ಕನ್ನಡ ಸುದ್ದಿ  /  Sports  /  Ind Vs Aus 2nd Odi Mitchell Starcs Fifer Helps Aus Bowl Out Ind For 117 In Only 26 Overs

Ind vs Aus 2nd ODI: ಬ್ಯಾಟ್ಸ್​​ಮನ್​​ಗಳ ಅಟ್ಟರ್​​ಫ್ಲಾಪ್​ ಶೋ, ಮಿಚೆಲ್​ ಸ್ಟಾರ್ಕ್​​ ಅಬ್ಬರ... ಭಾರತ 117 ರನ್​ಗಳಿಗೆ ಸರ್ವಪತನ

ಆಸ್ಟ್ರೇಲಿಯಾದ ಫಾಸ್ಟ್​​ ಬೌಲರ್​​​ ಮಿಚೆಲ್​ ಸ್ಟಾರ್ಕ್​ ಅಬ್ಬರಕ್ಕೆ ವಿಲವಿಲ ಒದ್ದಾಡಿದ ಟೀಮ್​ ಇಂಡಿಯಾ 117 ರನ್​​​ಗೆ ಸರ್ವಪತನ ಕಂಡಿದೆ. ಪಂದ್ಯವನ್ನು ಕಳೆದುಕೊಳ್ಳುವ ಸ್ಥಿತಿಗೆ ಸಿಲುಕಿದೆ.

ವಿರಾಟ್​ ಕೊಹ್ಲಿ
ವಿರಾಟ್​ ಕೊಹ್ಲಿ (BCCI/Twitter)

ಆಸ್ಟ್ರೇಲಿಯಾ ವಿರುದ್ಧದ 2ನೇ ಏಕದಿನ ಪಂದ್ಯದಲ್ಲಿ ಟೀಮ್​ ಇಂಡಿಯಾ (Team India) ಕಳಪೆ ಪ್ರದರ್ಶನ ನೀಡಿದೆ. ಆಸಿಸ್​​ ಬೌಲರ್​​ಗಳು ಮುಂದೆ ಶರಣಾದ ಭಾರತೀಯ ಬ್ಯಾಟರ್​​ಗಳು ಅಲ್ಪಮೊತ್ತಕ್ಕೆ ಕುಸಿತ ಕಂಡಿದ್ದಾರೆ. ಮೊದಲ ಪಂದ್ಯದಂತೆ 2ನೇ ಏಕದಿನ ಪಂದ್ಯದಲ್ಲಿ ಬ್ಯಾಟ್ಸ್​​​ಮನ್​​ಗಳು ತೀವ್ರ ವೈಫಲ್ಯ ಅನುಭವಿಸಿದ್ದು, ಟೀಕೆಗೆ ಕಾರಣವಾಗಿದೆ.

ವಿಶಾಖಪಟ್ಟಣದ ಡಾ. ವೈ.ಎಸ್​ ರಾಜಶೇಖರ ರೆಡ್ಡಿ ಕ್ರಿಕೆಟ್​ ಮೈದಾನದಲ್ಲಿ ನಡೆಯುತ್ತಿರುವ 2ನೇ ಒಡಿಐ ಪಂದ್ಯದಲ್ಲಿ ಟಾಸ್​ ಸೋತು ಬ್ಯಾಟಿಂಗ್​ ನಡೆಸಿದ ಟೀಮ್​ ಇಂಡಿಯಾ, ವೇಗಿ ಮಿಚೆಲ್​ ಸ್ಟಾರ್ಕ್​ ದಾಳಿಗೆ ನಿರೀಕ್ಷಿತ ಪ್ರದರ್ಶನ ನೀಡಲಿಲ್ಲ. ನಾಯಕ ರೋಹಿತ್​ ಶರ್ಮಾ ಕಂಬ್ಯಾಕ್​ ಮಾಡಿದರೂ ದೊಡ್ಡ ಮೊತ್ತ ಕಲೆ ಹಾಕುವಲ್ಲಿ ವಿಫಲರಾದರು.

ಇನ್ನು ವೈಜಾಗ್​​ ಪಂದ್ಯದಲ್ಲೂ ಶುಭ್​ಮನ್​ ಗಿಲ್​​, ನಿರಾಸೆ ಮೂಡಿಸಿದರು. ಮೊದಲ ಓವರ್​​ನಲ್ಲೇ ಕ್ಯಾಚ್​​ ನೀಡಿ ನಿರ್ಗಮಿಸಿದರು. 2 ಎಸೆತಗಳಲ್ಲಿ ಸೊನ್ನೆ ಸುತ್ತಿದರು. ಬಳಿಕ ಕ್ರೀಸ್​ಗೆ ಬಂದ ಸೂರ್ಯಕುಮಾರ್​ ಯಾದವ್​ ಮತ್ತೆ ಗೋಲ್ಡನ್​ ಡಕ್​ ಆದರು. ಮೊದಲ ಪಂದ್ಯದಲ್ಲೂ ಮೊದಲ ಎಸೆತದಲ್ಲೇ ಸೂರ್ಯಕುಮಾರ್​ ವಿಕೆಟ್​ ಒಪ್ಪಿಸಿದ್ದರು. ಕ್ರಿಕೆಟ್​ ಪ್ರಿಯರ ಆಕ್ರೋಶಕ್ಕೆ ಕಾರಣವಾಗಿದೆ.

ಮುಂಬೈ ಮ್ಯಾಚ್​​ನಲ್ಲಿ ಮ್ಯಾಚ್​ ವಿನ್ನಿಂಗ್ಸ್​ ಪರ್ಫಾಮೆನ್ಸ್​ ಕೊಟ್ಟಿದ್ದ ಕೆ.ಎಲ್​ ರಾಹುಲ್​, ಈ ಪಂದ್ಯದಲ್ಲಿ ಕೈ ಎತ್ತಿದರು. 13 ಎಸೆತಗಳಲ್ಲಿ 9 ರನ್​ಗಳಿಸಿ ಪೆವಿಲಿಯನ್​ ದಾರಿ ಹಿಡಿದರು. ಸತತ ವಿಕೆಟ್​​ಗಳ ನಡುವೆ ವಿರಾಟ್​ ಕೊಹ್ಲಿ, ತಂಡಕ್ಕೆ ಆಧಾರವಾಗುವ ಭರವಸೆ ಮೂಡಿಸಿದ್ದರು. ಆದರೆ 31 ರನ್​ಗಳಿಸಿದ್ದ ಕೊಹ್ಲಿ, ನಥನ್ ಎಲಿಸ್​ ಬೌಲಿಂಗ್​​ನಲ್ಲಿ ಎಲ್​ಬಿಡಬ್ಲ್ಯೂ ಬಲೆಗೆ ಬಿದ್ದರು.

ಬಳಿಕ ಹಾರ್ದಿಕ್​ ಪಾಂಡ್ಯ (1), ರವೀಂದ್ರ ಜಡೇಜಾ (16) ಕುಲ್ದೀಪ್​ ಯಾದವ್​ (4), ಮೊಹಮ್ಮದ್​ ಶಮಿ (0), ಮೊಹಮ್ಮದ್​ ಸಿರಾಜ್ (0) ಕ್ರೀಸ್​​ನಲ್ಲಿ ಹೆಚ್ಚು ಹೊತ್ತು ನಿಲ್ಲಲಿಲ್ಲ. ಅಕ್ಷರ್​ ಪಟೇಲ್​​ ಮಾತ್ರ ಅಜೇಯ 29 ರನ್​ ಗಳಿಸಿ ತಂಡದ ಮೊತ್ತ ಏರಿಸುವ ವಿಶ್ವಾಸ ನೀಡಿದರು. ಆದರೆ, ಯಾರೊಬ್ಬರೂ ಅಕ್ಷರ್​ಗೆ ಸಾಥ್​ ನೀಡಲಿಲ್ಲ.

ಮಿಚೆಲ್ ಸ್ಟಾರ್ಕ್​ಗೆ 5 ವಿಕೆಟ್​​

ಮೊದಲು ಬ್ಯಾಟಿಂಗ್​ ಮಾಡಿದ ಭಾರತ 26 ಓವರ್​​ಗಳಲ್ಲಿ 117 ರನ್​ಗಳಿಗೆ ಆಲೌಟ್​ ಆಗಿದೆ. ಆರಂಭದಿಂದಲೇ ವಿಕೆಟ್ ಬೇಟೆಯಾಡಿದ ಮಿಚೆಲ್​​ ಸ್ಟಾರ್ಕ್​ ಐವರು ಬ್ಯಾಟ್ಸ್​​ಮನ್​ಗಳಿಗೆ ಪೆವಿಲಿಯನ್​ ದಾರಿ ತೋರಿಸಿದರು. ಇದರೊಂದಿಗೆ ದಾಖಲೆಯನ್ನೂ ಬರೆದರು. ಏಕದಿನ ಕ್ರಿಕೆಟ್​​ನಲ್ಲಿ ಇನ್ನಿಂಗ್ಸ್​​ವೊಂದರಲ್ಲಿ ಹೆಚ್ಚು ಬಾರಿ 5 ವಿಕೆಟ್​ ಪಡೆದ ವಿಶ್ವದ 3ನೇ ಬೌಲರ್​ ಎನಿಸಿದ್ದಾರೆ.

ಮಿಚೆಲ್​ ಸ್ಟಾರ್ಕ್​​​ ಒಟ್ಟು 9 ಬಾರಿ 5 ವಿಕೆಟ್​ ಪಡೆದು 3ನೇ ಸ್ಥಾನದಲ್ಲಿದ್ದಾರೆ. ಅಗ್ರಸ್ಥಾನದಲ್ಲಿ ವಕಾರ್​ ಯೂನಿಸ್​​ 13 ಬಾರಿ, ಮುತ್ತಯ್ಯ ಮುರಳೀಧರನ್​ 10 ಬಾರಿ, ಶಾಹೀದ್​ ಅಫ್ರಿದಿ, ಬ್ರೆಟ್​ಲೀ ಕೂಡ 9 ಬಾರಿ ಐದು ವಿಕೆಟ್​ ಉರುಳಿಸಿದ್ದಾರೆ.

ಮಿಚೆಲ್​ ಸ್ಟಾರ್ಕ್​ಗೆ ಸಾಥ್​ ನೀಡಿದ ಸೀನ್​ ಅಬಾಟ್ 3 ವಿಕೆಟ್, ನಥನ್ ಎಲ್ಲಿಸ್​ 2 ವಿಕೆಟ್ ಪಡೆದು ಮಿಂಚಿದ್ದಾರೆ. ವಿರಾಟ್​ ಕೊಹ್ಲಿ 31 ರನ್​ ಗಳಿಸಿ ಭಾರತದ ಪರ ಗರಿಷ್ಠ ಸ್ಕೋರರ್​ ಎನಿಸಿದ್ದಾರೆ. 117 ರನ್​ಗೆ ಆಲೌಟ್​ ಆದ ಟೀಮ್​ ಇಂಡಿಯಾ ಕೆಟ್ಟ ದಾಖಲೆಯನ್ನೂ ತಮ್ಮದಾಗಿಸಿಕೊಂಡಿದೆ. ಆಸ್ಟ್ರೇಲಿಯಾ ವಿರುದ್ಧ ಟೀಮ್​ ಇಂಡಿಯಾ 3ನೇ ಬಾರಿಗೆ ಲೋ ಸ್ಕೋರ್​ಗೆ ಔಟಾಗಿದೆ.