ISL Final: ಮೋಹನ್ ಬಾಗನ್ vs ಬೆಂಗಳೂರು ಎಫ್ಸಿ ಐಎಸ್ಎಲ್ ಫೈನಲ್; ಎಲ್ಲಿ, ಯಾವಾಗ, ಹಿಂದಿನ ವಿಜೇತರ ಯಾರು?
Mohun Bagan vs Bengaluru FC: ಇಂಡಿಯನ್ ಸೂಪರ್ ಲೀಗ್ ಫೈನಲ್ ಪಂದ್ಯವು ಏಪ್ರಿಲ್ 12ರ ಶನಿವಾರ ಮೋಹನ್ ಬಾಗನ್ vs ಬೆಂಗಳೂರು ಎಫ್ಸಿ ನಡುವೆ ನಡೆಯಲಿದೆ. ಈ ಪಂದ್ಯದ ಕುರಿತು ಮಾಹಿತಿ ಇಂತಿದೆ.
ಬಹುನಿರೀಕ್ಷಿತ ಇಂಡಿಯನ್ ಸೂಪರ್ ಲೀಗ್ಗೆ ತೆರೆ ಬೀಳಲು ದಿನಗಣನೆ ಆರಂಭವಾಗಿದೆ. ಏಪ್ರಿಲ್ 12ರಂದು ಟೂರ್ನಿಯ ಫೈನಲ್ ಪಂದ್ಯದಲ್ಲಿ ಬೆಂಗಳೂರು ಎಫ್ಸಿ ಮತ್ತು ಮೋಹನ್ ಬಗಾನ್ ಸೂಪರ್ ಜೈಂಟ್ ತಂಡಗಳು ಪ್ರಶಸ್ತಿಗಾಗಿ ಕಾದಾಟ ನಡೆಸಲಿವೆ. ಕೋಲ್ಕತ್ತಾದ ಸಾಲ್ಟ್ ಲೇಕ್ ಕ್ರೀಡಾಂಗಣ ಫೈನಲ್ಗೆ ಆತಿಥ್ಯ ವಹಿಸಲಿದೆ. ನಿಯಮಿತ ಆವೃತ್ತಿಯಲ್ಲಿ ಮೋಹನ್ ಬಗಾನ್ ತಂಡವು ಬಿಎಫ್ಸಿಗಿಂತ ಅತ್ಯಧಿಕ ಅಂಕ ಪಡೆದ ಹಿನ್ನೆಲೆ ಕೋಲ್ಕತ್ತಾದಲ್ಲಿ ಅಂತಿಮ ಪಂದ್ಯ ಜರುಗಲಿದೆ.
ಲೀಗ್ ಹಂತದಲ್ಲಿ ಸುನಿಲ್ ಛೆಟ್ರಿ ನೇತೃತ್ವದ ಬೆಂಗಳೂರು ಎಫ್ಸಿ ತಂಡವು ಆಡಿದ್ದ 24 ಪಂದ್ಯಗಳಲ್ಲಿ 11 ಗೆಲುವು, 8 ಸೋಲು ಕಂಡಿತ್ತು. ಜೊತೆಗೆ 5 ಡ್ರಾ ಸಾಧಿಸಿತ್ತು. ಒಟ್ಟಾರೆ 38 ಅಂಕ ಗಳಿಸಿದ್ದ ಬೆಂಗಳೂರು ಎಫ್ಸಿ ಅಂಕಪಟ್ಟಿಯಲ್ಲಿ ಮೂರನೇ ಸ್ಥಾನ ಪಡೆದಿತ್ತು. ಇತ್ತ ಮೋಹನ್ ಬಗಾನ್ ತಂಡವು ಕಣಕ್ಕಿಳಿದಿದ್ದ 24 ಪಂದ್ಯಗಳಲ್ಲಿ 17 ಗೆಲುವು, 2 ಸೋಲು ಸಾಧಿಸಿತ್ತು. ಉಳಿದ 5ರಲ್ಲಿ ಡ್ರಾ ಸಾಧಿಸಿತ್ತು. ಒಟ್ಟಾರೆ 56 ಅಂಕ ಸಂಪಾದಿಸಿ ಪಾಯಿಂಟ್ಸ್ ಟೇಬಲ್ನಲ್ಲಿ ಅಗ್ರಸ್ಥಾನ ಪಡೆದಿತ್ತು.
ಸೆಮಿಫೈನಲ್ನಲ್ಲಿ ಗೋವಾ ಎಫ್ಸಿ ತಂಡವನ್ನು ಮಣಿಸಿದ ಬಿಎಫ್ಸಿ 4ನೇ ಬಾರಿಗೆ ಪ್ರಶಸ್ತಿ ಸುತ್ತಿಗೆ ಅರ್ಹತೆ ಪಡೆದುಕೊಂಡಿದೆ. ಎಫ್ಸಿ ಗೋವಾ ವಿರುದ್ಧದ 2ನೇ ಸೆಮಿಫೈನಲ್ ಬಳಿಕ ಒಟ್ಟು ಗೋಲುಗಳ (3-2)ಲೆಕ್ಕಚಾರದಲ್ಲಿ ಬೆಂಗಳೂರು ಎಫ್ಸಿ ಐಎಸ್ಎಲ್ 2025ರ ಫೈನಲ್ನಲ್ಲಿ ಸ್ಥಾನ ಪಡೆದಿದೆ. ಸೆಮಿಫೈನಲ್ ಮೊದಲ ಲೆಗ್ನಲ್ಲಿ 2-0 ಅಂತರದ ಗೋಲು ಗಳಿಸಿ ಗೆಲುವು ಸಾಧಿಸಿತ್ತು. ಆದರೆ ಸೆಮಿಫೈನಲ್ 2ನೇ ಲೆಗ್ನಲ್ಲಿ ಬಿಎಫ್ಸಿ 1-2 ರಿಂದ ಸೋತಿತ್ತು. ಆದರೆ, ಒಟ್ಟು ಗೋಲುಗಳ ಲೆಕ್ಕಾಚಾರದಲ್ಲಿ ಬಿಎಫ್ಸಿ ಮುನ್ನಡೆ ಸಾಧಿಸಿತ್ತು.
ಮೋಹನ್ ಬಗಾನ್ ಕೂಡ 4ನೇ ಬಾರಿಗೆ ಪ್ರಶಸ್ತಿ ಸುತ್ತಿಗೆ ಲಗ್ಗೆ ಹಾಕಿದೆ. 2022-23ರ ಆವೃತ್ತಿಯ ಚಾಂಪಿಯನ್ ಆಗಿದ್ದ ಬಾಗನ್ ತಂಡವು 2ನೇ ಟ್ರೋಫಿ ಮೇಲೆ ಕಣ್ಣಿಟ್ಟಿದೆ. ಸೆಮಿಫೈನಲ್ ಮೊದಲ ಲೆಗ್ನಲ್ಲಿ ಜೆಮ್ಶೆಡ್ಪುರ ವಿರುದ್ಧ 1-2ರಿಂದ ಮಣಿದಿದ್ದ ಮೋಹನ್ ಬಾಗನ್, 2ನೇ ಲೆಗ್ನಲ್ಲಿ 2-0 ಅಂತರದಿಂದ ಗೆದ್ದಿತ್ತು ಪರಿಣಾಮ ಸೆಮಿಫೈನಲ್‌ನ 2 ಲೆಗ್ ಪಂದ್ಯಗಳಲ್ಲಿ ದಾಖಲಾದ ಒಟ್ಟು ಗೋಲುಗಳ ಲೆಕ್ಕಾಚಾರದಲ್ಲಿ ಮೋಹನ್ ಬಾಗನ್ (3–2) ತಂಡವು ಮೇಲುಗೈ ಸಾಧಿಸಿ ಫೈನಲ್ಗೆ ಅರ್ಹತೆ ಗಿಟ್ಟಿಸಿತು.
ಮತ್ತೆ ಫೈನಲ್ನಲ್ಲಿ ಬಿಎಫ್ಸಿ-ಮೋಹನ್ ಬಾಗನ್ ಮುಖಾಮುಖಿ
2022-23ರ ಆವೃತ್ತಿಯ ಫೈನಲ್ನಲ್ಲಿ ಸೆಣಸಾಟ ನಡೆಸಿದ್ದ ತಂಡಗಳೇ ಮತ್ತೊಮ್ಮೆ ಅಂತಿಮ ಪಂದ್ಯದಲ್ಲಿ ಮುಖಾಮುಖಿಯಾಗುತ್ತಿವೆ. ಅಂದು ಫೈನಲ್ನಲ್ಲಿ ಬಿಎಫ್ಸಿ ಮಣಿಸಿ ಮೋಹನ್ ಬಾಗನ್ 4-3 ಅಂತರದಿಂದ ಗೆದ್ದು ಚೊಚ್ಚಲ ಚಾಂಪಿಯನ್ ಆಗಿತ್ತು. 2018-19ರಲ್ಲಿ ಗೋವಾ ಎಫ್ಸಿ ವಿರುದ್ಧ ಬೆಂಗಳೂರು ಎಫ್ಸಿ ಗೆದ್ದು ಮೊದಲ ಬಾರಿಗೆ ಪ್ರಶಸ್ತಿಗೆ ಮುತ್ತಿಕ್ಕಿತ್ತು. ಇದೀಗ ಉಭಯ ತಂಡಗಳು 2ನೇ ಟ್ರೋಫಿಯನ್ನು ಗೆಲ್ಲಲು ಸಜ್ಜಾಗಿವೆ. ಆದರೆ ಟ್ರೋಫಿ ಯಾವ ತಂಡದ ಪಾಲಾಗಲಿದೆ ಎಂಬುದನ್ನು ಕಾದುನೋಡೋಣ.
| ISL ಸೀಸನ್ | ಚಾಂಪಿಯನ್ಸ್ | ರನ್ನರ್ಸ್ ಅಪ್ |
|---|---|---|
| 2023-24 | ಮುಂಬೈ ಸಿಟಿ ಎಫ್ಸಿ | ಮೋಹನ್ ಬಗಾನ್ ಸೂಪರ್ ಜೈಂಟ್ |
| 2022-23 | ಎಟಿಕೆ ಮೋಹನ್ ಬಗಾನ್ | ಬೆಂಗಳೂರು ಎಫ್ಸಿ |
| 2021-22 | ಹೈದರಾಬಾದ್ ಎಫ್ಸಿ | ಕೇರಳ ಬ್ಲಾಸ್ಟರ್ಸ್ |
| 2020-21 | ಮುಂಬೈ ಸಿಟಿ ಎಫ್ಸಿ | ಎಟಿಕೆ ಮೋಹನ್ ಬಗಾನ್ |
| 2019-20 | ಎಟಿಕೆ | ಚೆನ್ನೈಯಿನ್ ಎಫ್ಸಿ |
| 2018-19 | ಬೆಂಗಳೂರು ಎಫ್ಸಿ | ಎಫ್ಸಿ ಗೋವಾ |
| 2017-18 | ಚೆನ್ನೈಯಿನ್ ಎಫ್ಸಿ | ಬೆಂಗಳೂರು ಎಫ್ಸಿ |
| 2016 | ಎಟಿಕೆ | ಕೇರಳ ಬ್ಲಾಸ್ಟರ್ಸ್ |
| 2015 | ಚೆನ್ನೈಯಿನ್ ಎಫ್ಸಿ | ಎಫ್ಸಿ ಗೋವಾ |
| 2014 | ಎಟಿಕೆ | ಕೇರಳ ಬ್ಲಾಸ್ಟರ್ಸ್ |
Prasanna Kumar PN
