ಪ್ರೊ ಕಬಡ್ಡಿ ಲೀಗ್ 11: ಫೈನಲ್ ಪ್ರವೇಶಿಸಿದ ಹರಿಯಾಣ ಸ್ಟೀಲರ್ಸ್, ಪಾಟ್ನಾ ಪೈರೇಟ್ಸ್; ಡಿ 29ರಂದು ಪ್ರಶಸ್ತಿಗಾಗಿ ಕಾದಾಟ
PKL Season 11: 11ನೇ ಆವೃತ್ತಿಯ ಪ್ರೊ ಕಬಡ್ಡಿ ಲೀಗ್ನಲ್ಲಿ ಹರಿಯಾಣ ಸ್ಟೀಲರ್ಸ್, ಪಾಟ್ನಾ ಪೈರೇಟ್ಸ್ ತಂಡಗಳು ಫೈನಲ್ ಪ್ರವೇಶಿಸಿವೆ. ಡಿಸೆಂಬರ್29ರಂದು ಪ್ರಶಸ್ತಿಗಾಗಿ ಕಾದಾಟ ನಡೆಸಲಿವೆ.
11ನೇ ಆವೃತ್ತಿಯ ಪ್ರೊ ಕಬಡ್ಡಿ ಲೀಗ್ ಫೈನಲ್ ಪಂದ್ಯದಲ್ಲಿ ಹರಿಯಾಣ ಸ್ಟೀಲರ್ಸ್-ಪಾಟ್ನಾ ಪೈರೇಟ್ಸ್ ತಂಡಗಳು ಮುಖಾಮುಖಿಯಾಗಲಿವೆ. ಡಿಸೆಂಬರ್ 29ರ ಭಾನುವಾರ ನಡೆಯುವ ಫೈನಲ್ನಲ್ಲಿ ಹರಿಯಾಣ ಚೊಚ್ಚಲ ಪ್ರಶಸ್ತಿಗೆ, ಪಾಟ್ನಾ ನಾಲ್ಕನೇ ಪ್ರಶಸ್ತಿಗೆ ಕಾದಾಟ ನಡೆಸಲಿವೆ. ಈ ಫೈನಲ್ ಪಂದ್ಯ ಪುಣೆಯ ಬಾಲೆವಾಡಿ ಶ್ರೀಶಿವ ಛತ್ರಪತಿ ಕ್ರೀಡಾ ಸಂಕೀರ್ಣದಲ್ಲಿ ನಡೆಯಲಿದೆ. ಇಂದು (ಡಿಸೆಂಬರ್ 27) ನಡೆದ ಮೊದಲ ಸೆಮಿಫೈನಲ್ನಲ್ಲಿ ಯುಪಿ ಯೋಧಾಸ್ ತಂಡವನ್ನು (28-25) ಮಣಿಸಿದ ಹರಿಯಾಣ ಸತತ 2ನೇ ಬಾರಿಗೆ ಪ್ರಶಸ್ತಿ ಸುತ್ತಿಗೆ ಲಗ್ಗೆ ಇಟ್ಟರೆ, 2ನೇ ಸೆಮಿಫೈನಲ್ನಲ್ಲಿ ದಬಾಂಗ್ ಡೆಲ್ಲಿಯನ್ನು ಸೋಲಿಸಿದ ಪಾಟ್ನಾ ತಂಡ (28-32) 5ನೇ ಬಾರಿಗೆ ಪ್ರಶಸ್ತಿ ಸುತ್ತಿಗೆ ಅರ್ಹತೆ ಪಡೆಯಿತು.
ಮೊದಲ ಸೆಮೀಸ್ನಲ್ಲಿ ಹರಿಯಾಣಗೆ ಗೆಲುವು
ಪುಣೆಯ ಬಾಲೆವಾಡಿ ಶ್ರೀ ಶಿವ ಛತ್ರಪತಿ ಕ್ರೀಡಾ ಸಂಕೀರ್ಣದಲ್ಲಿ ನಡೆದ ಮೊದಲ ಸೆಮಿಫೈನಲ್ ಪಂದ್ಯದಲ್ಲಿ ಯುಪಿ ಯೋಧಾಸ್ ವಿರುದ್ಧ ಭರ್ಜರಿ ಗೆಲುವು ಸಾಧಿಸಿದ ಹರಿಯಾಣ ಸ್ಟೀಲರ್ಸ್ ಸತತ 2ನೇ ಬಾರಿಗೆ ಫೈನಲ್ಗೇರಿದೆ. ಕಳೆದ ಬಾರಿ ರನ್ನರ್ಅಪ್ಗೆ ತೃಪ್ತಿಪಟ್ಟುಕೊಂಡಿದ್ದ ಹರಿಯಾಣ 28-25 ಅಂಕಗಳ ಅಂತರದಿಂದ ಜಯಭೇರಿ ಬಾರಿಸುವ ಮೂಲಕ ಫೈನಲ್ಗೇರಿ ಚೊಚ್ಚಲ ಟ್ರೋಫಿ ಗೆಲುವಿನ ಕನಸಿನಲ್ಲಿದೆ. ಎಲಿಮಿನೇಟರ್ ಪಂದ್ಯದಲ್ಲಿ ಜೈಪುರ ಪಿಂಕ್ ಪ್ಯಾಂಥರ್ಸ್ ವಿರುದ್ಧ 46-18 ಅಂಕಗಳಿಂದ ಅಮೋಘ ಗೆಲುವು ಸೆಮಿಫೈನಲ್ ಪ್ರವೇಶಿಸಿದ್ದ ಯುಪಿ ಯೋಧಾಸ್, ಮೊದಲ ಬಾರಿಗೆ ಫೈನಲ್ಗೆ ಅರ್ಹತೆ ಪಡೆಯಲು ವಿಫಲವಾಯಿತು.
ಹರಿಯಾಣ-ಯುಪಿ ನಡುವಿನ ಸೆಮಿಫೈನಲ್ ಕದನ ರೋಚಕವಾಗಿತ್ತು. ಆರಂಭದಿಂದಲೂ ಉಭಯ ತಂಡಗಳ ನಡುವಿನ ಹೋರಾಟವು ಜಿದ್ದಾಜಿದ್ದಿನಿಂದ ಕೂಡಿತ್ತು. ಮೊದಲಾರ್ಧ ಮುಕ್ತಾಯಕ್ಕೆ ಹರಿಯಾಣ 12 ಮತ್ತು ಯುಪಿ 11 ಅಂಕ ಪಡೆದಿತ್ತು. ಬಳಿಕ ದ್ವಿತೀಯಾರ್ಧದ ಆರಂಭದಲ್ಲಿ ಹರಿಯಾಣ 6 ಅಂಕ ಮುನ್ನಡೆ ಪಡೆಯಿತು. ಇನ್ನೇನು ಪಂದ್ಯ ಮುಗಿಯಲು 10 ನಿಮಿಷ ಇದ್ದಾಗ ಪ್ರತಿರೋಧ ತೋರಿದ ಯುಪಿ ಗೆಲುವಿನ ಸನಿಹಕ್ಕೆ ಬಂದಿತು. ಆದರೆ ಅಂತಿಮವಾಗಿ ಹರಿಯಾಣ 3 ಅಂಕಗಳಿಂದ ಗೆದ್ದು ಎರಡನೇ ಫೈನಲ್ಗೇರಿದ್ದು, ಚೊಚ್ಚಲ ಪಿಕೆಎಲ್ ಟ್ರೋಫಿಯ ನಿರೀಕ್ಷೆಯಲ್ಲಿದೆ.
ಪಾಟ್ನಾಗೆ ಜಯಭೇರಿ, 5ನೇ ಬಾರಿಗೆ ಫೈನಲ್ಗೆ
ಮೊದಲ ಸೆಮಿಫೈನಲ್ನಂತೆ ಪಾಟ್ನಾ ಪೈರೇಟ್ಸ್ ಮತ್ತು ದಬಾಂಗ್ ಡೆಲ್ಲಿ ನಡುವಿನ 2ನೇ ಸೆಮಿಫೈನಲ್ ಸಹ ರೋಚಕತೆಯಿಂದ ಕೂಡಿತ್ತು. ಆದರೆ ಕೊನೆಗೆ ಪಾಟ್ನಾವೇ ಮೇಲುಗೈ ಸಾಧಿಸಿತು. 3, 4, 5 ಹಾಗೂ 8ನೇ ಆವೃತ್ತಿಗಳಲ್ಲಿ ಫೈನಲ್ ಪ್ರವೇಶಿಸಿದ್ದ ಪಾಟ್ನಾ ಒಟ್ಟು 3 ಬಾರಿ ಪ್ರಶಸ್ತಿ ಗೆದ್ದುಕೊಂಡಿದೆ. 8ನೇ ಸೀಸನ್ನಲ್ಲಿ ರನ್ನರ್ಅಪ್ಗೆ ತೃಪ್ತಿಪಟ್ಟುಕೊಂಡಿತ್ತು. ಇದೀಗ ಐದನೇ ಸಲ ಅಂತಿಮ ಸುತ್ತಿಗೇರಿರುವ ಪಾಟ್ನಾ ನಾಲ್ಕನೇ ಬಾರಿ ಚಾಂಪಿಯನ್ ಪಟ್ಟಕ್ಕೇರುವ ಲೆಕ್ಕಾಚಾರದಲ್ಲಿದೆ. ಮತ್ತೊಂದೆಡೆ ಸೆಮಿಫೈನಲ್ನಲ್ಲಿ ಸೋತಿರುವ ಡಬಾಂಗ್ ಡೆಲ್ಲಿ, ಮೂರನೇ ಬಾರಿಗೆ ಫೈನಲ್ ಪ್ರವೇಶಿಸಲು ವಿಫಲವಾಯಿತು.
ಪಂದ್ಯದ ಆರಂಭದಿಂದಲೂ ಮುನ್ನಡೆ ಕಾಯ್ದುಕೊಂಡ ಪಾಟ್ನಾ ಯಾವ ಹಂತದಲ್ಲೂ ಡೆಲ್ಲಿಗೆ ಲೀಡ್ ಬಿಟ್ಟುಕೊಡಲಿಲ್ಲ. ಮೊದಲಾರ್ಧ ಮುಕ್ತಾಯಕ್ಕೆ ಡೆಲ್ಲಿ 10 ಅಂಕ, ಪಾಟ್ನಾ 17 ಅಂಕ ಪಡೆದಿತ್ತು. ದ್ವಿತೀಯಾರ್ಧದಲ್ಲೂ ಪಾಟ್ನಾ ಪ್ರಾಬಲ್ಯ ಮುಂದುವರೆಸಿತು. ಮೂರನೇ ಕ್ವಾರ್ಟರ್ನಲ್ಲೂ ಡೆಲ್ಲಿ ಹಿಂದುಳಿದಿತ್ತು. ಆದರೆ ಕೊನೆಯ 5 ನಿಮಿಷಗಳಲ್ಲಿ ಡೆಲ್ಲಿ ಬಲಿಷ್ಠವಾಗಿ ಪುನರಾಗಮನ ಮಾಡಿತು. ಹೀಗಾಗಿ ಪಂದ್ಯ 26-26ರಲ್ಲಿ ಸಮಬಲ ಸಾಧಿಸಿತು. ಆದರೆ ಅಂತಿಮವಾಗಿ ಪಾಟ್ನಾ 32-28 ಅಂಕಗಳಿಂದ ಗೆದ್ದು ಫೈನಲ್ಗೆ ಅರ್ಹತೆ ಪಡೆಯಿತು. ಇದೀಗ ಡಿಸೆಂಬರ್ 29ರಂದು ಭಾನುವಾರ ನಡೆಯುವ ಫೈನಲ್ನಲ್ಲಿ ಹರಿಯಾಣ ಸ್ಟೀಲರ್ಸ್ ತಂಡವನ್ನು ಎದುರಿಸಲಿದೆ.
