ಪುರುಷರ 4X400 ಮೀ, ಮಿಶ್ರ 4X400 ಮೀ ಓಟ; ವಿಶ್ವ ಅಥ್ಲೆಟಿಕ್ಸ್ ಚಾಂಪಿಯನ್​ಶಿಪ್​ಗೆ ಅರ್ಹತೆ ಪಡೆಯದ ಭಾರತದ ತಂಡಗಳು

ಈ ವರ್ಷದ ಕೊನೆಯಲ್ಲಿ ಟೊಕಿಯೊದಲ್ಲಿ ನಡೆಯಲಿರುವ ವಿಶ್ವ ಅಥ್ಲೆಟಿಕ್ಸ್ ಚಾಂಪಿಯನ್​ಶಿಪ್​ಗೆ ಅರ್ಹತೆ ಪಡೆಯಲು ಪುರುಷರ 4×400 ಮೀಟರ್ ಮತ್ತು ಮಿಶ್ರ 4×400 ಮೀಟರ್ ತಂಡಗಳು ವಿಫಲವಾದ ಕಾರಣ ವಿಶ್ವ ಅಥ್ಲೆಟಿಕ್ಸ್ ರಿಲೇಗಳಲ್ಲಿ ಭಾರತದ ಅಭಿಯಾನವು ನಿರಾಶೆಯಲ್ಲಿ ಕೊನೆಗೊಂಡಿತು.

ಮಿಶ್ರ 4×400 ಮೀಟರ್ ಓಟದಲ್ಲಿ ಸಂತೋಷ್ ಕುಮಾರ್ ತಮಿಳರಸನ್, ರೂಪಲ್ ಚೌಧರಿ, ತೆನ್ನರಸು ಕಾಯಲ್ವಿಜಿ ವಿಶಾಲ್ ಮತ್ತು ಶುಭಾ ವೆಂಕಟೇಶನ್ ಅವರನ್ನು ಒಳಗೊಂಡ ತಂಡ 3 ನಿಮಿಷ 14.81 ಸೆಕೆಂಡುಗಳಲ್ಲಿ ಗುರಿ ತಲುಪಿ 4ನೇ ಸ್ಥಾನ ಪಡೆಯಿತು. 2 ಹೀಟ್ಸ್​​​ನಲ್ಲಿ ಅಗ್ರ 3 ತಂಡಗಳು ಸೆಪ್ಟೆಂಬರ್ 13-21ರವರೆಗೆ ಜಪಾನ್​ನ ರಾಜಧಾನಿಯಲ್ಲಿ ನಡೆಯಲಿರುವ ವಿಶ್ವ ಚಾಂಪಿಯನ್​​ಶಿಪ್​ಗೆ ಅರ್ಹತೆ ಪಡೆದಿವೆ.

ಇದನ್ನೂ ಓದಿ: ಟೆಸ್ಟ್​​ ಕ್ರಿಕೆಟ್​ನಲ್ಲಿ ಅತಿ ಹೆಚ್ಚು ರನ್ ಗಳಿಸಿದ ಟಾಪ್-5 ಭಾರತದ ಬ್ಯಾಟರ್​​ಗಳಿವರು; ಕೊಹ್ಲಿ ಗಳಿಸಿದ ಸ್ಥಾನವೆಷ್ಟು?

ಶನಿವಾರ ನಡೆದ ಸ್ಪರ್ಧೆಯಲ್ಲಿ ಭಾರತೀಯರು 3:16.85 ಸೆಕೆಂಡುಗಳಲ್ಲಿ ಗುರಿ ತಲುಪಿ ಐದನೇ ಸ್ಥಾನ ಪಡೆದಿದ್ದರು. ವಿಶ್ವ ಚಾಂಪಿಯನ್​ಶಿಪ್ ಸ್ಥಾನ ಕಾಯ್ದಿರಿಸಲು ಭಾರತಕ್ಕೆ ಮತ್ತೊಂದು ಅವಕಾಶ ಸಿಕ್ಕಿತ್ತು. ಆದರೆ ಸಾಧ್ಯವಾಗಲಿಲ್ಲ. 8 ತಂಡಗಳು ಶನಿವಾರ ತಮ್ಮ ವಿಶ್ವ ಚಾಂಪಿಯನ್ ಶಿಪ್ ಸ್ಥಾನಗಳನ್ನು ಕಾಯ್ದಿರಿಸಿವೆ.

ಪುರುಷರ ತಂಡಕ್ಕೂ ಸೋಲು

ಪುರುಷರ 4×400 ಮೀಟರ್ ಓಟದಲ್ಲಿ ಜಯ್ ಕುಮಾರ್, ಧರ್ಮವೀರ್ ಚೌಧರಿ, ತೆಕ್ಕಿನಾಲಿಲ್ ಸಾಜಿ ಮನು ಮತ್ತು ರಿನ್ಸ್ ಜೋಸೆಫ್ ಅವರನ್ನೊಳಗೊಂಡ ತಂಡ 3:04.49 ಸೆಕೆಂಡುಗಳಲ್ಲಿ ಗುರಿ ತಲುಪಿ 7ನೇ ಸ್ಥಾನ ಪಡೆಯಿತು. ಶನಿವಾರ ನಡೆದ ಪುರುಷರ 4×400 ಮೀಟರ್ ಓಟದಲ್ಲಿ ಭಾರತ 3:03.92 ಸೆಕೆಂಡುಗಳಲ್ಲಿ ಗುರಿ ತಲುಪಿ ಐದನೇ ಸ್ಥಾನ ಪಡೆದಿತ್ತು. ವಿಶ್ವ ಚಾಂಪಿಯನ್​ಶಿಪ್​ ಸ್ಥಾನ ಕಾಯ್ದಿರಿಸಲು ಅವರಿಗೂ ಭಾನುವಾರ ಮತ್ತೊಂದು ಅವಕಾಶ ಸಿಕ್ಕಿತ್ತಾದರೂ ಸಾಧ್ಯವಾಗಲಿಲ್ಲ.

ಇದನ್ನೂ ಓದಿ: ಮೇ 17 ರಿಂದ ಐಪಿಎಲ್ ಮತ್ತೆ​​ ಆರಂಭ, ಜೂನ್ 3ರಂದು ಫೈನಲ್; ಆರ್​​ಸಿಬಿ ಸೇರಿ ಪರಿಷ್ಕೃತ ವೇಳಾಪಟ್ಟಿ ಇಲ್ಲಿದೆ

ಪುರುಷರ ಮತ್ತು ಮಹಿಳೆಯರ 4×100 ಮೀಟರ್ ಮತ್ತು 4×400 ಮೀಟರ್ ಮತ್ತು ಮಿಶ್ರ 4×400 ಮೀಟರ್​​​ನಲ್ಲಿ ಅಗ್ರ 14 ತಂಡಗಳು ಟೊಕಿಯೊ ವಿಶ್ವ ಚಾಂಪಿಯನ್​​ಶಿಪ್​ನಲ್ಲಿ ತಮ್ಮ ಸ್ಥಾನವನ್ನು ಭದ್ರಪಡಿಸಿಕೊಳ್ಳುತ್ತವೆ. ಅರ್ಹತಾ ಅವಧಿಯಲ್ಲಿ ಅಗ್ರ ಪಟ್ಟಿಗಳ ಆಧಾರದ ಮೇಲೆ ಪ್ರತಿ ಸ್ಪರ್ಧೆಯಲ್ಲಿ ಉಳಿದ 2 ಸ್ಥಾನ ನೀಡಲಾಗುತ್ತದೆ. ಭಾರತವು ಈಗ ಉಳಿದಿರುವ 2 ತಂಡಗಳಲ್ಲಿ ಒಂದಾಗಲು ಆಶಿಸುತ್ತದೆ. ಅರ್ಹತಾ ವಿಂಡೋದಲ್ಲಿ ಸ್ಪರ್ಧೆಗಳಲ್ಲಿ ಉತ್ತಮ ಸಮಯವನ್ನು ಗಳಿಸಲು ಪ್ರಯತ್ನಿಸುತ್ತದೆ.

ಪ್ಯಾರಿಸ್ ಒಲಿಂಪಿಕ್ಸ್​​ಗೆ ಅರ್ಹತೆ ಪಡೆದಿರಲಿಲ್ಲ

ಹಂಗೇರಿಯಲ್ಲಿ ನಡೆದ 2023ರ ವಿಶ್ವ ಚಾಂಪಿಯನ್​​ಶಿಪ್​​​ನಲ್ಲಿ ದೇಶವು ಪುರುಷರ 4×400 ಮೀಟರ್ ಸ್ಪರ್ಧೆಯಲ್ಲಿ ಸ್ಪರ್ಧಿಸಿತ್ತು. ಅಲ್ಲಿ ಭಾರತೀಯ ಕ್ವಾರ್ಟೆಟ್ 2:59.05ರ ಏಷ್ಯನ್ ದಾಖಲೆಯೊಂದಿಗೆ ಹೀಟ್ ರೇಸ್​​ನಲ್ಲಿ 2ನೇ ಸ್ಥಾನ ಪಡೆಯುವ ಮೊದಲು ಯುನೈಟೆಡ್ ಸ್ಟೇಟ್ಸ್​​​​ಗೆ ಆತಂಕ ಸೃಷ್ಟಿಸಿತ್ತು. ಮೊಹಮ್ಮದ್ ಅನಾಸ್, ಅಮೋಜ್ ಜಾಕೋಬ್, ರಾಜೇಶ್ ರಮೇಶ್ ಮತ್ತು ಮುಹಮ್ಮದ್ ಅಜ್ಮಲ್ ಅವರನ್ನೊಳಗೊಂಡ ಭಾರತ ತಂಡ ಫೈನಲ್​​​ನಲ್ಲಿ 5ನೇ ಸ್ಥಾನ ಪಡೆದಿತ್ತು.

ಆದಾಗ್ಯೂ, ಅದೇ ತಂಡವು ಹೀಟ್ ರೇಸ್​​ನಲ್ಲಿ ನಾಲ್ಕನೇ ಸ್ಥಾನ ಪಡೆದ ಕಾರಣ 2024ರ ಪ್ಯಾರಿಸ್ ಒಲಿಂಪಿಕ್ಸ್​​ಗೆ ಅಂತಿಮ ಸುತ್ತಿಗೆ ಅರ್ಹತೆ ಪಡೆಯಲು ವಿಫಲವಾಗಿತ್ತು. ಇದೀಗ 2023ರ ವಿಶ್ವ ಚಾಂಪಿಯನ್​ಶಿಪ್​ ಮತ್ತು 2024ರ ಒಲಿಂಪಿಕ್ಸ್​​​ನಲ್ಲಿ ಸ್ಪರ್ಧಿಸಿದ್ದ ಅಥ್ಲೀಟ್​​ಗಳನ್ನು ಹೊರಗಿಟ್ಟು ಪುರುಷರ 4×400 ಮೀಟರ್ ರಿಲೇಯಲ್ಲಿ ಭಾರತ ಹೊಸ ತಂಡವನ್ನು ಕಣಕ್ಕಿಳಿಸಿತ್ತು.

ಇದನ್ನೂ ಓದಿ: ರೋಹಿತ್ ಬೆನ್ನಲ್ಲೇ ಕೊನೆಗೂ ಟೆಸ್ಟ್ ಕ್ರಿಕೆಟ್‌ಗೆ ವಿರಾಟ್ ಕೊಹ್ಲಿ ನಿವೃತ್ತಿ ಘೋಷಣೆ; 14 ವರ್ಷಗಳ ವೃತ್ತಿಜೀವನ ಅಂತ್ಯ