ಕನ್ನಡ ಸುದ್ದಿ  /  ಕ್ರೀಡೆ  /  Kkr Vs Lsg: ಇಂದು ನಿರ್ಧಾರವಾಗಲಿದೆ ಕೆಕೆಆರ್-ಎಸ್​ಎಸ್​ಜಿ ಪ್ಲೇ ಆಫ್ ಭವಿಷ್ಯ; 2ನೇ ಸ್ಥಾನದ ಮೇಲೆ ಲಕ್ನೋ ಕಣ್ಣು; ಸಂಭಾವ್ಯ ತಂಡ ಹೀಗಿದೆ

KKR vs LSG: ಇಂದು ನಿರ್ಧಾರವಾಗಲಿದೆ ಕೆಕೆಆರ್-ಎಸ್​ಎಸ್​ಜಿ ಪ್ಲೇ ಆಫ್ ಭವಿಷ್ಯ; 2ನೇ ಸ್ಥಾನದ ಮೇಲೆ ಲಕ್ನೋ ಕಣ್ಣು; ಸಂಭಾವ್ಯ ತಂಡ ಹೀಗಿದೆ

ಕೋಲ್ಕತ್ತಾದ ಈಡನ್ ಗಾರ್ಡನ್ಸ್​ನಲ್ಲಿ ಇಂದು ನಡೆಯಲಿರುವ 2ನೇ ಪಂದ್ಯದಲ್ಲಿ ನಿತೀಶ್ ರಾಣಾ ನಾಯಕತ್ವದ ಕೋಲ್ಕತ್ತಾ ನೈಟ್ ರೈಡರ್ಸ್ ಹಾಗೂ ಕೃನಾಲ್ ಪಾಂಡ್ಯ ನೇತೃತ್ವದ ಲಕ್ನೋ ಸೂಪರ್ ಜೈಂಟ್ಸ್ (KKR vs LSG) ಮುಖಾಮುಖಿ ಆಗಲಿದೆ.

ಕೃನಾಲ್​ ಪಾಂಡ್ಯ ಮತ್ತು ನಿತೀಶ್​ ರಾಣಾ
ಕೃನಾಲ್​ ಪಾಂಡ್ಯ ಮತ್ತು ನಿತೀಶ್​ ರಾಣಾ

ಗೆಲುವಿನೊಂದಿಗೆ ಪ್ಲೇ ಆಫ್​​ಗೇರುವ ಲೆಕ್ಕಾಚಾರ ಹಾಕಿಕೊಂಡಿರುವ ಲಕ್ನೋ ಸೂಪರ್ ಜೈಂಟ್ಸ್​, ಐಪಿಎಲ್​ 16ರ 68ನೇ ಪಂದ್ಯದಲ್ಲಿ ಅತಿಥೇಯ ಕೋಲ್ಕತ್ತಾ ನೈಟ್​ ರೈಡರ್ಸ್​ ತಂಡದ ಸವಾಲಿಗೆ ಸಜ್ಜಾಗಿದೆ. ಕೃನಾಲ್​ ಪಾಂಡ್ಯ ಪಡೆ ಭಾರಿ ಅಂತರದ ಗೆಲುವು ಸಾಧಿಸಿದರೆ, ಅಂಕಪಟ್ಟಿಯಲ್ಲಿ 2ನೇ ಸ್ಥಾನಕ್ಕೇರುವ ಅವಕಾಶ ಹೊಂದಿದೆ. ಮತ್ತೊಂದೆಡೆ 7ನೇ ಸ್ಥಾನದಲ್ಲಿರುವ ಕೆಕೆಆರ್ ತಂಡಕ್ಕೂ ಪ್ಲೇ ಆಫ್​ ಕನಸು ಇಲ್ಲದಿದ್ದರೂ, ಗೆಲುವಿನೊಂದಿಗೆ ಸ್ಥಾನ ಸುಧಾರಣೆ ಕಾಣುವ ಅವಕಾಶ ಇದೆ. ಈ ಪಂದ್ಯಕ್ಕೆ ಮಳೆ ಭೀತಿಯೂ ಇದೆ.

ಈಡನ್​ ಗಾರ್ಡನ್​ ಮೈದಾನವು ಕೆಕೆಆರ್​​ಗೆ ತವರು ಮೈದಾನವಾಗಿದ್ದರೂ ಲಕ್ನೋ ತಂಡವು ಕೋಲ್ಕತ್ತಾದ ಮೋಹನ್​ ಬಾಗನ್​ ಫುಟ್​ಬಾಲ್​ ಕ್ಲಬ್​ಗೆ ಗೌರವ ಸೂಚಕವಾಗಿ ಕೆಂಗೆಂದು ಬಣ್ಣದ ಜೆರ್ಸಿ ತೊಟ್ಟು ಆಡಲಿದೆ. ಇದರಿಂದ ಸ್ಥಳೀಯ ಪ್ರೇಕ್ಷಕರ ಬೆಂಬಲ ಪಡೆಯುವ ನಿರೀಕ್ಷೆಯಲ್ಲಿದೆ. ಇನ್ನು ಕೆಕೆಆರ್​ ತವರಿನಲ್ಲಿ ಆಡಿದ 6 ಪಂದ್ಯಗಳಲ್ಲಿ 4ರಲ್ಲಿ ಸೋತಿದೆ. ಇದರಿಂದಾಗಿ ಲಕ್ನೋ ತಂಡವು ಗೆದ್ದು ಪ್ಲೇ ಆಪ್​ಗೇರುವ ಅವಕಾಶ ಇದೆ.

ಕೆಕೆಆರ್ ತಂಡದ ನಾಯಕನಾಗಿದ್ದ ಗೌತಮ್ ಗಂಭೀರ್​, ಈಗ ಲಕ್ನೋ ತಂಡದ ಮೆಂಟರ್ ಆಗಿದ್ದು, ಈಡನ್​ ಪಿಚ್​​ ಬಗ್ಗೆ ಅವರ ಜ್ಞಾನವು ಲಾಭದಾಯಕವಾಗಿದೆ. ಕೆಕೆಆರ್​ ಟೂರ್ನಿಯ ಆರಂಭಿಕ ಮೊದಲ 3 ಪಂದ್ಯಗಳಲ್ಲಿ ಗೆದ್ದಿದ್ದ ಕೆಕೆಆರ್​​​ ನಂತರದ ಸುತ್ತಿನಲ್ಲಿ ಸತತ 4 ಸೋಲು ಕಂಡಿತ್ತು. ಬಳಿಕ ಲಯಕ್ಕೆ ಮರಳಿದ ನಂತರದ 6 ಪಂದ್ಯಗಳ ಪೈಕಿ 4ರಲ್ಲಿ ಗೆದ್ದರೂ ಪ್ಲೇ ಆಫ್​ ಆಸೆ ಉಳಿಸಿಕೊಳ್ಳಲು ಸಾಧ್ಯವಾಗಿಲ್ಲ. ಸದ್ಯ 14 ಅಂಕ ಕಲೆ ಹಾಕಿರುವ ಕೆಕೆಆರ್​ ಪ್ಲೇ ಆಫ್​ಗೇರುವ ಅವಕಾಶ ಇದ್ದರೂ, ಕಳಪೆ ರನ್​ರೇಟ್​ ಹಿನ್ನಡೆ ತಂದಿಟ್ಟಿದೆ.

ಟ್ರೆಂಡಿಂಗ್​ ಸುದ್ದಿ

ಉಭಯ ತಂಡಗಳ ಮುಖಾಮುಖಿ

ಲಕ್ನೋ ಮತ್ತು ಕೆಕೆಆರ್ ತಂಡಗಳು ಪರಸ್ಪರ ಒಟ್ಟು 2 ಬಾರಿ ಮುಖಾಮುಖಿಯಾಗಿವೆ. ಆದರೆ ಈ ಎರಡೂ ಪಂದ್ಯಗಳಲ್ಲೂ ಲಕ್ನೋ ತಂಡವು ಗೆದ್ದು ಬೀಗಿದೆ. ಸದ್ಯ ಲಕ್ನೋ ವಿರುದ್ಧ ಖಾತೆ ತೆರೆಯುವ ಹಂಬದಲ್ಲಿದೆ ಕೆಕೆಆರ್.

ಪಿಚ್​ ರಿಪೋರ್ಟ್​

ಕೋಲ್ಕತ್ತಾದ ಈಡನ್​ ಗಾರ್ಡನ್ಸ್​ ಮೈದಾನವು ಬ್ಯಾಟಿಂಗ್​ ಸ್ನೇಹಿಯಾಗಿದೆ. ಮೊದಲ ಇನ್ನಿಂಗ್ಸ್​ನ ಸರಾರಿ ಮೊತ್ತ 196 ಇದೆ. ಬ್ಯಾಟ್ಸ್​ಮನ್​ಗಳ ಸ್ವರ್ಗವಾದ ಈ ಪಿಚ್​​​ನಲ್ಲಿ ಬೌಲರ್​​ಗಳು ಎಚ್ಚರಿಕೆ ವಹಿಸುವುದು ಮುಖ್ಯ. ಆದರೆ ಕಳೆದ ಪಂದ್ಯದಲ್ಲಿ ಕೋಲ್ಕತ್ತಾ 149 ರನ್​ಗಳಿಗೆ ಕುಸಿತ ಕಂಡಿತ್ತು. ಈ ಗುರಿಯನ್ನು ರಾಜಸ್ಥಾನ್ 13.1 ಓವರ್​​ಗಳಲ್ಲಿ ಚೇಸ್​ ಮಾಡಿತ್ತು. ಬ್ಯಾಟ್ಸ್​ಮನ್​​ಗಳಿಗೆ ನೆರವಾದರೆ, ಸ್ಪಿನ್ನರ್​ಗಳು ಪ್ರಭಾವ ಬೀರುವ ಸಾಧ್ಯತೆ ಇದೆ. ಟಾಸ್​ ಗೆದ್ದವರು ಚೇಸಿಂಗ್​​ ಆಯ್ಕೆ ಸಾಧ್ಯತೆ ಹೆಚ್ಚಿದೆ. ಪಂದ್ಯ ಮುಂದುವರೆದಂತೆ ಇಬ್ಬನಿ ಕಾಡುವ ಸಾಧ್ಯತೆ ಇದೆ.

ಕೋಲ್ಕತ್ತಾ ನೈಟ್​ ರೈಡರ್ಸ್​ ಸಂಭಾವ್ಯ ತಂಡ

ರಹಮಾನುಲ್ಲಾ ಗುರ್ಬಾಜ್ (ವಿಕೆಟ್​ ಕೀಪರ್​), ಜೇಸನ್ ರಾಯ್, ವೆಂಕಟೇಶ್ ಅಯ್ಯರ್, ನಿತೀಶ್ ರಾಣಾ (ನಾಯಕ), ಆಂಡ್ರೆ ರಸೆಲ್, ರಿಂಕು ಸಿಂಗ್, ಶಾರ್ದೂಲ್ ಠಾಕೂರ್, ಸುನಿಲ್ ನರೈನ್, ವೈಭವ್ ಅರೋರಾ, ಹರ್ಷಿತ್ ರಾಣಾ, ಸುಯಶ್ ಶರ್ಮಾ, ವರುಣ್ ಚಕ್ರವರ್ತಿ.

ಲಕ್ನೋ ಸೂಪರ್ ಜೈಂಟ್ಸ್​ ಸಂಭಾವ್ಯ ತಂಡ

ಕ್ವಿಂಟನ್ ಡಿ ಕಾಕ್ (ವಿಕೆಟ್​ ಕೀಪರ್​), ಕೈಲ್ ಮೇಯರ್ಸ್, ದೀಪಕ್ ಹೂಡಾ, ಪ್ರೇರಕ್ ಮಂಕಡ್, ಕೃನಾಲ್ ಪಾಂಡ್ಯ (ನಾಯಕ), ಮಾರ್ಕಸ್ ಸ್ಟೋಯ್ನಿಸ್, ನಿಕೋಲಸ್ ಪೂರನ್, ಆಯುಷ್ ಬಡೋನಿ, ನವೀನ್-ಉಲ್-ಹಕ್, ರವಿ ಬಿಷ್ಣೋಯ್, ಸ್ವಪ್ನಿಲ್ ಸಿಂಗ್, ಮೊಹ್ಸಿನ್ ಖಾನ್.