ಚೆಸ್ ರ್ಯಾಂಕಿಂಗ್: 3ನೇ ಸ್ಥಾನಕ್ಕೇರಿದ ಗುಕೇಶ್; ಅಗ್ರ 8ರೊಳಗೆ ಸ್ಥಾನ ಪಡೆದ ಅರ್ಜುನ್-ಪ್ರಜ್ಞಾನಂದ; ಕುಸಿದ ವಿಶ್ವನಾಥನ್ ಆನಂದ್
ಲೈವ್ ಎಲೋ ಚೆಸ್ ರೇಟಿಂಗ್ಲ್ಲಿ ಡಿ ಗುಕೇಶ್ ಮೂರನೇ ಸ್ಥಾನಕ್ಕೆ ಏರಿದ್ದಾರೆ. ವಿಶ್ವನಾಥನ್ ಆನಂದ್ 10ನೇ ಸ್ಥಾನದಿಂದ 12ನೇ ಸ್ಥಾನಕ್ಕೆ ಕುಸಿದಿದ್ದಾರೆ. ಅರ್ಜುನ್ ಎರಿಗೈಸಿ ಮತ್ತು ಪ್ರಜ್ಞಾನಂದ ನಂತರದ ಸ್ಥಾನದಲ್ಲಿದ್ದಾರೆ.

ಕಳೆದ ವರ್ಷದ (2024) ಡಿಸೆಂಬರ್ನಲ್ಲಿ ಸಿಂಗಾಪುರದಲ್ಲಿ ನಡೆದ ವಿಶ್ವ ಚೆಸ್ ಚಾಂಪಿಯನ್ಶಿಪ್ ಗೆಲುವಿನ ನಂತರ ಭಾರತದ ಚೆಸ್ ಗ್ರ್ಯಾಂಡ್ ಮಾಸ್ಟರ್ ಡಿ ಗುಕೇಶ್ ಅಮೋಘ ಫಾರ್ಮ್ನಲ್ಲಿದ್ದಾರೆ. ಶನಿವಾರ (ಫೆ.1) ಜೋರ್ಡೆನ್ ವ್ಯಾನ್ ಫೋರ್ಸ್ಟ್ ವಿರುದ್ಧ ಕಠಿಣ ಸ್ಪರ್ಧೆಯಲ್ಲಿ ಡ್ರಾ ಸಾಧಿಸಿದ ಅವರು, ಆರ್ ಪ್ರಜ್ಞಾನಂದ ಅವರೊಂದಿಗೆ ಮುನ್ನಡೆಯನ್ನು ಹಂಚಿಕೊಂಡಿದ್ದಾರೆ. ಶನಿವಾರ ನಡೆದ ಟಾಟಾ ಸ್ಟೀಲ್ ಮಾಸ್ಟರ್ಸ್ ಪಂದ್ಯದ ನಂತರ ಲೈವ್ ಎಲೋ ರೇಟಿಂಗ್ಸ್ನಲ್ಲಿ ಗುಕೇಶ್ ಮೂರನೇ ಸ್ಥಾನಕ್ಕೆ ಏರಿದ್ದಾರೆ.
ಗುಕೇಶ್ ಈಗ 2791.9 ರೇಟಿಂಗ್ನೊಂದಿಗೆ ವಿಶ್ವದಲ್ಲೇ 3ನೇ ಸ್ಥಾನದಲ್ಲಿದ್ದಾರೆ. ಎರಡನೇ ಸ್ಥಾನದಲ್ಲಿ ಹಿಕಾರು ನಕಮುರಾ (2802) ಮತ್ತು ಅಗ್ರಸ್ಥಾನದಲ್ಲಿರುವ ಮ್ಯಾಗ್ನಸ್ ಕಾರ್ಲ್ಸನ್ (2833) ನಂತರದ ಸ್ಥಾನದಲ್ಲಿದ್ದಾರೆ. ಇದೇ ವೇಳೆ ಫ್ಯಾಬಿಯಾನೊ ಕರುವಾನಾ 2790.2 ರೇಟಿಂಗ್ನೊಂದಿಗೆ ನಾಲ್ಕನೇ ಸ್ಥಾನದಲ್ಲಿದ್ದರೆ. ನೊಡಿರ್ಬೆಕ್ ಅಬ್ದುಸಾಟೊರೊವ್ (2774), ಅರ್ಜುನ್ ಎರಿಗೈಸಿ (2772), ಪ್ರಜ್ಞಾನಂದ (2763.3) ಮತ್ತು ಅಲಿರೆಜಾ ಫಿರೋಜ್ಜಾ (2759.9) ನಂತರದ ಸ್ಥಾನಗಳಲ್ಲಿದ್ದಾರೆ.
ವಿಶ್ವನಾಥನ್ ಆನಂದ್ 10ನೇ ಸ್ಥಾನದಿಂದ 12ನೇ ಸ್ಥಾನಕ್ಕೆ ಕುಸಿದಿದ್ದಾರೆ. ಚೆಸ್ ದಂತಕಥೆ ಪ್ರಸ್ತುತ ಫಿಡೆ ಉಪಾಧ್ಯಕ್ಷರಾಗಿದ್ದಾರೆ. ಪಂದ್ಯಾವಳಿಗಳಲ್ಲಿ ಹೆಚ್ಚಾಗಿ ಕಾಣಿಸಿಕೊಳ್ಳದ ಚೆಸ್ ದಿಗ್ಗಜ, ಫ್ರೀಸ್ಟೈಲ್ ಗ್ರ್ಯಾಂಡ್ ಸ್ಲಾಮ್ ಟೂರ್ನ ಮೊದಲ ಹಂತದಲ್ಲಿ ಭಾಗವಹಿಸಲು ನಿರ್ಧರಿಸಿದ್ದರು. ಆದರೆ ಆ ನಂತರ ಹಿಂದೆ ಸರಿದರು.
ಮುಂದಿನ ಸುತ್ತಿನಲ್ಲಿ ಅರ್ಜುನ್ ಅವರನ್ನು ಎದುರಿಸುವ ಬಗ್ಗೆ ಮಾತನಾಡಿದ ಗುಕೇಶ್, "ತುಂಬಾ ಖುಷಿ. ನಾನು ಈ ಆಟದಲ್ಲಿ ಗೆಲ್ಲಲು ಸಾಧ್ಯವಾಗಿದ್ದಕ್ಕೆ ನನಗೆ ಈಗಾಗಲೇ ಸಂತೋಷವಾಗಿದೆ. ಎಲ್ಲವೂ ರೋಮಾಂಚಕಾರಿ ಅಂತ್ಯಕ್ಕೆ ಸಜ್ಜಾಗಿದೆ. ನಾನು ಸಾಧ್ಯವಾದಷ್ಟು ಆನಂದಿಸಲು ಪ್ರಯತ್ನಿಸುತ್ತೇನೆ," ಎಂದು ಹೇಳಿದ್ದಾರೆ.
ಜರ್ಮನಿಗೆ ಪ್ರಯಾಣ
ಟಾಟಾ ಸ್ಟೀಲ್ ಮಾಸ್ಟರ್ಸ್ ಮುಗಿದ ನಂತರ, ಗುಕೇಶ್ ಫ್ರೀಸ್ಟೈಲ್ ಚೆಸ್ ಗ್ರ್ಯಾಂಡ್ ಸ್ಲಾಮ್ ಟೂರ್ನ ಮೊದಲ ಹಂತದಲ್ಲಿ ಆಡಲು ಜರ್ಮನಿಗೆ ಪ್ರಯಾಣಿಸಲಿದ್ದಾರೆ. ಅಲ್ಲಿ ಪ್ರಬಲ ಆಟಗಾರ ಮ್ಯಾಗ್ನಸ್ ಕಾರ್ಲ್ಸನ್ ಮತ್ತು ಕರುವಾನಾ ಅವರನ್ನು ಎದುರಿಸಲಿದ್ದಾರೆ.
