ಫಿಫಾ ವಿಶ್ವಕಪ್​ನಲ್ಲಿ ಮೆಸ್ಸಿ ಧರಿಸಿದ್ದ 6 ಜೆರ್ಸಿಗಳು ಹರಾಜಿಗೆ; ಅವುಗಳ ಮೌಲ್ಯವೇ ಅದೆಷ್ಟೋ ಕೋಟಿ!

ವಿಶ್ವಶ್ರೇಷ್ಠ ಫುಟ್ಬಾಲ್‌ ಆಟಗಾರ, ಅರ್ಜೆಂಟೀನಾ ತಂಡದ ನಾಯಕ ಲಿಯೋನೆಲ್ ಮೆಸ್ಸಿ (Lionel Messi) ಅವರು 2022ರ ಫಿಫಾ ವಿಶ್ವಕಪ್‌ ಟೂರ್ನಿಯಲ್ಲಿ ಧರಿಸಿದ್ದ ಆರು ಜರ್ಸಿಗಳು ಹರಾಜಿಗೆ ಸಿದ್ಧವಾಗಿವೆ. ಆ ಜೆರ್ಸಿಗಳ ಹರಾಜು ಪ್ರಕ್ರಿಯೆ ಡಿಸೆಂಬರ್​​ನಲ್ಲಿ ನಡೆಸುವುದಾಗಿ ಹರಾಜು ಸಂಸ್ಥೆ ಸೊದೆಬಿ ಮಾಹಿತಿ ನೀಡಿದೆ. ಈ 6 ಜೆರ್ಸಿಗಳ ಮೌಲ್ಯ ಬರೋಬ್ಬರಿ 83.36 ಕೋಟಿ ರೂಪಾಯಿ ಎಂದು ಅಂದಾಜಿಸಲಾಗಿದೆ.

ಮೆಸ್ಸಿ ಧರಿಸಿದ್ದ 6 ಜೆರ್ಸಿಗಳ ಪೈಕಿ ಗುಂಪು ಹಂತದಲ್ಲಿ ಎರಡು (ಸೌದಿ ಅರೇಬಿಯಾ ಮತ್ತು ಮೆಕ್ಸಿಕೋ) ಪಂದ್ಯಗಳಲ್ಲಿ ಮತ್ತು ನಾಕೌಟ್​ ಹಂತದಲ್ಲಿ ವೇಳೆ ಧರಿಸಿದ್ದವು. ಕಳೆದ ವರ್ಷ ಕತಾರ್​​ನಲ್ಲಿ ಜರುಗಿದ್ದ ಫಿಫಾ ವಿಶ್ವಕಪ್ ಟೂರ್ನಿಯಲ್ಲಿ ಚಾಂಪಿಯನ್ ಪಟ್ಟ ಅಲಂಕರಿಸಿತು. ಟೂರ್ನಿಯ ಆರಂಭಿಕ ಪಂದ್ಯದಲ್ಲಿ ಸೌದಿ ಅರೇಬಿಯಾ ಎದುರು ಅರ್ಜೆಂಟೀನಾ ಸೋತಿತ್ತು. ಈ ವೇಳೆ ಮೆಸ್ಸಿ ಪಡೆಯನ್ನು ಟೀಕಿಸಿದ್ದರು.

ತದ ನಂತರ ಉಳಿದೆಲ್ಲಾ ಪಂದ್ಯಗಳನ್ನೂ ಗೆದ್ದು ಟ್ರೋಫಿಗೆ ಮುತ್ತಿಕ್ಕಿತ್ತು. ಲಿಯೊನೆಲ್ ಮೆಸ್ಸಿ ಜೆರ್ಸಿಗಳ ಆಕ್ಷನ್ ನವೆಂಬರ್ 30 ರಿಂದ ಡಿಸೆಂಬರ್​ 14ರವರೆಗೂ ಜರುಗಲಿದೆ. ವಿಶ್ವದ ಫುಟ್ಬಾಲ್ ಪ್ರೇಮಿಗಳು ತಮ್ಮ ಫೇವರಿಟ್ ಆಟಗಾರ ಜೆರ್ಸಿ ಹರಾಜಿನಲ್ಲಿ ಪಡೆಯಲು ಜಿದ್ದಾಜಿದ್ದಿನ ಪೈಪೋಟಿಗೆ ಬಿದ್ದಿದ್ದಾರೆ ಎಂದು ಹರಾಜಿಗೆ ಹರಾಜು ತಿಳಿಸಿದೆ. ಮೆಸ್ಸಿ ಅಭಿಮಾನಿಗಳು ಕೂಡ ಹರಾಜನ್ನು ಕಣ್ತುಂಬಿಕೊಳ್ಳಲು ಕಾತರದಿಂದ ಕಾಯುತ್ತಿದ್ದಾರೆ.

ಬ್ಯಾಲನ್ ಡಿ ಓರ್​ ಪ್ರಶಸ್ತಿ ಗೆದ್ದಿದ್ದ ಮೆಸ್ಸಿ

ಕಳೆದ ತಿಂಗಳು ಪ್ರತಿಷ್ಠಿತ ಬ್ಯಾಲನ್ ಡಿ'ಓರ್ ಪ್ರಶಸ್ತಿಯನ್ನು (Ballon d’Or 2023) ಲಿಯೋನೆಲ್​ ಮೆಸ್ಸಿ ಗೆದ್ದಿದ್ದರು. ಇದು ಅವರಿಗೆ ಸಿಕ್ಕ ದಾಖಲೆಯ 8ನೇ ಪ್ರಶಸ್ತಿ. ಈ ಹಿಂದೆ 2009, 2010, 2011, 2012, 2015, 2019 ಮತ್ತು 2021ರಲ್ಲಿ ಬ್ಯಾಲನ್ ಡಿ'ಓರ್ ಪ್ರಶಸ್ತಿಯನ್ನು ಪಡೆದಿದ್ದರು. ಫಿಫಾ ವಿಶ್ವಕಪ್​ನಲ್ಲಿ ತೋರಿದ್ದ ಅದ್ಭುತ ಪ್ರದರ್ಶನದ ಹಿನ್ನೆಲೆಯಲ್ಲಿ ಅತ್ಯುತ್ತಮ ಆಟಗಾರ ಪ್ರಶಸ್ತಿಯನ್ನು ಮುಡಿಗೇರಿಸಿಕೊಂಡಿದ್ದರು.

ವಿಶ್ವಕಪ್ ಬಳಿಕ ಫ್ರಾನ್ಸ್‌ನ ಪ್ಯಾರಿಸ್‌ ಸೈಂಟ್ ಜರ್ಮೈನ್‌ (PSG) ಫುಟ್ಬಾಲ್​ ಕ್ಲಬ್ ತೊರೆದರು. ಆ ಬಳಿಕ ಮೆಸ್ಸಿ, ಅಮೆರಿಕದ ಮಿಯಾಮಿ ತಂಡದ ಪರ ಕಣಕ್ಕಿಳಿದರು. ಅಲ್ಲದೆ, ತಂಡವನ್ನು ಚಾಂಪಿಯನ್ ಪಟ್ಟಕ್ಕೇರಿಸಿದರು. ಮೆಸ್ಸಿ ಬರುವುದಕ್ಕೂ ಮುನ್ನ ಮಿಯಾಮಿ ಹಲವು ಲೀಗ್​​ ಪಂದ್ಯಗಳಲ್ಲಿ ಸೋಲು ಕಂಡಿತ್ತು. ಆದರೆ ಮೆಸ್ಸಿ ತಂಡ ಸೇರಿದ ನಂತರ ತಂಡವು ಅದ್ಭುತ ಪ್ರದರ್ಶನ ನೀಡಿತು.

ಭಾರತಕ್ಕೆ ಮೆಸ್ಸಿ?

ಅರ್ಜೆಂಟೀನಾ ತಂಡವು ಭಾರತ ತಂಡದ ಎದುರು ಸೌಹಾರ್ದ ಪಂದ್ಯವನ್ನಾಡುವ ಸಾಧ್ಯತೆ ಇದೆ. ಮೆಸ್ಸಿ ಪಡೆ ಕೇರಳಕ್ಕೆ ಬರುವ ನಿರೀಕ್ಷೆ ಇದೆ. ಈ ಬಗ್ಗೆ ಕೇರಳ ಸರ್ಕಾರ ಇತ್ತೀಚೆಗಷ್ಟೇ ಮಾಹಿತಿ ಕೊಟ್ಟಿತ್ತು. ಭಾರತದಲ್ಲಿ ಸ್ನೇಹ ಸೌಹಾರ್ದ ಪಂದ್ಯವನ್ನಾಡಲು ಅರ್ಜೆಂಟೀನಾ ತಂಡ ಅಖಿಲ ಭಾರತ ಫುಟ್ಬಾಲ್ ಫೆಡರೇಷನ್​ಗೆ ಪ್ರಸ್ತಾವನೆ ಸಲ್ಲಿಸಿತ್ತು. ಆದರೆ, ಪಂದ್ಯ ಆಯೋಜಿಸಲು ದೊಡ್ಡ ಹಣದ ಅಗತ್ಯ ಇರುವ ಕಾರಣ ಅಖಿಲ ಭಾರತ ಫುಟ್ಬಾಲ್ ಫೆಡರೇಷನ್ ಈ ಮನವಿ ತಿರಸ್ಕರಿಸಿತ್ತು.

ಆದರೆ ತದನಂತರ ಕೇರಳ ಸರ್ಕಾರ ತಮ್ಮ ರಾಜ್ಯದಲ್ಲಿ ಈ ಪಂದ್ಯ ಆಯೋಜನೆಗೆ ಮುಂದೆ ಬಂದಿತ್ತು. ಅರ್ಜೆಂಟೀನಾ ಎದುರು ಭಾರತ ಆಡುವ ಪಂದ್ಯಕ್ಕೆ ಆತಿಥ್ಯ ಕೇರಳ ವಹಿಸಿಕೊಳ್ಳುವುದಾಗಿ ರಾಜ್ಯದ ಸರ್ಕಾರ ತಿಳಿಸಿತ್ತು. ಈ ಬಗ್ಗೆ ಅಧಿಕೃತವಾಗಿಯೂ ಮಾಹಿತಿ ಕೊಟ್ಟಿತ್ತು.

ಈ ಬಗ್ಗೆ ಅರ್ಜೆಂಟೀನಾ ಪುಟ್ಬಾಲ್ ಆಡಳಿತ ಮಂಡಳಿಯೊಂದಿಗೆ ಮಾತುಕತೆ ನಡೆಸಲಾಗಿದೆ. ಬಹುತೇಕ ಅರ್ಜೆಂಟೀನಾ ಭಾರತಕ್ಕೆ ಬರುವುದು ಖಚಿತ. ಪಂದ್ಯಕ್ಕಾಗುವ ಖರ್ಚನ್ನು ನಮ್ಮ ಸರ್ಕಾರವೇ ನೋಡಿಕೊಳ್ಳಲಿದೆ ಎಂದು ಕೇರಳದ ಕ್ರೀಡಾ ಸಚಿವ ವಿ.ಅಬ್ದುರಹಿಮಾನ್ ಎಂದು ಹೇಳಿದ್ದರು. ಆದರೆ ದಿನಾಂಕ ಯಾವಾಗ ಎಂಬುದು ಅಧಿಕೃತಗೊಂಡಿಲ್ಲ.