PBKS vs MI: ಇಶಾನ್, ಸೂರ್ಯರ ಬೆಂಕಿ-ಬಿರುಗಾಳಿ ಆಟಕ್ಕೆ ಪಂಜಾಬ್ ಧ್ವಂಸ; ದಾಖಲೆಯ ಗೆಲುವು ಸಾಧಿಸಿದ ಮುಂಬೈ; ಲಿವಿಂಗ್ಸ್ಟೋನ್ ಆಟ ವ್ಯರ್ಥ
16ನೇ ಆವೃತ್ತಿಯ ಐಪಿಎಲ್ನ 46ನೇ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್ ಮತ್ತೊಂದು ದಾಖಲೆಯ ಗೆಲುವು ತನ್ನದಾಗಿಸಿಕೊಂಡಿದೆ. ಗೆಲ್ಲುವ ವಿಶ್ವಾಸದಲ್ಲಿದ್ದ ಪಂಜಾಬ್ ಲೆಕ್ಕಾಚಾರವನ್ನು ಸೂರ್ಯಕುಮಾರ್ ಯಾದವ್ ಮತ್ತು ಇಶಾನ್ ಕಿಶನ್ ತಲೆ ಕೆಳಗೆ ಮಾಡಿದರು.
ಐದು ಬಾರಿಯ ಚಾಂಪಿಯನ್ ಮುಂಬೈ ಇಂಡಿಯನ್ಸ್ ದಾಖಲೆಯ ಗೆಲುವಿಗೆ ಮುತ್ತಕ್ಕಿದೆ. ಬ್ಯಾಕ್ ಟು ಬ್ಯಾಕ್ 200+ ಸ್ಕೋರ್ ಅನ್ನು ಬೆನ್ನಟ್ಟಿದೆ. ಸೂರ್ಯಕುಮಾರ್, ಇಶಾನ್ ಕಿಶನ್ ಅವರ ಬೆಂಕಿ-ಬಿರುಗಾಳಿ ಆಟ ಪಂಜಾಬ್ ಬೌಲಿಂಗ್ ಪಡೆಯನ್ನು ಧ್ವಂಸಗೊಳಿಸಿತು. ಇದರೊಂದಿಗೆ ಇನ್ನೂ 7 ಎಸೆತಗಳು ಬಾಕಿ ಇರುವಂತೆಯೇ 6 ವಿಕೆಟ್ಗಳ ಗೆಲುವಿನ ನಗೆ ಬಾರಿಸಿತು. ಇದರೊಂದಿಗೆ ಅಂಕಪಟ್ಟಿಯಲ್ಲಿ ಒಂದು ಸ್ಥಾನ ಮೇಲೇರಿದೆ. ಕಳೆದ ಪಂದ್ಯದಲ್ಲೂ ಮುಂಬೈ 200+ ರನ್ಗಳ ಚೇಸ್ ಮಾಡಿತ್ತು.
ಬೃಹತ್ ರನ್ ಕೋಟೆಯನ್ನು ಹಿಂಬಾಲಿಸಿದ ಮುಂಬೈ ಇಂಡಿಯನ್ಸ್, ಭರ್ಜರಿ ಆರಂಭ ಪಡೆಯುವಲ್ಲಿ ಎಡವಿತು. ನಾಯಕ ರೋಹಿತ್ ಶರ್ಮಾ ಡಕೌಟ್ಗೆ ಬಲಿಯಾದರು. ಬಳಿಕ ಇಶಾನ್ ಕಿಶನ್ - ಕ್ಯಾಮರೂನ್ ಗ್ರೀನ್ 54 ರನ್ಗಳ ಜೊತೆಯಾಟವಾಡಿದರು. ಆದರೆ ಈ ಜೋಡಿಯನ್ನು ಬೇರ್ಪಡಿಸಿದರು. ಗ್ರೀನ್ 23 ರನ್ ಗಳಿಸಿ ಔಟಾದರು.
ಸೂರ್ಯ - ಇಶಾನ್ ಶತಕದ ಜೊತೆಯಾಟ
ಬಳಿಕ ಒಂದಾದ ಇಶಾನ್ ಕಿಶನ್ ಮತ್ತು ಸೂರ್ಯಕುಮಾರ್, ಪಂಜಾಬ್ ಬೌಲರ್ಗಳನ್ನು ಅಟ್ಟಾಡಿಸಿಕೊಂಡು ಹೊಡೆದರು. ಬೌಲರ್ಗಳಿಗೆ ಬೆಂಡೆತ್ತಿದ ಈ ಜೋಡಿ 3ನೇ ವಿಕೆಟ್ಗೆ ಶತಕದ ಜೊತೆಯಾಟವಾಡಿದರು. ಬಿರುಸಿನ ಆಟಕ್ಕೆ ಕೈ ಹಾಕಿದ ಇಬ್ಬರೂ, ಮುಂಬೈ ಕ್ಯಾಂಪ್ನಲ್ಲಿ ಗೆಲುವಿನ ಆಸೆ ಹೆಚ್ಚಿಸಿದರು. ಕೇವಲ 55 ಎಸೆತಗಳಲ್ಲಿ 116 ರನ್ಗಳ ಪಾಲುದಾರಿಕೆ ನೀಡಿದರು.
ಸ್ಕೈ-ಕಿಶನ್ ಇರ್ಧಶತಕ
ಅಬ್ಬರದ ಇನ್ನಿಂಗ್ಸ್ ಕಟ್ಟಿದ ಸೂರ್ಯ ಮತ್ತು ಕಿಶನ್ ತಲಾ ಅರ್ಧಶತಕ ಸಿಡಿಸಿದರು. ಬೌಂಡರಿ - ಸಿಕ್ಸರ್ಗಳ ಸುರಿ ಮಳೆಗೈದ ಇವರು, ರನ್ ಪ್ರವಾಹವನ್ನೇ ಹರಿಸಿದರು. ಇಶಾನ್ 41 ಎಸೆತಗಳಲ್ಲಿ 7 ಬೌಂಡರಿ, 4 ಸಿಕ್ಸರ್ಗಳ ನೆರವಿನಿಂದ 75 ಚಚ್ಚಿದರು. ಮತ್ತೊಂದೆಡೆ ಸೂರ್ಯಕುಮಾರ್ 31 ಎಸೆತಗಳಲ್ಲಿ 8 ಬೌಂಡರಿ, 2 ಸಿಕ್ಸರ್ಗಳ ಸಹಾಯದಿಂದ 66 ಚಚ್ಚಿದರು. ಪಂದ್ಯವನ್ನು ಗೆಲುವಿನ ಸನಿಹಕ್ಕೆ ತಂದು ಔಟಾದರು.
ಕೊನೆಯಲ್ಲಿ ಡೇವಿಡ್-ತಿಲಕ್ ಶೈನಿಂಗ್
ಸೂರ್ಯ-ಇಶಾನ್ ಔಟಾದ ಬಳಿಕ ತಿಲಕ್ ವರ್ಮಾ ಮತ್ತು ಟಿಮ್ ಡೇವಿಡ್ ಮೇಲೆ ಜವಾಬ್ದಾರಿ ಹೆಚ್ಚಾಯಿತು. ಆದರೆ ಈ ಇಬ್ಬರು ಯಾವುದೇ ಒತ್ತಡಕ್ಕೆ ಒಳಗಾಗದೆ, ತಮ್ಮ ಮೇಲಿದ್ದ ಜವಾಬ್ದಾರಿಯನ್ನು ಅಚ್ಚುಕಟ್ಟಾಗಿ ನಿಭಾಯಿಸಿದರು. ಆ ಮೂಲಕ ತಂಡವನ್ನು ಗೆಲುವಿನ ದಡ ಸೇರಿಸಿದರು. ಟಿಮ್ ಡೇವಿಡ್ ಅಜೇಯ 19 ರನ್ ಗಳಿಸಿದರೆ, ತಿಲಕ್ ವರ್ಮಾ ಅಜೇಯ 26 ರನ್ ಗಳಿಸಿದರು. ಅಂತಿಮವಾಗಿ ಮುಂಬೈ 7 ಎಸೆತಗಳು ಬಾಕಿ ಇರುವಂತೆಯೇ 216 ರನ್ಗಳಿಸಿ 6 ವಿಕೆಟ್ಗಳ ಜಯ ಸಾಧಿಸಿತು.
ಟಾಸ್ ಸೋತು ಮೊದಲು ಬ್ಯಾಟಿಂಗ್ ನಡೆಸಿದ ಪಂಜಾಬ್ ಕಿಂಗ್ಸ್, ಕಳಪೆ ಆರಂಭ ಪಡೆಯಿತು. ಪ್ರಭು ಸಿಮ್ರಾನ್ ಸಿಂಗ್ ಬೇಗನೇ ಔಟಾದರು. ಬಳಿಕ ಶಿಖರ್ ಧವನ್ ಮತ್ತು ಮ್ಯಾಥ್ಯೂ ಶಾರ್ಟ್ ವಿಕೆಟ್ ಕಾಪಾಡಿದರು. 49 ರನ್ಗಳ ಜೊತೆಯಾಟವಾಡಿದ ಈ ಜೋಡಿಗೆ ಸ್ಪಿನ್ನರ್ ಪಿಯೂಷ್ ಚಾವ್ಲಾ ಶಾಕ್ ನೀಡಿದರು. ಶಿಖರ್ 30 ರನ್, ಶಾರ್ಟ್ 27 ರನ್ ಗಳಿಸಿ ಆದರು.
4ನೇ ವಿಕೆಟ್ಗೆ ಶತಕದ ಜೊತೆಯಾಟ
95 ರನ್ಗಳಿಗೆ 3 ವಿಕೆಟ್ಗಳನ್ನು ಕಳೆದುಕೊಂಡಿದ್ದ ಪಂಜಾಬ್ಗೆ ಲಿಯಾಮ್ ಲಿವಿಂಗ್ಸ್ಟೋನ್ ಮತ್ತು ಜಿತೇಶ್ ಶರ್ಮಾ ಆಸರೆಯಾದರು. ಒಂದೆಡೆ ವೇಗದ ಬ್ಯಾಟಿಂಗ್ ನಡೆಸಿದರೆ, ಮತ್ತೊಂದೆಡೆ ಬೌಲರ್ಗಳು ಸುಸ್ತಾದರು. ಕೇವಲ 53 ಎಸೆತಗಳಲ್ಲಿ 119 ರನ್ಗಳ ಕಾಣಿಕೆ ನೀಡಿದರು. ಅದರಲ್ಲೂ ಲಿವಿಂಗ್ಸ್ಟೋನ್ ಅವರ ಸ್ಪೋಟಕ ಆಟಕ್ಕೆ ಮುಂಬೈ ಅಕ್ಷರಶಃ ಬೆಚ್ಚಿ ಬಿದ್ದಿತು.
ಲಿವಿಂಗ್ಸ್ಟೋನ್ ಸ್ಫೋಟಕ ಅರ್ಧಶತಕ ವ್ಯರ್ಥ
ಲಿವಿಂಗ್ಸ್ಟೋನ್ ಘರ್ಜನೆಗೆ ಮುಂಬೆ ಹೆದರಿತು.ಆಕ್ರಮಣಕಾರಿ ಆಟದ ಮೂಲಕ ಸ್ಫೋಟಕ ಅರ್ಧಶತಕ ಚಚ್ಚಿದರು. ಲಿವಿಂಗ್ಸ್ಟೋನ್ 42 ಎಸೆತಗಳಲ್ಲಿ 7 ಬೌಂಡರಿ, 4 ಸಿಕ್ಸರ್ಗಳ ನೆರವಿನಿಂದ ಅಜೇಯ 82 ರನ್ ಗಳಿಸಿದರು. ಆದರೆ ಅವರ ಹೋರಾಟದ ಆಟ ವ್ಯರ್ಥವಾಗಿದೆ. ಜಿತೇಶ್ 27 ಎಸೆತಗಳಲ್ಲಿ ಅಜೇಯ 49 ರನ್ ಚಚ್ಚಿದರು. ಅಂತಿಮವಾಗಿ ಪಂಜಾಬ್ ಕಿಂಗ್ಸ್ 20 ಓವರ್ಗಳಲ್ಲಿ 3 ವಿಕೆಟ್ ನಷ್ಟಕ್ಕೆ 214 ರನ್ ಗಳಿಸಿತು.