ಐಎಸ್ಎಲ್ ಫೈನಲ್ ಪಂದ್ಯದ ವೇಳೆ ಪಟಾಕಿ ಸ್ಫೋಟ: ಅಭಿಮಾನಿ, ಕ್ಲಬ್ ಮಾಲೀಕರಿಗೆ ಗಾಯ, ಬೆಂಗಳೂರು ಎಫ್ಸಿ ದೂರು ದಾಖಲು
ಐಎಸ್ಎಲ್ ಫೈನಲ್ ಪಂದ್ಯದ ವೇಳೆ ಪಟಾಕಿ ಸ್ಫೋಟಗೊಂಡಿದ್ದಕ್ಕೆ ಸಂಬಂಧಿಸಿ ಅಭಿಮಾನಿ ಮತ್ತು ಕ್ಲಬ್ ಮಾಲೀಕರಿಗೆ ಗಾಯವಾಗಿದೆ. ಈ ಬಗ್ಗೆ ಎಐಎಫ್ಎಫ್ ಮತ್ತು ಎಫ್ಎಸ್ಡಿಎಲ್ಗೆ ಬೆಂಗಳೂರು ಎಫ್ಸಿ ದೂರು ದಾಖಲಿಸಿದೆ.
ಕೋಲ್ಕತ್ತಾದಲ್ಲಿ ಶನಿವಾರ (ಏಪ್ರಿಲ್ 12) ನಡೆದ ಇಂಡಿಯನ್ ಸೂಪರ್ ಲೀಗ್ನ (ISL 2024-25) ಮೋಹನ್ ಬಗಾನ್ ಸೂಪರ್ ಜೈಂಟ್ ಮತ್ತು ಬೆಂಗಳೂರು ಎಫ್ಸಿ (Bengaluru FC) ಫೈನಲ್ ಪಂದ್ಯದ ನಂತರ ಕ್ರೀಡಾಂಗಣಕ್ಕೆ ಪಟಾಕಿಗಳನ್ನು ಎಸೆದ ಕಿಡಿಗೇಡಿಗಳ ಅಜಾಗರೂಕ ಮತ್ತು ಹೇಡಿತನದ ಕೃತ್ಯವನ್ನು ಬೆಂಗಳೂರು ಎಫ್ಸಿ ಖಂಡಿಸಿದೆ. ಅಖಿಲ ಭಾರತ ಫುಟ್ಬಾಲ್ ಫೆಡರೇಷನ್ (AIFF) ಮತ್ತು ಫುಟ್ಬಾಲ್ ಸ್ಪೋರ್ಟ್ಸ್ ಡೆವಲಪ್‌ಮೆಂಟ್ ಲಿಮಿಟೆಡ್ಗೆ (FSDL) ಔಪಚಾರಿಕ ದೂರು ದಾಖಲಿಸಿದೆ.
ಘಟನೆಯಲ್ಲಿ ಹಲವಾರು ಜನರು ಗಾಯಗೊಂಡಿದ್ದಾರೆ. ಬಿಎಫ್ಸಿ ಅಭಿಮಾನಿಯೊಬ್ಬರ ಕಣ್ಣಿಗೆ ಗಾಯವಾಗಿದ್ದು, ಚಿಕಿತ್ಸೆ ಪಡೆಯುತ್ತಿದ್ದಾರೆ. ಕ್ಲಬ್ ಮಾಲೀಕ ಪಾರ್ಥ್ ಜಿಂದಾಲ್ ಸೇರಿ ಇತರ ಅಭಿಮಾನಿಗಳಿಗೆ ಸುಟ್ಟ ಗಾಯಗಳಾಗಿವೆ. ಈ ಬಗ್ಗೆ ಏಪ್ರಿಲ್ 15ರಂದು ಬಿಎಫ್ಸಿ ಹೇಳಿಕೆ ಬಿಡುಗಡೆ ಮಾಡಿದ್ದು, ಆಕ್ರೋಶ ವ್ಯಕ್ತಪಡಿಸಿದೆ. ಎಐಎಫ್ಎಫ್ ಮತ್ತು ಎಫ್ಎಸ್ಡಿಎಲ್ಗೆ ಬಿಎಫ್ಸಿ ಔಪಚಾರಿಕ ದೂರು ದಾಖಲಿಸಿದೆ. ಕ್ರೀಡಾಂಗಣಗಳಲ್ಲಿ ಅಭಿಮಾನಿಗಳ ಸುರಕ್ಷತಾ ಮಾನದಂಡಗಳ ಕ್ರಮ ಕೈಗೊಳ್ಳುವುದಕ್ಕೆ ಸಂಬಂಧಿಸಿ ಫೆಡರೇಶನ್ ಮತ್ತು ಲೀಗ್‌ನೊಂದಿಗೆ ನಿಕಟ ಸಂಪರ್ಕದಲ್ಲಿದ್ದೇವೆ ಎಂದಿದೆ.
ಇಂತಹ ಕ್ರಮಗಳು ಜೀವಗಳಿಗೆ ಅಪಾಯವನ್ನು ಉಂಟು ಮಾಡುವುದಲ್ಲದೆ, ನಮ್ಮ ಸುಂದರ ಆಟದ ಮನೋಭಾವಕ್ಕೆ ವಿರುದ್ಧವಾಗಿವೆ. ಕ್ರೀಡಾಂಗಣಗಳು ಯಾವಾಗಲೂ ಸುರಕ್ಷಿತ ಸ್ಥಳವಾಗಿರಬೇಕು. ಅಂತಹ ಕೃತ್ಯಗಳಿಗೆ ಫುಟ್‌ಬಾಲ್‌ನಲ್ಲಿ ಅಥವಾ ಎಲ್ಲಿಯೂ ಸ್ಥಾನವಿಲ್ಲ ಎಂದು ಹೇಳಿಕೆಯಲ್ಲಿ ಉಲ್ಲೇಖಿಸಿದೆ.
ಪಾರ್ಥ ಜಿಂದಾಲ್ ಆಕ್ರೋಶ
ಕ್ಲಬ್ ಮಾಲೀಕರು ಸಾಮಾಜಿಕ ಮಾಧ್ಯಮದಲ್ಲಿ ಘಟನೆಯ ಕುರಿತು ಹಂಚಿಕೊಂಡು ಪ್ರಶ್ನಿಸಿದ್ದಾರೆ. ಬೆಂಗಳೂರು ಎಫ್ಸಿ ತಂಡವನ್ನು ನಾನು ಹುರಿದುಂಬಿಸುತ್ತಿರುವಾಗ ಕ್ರೀಡಾಂಗಣದಲ್ಲಿ ಪಟಾಕಿ ಸಿಡಿದಿದೆ. ಕೋಲ್ಕತ್ತಾದಲ್ಲಿ ನಾವು ನಿರೀಕ್ಷಿಸಬಹುದಾದ ಭದ್ರತೆ ಇದೇನಾ? ಎಂದು ಕೇಳಿದ್ದಾರೆ. ಬಿಎಫ್ಸಿ ಬಗ್ಗೆ ಹೆಮ್ಮೆ ಇದೆ. ನಾವು ಕ್ರೀಡಾ ಮನೋಭಾವವನ್ನು ನಂಬುತ್ತೇವೆ. ಕ್ರೀಡಾಂಗಣದಲ್ಲಿ ಪಟಾಕಿ ಸಿಡಿಸಲು ಅವಕಾಶ ನೀಡಿರುವುದನ್ನು ನೋಡಿ ಗಾಬರಿಯಾಯಿತು ಎಂದು ಪಾರ್ಥ ಜಿಂದಾಲ್ ಬರೆದಿದ್ದಾರೆ.
ಮೋಹನ್ ಬಗಾನ್ಗೆ ಗೆಲುವು, ಬಿಎಫ್ಸಿಗೆ ನಿರಾಸೆ
ಬೆಂಗಳೂರು ಎಫ್ಸಿ ಕನಸು ಮತ್ತೊಮ್ಮೆ ಭಗ್ನವಾಗಿದೆ. 2023ರ ಫಲಿತಾಂಶವೇ ಮತ್ತೊಮ್ಮೆ ಪುನರಾವರ್ತನೆಯಾಗಿದೆ. ಇಂಡಿಯನ್ ಸೂಪರ್ ಲೀಗ್ (ಐಎಸ್ಎಲ್) ಫೈನಲ್ ಪಂದ್ಯದಲ್ಲಿ ಬೆಂಗಳೂರು ಎಫ್ಸಿ ತಂಡವನ್ನು ಮಣಿಸಿದ ಮೋಹನ್ ಬಗಾನ್ ಸೂಪರ್ ಜೈಂಟ್ ತಂಡವು ಮತ್ತೊಮ್ಮೆ ಐಎಸ್ಎಲ್ ಚಾಂಪಿಯನ್‌ ಪಟ್ಟ ಅಲಂಕರಿಸಿದೆ. ಅತ್ತ ಎರಡನೇ ಬಾರಿಗೆ ಐಎಸ್ಎಲ್ ಚಾಂಪಿಯನ್‌ ಆಗಿ ಮಿಂಚುವ ಬೆಂಗಳೂರು ಎಫ್ಸಿ ಕನಸು ನುಚ್ಚುನೂರಾಗಿದೆ.
ಕೋಲ್ಕತ್ತಾದ ಸಾಲ್ಟ್‌ ಲೇಕ್‌ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಮೋಹನ್ ಬಗಾನ್ ತಂಡವು 2-1 ಅಂತರದಲ್ಲಿ ಗೆದ್ದು ಬೀಗಿದೆ. ಕಿಕ್ಕಿರಿದು ತುಂಬಿದ್ದ ತವರಿನ ಅಭಿಮಾನಿಗಳ ನಿರಂತರ ಬೆಂಬಲದ ನಡುವೆ ತವರಿನ ತಂಡ ಗೆದ್ದು ಬೀಗಿದೆ. ಪಂದ್ಯದ ನಿಗದಿತ ಅವಧಿಯಲ್ಲಿ 1-1 ಅಂತರದಿಂದ ಅಂಕ ಸಮಬಲವಾಗಿತ್ತು. ಹೀಗಾಗಿ ಹೆಚ್ಚುವರಿ ಅವಧಿ ನೀಡಲಾಯ್ತು. ಆ ಸಮಯದಲ್ಲಿ ಮತ್ತೊಂದು ಗೋಲು ಕಲೆಹಾಕಿದ ತಂಡ ಜಯಭೇರಿ ಬಾರಿಸಿತು.
Prasanna Kumar PN
