ಖೋ ಖೋ ವಿಶ್ವಕಪ್ ಫೈನಲ್ ಪ್ರವೇಶಿಸಿದ ಭಾರತದ ಪುರುಷರ-ಮಹಿಳೆಯರ ತಂಡಗಳು, ಎರಡು ತಂಡಗಳಿಗೆ ನೇಪಾಳ ಎದುರಾಳಿ
Kho Kho World Cup 2025: ಖೋ ಖೋ ವಿಶ್ವಕಪ್ ಸೆಮಿಫೈನಲ್ಗಳಲ್ಲಿ ಭರ್ಜರಿ ಗೆಲುವು ದಾಖಲಿಸಿದ ಭಾರತದ ಪುರುಷರ ಮತ್ತು ಮಹಿಳೆಯರ ತಂಡಗಳು ಫೈನಲ್ ಪ್ರವೇಶಿಸಿವೆ. ಈ ಎರಡು ತಂಡಗಳಿಗೆ ನೇಪಾಳ ತಂಡವೇ ಎದುರಾಳಿಯಾಗಿದೆ.

ಚೊಚ್ಚಲ ಖೋ ಖೋ ವಿಶ್ವಕಪ್ ಟೂರ್ನಿಯಲ್ಲಿ ಭಾರತದ ಪುರುಷರ ಮತ್ತು ಮಹಿಳೆಯರ ತಂಡಗಳು ಫೈನಲ್ಗೆ ಅರ್ಹತೆ ಪಡೆದುಕೊಂಡಿವೆ. ಆ ಮೂಲಕ ಅಜೇಯ ಓಟವನ್ನು ಮುಂದುವರೆಸಿವೆ. ಮತ್ತೊಮ್ಮೆ ತಮ್ಮ ಅದ್ಭುತ ತಂತ್ರಗಾರಿಕೆ ಪ್ರದರ್ಶಿಸಿದ ಭಾರತದ ಎರಡು ತಂಡಗಳು ಶನಿವಾರ (ಜನವರಿ 18) ನಡೆದ ಸೆಮಿಫೈನಲ್ಗಳಲ್ಲಿ ದಕ್ಷಿಣ ಆಫ್ರಿಕಾ ಪುರುಷರ ಮತ್ತು ಮಹಿಳಾ ತಂಡಗಳನ್ನು ಸೋಲಿಸಿ ಪ್ರಶಸ್ತಿ ಸುತ್ತಿಗೆ ಅರ್ಹತೆ ಪಡೆದಿವೆ. ನೇಪಾಳ ತಂಡ ಕೂಡ ಎರಡು ವಿಭಾಗಗಳಲ್ಲಿ (ಪುರುಷರು-ಮಹಿಳೆಯರು) ಅಂತಿಮ ಸುತ್ತಿಗೆ ಲಗ್ಗೆ ಇಟ್ಟಿದ್ದು, ಭಾರತದ ಎರಡೂ ವಿಭಾಗಗಳಿಗೆ ಎದುರಾಳಿಯಾಗಿದೆ.
ನವದೆಹಲಿಯ ಇಂದಿರಾಗಾಂಧಿ ಒಳಾಂಗಣ ಕ್ರೀಡಾಂಗಣದಲ್ಲಿ ನಡೆದ ಸೆಮಿಫೈನಲ್ ಪಂದ್ಯದಲ್ಲಿ 'ವುಮೆನ್ ಇನ್ ಬ್ಲೂ' ಅತ್ಯುತ್ತಮ ದಾಳಿ ಮತ್ತು ರಕ್ಷಣಾತ್ಮಕ ಆಟಕ್ಕೆ ಒತ್ತು ನೀಡಿ ಮಾಸ್ಟರ್ ಕ್ಲಾಸ್ ಪ್ರದರ್ಶನ ನೀಡಿತು. 66-16 ಅಂಕಗಳಿಂದ ಪ್ರವಾಸಿಗರನ್ನು ಮಣಿಸಿದ ಭಾರತೀಯ ನಾರಿಯರು, ಚೊಚ್ಚಲ ಟ್ರೋಫಿ ಗೆಲ್ಲುವ ಕನಸಿನಲ್ಲಿದ್ದಾರೆ. ಪಂದ್ಯದ ಆರಂಭದಿಂದ ಕೊನೆಯ ತನಕ ಭಾರತದ ಮಹಿಳಾ ತಂಡ ಪ್ರಬಲ ಹೋರಾಟ ನಡೆಸಿತು. ಆದರೆ, ದಕ್ಷಿಣ ಆಫ್ರಿಕಾ ಯಾವುದೇ ಹಂತದಲ್ಲೂ ಪ್ರತಿರೋಧ ತೋರಲಿಲ್ಲ. ಪರಿಣಾಮ ಸೋಲಿಗೆ ಶರಣಾಯಿತು. ಮತ್ತೊಂದು ಸೆಮಿಫೈನಲ್ನಲ್ಲಿ ನೇಪಾಳದ ಮಹಿಳೆಯರು ಉಗಾಂಡಾ ತಂಡವನ್ನು 89-18ರಿಂದ ಸೋಲಿಸಿ ಫೈನಲ್ಗೆ ಅರ್ಹತೆ ಪಡೆದರು.
ಭಾರತ ಪುರುಷರ ತಂಡವೂ ಫೈನಲ್ಗೆ ಲಗ್ಗೆ
ಟೂರ್ನಿಯುದ್ದಕ್ಕೂ ಪಾರಮ್ಯ ಮೆರೆದಿರುವ ಭಾರತ ಪುರುಷರ ತಂಡ ಸೆಮಿಫೈನಲ್ನಲ್ಲೂ ಅಸಾಧಾರಣ ಪ್ರದರ್ಶನದೊಂದಿಗೆ ದಕ್ಷಿಣ ಆಫ್ರಿಕಾ ಪುರುಷರ ತಂಡದ ವಿರುದ್ಧ ಭರ್ಜರಿ ಗೆಲುವು ದಾಖಲಿಸಿ ಚೊಚ್ಚಲ ಫೈನಲ್ಗೆ ಎಂಟ್ರಿಕೊಟ್ಟಿದೆ. ದಕ್ಷಿಣ ಆಫ್ರಿಕಾ ತಂಡದ ಉತ್ಸಾಹಭರಿತ ಹೋರಾಟದ ನಡುವೆಯೂ 60-42 ಅಂತರದಿಂದ ಸೋಲು ಅನುಭವಿಸಿದೆ. ಈ ಪಂದ್ಯವೂ ಇಂದಿರಾಗಾಂಧಿ ಒಳಾಂಗಣ ಕ್ರೀಡಾಂಗಣದಲ್ಲೇ ನಡೆಯಿತು. ಪುರುಷರ ಮತ್ತೊಂದು ಸೆಮೀಸ್ನಲ್ಲಿ ಇರಾನ್ ತಂಡವನ್ನು 72-20 ಅಂತರದಿಂದ ಸೋಲಿಸಿದ ನೇಪಾಳ ಪುರುಷರ ವಿಭಾಗದಲ್ಲೂ ಫೈನಲ್ ಪ್ರವೇಶಿಸಿದೆ. ಇದೀಗ ಎರಡು ವಿಭಾಗಗಳಲ್ಲೂ ಭಾರತ-ನೇಪಾಳ ತಂಡಗಳೇ ಫೈನಲಿಸ್ಟ್ಗಳಾಗಿದ್ದು, ಭಾನುವಾರ (ಜನವರಿ 19) ಪಂದ್ಯಗಳು ನಡೆಯಲಿವೆ.
