Suresh Raina: ಲಂಕಾ ಪ್ರೀಮಿಯರ್​​ ಲೀಗ್​​​ ಹರಾಜಿನಲ್ಲಿ ಸುರೇಶ್​ ರೈನಾ ಹೆಸರೇ ಕೂಗಲಿಲ್ಲ; ಇದು ಅವಮಾನ ಎಂದು ಅಭಿಮಾನಿಗಳು ಆಕ್ರೋಶ

ಶ್ರೀಲಂಕಾ ಕ್ರಿಕೆಟ್​ ಮಂಡಳಿಯು ಆಯೋಜಿಸುತ್ತಿರುವ ಲಂಕಾ ಪ್ರೀಮಿಯರ್ ಲೀಗ್‌ (LPL 2023) ಇತಿಹಾಸದಲ್ಲಿ ಇದೇ ಮೊದಲ ಬಾರಿಗೆ ಆಟಗಾರರ ಹರಾಜು ಪ್ರಕ್ರಿಯೆ ನಡೆಯಿತು. ಜೂನ್​ 14ರಂದು ನಡೆದ ಹರಾಜಿನಲ್ಲಿ ಆಟಗಾರರು ಉತ್ತಮ ಮೊತ್ತಕ್ಕೆ ಖರೀದಿಯಾದರು. ಆಕ್ಷನ್​​ನಲ್ಲಿ 60 ಆಟಗಾರರು ಹೆಸರು ನೋಂದಾಯಿಸಿಕೊಂಡಿದ್ದರು. ಅದರಲ್ಲಿ ಭಾರತದ ಸುರೇಶ್​ ರೈನಾ (Suresh Raina) ಕೂಡ ಒಬ್ಬರು. ಭಾರತದಿಂದ ಹೆಸರು ರಿಜಿಸ್ಟರ್ ಮಾಡಿಕೊಂಡಿದ್ದ ಏಕೈಕ ಆಟಗಾರ ಕೂಡ ಅವರೇ.

ಅಂತಾರಾಷ್ಟ್ರೀಯ ಕ್ರಿಕೆಟ್​​​ಗೆ ಗುಡ್​ಬೈ ಹೇಳಿರುವ ರೈನಾ, ಐಪಿಎಲ್​​ನಿಂದಲೂ ದೂರ ಆಗಿದ್ದಾರೆ. ಇದೀಗ ಲಂಕಾ ಪ್ರೀಮಿಯರ್​ ಲೀಗ್​ನಲ್ಲಿ ಆಡುವ ಅವಕಾಶ ಪಡೆಯುವ ನಿರೀಕ್ಷೆಯಲ್ಲಿದ್ದರು. ಜೊತೆಗೆ ಅಭಿಮಾನಿಗಳು ಮತ್ತೊಮ್ಮೆ ತಮ್ಮ ನೆಚ್ಚಿನ ಆಟಗಾರ ಆಟ ಕಣ್ತುಂಬಿಕೊಳ್ಳಬಹುದು ಎಂಬ ಕನಸಿನಲ್ಲಿದ್ದರು. ಒಂದು ಹಂತದಲ್ಲಿ ಸುರೇಶ್​ ರೈನಾ ಅವರನ್ನೇ ಎಲ್​ಪಿಎಲ್​ ತನ್ನ ಬ್ರಾಂಡ್​ ಅಂಬಾಸಿಡರ್​ ಆಗಿ ಬಳಸಿಕೊಳ್ಳುತ್ತಿದೆ ಎಂದು ಭಾವಿಸಲಾಗಿತ್ತು. ಆದರೀಗ ಹರಾಜಿನ ವೇಳೆ ಆ ದೃಶ್ಯವು ವ್ಯತಿರಿಕ್ತವಾಗಿದೆ.

ರೈನಾ ಹೆಸರೇ ಮಾಯ

ಆದರೆ ಹರಾಜಿನ ವೇಳೆ ಎಲ್ಲಿಯೂ ಸುರೇಶ್​ ರೈನಾ ಹೆಸರು ಕೇಳಿ ಬರಲಿಲ್ಲ. ಅನ್​​ಸೋಲ್ಡ್​​ ಲೀಸ್ಟ್​​ನಲ್ಲಾದರೂ ಇದ್ದಾರಾ ಎಂಬುದಕ್ಕೂ ಉತ್ತರ ಸಿಗಲಿಲ್ಲ. ಹಾಗಾದರೆ ರೈನಾ ಹೆಸರು ಏನಾಯಿತು ಎಂದು ಅಭಿಮಾನಿಗಳು ಗೊಂದಲಕ್ಕೆ ಒಳಗಾಗಿದ್ದಾರೆ. ಹರಾಜು ನಡೆಸಿಕೊಟ್ಟ ಚಾರು ಶರ್ಮಾ ಅವರು ರೈನಾ ಹೆಸರನ್ನು ಮರೆತಿದ್ದಾರೋ ಅಥವಾ ತಲೆ ಕೆಡಿಸಿಕೊಳ್ಳಲಿಲ್ಲವೋ ಎಂಬುದು ತಿಳಿಯಬೇಕಿದೆ. ಇದಕ್ಕೆ ಸಂಬಂಧಿಸಿ ಲಂಕಾ ಕ್ರಿಕೆಟ್​ ಬೋರ್ಡ್​​ ಯಾವುದೇ ಹೇಳಿಕೆ ನೀಡಿಲ್ಲ. ಇದರಿಂದ ಎಲ್​ಪಿಎಲ್​ನಲ್ಲಿ ರೈನಾ ಆಡುತ್ತಾರೋ ಇಲ್ಲವೋ ಎಂಬುದು ಅನುಮಾನ ಮೂಡಿಸಿದೆ.

11ನೇ ಸೆಟ್​​ನಲ್ಲಿತ್ತು ಚಿನ್ನ ತಲಾ ಹೆಸರು

ರೈನಾ ಅವರು ತನ್ನ ಮೂಲಬೆಲೆಯೊಂದಿಗೆ 11ನೇ ಸೆಟ್​​ನಲ್ಲಿ ಇದ್ದರು. ಈ ಸೆಟ್​ನಲ್ಲಿ ರಾಸ್ಸಿ ವಾನ್​ಡರ್​ ಡುಸೆನ್ (ಸೌತ್​ ಆಫ್ರಿಕಾ), ಇಮಾಮುಲ್​ ಹಕ್​ (ಪಾಕಿಸ್ತಾನ), ಎವಿನ್​ ಲೆವಿಸ್​ (ವೆಸ್ಟ್​ ಇಂಡೀಸ್​) ಹೀಗೆ ಪ್ರಮುಖ ಕ್ರಿಕೆಟರ್​ಗಳ ಹೆಸರುಗಳೂ ಇದ್ದವು. ಹರಾಜಿನಲ್ಲಿ ಈ ಎಲ್ಲಾ ಹೆಸರುಗಳನ್ನು ಪ್ರಸ್ತಾಪಿಸಿದ ಚಾರು ಶರ್ಮಾ, ರೈನಾ ಹೆಸರನ್ನು ಮರೆತಿದ್ದಾರೆ. ಆದರೆ ಇದು ಅಭಿಮಾನಿಗಳಲ್ಲಿ ತೀವ್ರ ಗೊಂದಲ ಮೂಡಿಸಿದೆ. ರೈನಾ ಹೆಸರನ್ನು ಕೂಗುವುದನ್ನು ಮರೆತಿದ್ದಾರಾ ಅಥವಾ ಕೊನೆಯ ಕ್ಷಣದಲ್ಲಿ ಹೆಸರನ್ನು ತೆಗೆದುಹಾಕಲಾಗಿದೆಯೇ ಎಂಬುದು ಸ್ಪಷ್ಟವಾಗಿಲ್ಲ.

ಐಪಿಎಲ್​ನಲ್ಲಿ ಅದ್ಭುತ ಪ್ರದರ್ಶನ

ಸುರೇಶ್​ ರೈನಾ ಟಿ20 ಕ್ರಿಕೆಟ್​ನಲ್ಲಿ ಅತ್ಯುತ್ತಮ ದಾಖಲೆ ಹೊಂದಿದ್ದಾರೆ. ಐಪಿಎಲ್​ನಲ್ಲಿ ಅತ್ಯಂತ ಯಶಸ್ವಿ ಕ್ರಿಕೆಟಿಗ ಎನಿಸಿಕೊಂಡಿರುವ ಸುರೇಶ್​ ರೈನಾ, 205 ಪಂದ್ಯಗಳ ಪೈಕಿ 5528 ರನ್​ ಗಳಿಸಿದ್ದಾರೆ. 1 ಶತಕ, 39 ಅರ್ಧಶತಕಗಳೂ ಇದರಲ್ಲಿ ಸೇರಿವೆ. ಸಿಎಸ್​ಕೆ ತಂಡದ ಪ್ರಮುಖ ಭಾಗವಾಗಿದ್ದ ರೈನಾ, ತಾನಿದ್ದಾಗ ಚೆನ್ನೈ 4 ಬಾರಿ ಚಾಂಪಿಯನ್​ (ಪ್ರಸ್ತುತ 5) ಆಗುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು.

ಟಿ20 ಕ್ರಿಕೆಟ್​ನಲ್ಲೂ ಉತ್ತಮ ಸಾಧನೆ

ಇದಲ್ಲದೆ, ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್​ನಲ್ಲೂ ಅಮೋಘ ದಾಖಲೆ ಹೊಂದಿದ್ದಾರೆ. ಟೀಮ್​ ಇಂಡಿಯಾ ಪರ 78 ಟಿ20 ಅಂತಾರಾಷ್ಟ್ರೀಯ ಪಂದ್ಯಗಳಲ್ಲಿ 1609 ರನ್​ ಗಳಿಸಿರುವ ರೈನಾ, 1 ಶತಕ, 5 ಅರ್ಧಶತಕಗಳನ್ನೂ ದಾಖಲಿಸಿದ್ದಾರೆ. ಇಂತಹ ಅದ್ಭುತ ಟ್ರ್ಯಾಕ್​ ರೆಕಾರ್ಡ್​ ಹೊಂದಿರುವ ಸುರೇಶ್​​ ರೈನಾಗೆ ಲಂಕಾ ಪ್ರೀಮಿಯರ್​​ ಲೀಗ್​​ನಲ್ಲಿ ಕಹಿ ಅನುಭವವಾಗಿದೆ ಎಂದೇ ಹೇಳಬಹುದು. ಆದರೆ ಈ ಬಗ್ಗೆ ಸ್ಪಷ್ಟನೆ ಬರುವವರೆಗೂ ಎಲ್​ಪಿಎಲ್​ ಆಡುತ್ತಾರೋ ಇಲ್ಲವೋ ಎಂಬುದು ತಿಳಿದಿಲ್ಲ.

ದಿಲ್ಶನ್​ ಮಧುಶನಕ ದುಬಾರಿ ಆಟಗಾರ

ಎಲ್​ಪಿಎಲ್​ನಲ್ಲಿ ಪಾಕಿಸ್ತಾನದ ನಾಯಕ ಬಾಬರ್ ಅಜಮ್​ ಏಕೈಕ ಐಕಾನ್​ ಆಟಗಾರ. ಬಾಬರ್​, ಕೊಲೊಂಬೋ ಸ್ಟ್ರೈಕರ್ಸ್​ ತಂಡದ ನಾಯಕನಾಗಿದ್ದಾರೆ. ಹರಾಜಿನಲ್ಲಿ ದಿಲ್ಶಾನ್​ ಮಧುಶನಕ ಅತಿಹೆಚ್ಚು ಬೆಲೆಗೆ ಮಾರಾಟವಾದ ದುಬಾರಿ ಆಟಗಾರ ಎಂಬ ದಾಖಲೆ ಬರೆದಿದ್ದಾರೆ. ಮಧುಶನಕ ಅವರನ್ನು ಲೈಕಾ ಜಾಫ್ನಾ ಕಿಂಗ್ಸ್​​ 92 ಸಾವಿರ ಡಾಲರ್ಸ್​ಗೆ ಖರೀದಿಸಿದೆ. ಆ ನಂತರ ಚರಿತ್​ ಅಸಲಂಕಾ ಅವರನ್ನು ಅದೇ ತಂಡವು, 80 ಸಾವಿರ ಡಾಲರ್​ಗೆ ಖರೀದಿತು. ಇನ್ನು ಮೂರನೇ ಸ್ಥಾನದಲ್ಲಿ ಧನಂಜಯ್ ಡಿಸಿಲ್ವಾ ಅವರು 76 ಸಾವಿರ ಡಾಲರ್​ಗೆ ದಂಬುಲ್ಲಾ ಔರಾ ತಂಡಕ್ಕೆ ಸೇಲಾದರು.