಕರು ಮತ್ತು ಆನ್‌ಲೈನ್ ಏಜೆಂಟ್‌ಗಳ ಮೂಲಕವೂ ಬೆಳ್ಳಿಯನ್ನು ಖರೀದಿಸಬಹುದು.

ಬೆಳ್ಳಿ ಗಟ್ಟಿಯು ಶುದ್ಧತೆಯ ಗ್ರೇಡ್ 999.9, 999.5, 999 ರಲ್ಲಿ ಲಭ್ಯವಿದೆ. ಇತರ ಲೋಹಗಳ ಮಿಶ್ರಣವಿರುವ ಬೆಳ್ಳಿಯಿಂದ ಆಭರಣಗಳು ಮತ್ತು ಕಲಾಕೃತಿಗಳನ್ನು ತಯಾರಿಸುತ್ತಾರೆ. ಇಂಥ ಬೆಳ್ಳಿಯ ಶುದ್ಧತೆಯನ್ನು 970, 925, 900, 835 ಎಂದು ವಿಂಗಡಿಸಲಾಗಿದೆ. ಬೆಳ್ಳಿಯನ್ನು ಅದರ ಶುದ್ಧ ರೂಪದಲ್ಲಿ ಬಳಸುವ ಸಾಧ್ಯತೆಗಳು ಬಹಳ ಕಡಿಮೆ. ಆಭರಣ ತಯಾರಕರು ಶೇ 92.5 ಬೆಳ್ಳಿ ಮತ್ತು ಶೇ 7.5 ಇತರ ಲೋಹಗಳ ಮಿಶ್ರಣ ಇರುವ ಸ್ಟರ್ಲಿಂಗ್ ಬೆಳ್ಳಿಯನ್ನು ಬಳಸುತ್ತಾರೆ. ಭಾರತವು ತನ್ನ ಬೆಳ್ಳಿಯ ಅವಶ್ಯಕತೆಗಳನ್ನು ಹೆಚ್ಚಾಗಿ ಆಮದುಗಳ ಮೂಲಕ ಪೂರೈಸಿಕೊಳ್ಳುತ್ತದೆ. ಬೆಳ್ಳಿ ಉತ್ಪಾದನೆಯು ಅದರ ಬೇಡಿಕೆಗಳನ್ನು ಪೂರೈಸಲು ಸಾಕಾಗುವುದಿಲ್ಲ. ಜಾರ್ಖಂಡ್, ಗುಜರಾತ್ ಮತ್ತು ರಾಜಸ್ಥಾನ ರಾಜ್ಯಗಳಲ್ಲಿ ಬೆಳ್ಳಿಯ ಗಣಿ, ಸಂಸ್ಕರಣಾ ಕೇಂದ್ರಗಳಿವೆ.

ಪ್ರಸ್ತುತ, ಭಾರತದಲ್ಲಿ ಚಿನ್ನದ ಆಮದು ಸುಂಕವು ಶೇ 10 ಇದೆ. ಆಮದು ನಿಯಂತ್ರಿಸುವ ಉದ್ದೇಶದಿಂದ ಭಾರತದ ಆಂತರಿಕ ಆರ್ಥಿಕತೆಯನ್ನು ದೃಷ್ಟಿಯಲ್ಲಿರಿಸಿಕೊಂಡು ಕೇಂದ್ರ ಸರ್ಕಾರವು ಆಮದು ಸುಂಕವನ್ನು ನಿರ್ಧರಿಸುತ್ತದೆ.

ಭಾರತವು ಚೀನಾ, ಬ್ರಿಟನ್, ಐರೋಪ್ಯ ಒಕ್ಕೂಟದ ದೇಶಗಳು, ಆಸ್ಟ್ರೇಲಿಯಾ ಮತ್ತು ದುಬೈನಿಂದ ಬೆಳ್ಳಿಯನ್ನು ಆಮದು ಮಾಡಿಕೊಳ್ಳುತ್ತದೆ.