ಕನ್ನಡ ಸುದ್ದಿ  /  Sports  /  Cricket News Gt Vs Mi Qualifier 2 Gujarat Titans Entered The Ipl Final For The 2nd Time In A Row After Win Vs Mumbai Prs

GT vs MI Qualifier 2: ಸತತ 2ನೇ ಬಾರಿಗೆ ಫೈನಲ್​ ಪ್ರವೇಶಿಸಿದ ಗುಜರಾತ್​ ಟೈಟಾನ್ಸ್; ಕಳಪೆ ಪ್ರದರ್ಶನಕ್ಕೆ ಬೆಲೆತೆತ್ತ ಮುಂಬೈ ಇಂಡಿಯನ್ಸ್

16ನೇ ಆವೃತ್ತಿಯ ಐಪಿಎಲ್​ನಲ್ಲೂ ಗುಜರಾತ್​ ಟೈಟಾನ್ಸ್​​ ಫೈನಲ್​ ಪ್ರವೇಶಿಸಿದೆ. 2ನೇ ಕ್ವಾಲಿಫೈಯರ್ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್​ ತಂಡವನ್ನು ಮಣಿಸಿದ ಹಾರ್ದಿಕ್​ ಪಡೆ, ಫೈನಲ್​ನಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್​ ತಂಡವನ್ನು ಎದುರಿಸಲಿದೆ. ಆ ಮೂಲಕ ಹಾಲಿ ಚಾಂಪಿಯನ್​ ಪಟ್ಟ ಉಳಿಸಿಕೊಳ್ಳಲು ಮುಂದಾಗಿದೆ.

ಐಪಿಎಲ್ ಫೈನಲ್ ಪ್ರವೇಶಿಸಿದ ಗುಜರಾತ್​ ಟೈಟಾನ್ಸ್​ ತಂಡ
ಐಪಿಎಲ್ ಫೈನಲ್ ಪ್ರವೇಶಿಸಿದ ಗುಜರಾತ್​ ಟೈಟಾನ್ಸ್​ ತಂಡ

ಗುಜರಾತ್​ ಟೈಟಾನ್ಸ್​ ಸತತ ಎರಡನೇ ಬಾರಿಗೆ ಫೈನಲ್​ ಪ್ರವೇಶಿಸಿತು. ಐಪಿಎಲ್​ನ 2ನೇ ಕ್ವಾಲಿಫೈಯರ್ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್​ ತಂಡವನ್ನು ಮಣಿಸಿ ಐತಿಹಾಸಿಕ ದಾಖಲೆ ಬರೆದಿದೆ. ಇದರೊಂದಿಗೆ 16ನೇ ಆವೃತ್ತಿಯ ಕಲರ್​ಫುಲ್​ ಲೀಗ್​​ನಲ್ಲೂ ಪ್ರಶಸ್ತಿ ಸುತ್ತಿಗೇರಿದ್ದು, ಮೇ 28ರಂದು ನಡೆಯುವ ಫೈನಲ್​ನಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್​ ತಂಡದ ಎದುರು ಪ್ರಶಸ್ತಿಗಾಗಿ ಕಾದಾಡಲಿದೆ. ಗುಜರಾತ್​ ತಂಡವು ಆಲ್​ರೌಂಡ್​ ನಿರ್ವಹಣೆಯ ಕಾರಣ ಮಹತ್ವದ ಪಂದ್ಯದಲ್ಲಿ ಮುಂಬೈ ಮಕಾಡೆ ಮಲಗಿತು. 6ನೇ ಟ್ರೋಫಿಯ ಕನಸಿನಲ್ಲಿದ್ದ ರೋಹಿತ್​ ಪಡೆಗೆ ಹಾರ್ದಿಕ್​ ಪಡೆ ಶಾಕ್​ ನೀಡಿತು.

ಅಹ್ಮದಾಬಾದ್​ನ ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ಟಾಸ್​ ಮೊದಲು ಬ್ಯಾಟಿಂಗ್​ ನಡೆಸಿದ ಗುಜರಾತ್​ ಟೈಟಾನ್ಸ್​ ಬೃಹತ್​ ಮೊತ್ತ ಕಲೆ ಹಾಕಿತು. ಆರಂಭಿಕ ಆಟಗಾರ ಶುಭ್ಮನ್ ಗಿಲ್​ ಅವರ (129) ಸ್ಪೋಟಕ ಶತಕದ ನೆರವಿನಿಂದ ಬರೋಬ್ಬರಿ 234 ರನ್​ ಪೇರಿಸಿತು. ಈ ದೊಡ್ಡ ಮೊತ್ತವನ್ನು ಹಿಂಬಾಲಿಸಿದ ಮುಂಬೈ ಬ್ಯಾಟಿಂಗ್​​ನಲ್ಲೂ ವೈಫಲ್ಯ ಅನುಭವಿಸಿತು. ಸೂರ್ಯಕುಮಾರ್ (61) ಹೊರತುಪಡಿಸಿ ಉಳಿದ ಬ್ಯಾಟರ್​ಗಳು ತಂಡಕ್ಕೆ ಕೊಡುಗೆ ನೀಡುವಲ್ಲಿ ವಿಫಲರಾದರು. ಪರಿಣಾಮ 20 ಓವರ್​ಗಳಲ್ಲಿ 171 ರನ್​ ಗಳಿಸಿ ಆಲೌಟ್​ ಆಯಿತು. ಇದರೊಂದಿಗೆ ಎದುರಾಳಿ ಗುಜರಾತ್​ 62 ರನ್​ಗಳಿಂದ ಗೆದ್ದು ಬೀಗಿತು.

ದಾಖಲೆ ಬರೆದ ಗುಜರಾತ್​

2ನೇ ಕ್ವಾಲಿಫೈಯರ್ ಪಂದ್ಯದಲ್ಲಿ ಗೆಲುವು ಸಾಧಿಸಿದ ಗುಜರಾತ್, ಸತತ 2ನೇ ಬಾರಿಗೆ ಫೈನಲ್​ ಪ್ರವೇಶಿಸಿತು. ಆ ಮೂಲಕ ಈ ಸಾಧನೆ ಮಾಡಿದ 3ನೇ ತಂಡ ಎನಿಸಿತು. ಚೆನ್ನೈ ಸೂಪರ್ ಕಿಂಗ್ಸ್​, ಮುಂಬೈ ಇಂಡಿಯನ್ಸ್​ ತಂಡಗಳು ತಂಡಗಳು ಹೊರತುಪಡಿಸಿದರೆ, ಬೇರೆ ಯಾವ ತಂಡಗಳು ಈ ಸಾಧನೆ ಮಾಡಿಲ್ಲ. ಗುಜರಾತ್ ಇದೇ ಮೊದಲ ಬಾರಿಗೆ ಕ್ವಾಲಿಫೈಯರ್​​-2 ಆಡಿದ್ದು, ಈಗ ಗೆದ್ದು ಫೈನಲ್​ ಪ್ರವೇಶಿಸಿದೆ. ಕಳೆದ ಬಾರಿಯೂ ಚಾಂಪಿಯನ್​ ಆಗಿತ್ತು. ಫೈನಲ್​ನಲ್ಲಿ ರಾಜಸ್ಥಾನ್​ ರಾಯಲ್ಸ್ ವಿರುದ್ಧ ಗೆದ್ದಿತ್ತು. ಇನ್ನು ನಾಯಕ ಹಾರ್ದಿಕ್​ ಪಾಂಡ್ಯ ಒಟ್ಟಾರೆ 6ನೇ ಬಾರಿಗೆ ಐಪಿಎಲ್​ ಫೈನಲ್​ಗೆ ಪ್ರವೇಶ ಪಡೆದಿದ್ದಾರೆ.

ಫೈನಲ್​ನಲ್ಲಿ ಸಿಎಸ್​ಕೆ ಎದುರಾಳಿ

ಮೊದಲ ಕ್ವಾಲಿಫೈಯರ್​ ಪಂದ್ಯದಲ್ಲಿ ಗುಜರಾತ್ ಟೈಟಾನ್ಸ್​ ತಂಡವನ್ನು ಚೆನ್ನೈ ಸೂಪರ್​ ಕಿಂಗ್ಸ್​ ಮಣಿಸಿತ್ತು. ಪರಿಣಾಮ ಸಿಎಸ್​ಕೆ ನೇರವಾಗಿ ಫೈನಲ್​ಗೆ ಅರ್ಹತೆ ಪಡೆದುಕೊಂಡಿತ್ತು. ಮೇ 28ರಂದು ಇದೇ ಮೈದಾನದಲ್ಲಿ ಧೋನಿ ಪಡೆಯ ವಿರುದ್ಧ ಪ್ರಶಸ್ತಿಗಾಗಿ ಗುಜರಾತ್​ ಸೆಣಸಾಟ ನಡೆಸಲಿದೆ.

ಕ್ವಾಲಿಫೈಯರ್​​ನಲ್ಲಿ ಮುಂಬೈಗೆ ಮತ್ತೊಂದು ಸೋಲು

2ನೇ ಕ್ವಾಲಿಫೈಯರ್​​ನಲ್ಲಿ ಗುಜರಾತ್​ ವಿರುದ್ಧ ಸೋಲುವ ಮೂಲಕ ಮತ್ತೊಮ್ಮೆ 2ನೇ ಕ್ವಾಲಿಫೈಯರ್​ನಲ್ಲಿ ಎಡವಿದೆ. 7ನೇ ಬಾರಿಗೆ ಫೈನಲ್​ ಪ್ರವೇಶಿಸುವ ಕನಸಿನಲ್ಲಿದ್ದ ಮುಂಬೈ ಶಾಕ್​ ನೀಡಿತು. 2010ರಲ್ಲಿ ರನ್ನರ್​ ಅಪ್​ ಆಗಿದ್ದ ಮುಂಬೈ, 2012, 2015, 2017, 2019, 2020ರಲ್ಲಿ ಚಾಂಪಿಯನ್​ ಆಗಿ ಹೊರಹೊಮ್ಮಿತ್ತು. ಮುಂಬೈ 4 ಬಾರಿ ಎರಡನೇ ಕ್ವಾಲಿಫೈಯರ್​ ಪಂದ್ಯಗಳನ್ನಾಡಿದ್ದು, ಎರಡಲ್ಲಿ ಗೆದ್ದು, ಎರಡರಲ್ಲಿ ಸೋಲು ಕಂಡಿದೆ. ಕಳೆದ ಆವೃತ್ತಿಯ ಐಪಿಎಲ್​ನಲ್ಲಿ ಲೀಗ್​ ಹಂತದಿಂದಲೇ ಹೊರ ಬಿದ್ದಿತ್ತು.

ಸಿಎಸ್​ಕೆ - ಗುಜರಾತ್​ 3ನೇ ಬಾರಿ ಮುಖಾಮುಖಿ

ಚೆನ್ನೈ ಸೂಪರ್ ಕಿಂಗ್ಸ್​ ಮತ್ತು ಗುಜರಾತ್ ತಂಡಗಳು ಇದೇ ಆವೃತ್ತಿಯಲ್ಲಿ ಮತ್ತೊಮ್ಮೆ ಮುಖಾಮುಖಿಯಾಗುತ್ತಿವೆ. ಈ ಸೀಸನ್​​ನ ಉದ್ಘಾಟನಾ ಪಂದ್ಯದಲ್ಲಿ ಮುಖಾಮುಖಿಯಾಗಿದ್ದ ಉಭಯ ತಂಡಗಳು ನಂತರ ಮೊದಲ ಕ್ವಾಲಿಫೈಯರ್​ನಲ್ಲಿ ಸೆಣಸಾಟ ನಡೆಸಿದ್ದವು. ಮೊದಲ ಮುಖಾಮುಖಿಯಲ್ಲಿ ಸೋತಿದ್ದ ಚೆನ್ನೈ, ಕ್ವಾಲಿಫೈಯರ್​ನಲ್ಲಿ ಗೆದ್ದು ಫೈನಲ್​ಗೆ ಪ್ರವೇಶಿಸಿತ್ತು. ಒಟ್ಟು 4 ಬಾರಿ ಉಭಯ ತಂಡಗಳು ಮುಖಾಮುಖಿಯಾಗಿದ್ದು, ಗುಜರಾತ್​ 3 ಬಾರಿ ಜಯಿಸಿದೆ.

ಶುಭ್​ಮನ್​ ಗಿಲ್​ ದಾಖಲೆಯ ಸೆಂಚುರಿ

ಮುಂಬೈ ಬೌಲರ್​ಗಳಿಗೆ ಬೆಂಡೆತ್ತಿದ ಪಂಜಾಜ್​ ಪುತ್ತರ್​​, 16ನೇ ಆವೃತ್ತಿಯ ಐಪಿಎಲ್​ನ ಮಹತ್ವದ ಪಂದ್ಯದಲ್ಲಿ ಮತ್ತೊಂದು ಶತಕ ಸಿಡಿಸಿದರು. ಇದು ಈ ಐಪಿಎಲ್​​ನಲ್ಲಿ ಗಿಲ್​ ಬಾರಿಸಿದ 3ನೇ ಶತಕವಾಗಿದೆ. ಪ್ರಸಕ್ತ ಆವೃತ್ತಿಯಲ್ಲಿ 2 ಶತಕ ಸಿಡಿಸಿದ್ದ ವಿರಾಟ್​ ಕೊಹ್ಲಿ ದಾಖಲೆ ಮುರಿದಿದ್ದಾರೆ. ಇದರೊಂದಿಗೆ ಆರೆಂಜ್​ ಕ್ಯಾಪ್​ ಅನ್ನೂ ತನ್ನದಾಗಿಸಿಕೊಂಡಿದ್ದಾರೆ. ಸದ್ಯ ಗಿಲ್​ 16 ಪಂದ್ಯಗಳಲ್ಲಿ 61ರ ಸರಾಸರಿಯಲ್ಲಿ 851 ರನ್​ ಗಳಿಸಿದ್ದಾರೆ.