ಕನ್ನಡ ಸುದ್ದಿ  /  ಕ್ರೀಡೆ  /  Fake Account: ಕ್ಷಮಿಸಿ ವಿರಾಟ್ ಕೊಹ್ಲಿ ಸರ್; ನವೀನ್ ಉಲ್ ಹಕ್​ ಟ್ವೀಟ್​ ವೈರಲ್​; ಅಸಲಿಯಲ್ಲ, ನಕಲಿ ಖಾತೆಯಿಂದ ಪೋಸ್ಟ್​

Fake Account: ಕ್ಷಮಿಸಿ ವಿರಾಟ್ ಕೊಹ್ಲಿ ಸರ್; ನವೀನ್ ಉಲ್ ಹಕ್​ ಟ್ವೀಟ್​ ವೈರಲ್​; ಅಸಲಿಯಲ್ಲ, ನಕಲಿ ಖಾತೆಯಿಂದ ಪೋಸ್ಟ್​

ವಿರಾಟ್​ ಕೊಹ್ಲಿಗೆ ನವೀನ್ ಉಲ್​ ಹಕ್​ ಅವರು​ ಕ್ಷಮೆಯಾಚಿಸಿರುವ ಕುರಿತು ಮತ್ತೊಂದು ಸುದ್ದಿ ಜಾಲತಾಣದಲ್ಲಿ ಹರಿದಾಡುತ್ತಿದೆ. ಆದರೆ ಇದು ಸುಳ್ಳು ಸುದ್ದಿ ಎಂಬುದು ತಿಳಿದು ಬಂದಿದೆ.

ನವೀನ್​ ಉಲ್​​ ಹಕ್​ ಎಂಬವರ ಹೆಸರಿನಲ್ಲಿ ಟ್ವೀಟ್​ ವೈರಲ್​
ನವೀನ್​ ಉಲ್​​ ಹಕ್​ ಎಂಬವರ ಹೆಸರಿನಲ್ಲಿ ಟ್ವೀಟ್​ ವೈರಲ್​

ಮೇ 1ರಂದು ಲಕ್ನೋ ಸೂಪರ್ ಜೈಂಟ್ಸ್​ ಮತ್ತು ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು (LSG vs RCB Match) ಪಂದ್ಯದಲ್ಲಿ ವಿರಾಟ್​ ಕೊಹ್ಲಿ ಮತ್ತು ನವೀನ್​ ಉಲ್​​ ಹಕ್​ (Naveen ul Haq vs Virat Kohli) ನಡುವೆ ಜೋರು ಮಾತಿನ ಚಕಮಕಿ ನಡೆದಿತ್ತು. ಈ ಘಟನೆ ನಡೆದು 25 ದಿನಗಳಾದರೂ, ನವೀನ್​ ಉಲ್​ ಹಕ್ ಈಗಲೂ ಟ್ರೋಲ್​ ಆಗುತ್ತಲೇ ಇದ್ದಾರೆ. ಈ ವೇಗಿ ಹೋದಲೆಲ್ಲಾ, ಮೈದಾನದಲ್ಲಿ ಫ್ಯಾನ್ಸ್​ ಕೊಹ್ಲಿ... ಕೊಹ್ಲಿ... ಎಂದು ಕೂಗುವ ಗೇಲಿ ಮಾಡುತ್ತಿದ್ದಾರೆ.

ಈ ಬಗ್ಗೆ ಪ್ರತಿಕ್ರಿಯಿಸಿರುವ ನವೀನ್​, ಮೈದಾನದಲ್ಲಿ ಕೊಹ್ಲಿ... ಕೊಹ್ಲಿ ಎಂದು ಕೂಗುವುದನ್ನು ನಾನು ಹೆಚ್ಚು ಇಷ್ಟಪಡುತ್ತೇನೆ. ನಾನು ಇದನ್ನು ಸಖತ್​​ ಎಂಜಾಯ್​ ಮಾಡುತ್ತೇನೆ. ಇದರಿಂದ ನನಗೆ ಹೆಚ್ಚು ಉತ್ಸಾಹ ಬರುತ್ತದೆ ಎಂದು ಹೇಳಿದ್ದಾರೆ. ಇದರ ಬೆನ್ನಲ್ಲೆ ಕೊಹ್ಲಿಗೆ ನವೀನ್​ ಕ್ಷಮೆಯಾಚಿಸಿರುವ ಕುರಿತು ಮತ್ತೊಂದು ಸುದ್ದಿ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದೆ. ಆದರೆ ಇದು ಸುಳ್ಳು ಸುದ್ದಿ ಎಂಬುದು ತಿಳಿದು ಬಂದಿದೆ.

ಟ್ರೆಂಡಿಂಗ್​ ಸುದ್ದಿ

ನವೀನ್​ ಉಲ್​ ಹಕ್​ ಎಂಬ ಟ್ವಿಟರ್ ಖಾತೆಯಲ್ಲಿ ಕ್ಷಮಿಸಿ ವಿರಾಟ್​ ಕೊಹ್ಲಿ ಸರ್​​ ಎಂದು ಪೋಸ್ಟ್​ ಮಾಡಲಾಗಿದೆ. ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿರುವ ಟ್ವೀಟ್‌ನಲ್ಲಿ ನವೀನ್ ಉಲ್ ಹಕ್, ವಿರಾಟ್ ಕೊಹ್ಲಿಗೆ ಕ್ಷಮೆಯಾಚಿಸಿದ್ದಾರೆ. ಅಷ್ಟೇ ಅಲ್ಲದೆ, ಇನ್ನೂ ಎರಡು ಮೂರು ಟ್ವೀಟ್​​ಗಳನ್ನೂ ಮಾಡಲಾಗಿದೆ.

ನವೀನ್ ತಮ್ಮ ಟ್ವೀಟ್‌ನಲ್ಲಿ ಕೊಹ್ಲಿಯೊಂದಿಗೆ ಜಗಳವಾಡಿದ್ದು, ನನ್ನ ಜೀವನದ ದೊಡ್ಡ ತಪ್ಪು. ಇದರಲ್ಲಿ ನನ್ನದೇ ತಪ್ಪಿದೆ ಎಂದಿದ್ದಾರೆ. ನವೀನ್​ ಉಲ್​ ಹಕ್​ ಅವರು ಕ್ಷಮೆ ಕೇಳಿದ್ದು, ಕೊಹ್ಲಿ ಅಭಿಮಾನಿಗಳ ಮೆಚ್ಚುಗೆಗೆ ಕಾರಣವಾಗಿದೆ. ಬಾಬರ್ ಅಜಂಗಿಂತ ಕೊಹ್ಲಿ ಉತ್ತಮ ಎಂಬ ಪೋಸ್ಟ್​ ಅನ್ನೂ ಮಾಡಿದ್ದಾರೆ.

ಪರಿಶೀಲಿಸದ ಅಭಿಮಾನಿಗಳು

ಈ ಪೋಸ್ಟ್​ ನೋಡುತ್ತಿದ್ದಂತೆ ಕೊಹ್ಲಿ ಫ್ಯಾನ್ಸ್​​, ಫುಲ್​ ಖುಷ್​ ಆಗಿದ್ದಾರೆ. ಕಳೆದ ಹಲವು ದಿನಗಳಿಂದ ಟ್ರೋಲ್​, ಗೇಲಿ ಮಾಡುತ್ತಿದ್ದ ಫ್ಯಾನ್ಸ್​​ ಈಗ ಟ್ವೀಟ್​ಗೆ ಪ್ರತಿಕ್ರಿಯಿಸಿದ್ದಾರೆ. ನವೀನ್-ಉಲ್-ಹಕ್ ಪಾಠ ಕಲಿತಿದ್ದಾರೆ ಎಂದು ಕಮೆಂಟ್​​ಗಳಲ್ಲಿ ಉತ್ತರ ನೀಡುತ್ತಿದ್ದಾರೆ. 23ರ ಹರೆಯದ ವೇಗಿಯನ್ನು ಅಭಿಮಾನಿಗಳು ಕ್ಷಮಿಸಿರುವ ರೀತಿ, ಪ್ರತಿಕ್ರಿಯೆ ಕೊಡುತ್ತಿದ್ದಾರೆ.

ಇದು ನಕಲಿ ಖಾತೆ

ಹೌದು.. ವಿರಾಟ್​ ಕೊಹ್ಲಿಗೆ ನವೀನ್​ ಉಲ್​ ಹಕ್​ ಕ್ಷಮೆಯಾಚಿಸಿಲ್ಲ. ಇದು ಬೇರೊಬ್ಬರು ನವೀನ್​ ಹೆಸರಿನಲ್ಲಿ ತೆರೆದಿರುವ ಖಾತೆಯಾಗಿದೆ. ಆದರೆ ನವೀನ್​ರ ಅಧಿಕೃತ ಖಾತೆಯ ನವೀನ್​ ಉಲ್​ ಹಕ್​ ಮುರಿದ್​ ಎಂಬ ಹೆಸರಿನಲ್ಲಿದೆ. ಈ ಖಾತೆಯಲ್ಲಿ 1 ಲಕ್ಷ 15 ಸಾವಿರಕ್ಕೂ ಹೆಚ್ಚಿನ ಫಾಲೋವರ್ಸ್​ ಇದ್ದು, ಇದನ್ನೇ ಆಫ್ಘನ್​ ವೇಗಿ ಬಳಸುತ್ತಿದ್ದಾರೆ. ಆದರೆ, ನಕಲಿ ಖಾತೆಗೆ 3071 ಫಾಲೋವರ್ಸ್ ಇರುವುದು ಕಂಡು ಬಂದಿದೆ.

ಎಲಿಮಿನೇಟರ್ ಪಂದ್ಯದಲ್ಲಿ ಭರ್ಜರಿ ಬೌಲಿಂಗ್​​

ಎಲಿಮಿನೇಟರ್​ ಪಂದ್ಯದಲ್ಲಿ ಅದ್ಭುತ ಬೌಲಿಂಗ್​ ಪ್ರದರ್ಶಿಸಿದ ನವೀನ್​ ​, ಮುಂಬೈ ತಂಡದ ಅಗ್ರ ಕ್ರಮಾಂಕದ ಬ್ಯಾಟರ್​ಗಳನ್ನೇ ಖೆಡ್ಡಾಕೆ ಕೆಡವಿದರು. ರೋಹಿತ್​ ಶರ್ಮಾ, ಕ್ಯಾಮರೂನ್​ ಗ್ರೀನ್​, ಸೂರ್ಯಕುಮಾರ್, ತಿಲಕ್ ವರ್ಮಾ​ ವಿಕೆಟ್​ ಉರುಳಿಸಿದರು. 4 ಓವರ್​​ಗಳಲ್ಲಿ 38 ರನ್​ ಬಿಟ್ಟುಕೊಟ್ಟು 4 ವಿಕೆಟ್​ ಪಡೆದರು.