ಪ್ರೊ ಕಬಡ್ಡಿ ಲೀಗ್ ಫೈನಲ್: ಹರಿಯಾಣ ಸ್ಟೀಲರ್ಸ್​ ಚೊಚ್ಚಲ ಚಾಂಪಿಯನ್; ಪಾಟ್ನಾ ಪೈರೇಟ್ಸ್ 4ನೇ ಟ್ರೋಫಿ ಕನಸು ಭಗ್ನ

11ನೇ ಆವೃತ್ತಿಯ ಪ್ರೊ ಕಬಡ್ಡಿ ಲೀಗ್​ನಲ್ಲಿ (Pro Kabaddi League 11) ಹರಿಯಾಣ ಸ್ಟೀಲರ್ಸ್ ತಂಡವು (Haryana Steelers) ನೂತನ ಚಾಂಪಿಯನ್‌ ಪಟ್ಟ ಅಲಂಕರಿಸಿದೆ. ಪಾಟ್ನಾ ಪೈರೇಟ್ಸ್​​ ವಿರುದ್ಧದ ರೋಚಕ ಫೈನಲ್​​ನಲ್ಲಿ ಗೆದ್ದ ಹರಿಯಾಣ ಪಿಕೆಎಲ್‌ ಇತಿಹಾಸದಲ್ಲೇ ಚೊಚ್ಚಲ ಟ್ರೋಫಿ ಎತ್ತಿಹಿಡಿದಿದೆ. ಡಿಸೆಂಬರ್​ 29ರ ಭಾನುವಾರ ರಾತ್ರಿ ಪುಣೆಯ ಶ್ರೀ ಶಿವ ಛತ್ರಪತಿ ಕ್ರೀಡಾ ಸಂಕೀರ್ಣದಲ್ಲಿ ನಡೆದ ಈ ಹಣಾಹಣಿಯಲ್ಲಿ 32-23 ಅಂಕಗಳಿಂದ ಗೆಲುವು ಸಾಧಿಸಿ ಚಾಂಪಿಯನ್ ಆಗಿ ಹೊರಹೊಮ್ಮಿದೆ. ಕಳೆದ ಬಾರಿ ರನ್ನರ್​ಅಪ್​ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡಿದ್ದ ಸ್ಟೀಲರ್ಸ್, ಪ್ರಶಸ್ತಿ ದಕ್ಕಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದೆ. ಆದರೆ ಪಾಟ್ನಾ ಪೈರೇಟ್ಸ್ 4ನೇ ಟ್ರೋಫಿ ಕನಸು ಭಗ್ನಗೊಂಡಿದೆ.

ಪಂದ್ಯದಲ್ಲಿ ಟಾಸ್ ಜಯಿಸಿದ ಪಾಟ್ನಾ, ಎದುರಾಳಿ ತಂಡಕ್ಕೆ ರೈಡ್​ಗೆ ಅವಕಾಶ ನೀಡಿತು. ಆರಂಭದಿಂದಲೂ ಆಕ್ರಮಣಕಾರಿ ಆಟವಾಡಿದ ಹರಿಯಾಣ ಯಾವುದೇ ಹಂತದಲ್ಲೂ ಪಾಟ್ನಾಗೆ ಲೀಡ್ ಬಿಟ್ಟುಕೊಡಲಿಲ್ಲ. ಪಾಟ್ನಾ ಪರ ಆಯಾನ್ ಎರಡು ಅಂಕ ಪಡೆದು 7-7 ಸಮಬಲ ಸಾಧಿಸಲು ನೆರವಾದರೂ ಮೊದಲಾರ್ಧ ಮುಕ್ತಾಯಕ್ಕೆ 15-12 ಅಂಕಗಳಿಂದ ಹಿನ್ನಡೆ ಅನುಭವಿಸಿತು. ಈ ವೇಳೆ ಹರಿಯಾಣ 7 ರೈಡ್ ಪಾಯಿಂಟ್ಸ್, ಪಾಟ್ನಾ 5 ರೈಡ್ ಪಾಯಿಂಟ್ಸ್ ಪಡೆಯಿತು. ಅಲ್ಲದೆ, ಹರಿಯಾಣ 8 ಟ್ಯಾಕಲ್, ಪಾಟ್ನಾ 6 ಟ್ಯಾಕಲ್ ಅಂಕ ಪಡೆಯಿತು. ಫಸ್ಟ್​ ಹಾಫ್ ಬಳಿಕವೂ ಹರಿಯಾಣ ಆರ್ಭಟ ಮುಂದುವರೆಯಿತು. ಪಾಟ್ನಾ ಪ್ರಬಲ ಪೈಪೋಟಿ ನೀಡಲು ಯತ್ನಿಸಿದರೂ ಗೆಲುವಿನ ದಡ ಸೇರಲು ಸಾಧ್ಯವಾಗಿಲ್ಲ.

ಇದನ್ನೂ ಓದಿ: ಡಬ್ಲ್ಯುಟಿಸಿ ಫೈನಲ್​ಗೇರಿದ ದಕ್ಷಿಣ ಆಫ್ರಿಕಾ, ಉಳಿದ ಸ್ಥಾನಕ್ಕೆ 3 ತಂಡಗಳ ನಡುವೆ ಫೈಟ್, ಎರಡೂ ಪಂದ್ಯ ಗೆದ್ದರಷ್ಟೇ ಭಾರತಕ್ಕೆ ಉಳಿಗಾಲ

ದ್ವಿತೀಯಾರ್ಧದಲ್ಲಿ ಇನ್ನೂ 12 ನಿಮಿಷಗಳು ಇರುವಾಗ ಭರ್ಜರಿ ಮುನ್ನಡೆ ಸಾಧಿಸಿದ ಹರಿಯಾಣ, ಮತ್ತೆ ಹಿಂದಿರುಗಿ ನೋಡಲಿಲ್ಲ. ಪಂದ್ಯದ 28 ನಿಮಿಷಗಳಲ್ಲಿ ಸ್ಕೋರ್​ ಪಾಟ್ನಾ 18 ಮತ್ತು ಸ್ಟೀಲರ್ಸ್ 27 ಅಂಕ ಪಡೆದಿತ್ತು. ಹರಿಯಾಣ ಅಂತಿಮ ಕ್ಷಣದವರೆಗೂ ಮುನ್ನಡೆ ಕಾಯ್ದುಕೊಂಡು 32-23 ಅಂಕಗಳಿಂದ ಗೆದ್ದು ಬೀಗಿತು. ಹರಿಯಾಣ ಪರ ಶಿವಂ ಪರಾತೆ 9 ಅಂಕ, ಮೊಹಮ್ಮದ್ರೇಜಾ ಶಾಡ್ಲೌಯಿ ಚಿಯಾನೆ 7 ಅಂಕ, ವಿನಯ್ 6 ಅಂಕ ಗಳಿಸಿ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದರು. ಪಾಟ್ನಾ ಪರ ಗುರುದೀಪ್ 6, ದೇವಾಂಕ್ 5 ಅಂಕ ಪಡೆದು ಹೋರಾಟ ನಡೆಸಿದರಾದರೂ ತಂಡಕ್ಕೆ ಗೆಲುವು ತಂದುಕೊಡಲು ವಿಫಲರಾದರು.

ಪಿಕೆಎಲ್ ವಿಜೇತರು (ರನ್ನರ್​ಅಪ್) ಪಟ್ಟಿ

ಪಿಕೆಎಲ್ 1 - ಜೈಪುರ ಪಿಂಕ್ ಪ್ಯಾಂಥರ್ಸ್ (ಯು ಮುಂಬಾ)

ಪಿಕೆಎಲ್ 2 - ಯು ಮುಂಬಾ (ಬೆಂಗಳೂರು ಬುಲ್ಸ್)

ಪಿಕೆಎಲ್ 3 - ಪಾಟ್ನಾ ಪೈರೇಟ್ಸ್ (ಯು ಮುಂಬಾ)

ಪಿಕೆಎಲ್ 4 - ಪಾಟ್ನಾ ಪೈರೇಟ್ಸ್ (ಜೈಪುರ ಪಿಂಕ್ ಪ್ಯಾಂಥರ್ಸ್)

ಪಿಕೆಎಲ್ 5 - ಪಾಟ್ನಾ ಪೈರೇಟ್ಸ್ (ಗುಜರಾತ್ ಜೈಂಟ್ಸ್)

ಪಿಕೆಎಲ್ 6 - ಬೆಂಗಳೂರು ಬುಲ್ಸ್ (ಗುಜರಾತ್ ಜೈಂಟ್ಸ್)

ಪಿಕೆಎಲ್ 7 - ಬೆಂಗಾಲ್ ವಾರಿಯರ್ಸ್ (ದಬಾಂಗ್ ಡೆಲ್ಲಿ)

ಪಿಕೆಎಲ್ 8 - ದಬಾಂಗ್ ಡೆಲ್ಲಿ (ಪಾಟ್ನಾ ಪೈರೇಟ್ಸ್)

ಪಿಕೆಎಲ್ 9 - ಜೈಪುರ ಪಿಂಕ್ ಪ್ಯಾಂಥರ್ಸ್ (ಪುಣೇರಿ ಪಲ್ಟನ್)

ಪಿಕೆಎಲ್ 10 - ಪುಣೇರಿ ಪಲ್ಟನ್ (ಹರಿಯಾಣ ಸ್ಟೀಲರ್ಸ್)

ಪಿಕೆಎಲ್ 11 - ಹರಿಯಾಣ ಸ್ಟೀಲರ್ಸ್ (ಪಾಟ್ನಾ ಪೈರೇಟ್ಸ್)

ಇದನ್ನೂ ಓದಿ: ಭಾರತ ತಂಡ ಮಾಡಿದ್ದು ಒಂದೆರಡಲ್ಲ ಬರೋಬ್ಬರಿ ಐದು ತಪ್ಪುಗಳು; ದುಬಾರಿಯಾದ್ವು ನೋ ಬಾಲ್, ಕ್ಯಾಚ್​ ಡ್ರಾಪ್‌ಗಳು

2025 ನಿಮಗೆ ಏನೆಲ್ಲಾ ಶುಭಫಲಗಳನ್ನು ನೀಡಲಿದೆ?

ಹೊಸ ವರ್ಷದಲ್ಲಿ ಬದಲಾವಣೆಗಳು, ಉದ್ಯೋಗ ಪ್ರಗತಿ, ವಿದ್ಯಾಭ್ಯಾಸ, ಪ್ರೀತಿ, ದಾಂಪತ್ಯ ಸೇರಿದಂತೆ ನೀವು ತಿಳಿಯಬಯಸುವ ಸಮಗ್ರ ಮಾಹಿತಿ ಇಲ್ಲಿದೆ. ಪ್ರತಿ ರಾಶಿಯ ಸಮಗ್ರ ವಿವರ ಇಲ್ಲಿ ಲಭ್ಯ. ನೀವು ಈವರೆಗೆ ನೋಡಿಲ್ಲ ಅಂತಾದ್ರೆ ಬೇಗ ನೋಡಿ. ಈಗಾಗಲೇ ನೋಡಿದ್ದರೆ ನಿಮ್ಮ ಆಪ್ತರಿಗೂ ಈ ಬಗ್ಗೆ ತಿಳಿಸಿ. https://kannada.hindustantimes.com/astrology/yearly-horoscope