Virat Kohli: 2008ರ ಅಂಡರ್​​-19 ವಿಶ್ವಕಪ್​ನಲ್ಲಿ ಭಾರತವನ್ನು ಚಾಂಪಿಯನ್ ಪಟ್ಟಕ್ಕೇರಿಸಿದ್ದ ವಿರಾಟ್ ಕೊಹ್ಲಿ ಸಹ ಆಟಗಾರರು ಈಗ ಅಂಪೈರ್ಸ್

ವಿರಾಟ್​ ಕೊಹ್ಲಿ (Virat Kohli) ಸದ್ಯ ಟೀಮ್​ ಇಂಡಿಯಾದ (Team India) ಸೂಪರ್ ಸ್ಟಾರ್ ಆಟಗಾರ. ಸುಮಾರು 15 ವರ್ಷಗಳಿಂದ ಭಾರತೀಯ ತಂಡದಲ್ಲಿ ಗುರುತಿಸಿಕೊಂಡಿರುವ ಕೊಹ್ಲಿ, ಅಪಾರ ಕೊಡುಗೆ ನೀಡಿದ್ದಾರೆ. ಆತನೇ ತಂಡದ ಪ್ರಮುಖ ಬ್ಯಾಟಿಂಗ್​ ಅಸ್ತ್ರ. ವೆಸ್ಟ್​ ಇಂಡೀಸ್​ ಪ್ರವಾಸದ ಏಕದಿನ ಸರಣಿಯಲ್ಲಿ ಕೊನೆಯ ಎರಡು ಪಂದ್ಯಗಳಿಗೆ ಬೆಂಚ್​ ಕಾದಿದ್ದ ಕೊಹ್ಲಿ, ಈಗ ತವರಿಗೆ ಮರಳಲಿದ್ದಾರೆ.

ಆ ಬಳಿಕ ಏಷ್ಯಾಕಪ್​ಗೆ (Asia Cup 2023) ಸಖತ್​ ಸಿದ್ಧತೆ ಆರಂಭಿಸಲಿದ್ದಾರೆ. ಕೊಹ್ಲಿ ಕ್ರಿಕೆಟ್​ನಲ್ಲಿ ಬ್ಯುಸಿಯಾಗಿದ್ದರೆ, ಆತನ ಸಹ ಆಟಗಾರರು ಅಂಪೈರ್​​ಗಳಾಗಿ ಬದಲಾಗಿದ್ದಾರೆ. ಕಡಿಮೆ ವಯಸ್ಸಿಗೆ ನಿವೃತ್ತಿ ಘೋಷಿಸಿರುವ ಇಬ್ಬರು ಆಟಗಾರರು, ಅಂಪೈರ್ ಮೂಲಕ ಹೊಸ ಇನ್ನಿಂಗ್ಸ್​ ಆರಂಭಿಸಿದ್ದಾರೆ. ಹಾಗಾದರೆ ಅವರು ಯಾರು? ಸದ್ಯ ಎಲ್ಲಿ ಅಂಪೈರಿಂಗ್​ ಮಾಡುತ್ತಿದ್ದಾರೆ ಎಂಬುದನ್ನು ನೋಡೋಣ ಬನ್ನಿ.

ವಿರಾಟ್ ಕೊಹ್ಲಿಯ ಅವರೊಂದಿಗೆ ಕ್ರಿಕೆಟ್ ವೃತ್ತಿ ಬದುಕು ಆರಂಭಿಸಿದ್ದ​ ತನ್ಮಯ್ ಶ್ರೀವಾಸ್ತವ್ (Tanmay Srivastava) (33 ವರ್ಷ) ಮತ್ತು ಅಜಿತೇಶ್ ಅರ್ಗಲ್ (Ajitesh Argal) (34 ವರ್ಷ) ಕೆಲ ವರ್ಷಗಳ ಹಿಂದಷ್ಟೇ ವಿದಾಯ ಹೇಳಿದ್ದರು. ಕ್ರಿಕೆಟ್​ನಲ್ಲಿ ಅದ್ಭುತ ಪ್ರದರ್ಶನ ನೀಡಿದ್ದರ ಹೊರತಾಗಿಯೂ ಭಾರತೀಯ ತಂಡಕ್ಕೆ ಆಯ್ಕೆಯಾಗಲಿಲ್ಲ ಎಂಬುದು ಬೇಸರದ ಸಂಗತಿ. ಈಗ ಇಬ್ಬರು ಕ್ರಿಕೆಟಿಗರು ಬಿಸಿಸಿಐ ನಡೆಸಿದ ಅಂಪೈರಿಂಗ್ ಪರೀಕ್ಷೆಯಲ್ಲಿ ಪಾಸ್ ಆಗಿದ್ದಾರೆ. ಶೀಘ್ರದಲ್ಲೇ ಅಜಿತೇಶ್, ತನ್ಮಯ್ ಡೊಮೆಸ್ಟಿಕ್ ಕ್ರಿಕೆಟ್​​ನಲ್ಲಿ ಅಂಪೈರ್​ಗಳಾಗಿ ಕಾಣಿಸಿಕೊಳ್ಳಲಿದ್ದಾರೆ.

ಅಜಿತೇಶ್-ತನ್ಮಯ್, ಆಗಸ್ಟ್ 17-19ರವರೆಗೆ ಅಹ್ಮದಾಬಾದ್​​ನಲ್ಲಿ ಬಿಸಿಸಿಐನ ಓರಿಯಂಟೇಶನ್ ಕಾರ್ಯಕ್ರಮ ಮತ್ತು ಸೆಮಿನಾರ್‌ ನಡೆಯಲಿದೆ. ಆ ನಂತರ ಮಂಡಳಿ ಆಯೋಜಿಸುವ ಪಂದ್ಯಗಳಲ್ಲಿ ಅಧಿಕೃತವಾಗಿ ಅಂಪೈರ್​​ ಆಗಿ ಭಾಗವಹಿಸಲಿದ್ದಾರೆ ಎಂದು ಟೈಮ್ಸ್ ಆಫ್ ಇಂಡಿಯಾ ವರದಿ ಮಾಡಿದೆ. ಆರಂಭದಲ್ಲಿ ಡೊಮೆಸ್ಟಿಕ್​ನ ಪಂದ್ಯಗಳಲ್ಲಿ ಅಂಪೈರ್​ಗಳಾಗಿ ಕೆಲಸ ಮಾಡಲಿದ್ದಾರೆ.

ಅಂತಾರಾಷ್ಟ್ರೀಯ ಕ್ರಿಕೆಟ್​ನಲ್ಲಿ ಅಂಪೈರಿಂಗ್ ಸೇವೆ ಸಲ್ಲಿಸಬೇಕೆಂದರೆ, ಐಸಿಸಿ ನಡೆಸುವ ತೀರ್ಪುಗಾರರ ಪರೀಕ್ಷೆಯಲ್ಲಿ ಪಾಸ್​ ಆಗಬೇಕಾಗುತ್ತದೆ. ಹಾಗಾಗಿ, ಮುಂಬರುವ ದಿನಗಳಲ್ಲಿ ವಿರಾಟ್ ಕೊಹ್ಲಿ ಸಹ ಆಟಗಾರರು ಅಂತಾರಾಷ್ಟ್ರೀಯ ಪಂದ್ಯಗಳಲ್ಲೂ ಅಂಪೈರ್​ಗಳಾಗಿ ಭಾಗಹಿಸಿದರೂ ಅಚ್ಚರಿ ಇಲ್ಲ. ಅಜಿತೇಶ್ ದೇಶೀ ಕ್ರಿಕೆಟ್​ನಲ್ಲಿ​ಕಡಿಮೆ ಪಂದ್ಯಗಳನ್ನು ಆಡಿದ್ದಾರೆ. ಆದರೆ, ತನ್ಮಯ್ ಶ್ರೀವಾಸ್ತವ್ ಅವರು ಅದ್ಭುತ ಪ್ರದರ್ಶನ ನೀಡಿದ್ದಾರೆ.

ಅಜಿತೇಶ್ ಅರ್ಗರ್​

ಅಜಿತೇಶ್ 10 ಪ್ರಥಮ ದರ್ಜೆ ಪಂದ್ಯಗಳನ್ನು ಆಡಿದ್ದಾರೆ. ಆದರೆ ಗಳಿಸಿರುವುದು 78 ರನ್ ಮಾತ್ರ. ಇನ್ನು ಲೀಸ್ಟ್​​ ಎನಲ್ಲಿ 3 ಪಂದ್ಯಗಳಾಡಿದ್ದು, 2 ರನ್ ಗಳಿಸಿದ್ದಾರೆ. ಇನ್ನು 6 ಟಿ20ಗಳಲ್ಲಿ ಭಾಗವಹಿಸಿದ್ದು, 33 ರನ್ ಸಿಡಿಸಿದ್ದಾರೆ. ಇನ್ನು ಬೌಲಿಂಗ್​ನಲ್ಲಿ ಪ್ರಥಮ ದರ್ಜೆ ಕ್ರಿಕೆಟ್​​ನಲ್ಲಿ 24 ವಿಕೆಟ್​ ಪಡೆದಿದ್ದರೆ, ಲೀಸ್ಟ್​​ ಎನಲ್ಲಿ 1 ವಿಕೆಟ್, ಟಿ20ನಲ್ಲಿ 4 ವಿಕೆಟ್ ಪಡೆದಿದ್ದಾರೆ. 2008ರ ಅಂಡರ್​-19 ವಿಶ್ವಕಪ್​​ ಫೈನಲ್​ನಲ್ಲಿ ಅದ್ಭುತ ಪ್ರದರ್ಶನ ತೋರಿ ಪಂದ್ಯಶ್ರೇಷ್ಠ ಪ್ರಶಸ್ತಿ ಗೆದ್ದಿದ್ದರು.

ತನ್ಮಯ್ ಶ್ರೀವಾಸ್ತವ್

ಪ್ರಥಮ ದರ್ಜೆ ಕ್ರಿಕೆಟ್​ನಲ್ಲಿ 90 ಪಂದ್ಯಗಳನ್ನಾಡಿದ್ದು, 10 ಶತಕ, 27 ಅರ್ಧಶತಕಗಳ ನೆರವಿನಿಂದ 4918 ರನ್​ ಸಿಡಿಸಿದ್ದಾರೆ. ಇನ್ನು ಲೀಸ್ಟ್​​ ಎನಲ್ಲಿ 44 ಪಂದ್ಯಗಳಲ್ಲಿ ಬ್ಯಾಟ್ ಬೀಸಿದ್ದು, 7 ಶತಕ, 10 ಅರ್ಧಶತಕಗಳ ಸಹಾಯದಿಂದ 1728 ರನ್ ಚಚ್ಚಿದ್ದಾರೆ. ಬ್ಯಾಟಿಂಗ್​ ಸರಾಸರಿ 44.30 ಇದೆ. ಇನ್ನು ಐಪಿಎಲ್ ಸೇರಿ 34 ಟಿ20 ಪಂದ್ಯಗಳಲ್ಲಿ ಕಣಕ್ಕಿಳಿದಿದ್ದು, 649 ರನ್ ಗಳಿಸಿದ್ದಾರೆ. ತನ್ಮಯ್ ವಿಶ್ವಕಪ್ ಫೈನಲ್​​ನಲ್ಲಿ 46 ರನ್ ಸಿಡಿಸಿದ್ದರು.