ಕನ್ನಡ ಸುದ್ದಿ  /  ಕ್ರೀಡೆ  /  Ind Vs Wi Day 1: ರೋಹಿತ್​, ಜೈಸ್ವಾಲ್, ಕೊಹ್ಲಿ ಭರ್ಜರಿ ಅರ್ಧಶತಕ; 2ನೇ ಟೆಸ್ಟ್​ನಲ್ಲಿ ಮೊದಲ ದಿನದಾಟದ ಅಂತ್ಯಕ್ಕೆ ಟೀಮ್​ ಇಂಡಿಯಾ 288/4

IND vs WI Day 1: ರೋಹಿತ್​, ಜೈಸ್ವಾಲ್, ಕೊಹ್ಲಿ ಭರ್ಜರಿ ಅರ್ಧಶತಕ; 2ನೇ ಟೆಸ್ಟ್​ನಲ್ಲಿ ಮೊದಲ ದಿನದಾಟದ ಅಂತ್ಯಕ್ಕೆ ಟೀಮ್​ ಇಂಡಿಯಾ 288/4

India vs West Indies 2nd Test day 1 highlights: ಭಾರತ- ವೆಸ್ಟ್​ ಇಂಡೀಸ್​ ನಡುವಿನ 2ನೇ ಟೆಸ್ಟ್​​ನಲ್ಲಿ ಮೊದಲ ದಿನದಾಟ ಮುಕ್ತಾಯಗೊಂಡಿದ್ದು, ಟೀಮ್​ ಇಂಡಿಯಾ ಭರ್ಜರಿ ಪ್ರದರ್ಶನ ತೋರಿದೆ. ರೋಹಿತ್​ ಶರ್ಮಾ, ಯಶಸ್ವಿ ಜೈಸ್ವಾಲ್, ವಿರಾಟ್ ಕೊಹ್ಲಿ ತಲಾ ಅರ್ಧಶತಕ ಸಿಡಿಸಿ ಗಮನ ಸೆಳೆದಿದ್ದಾರೆ.

ರೋಹಿತ್​, ಜೈಸ್ವಾಲ್, ಕೊಹ್ಲಿ ಭರ್ಜರಿ ಅರ್ಧಶತಕ
ರೋಹಿತ್​, ಜೈಸ್ವಾಲ್, ಕೊಹ್ಲಿ ಭರ್ಜರಿ ಅರ್ಧಶತಕ

ಪೋರ್ಟ್ ಆಫ್ ಸ್ಪೇನ್‌ನ ಕ್ವೀನ್ಸ್ ಪಾರ್ಕ್ ಓವಲ್‌ನಲ್ಲಿ ವೆಸ್ಟ್​ ಇಂಡೀಸ್​ ಎದುರು ನಡೆಯುತ್ತಿರುವ ಎರಡನೇ ಟೆಸ್ಟ್​ನಲ್ಲೂ ಟೀಮ್​ ಇಂಡಿಯಾ (India vs West Indies 2nd Test) ಪ್ರಾಬಲ್ಯ ಮುಂದುವರೆಸಿದೆ. ಉಭಯ ತಂಡಗಳ ನಡುವಿನ ಐತಿಹಾಸಿಕ 100ನೇ ಟೆಸ್ಟ್​ ಪಂದ್ಯದಲ್ಲಿ ಭಾರತೀಯ ಆಟಗಾರರ ಅದ್ಭುತ ಪ್ರದರ್ಶನ ಗಮನ ಸೆಳೆದಿದೆ. ಇದರೊಂದಿಗೆ ಭಾರತ ತಂಡವು ಬೃಹತ್​ ಮೊತ್ತ ಕಲೆ ಹಾಕುವ ಮುನ್ಸೂಚನೆ ನೀಡಿದೆ. ಮೊದಲ ದಿನದ ಅಂತ್ಯಕ್ಕೆ ಭಾರತ 4 ವಿಕೆಟ್​ ನಷ್ಟಕ್ಕೆ 288 ರನ್​ ಕಲೆ ಹಾಕಿದೆ.

ರೋಹಿತ್-ಯಶಸ್ವಿ ಭರ್ಜರಿ ಆರಂಭ

ಚೊಚ್ಚಲ ಪಂದ್ಯದಲ್ಲೇ ಭರ್ಜರಿ ಪ್ರದರ್ಶನ ನೀಡಿದ ಹಿನ್ನೆಲೆಯಲ್ಲಿ 2ನೇ ಟೆಸ್ಟ್​​ನಲ್ಲೂ ಅವಕಾಶ ಪಡೆದ ಯುವ ಆರಂಭಿಕ ಆಟಗಾರ ಯಶಸ್ವಿ ಜೈಸ್ವಾಲ್ (Yashasvi Jaiswal)​, ಮೊದಲ ದಿನದಾಟದಲ್ಲೇ ನಾಯಕ ರೋಹಿತ್​ ಶರ್ಮಾ (Rohit Sharma) ಜೊತೆಗೂಡಿ ಮತ್ತೊಂದು ಅದ್ಭುತ ಇನ್ನಿಂಗ್ಸ್​ ಕಟ್ಟಿದರು. ಆರಂಭಿಕರಾಗಿ ಕಣಕ್ಕಿಳಿದ ಈ ಜೋಡಿ, ವೆಸ್ಟ್​ ಇಂಡೀಸ್​ ಬೌಲಿಂಗ್​ ಪಡೆಯನ್ನು ಧೂಳೀಪಟ ಮಾಡಿದರು. ಮೊದಲ ಟೆಸ್ಟ್​ನಲ್ಲಿ ದ್ವಿಶತಕದ ಜೊತೆಯಾಟವಾಡಿದ್ದ ಈ ಜೋಡಿ, ಈ ಪಂದ್ಯದಲ್ಲಿ ಮೊದಲ ವಿಕೆಟ್​ಗೆ ಶತಕದ ಜೊತೆಯಾಟವಾಡಿದರು. ಮೊದಲ ವಿಕೆಟ್​ಗೆ 139 ರನ್​ಗಳು ಹರಿದು ಬಂದವು.

ತಲಾ ಅರ್ಧಶತಕ ಸಿಡಿಸಿದ ಓಪನರ್ಸ್

ರೋಹಿತ್ ಹಾಗೂ ಜೈಸ್ವಾಲ್ ಮತ್ತೊಂದು ಭರ್ಜರಿ ಇನ್ನಿಂಗ್ಸ್​ ಕಟ್ಟಿದರು. ಇಬ್ಬರೂ ತಲಾ ಅರ್ಧಶತಕ ಇನ್ನಿಂಗ್ಸ್ ಆಡಿದರು. ಬಿರುಸಿನ ಅರ್ಧಶತಕ ಪೂರೈಸಿದ ಜೈಸ್ವಾಲ್, 49 ಎಸೆತಗಳಲ್ಲಿ ಅರ್ಧಶತಕ ಪೂರೈಸಿದರು. ಮತ್ತೊಂದೆಡೆ ತಾಳ್ಮೆಯ ಬ್ಯಾಟಿಂಗ್ ಜೊತೆಗೆ ಆಗ್ಗಾಗೆ ಬಿರುಸಿನ ಬ್ಯಾಟಿಂಗ್​ ನಡೆಸಿದ ಕ್ಯಾಪ್ಟನ್, ಶತಕದತ್ತ ಮುನ್ನುಗ್ಗಿದರು. ಊಟದ ವಿರಾಮಕ್ಕೆ ಭಾರತ ವಿಕೆಟ್ ನಷ್ಟ ಇಲ್ಲದೆ 121 ರನ್ ಗಳಿಸಿತ್ತು. ಆದರೆ ಊಟದ ವಿರಾಮದ ಬಳಿಕ ವಿಂಡೀಸ್ ಮೇಲುಗೈ ಸಾಧಿಸಿತ್ತು.

ಟ್ರೆಂಡಿಂಗ್​ ಸುದ್ದಿ

ಹಿಂದಿದೆಯೇ 4 ವಿಕೆಟ್​ ಪತನ

ಭೋಜನ ವಿರಾಮದ ನಂತರ ಭಾರತದ ಓಪನರ್ಸ್​ ಹೆಚ್ಚು ಹೊತ್ತು ಕ್ರೀಸ್​ನಲ್ಲಿ ಇರಲಿಲ್ಲ. 74 ಎಸೆತಗಳಲ್ಲಿ 9 ಬೌಂಡರಿ, 1 ಸಿಕ್ಸರ್​ ಸಹಿತ 57 ರನ್​ ಗಳಿಸಿದ ಜೈಸ್ವಾಲ್, ಜೇಸನ್ ಹೋಲ್ಡರ್ ಬೌಲಿಂಗ್​ನಲ್ಲಿ ಔಟಾದರು. ನಂತರ 143 ಎಸೆತಗಳಲ್ಲಿ 9 ಬೌಂಡರಿ, 2 ಸಿಕ್ಸರ್​ಗಳ ಸಹಾಯದಿಂದ 80 ರನ್​ ಗಳಿಸಿದ ರೋಹಿತ್​ಗೆ ವಾರಿಕಾನ್ ಗೇಟ್​ಪಾಸ್ ನೀಡಿದರು. ಇನ್ನು ಶುಭ್ಮನ್ ಗಿಲ್ 10 ರನ್, ಮತ್ತು ಅಜಿಂಕ್ಯ ರಹಾನೆ 8 ರನ್​ ಗಳಿಸಿ ಮತ್ತೊಮ್ಮೆ ನಿರಾಸೆ ಮೂಡಿಸಿದರು. 2ನೇ ಸೆಷನ್​ನಲ್ಲಿ ಭಾರತ ಕೇವಲ 61 ರನ್ ಕಲೆಹಾಕಿ 4 ವಿಕೆಟ್‌ ಕಳೆದುಕೊಂಡಿತು.

ಸ್ಮರಣೀಯ ಪಂದ್ಯದಲ್ಲಿ ಕೊಹ್ಲಿ ಅದ್ಭುತ ಆಟ

ಬ್ಯಾಕ್ ಟು ಬ್ಯಾಕ್ 4 ವಿಕೆಟ್​ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿದ ತಂಡಕ್ಕೆ ಆಸರೆಯಾಗಿದ್ದೇ ವಿರಾಟ್ ಕೊಹ್ಲಿ. ಕಳೆದ ಪಂದ್ಯದಲ್ಲಿ ಶತಕದ ಅಂಚಿನಲ್ಲಿ ಎಡವಿದ್ದ ಕೊಹ್ಲಿ, ಈಗ ದೊಡ್ಡ ಮೊತ್ತದ ನಿರೀಕ್ಷೆಯಲ್ಲಿದ್ದಾರೆ. ಅದರಲ್ಲೂ ಅವರಿಗೆ ಇದು ಸ್ಮರಣೀಯ 500ನೇ ಅಂತಾರಾಷ್ಟ್ರೀಯ ಪಂದ್ಯವಾಗಿದ್ದು, ಅದ್ಭುತ ಬ್ಯಾಟಿಂಗ್​ ನಡೆಸುತ್ತಿದ್ದಾರೆ. ತಮ್ಮ 21ನೇ ಎಸೆತದಲ್ಲಿ ಬೌಂಡರಿ ಖಾತೆ ತೆರೆದ ಈ ಸೂಪರ್​ ಸ್ಟಾರ್​ ಬ್ಯಾಟ್ಸ್​ಮನ್ ಕೊಹ್ಲಿ, ರವೀಂದ್ರ ಜಡೇಜಾ ಜೊತೆ ಸೇರಿ ಉತ್ತಮ ಜೊತೆಯಾಟ ಹಂಚಿಕೊಂಡಿದ್ದಾರೆ.

288ಕ್ಕೆ 4 ವಿಕೆಟ್

ವಿಂಡೀಸ್​ ದಾಳಿಯನ್ನು ಸಮರ್ಥವಾಗಿ ಎದುರಿಸಿದ ಕೊಹ್ಲಿ, ತಮ್ಮ 97ನೇ ಎಸೆತದಲ್ಲಿ 50ರ ಗಡಿ ದಾಟಿದರು. ಸೊಗಸಾದ ಕವರ್ ಡ್ರೈವ್‌ಗಳ ಮೂಲಕ ಕೊಹ್ಲಿ ಬೌಂಡರಿಗಳನ್ನು ತಮ್ಮ ಬತ್ತಳಿಕೆಗೆ ಹಾಕಿಕೊಂಡರು. ಇದು ಕೊಹ್ಲಿಯ 30ನೇ ಅರ್ಧಶತಕ. ಜಡೇಜಾ-ಕೊಹ್ಲಿ 3ನೇ ಸೆಷನ್‌ನ ಅಂತ್ಯಕ್ಕೆ 288 ರನ್‌ಗಳಿಗೆ ಕೊಂಡೊಯ್ದರು. ವಿರಾಟ್ (87) ಮತ್ತು ಜಡೇಜಾ (36) ಮಧ್ಯೆ ಶತಕದ ಜೊತೆಯಾಟವಿದ್ದು, ಇಬ್ಬರೂ ಎರಡನೇ ದಿನದಾಟಕ್ಕೆ ಬ್ಯಾಟಿಂಗ್ ಕಾಯ್ದುಕೊಂಡಿದ್ದು, ಬೃಹತ್ ಮೊತ್ತ ಕಲೆ ಹಾಕುವ ನಿರೀಕ್ಷೆಯಲ್ಲಿದ್ದಾರೆ.