GPS ಫಿಟ್ನೆಸ್ ಟ್ರ್ಯಾಕಿಂಗ್ ಸಾಧನ ಧರಿಸಿ IPL ಆಡಲಿರುವ ಟೀಮ್ ಇಂಡಿಯಾ ಆಟಗಾರರು, ಕಾರಣ ಇಲ್ಲಿದೆ!
ಫಿಟ್ನೆಸ್ ಮೇಲ್ವಿಚಾರಣೆ ನಡೆಸುವ ಸಲುವಾಗಿ ಟೀಮ್ ಇಂಡಿಯಾ ಆಟಗಾರರು ಜಿಪಿಎಸ್ ಫಿಟ್ನೆಸ್ ಟ್ರ್ಯಾಕಿಂಗ್ ಸಾಧನ (GPS Fitness Tracking Device) ಧರಿಸಿಯೇ ಅಂಗಳಕ್ಕಿಳಿಯುವಂತೆ ಬಿಸಿಸಿಐ ಸೂಚಿಸಿದೆ.
ವಿಶ್ವದ ಅತಿ ದೊಡ್ಡ ಕ್ರಿಕೆಟ್ ಲೀಗ್ ಐಪಿಎಲ್ (IPL) ಮಾರ್ಚ್ 31 ರಿಂದ ಪ್ರಾರಂಭವಾಗಲಿದೆ. ಈ ಲೀಗ್‌ನಲ್ಲಿ ಟೀಮ್ ಇಂಡಿಯಾ ಆಟಗಾರರು (Team India Players) ಮತ್ತು ವಿಶ್ವದ ದಿಗ್ಗಜ ಕ್ರಿಕೆಟಿಗರು ಪೈಪೋಟಿ ಏರ್ಪಡಲಿದೆ. ಆದರೆ, ಈ ಧನಾಧನ್ ಲೀಗ್‌ನಲ್ಲಿ ವಿಶೇಷ ಸಾಧನ ಧರಿಸಿ ಭಾರತೀಯ ಆಟಗಾರರು ಮೈದಾನ ಪ್ರವೇಶಿಸುವಂತೆ ಬಿಸಿಸಿಐ (BCCI) ಖಡಕ್ ಎಚ್ಚರಿಕೆ ಸಹ ನೀಡಿದೆ.
ಜಿಪಿಎಸ್ ಫಿಟ್ನೆಸ್ ಟ್ರ್ಯಾಕಿಂಗ್
ಫಿಟ್ನೆಸ್ ಮೇಲ್ವಿಚಾರಣೆ ನಡೆಸುವ ಸಲುವಾಗಿ ಟೀಮ್ ಇಂಡಿಯಾ ಆಟಗಾರರು ಜಿಪಿಎಸ್ ಫಿಟ್ನೆಸ್ ಟ್ರ್ಯಾಕಿಂಗ್ ಸಾಧನ (GPS Fitness Tracking Device) ಧರಿಸಿಯೇ ಅಂಗಳಕ್ಕಿಳಿಯುವಂತೆ ಬಿಸಿಸಿಐ ಸೂಚಿಸಿದೆ. ಈ ಸಾಧನದ ನೆರವಿನಿಂದ ಆಟಗಾರರ ಫಿಟ್ನೆಸ್ ಸಾಮರ್ಥ್ಯವನ್ನು ನಿರಂತರವಾಗಿ ಮೇಲ್ವಿಚಾರಣೆ ನಡೆಸಲಾಗುತ್ತದೆ.
ಅಭ್ಯಾಸದ ಅವಧಿಯಲ್ಲಿ ಮಾತ್ರವಲ್ಲ, ಪಂದ್ಯಗಳ ಸಂದರ್ಭದಲ್ಲೂ ಆಟಗಾರರು ಮೈದಾನದಲ್ಲಿ ಈ ಜಿಪಿಎಸ್ ಸಾಧನ ಧರಿಸಬೇಕು. ಆಟಗಾರರು ಮೆಗಾ ಲೀಗ್‌ನಲ್ಲಿ ಗಾಯಗೊಳ್ಳದಂತೆ ತಡೆಯಲು BCCI ಈ ನಿರ್ಧಾರಕ್ಕೆ ಮುಂದಾಗಿದೆ. ಭಾರತ ತಂಡದ ಎಲ್ಲಾ ಆಟಗಾರರು ಈ ಸಾಧನ ಧರಿಸಬೇಕು ಎಂದು ಬಿಸಿಸಿಐ ಕಟ್ಟುನಿಟ್ಟಾಗಿ ಹೇಳಿದೆ.
ಐಪಿಎಲ್ ನಂತರ ಟೀಮ್ ಇಂಡಿಯಾ ಪ್ರತಿಷ್ಠಿತ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್‌ನ ಫೈನಲ್‌ನಲ್ಲಿ (ICC World Test Championship) ಆಡಲಿದೆ. ಇಂಗ್ಲೆಂಡಿನಲ್ಲಿ ನಡೆಯಲಿರುವ ಈ ಪಂದ್ಯದಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಐಸಿಸಿ ಪ್ರಶಸ್ತಿಗಾಗಿ ಸೆಣಸಾಟ ನಡೆಸಲಿದೆ. ಇದರ ನಂತರ ಆಗಸ್ಟ್ನಲ್ಲಿ ಏಷ್ಯಾಕಪ್, ಬಳಿಕ ಅಕ್ಟೋಬರ್‌ನಲ್ಲಿ ODI ವಿಶ್ವಕಪ್ (ODI World Cup) ನಡೆಯಲಿದೆ.
ಕಳೆದ 10 ವರ್ಷಗಳಿಂದ ಟೀಮ್ ಇಂಡಿಯಾ ಐಸಿಸಿ ಟ್ರೋಫಿ ಗೆದ್ದಿಲ್ಲ. ಇತ್ತೀಚೆಗೆ ಫೈನಲ್, ಸೆಮಿಫೈನಲ್ನಲ್ಲೇ ಮುಗ್ಗರಿಸುತ್ತಿದೆ. ಈ ಹಿನ್ನೆಲೆ ಮುಂದಿರುವ ಎರಡೂ ಐಸಿಸಿ ಟ್ರೋಫಿಗಳನ್ನು ಗೆಲ್ಲುವುದು ಭಾರತಕ್ಕೆ ಮಹತ್ವದ್ದಾಗಿದೆ. ಅದರಲ್ಲೂ ತವರಿನಲ್ಲಿ ನಡೆಯಲಿರುವ ಏಕದಿನ ವಿಶ್ವಕಪ್ ಗೆಲ್ಲುವುದು ಅತ್ಯಂತ ಮಹತ್ವದ್ದು.
ಯಾವ ದೇಶಗಳು ಬಳಸುತ್ತಿವೆ?
ಪ್ರತಿಷ್ಠಿತ ಟೂರ್ನಿಗಳಿರುವ ಕಾರಣ, ಟೀಮ್ ಇಂಡಿಯಾ ಆಟಗಾರರ ಫಿಟ್ನೆಸ್ ಬಗ್ಗೆ ಬಿಸಿಸಿಐ ವಿಶೇಷ ಗಮನ ಹರಿಸಿದೆ. ಈಗಾಗಲೇ ಇಂಗ್ಲೆಂಡ್, ಆಸ್ಟ್ರೇಲಿಯಾ ತಂಡಗಳು ಈ ಸಾಧನ ಬಳಸುತ್ತಿವೆ. ಇತ್ತೀಚೆಗೆ ಮಹಿಳಾ ಐಪಿಎಲ್ ಟೂರ್ನಿಯಲ್ಲಿ ಮಹಿಳಾ ಕ್ರಿಕೆಟಿಗರು ಫಿಟ್ನೆಸ್ ಟ್ರ್ಯಾಕಿಂಗ್ ಸಾಧನಗಳೊಂದಿಗೆ ಕಣಕ್ಕೆ ಇಳಿದಿದ್ದರು. ಭಾರತದ ರಾಷ್ಟ್ರೀಯ ಹಾಕಿ ತಂಡದ ಆಟಗಾರರು ಸಹ ಬಳಸುತ್ತಿದ್ದಾರೆ.
ಹೇಗೆ ಕೆಲಸ ಮಾಡಲಿದೆ?
ಈ ಸಾಧನವು ಆಟಗಾರನ ಫಿಟ್ನೆಸ್ಗೆ ಸಂಬಂಧಿಸಿದ ಸುಮಾರು 500 ವಿವಿಧ ರೀತಿಯ ಮಾಹಿತಿಯನ್ನು ನೀಡುತ್ತದೆ. ಆಟಗಾರನ ಶಕ್ತಿಯ ಮಟ್ಟ, ದೂರ ಕ್ರಮಿಸುವಿಕೆ, ವೇಗ, ಸ್ಥಗಿತದ ಅಪಾಯ, ಹೃದಯ ಬಡಿತ, ರಕ್ತದೊತ್ತಡ ಸೇರಿ ಪ್ರಮುಖ ಮಾಹಿತಿ ನೀಡುತ್ತದೆ. ಈ ಸಾಧನವು ಕೆಲಸದ ಹೊರೆಯಿಂದ ಆಟಗಾರನಿಗೆ ಗಾಯವನ್ನು ಉಂಟು ಮಾಡುವ ಮಿತಿಯನ್ನು ಹೇಳುವ ಸಾಮರ್ಥ್ಯವನ್ನು ಹೊಂದಿದೆ.
2018ರಿಂದ ಕೆಲಸಗಳು ನಡೆಯುತ್ತಿವೆ!
BCCI 2018ರಿಂದಲೇ ಈ ಸಾಧನದ ಬಳಕೆಯನ್ನು ಪರಿಗಣಿಸಲು ಆರಂಭಿಸಿತ್ತು. ಈಗ ಮೊದಲ ಬಾರಿಗೆ IPLನಲ್ಲಿ ಬಳಸಲು ಸಜ್ಜಾಗಿದೆ. WPLನಲ್ಲಿ ಪ್ರಯೋಗ ನಡೆಸಲಾಗಿತ್ತು. ಇದರಿಂದ ಉತ್ತಮ ಫಲಿತಾಂಶ ಬಂದಿತ್ತು. ಇದರಿಂದ ಫ್ರಾಂಚೈಸಿಗಳಿಗೂ ಲಾಭವಾಗಿತ್ತು. ಫಿಟ್ನೆಸ್ಗೆ ಅನುಗುಣವಾಗಿ ತಮ್ಮ ಆಟಗಾರರನ್ನು ಬಳಸಿಕೊಂಡರು. ಇದಾದ ನಂತರ ಐಪಿಎಲ್‌ನಲ್ಲಿ ಬಳಸಲು ಗ್ರೀನ್ ಸಿಗ್ನಲ್ ನೀಡಲಾಗಿದೆ.
IPLನಲ್ಲಿ ಭಾರತೀಯ ಆಟಗಾರರ ಫಿಟ್ನೆಸ್ ಮೇಲ್ವಿಚಾರಣೆಗೆ ಸಂಬಂಧಿಸಿ ಬಿಸಿಸಿಐನ ವಾರ್ಷಿಕ ಸಾಮಾನ್ಯ ಸಭೆಯಲ್ಲಿ 3 ತಿಂಗಳ ಹಿಂದೆಯೇ ಕೆಲಸದ ಹೊರೆ ಇಳಿಸುವ ಕುರಿತು ತೀರ್ಮಾನ ಕೈಗೊಳ್ಳಲಾಗಿತ್ತು. ಗಾಯಗೊಳ್ಳಲಿರುವ ಆಟಗಾರರನ್ನು ಮೊದಲೇ ಸೂಚಿಸಿ ರಕ್ಷಿಸಲಾಗುತ್ತದೆ. ಇದರಿಂದ ತಂಡದಲ್ಲಿ ಗಾಯದ ಸಮಸ್ಯೆಯನ್ನು ತಡೆಗಟ್ಟಬಹುದು.
ಭಾರತ ತಂಡವು ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್‌ನ ಫೈನಲ್‌ನಲ್ಲಿ ಆಡಬೇಕಾಗಿದೆ. ಅಲ್ಲದೆ, ಅಕ್ಟೋಬರ್-ನವೆಂಬರ್‌ನಲ್ಲಿ ಭಾರತದಲ್ಲಿ ಏಕದಿನ ವಿಶ್ವಕಪ್ ನಡೆಯಲಿದೆ. ಅಂತಹ ಪರಿಸ್ಥಿತಿಯಲ್ಲಿ ಹಿರಿಯರು ಮತ್ತು ಪ್ರಮುಖ ಆಟಗಾರರಿಗೆ ಗಾಯವಾಗುವುದನ್ನು ತಪ್ಪಿಸಲು ಫ್ರಾಂಚೈಸಿಗಳೊಂದಿಗೆ ಕೆಲಸದ ಹೊರೆ ಇಳಿಸುವ ಚರ್ಚಿಸಲಾಗಿದೆ. ಈ ವಿಶೇಷ ಸಾಧನೆ ಅಳವಡಿಕೆಗೆ ಕ್ರಿಕೆಟ್ ತಜ್ಞರು, ಮಾಜಿ ಕ್ರಿಕೆಟರ್ಗಳಿಂದ ಮೆಚ್ಚುಗೆ ವ್ಯಕ್ತವಾಗಿದೆ.