Manu Bhaker: ಮನು ಭಾಕರ್​ಗೆ ಹ್ಯಾಟ್ರಿಕ್​ ಪದಕ ಜಸ್ಟ್ ಮಿಸ್; ಸ್ವಲ್ಪದರಲ್ಲಿ ಕೈ ತಪ್ಪಿತು ಮೆಡಲ್

ಪ್ಯಾರಿಸ್ ಒಲಿಂಪಿಕ್ಸ್​ 2024 ಕ್ರೀಡಾಕೂಟದಲ್ಲಿ ತಾನು ಸ್ಪರ್ಧಿಸಿದ್ದ ಎರಡೂ ಈವೆಂಟ್​ಗಳಲ್ಲಿ ಕಂಚಿನ ಪದಕ ಗೆದ್ದಿದ್ದ ಭಾರತದ ಶಾರ್ಪ್​ ಶೂಟರ್​​ ಮನು ಭಾಕರ್ ಅವರು, ಮಹಿಳೆಯರ 25 ಮೀಟರ್​ ಏರ್​ ಪಿಸ್ತೂಲ್​ ಸ್ಪರ್ಧೆಯಲ್ಲಿ 28 ಅಂಕಗಳೊಂದಿಗೆ 4ನೇ ಸ್ಥಾನ ಪಡೆದ ಕಾರಣ ಹ್ಯಾಟ್ರಿಕ್​​ ಒಲಿಂಪಿಕ್ ಪದಕದ ಕನಸು ನುಚ್ಚು ನೂರಾಯಿತು.

ಮಹಿಳೆಯರ 10 ಮೀಟರ್​ ಏರ್ ಪಿಸ್ತೂಲ್​ ಮತ್ತು 10 ಮೀಟರ್​ ಏರ್​ ಮಿಸ್ತೂಲ್ ಮಿಶ್ರ ತಂಡದ ಸ್ಪರ್ಧೆಯಲ್ಲಿ (ಸರಬ್ಜೋತ್ ಸಿಂಗ್ ಜೊತೆಗೂಡಿ) ಕಂಚಿನ ಪದಕ ಗೆದ್ದಿದ್ದರು. ಈ ಸ್ಪರ್ಧೆಯಲ್ಲೂ ಪದಕ ಗೆದ್ದಿದ್ದರೆ ಇತಿಹಾಸ ನಿರ್ಮಿಸಲು ಸಾಧ್ಯವಾಗುತ್ತಿತ್ತು. ಅಂತಿಮ ಹಂತದಲ್ಲಿ 28 ಅಂಕ ಪಡೆದು 4ನೇ ಸ್ಥಾನಕ್ಕೆ ತೃಪ್ತಿಪಟ್ಟು ಪದಕ ತಪ್ಪಿಸಿಕೊಂಡರು.

ಮನು ಭಾಕರ್ ಭರ್ಜರಿ ಪ್ರದರ್ಶನ

ಮೊದಲ ಸಿರೀಸ್​​ನಲ್ಲಿ 5 ಶೂಟ್​​ಗಳಲ್ಲಿ ಮನು ಭಾಕರ್, 2 ಅಂಕ ಪಡೆದು 6ನೇ ಸ್ಥಾನ ಪಡೆದಿದ್ದರು. ಆದರೆ, 2ನೇ ಸಿರೀಸ್​​ನಲ್ಲಿ ಪುನರಾಗಮನ ಮಾಡಿದ ಮನು, 5ಕ್ಕೆ 4 ಅಂಕ ಪಡೆದು 4ನೇ ಸ್ಥಾನಕ್ಕೆ ಜಿಗಿದರು. ಬಳಿಕ ಮೂರನೇ ಸಿರೀಸ್​ನಲ್ಲಿ 4 ಅಂಕ ಪಡೆದು ಒಟ್ಟು 10 ಅಂಕಗಳೊಂದಿಗೆ 2ನೇ ಸ್ಥಾನಕ್ಕೆ ಏರಿದರು.

ಬಳಿಕ 4ನೇ ಸಿರೀಸ್​​ನಿಂದ ಎಲಿಮಿನೇಷನ್ ಸುತ್ತು ಆರಂಭಗೊಂಡಿತು. ಈ ಸುತ್ತಿನಲ್ಲಿ 3 ಅಂಕ ಪಡೆದ ಮನು, ಮತ್ತೆ 6ನೇ ಸ್ಥಾನಕ್ಕೆ ಕುಸಿದರು. ಆದರೆ 5ನೇ ಸುತ್ತಿನಲ್ಲಿ 5ಕ್ಕೆ 5 ಅಂಕ ಪಡೆದು ಮತ್ತೆ 3ನೇ ಸ್ಥಾನಕ್ಕೇರಿದರು. 6ನೇ ಸುತ್ತಿನಲ್ಲಿ 2ನೇ ಸ್ಥಾನ ಪಡೆದ ನಂತರ 2ನೇ ಸ್ಥಾನ ಭದ್ರಪಡಿಸಿಕೊಂಡರು. 

ಭಾಕರ್ ತನ್ನ 7ನೇ ಸಿರೀಸ್​ನಲ್ಲಿ 4ಕ್ಕೆ 5 ಸ್ಕೋರ್ ಮಾಡಿ ಅಗ್ರ-3ರೊಳಗೆ ಪ್ರವೇಶಿಸಲು ಫೈಟ್ ನೀಡಿದರು. ಆದರೆ 8ನೇ ಸುತ್ತಿನಲ್ಲಿ ಅವರು ಹಂಗೇರಿಯ ವೆರೋನಿಕಾ ಮೇಜರ್ ವಿರುದ್ಧ ಶಾಟ್‌ಆಫ್‌ನಲ್ಲಿ ಒಂದು ಅಂಕದಿಂದ ಸೋತು ಒಟ್ಟು 28 ಅಂಕಗಳೊಂದಿಗೆ ಪಡೆದು ತಮ್ಮ ಅಭಿಯಾನ ಮುಗಿಸಿದರು.

ಇದನ್ನೂ ಓದಿ: ಚಿನ್ನ ಗೆದ್ದ ಚೀನಾ ಬ್ಯಾಡ್ಮಿಂಟನ್ ಆಟಗಾರ್ತಿಗೆ ಡೈಮಂಡ್ ರಿಂಗ್ ಕೊಟ್ಟು ಪ್ರಪೋಸ್ ಮಾಡಿದ ಸಹ ಆಟಗಾರ, ಆಕೆ ರಿಯಾಕ್ಷನ್ ನೋಡಿ

ಆಗಸ್ಟ್​ 2ರಂದು ಶುಕ್ರವಾರ ನಡೆದಿದ್ದ 25 ಮೀಟರ್ ಏರ್​ ಪಿಸ್ತೂಲ್​​​ ಅರ್ಹತಾ ಸುತ್ತಿನ ಪಂದ್ಯದಲ್ಲಿ 22 ವರ್ಷದ ಮನು ಭಾಕರ್,​ 590 ಅಂಕ ಗಳಿಸುವ ಮೂಲಕ 2ನೇ ಸ್ಥಾನ ಪಡೆದು ಫೈನಲ್​ಗೇರಿದ್ದರು. ಹೀಗಾಗಿ, ಹ್ಯಾಟ್ರಿಕ್ ಪದಕದ ನಿರೀಕ್ಷೆ ಹುಟ್ಟು ಹಾಕಿದ್ದರು. ಇದೀಗ ಫೈನಲ್​ನಲ್ಲಿ 4ನೇ ಸ್ಥಾನಿಯಾಗಿ ಸ್ವಲ್ಪದರಲ್ಲಿ ಹೊರಬಿದ್ದಿದ್ದಾರೆ.

ಸ್ವತಂತ್ರ ಭಾರತದ ಇತಿಹಾಸದಲ್ಲಿ ಒಂದೇ ಒಲಿಂಪಿಕ್ಸ್‌ನಲ್ಲಿ 2 ಪದಕ ಗೆದ್ದ ಭಾರತದ ಮೊದಲ ಕ್ರೀಡಾಪಟು ಎಂಬ ದಾಖಲೆಗೆ 22 ವರ್ಷದ ಮನು ಪಾತ್ರರಾಗಿದ್ದಾರೆ. ಅಲ್ಲದೆ, ಎರಡು ಒಲಿಂಪಿಕ್ಸ್​ ಗೆದ್ದಿರುವ ಮೂರನೇ ಭಾರತದ ಕ್ರೀಡಾಪಟು ಎನ್ನುವ ದಾಖಲೆಗೂ ಪಾತ್ರರಾಗಿದ್ದಾರೆ. ಕುಸ್ತಿಪಟು ಸುಶೀಲ್​ ಕುಮಾರ್ ​(2008 ಕಂಚು, 2012 ಬೆಳ್ಳಿ), ಪಿವಿ ಸಿಂಧು (2016 ಬೆಳ್ಳಿ, 2021 ಕಂಚು) ಮನುಗೂ ಮೊದಲು ಎರಡು ಪದಕ ಗೆದ್ದವರು.

ಕಳೆದ ಒಲಿಂಪಿಕ್ಸ್​​​ನಲ್ಲಿ ಭಾರಿ ನಿರಾಸೆ

ಟೊಕಿಯೊ ಒಲಿಂಪಿಕ್ಸ್​​ನಲ್ಲೂ ಮೂರು ವಿಭಾಗಗಳಲ್ಲಿ ಸ್ಪರ್ಧಿಸಿದ್ದ ಮನು ಭಾಕರ್​ ಪದಕ ಗೆಲ್ಲುವಲ್ಲಿ ವಿಫಲರಾಗಿದ್ದರು. ಆದರೆ ಅಂದು ನಿರಾಸೆಯಾಗಿದ್ದ ಭರವಸೆಯ ಕ್ರೀಡಾಪಟು ಈ ಸಲ ಎರಡು ಪದಕಗಳೊಂದಿಗೆ ಭಾರತಕ್ಕೆ ಕೀರ್ತಿ ತಂದಿದ್ದಾರೆ. 2028ರ ಒಲಿಂಪಿಕ್ಸ್​​ನಲ್ಲಿ ಚಿನ್ನ ಗೆಲ್ಲುವ ಭರವಸೆಯನ್ನೂ ವ್ಯಕ್ತಪಡಿಸಿದ್ದಾರೆ.

ಇದನ್ನೂ ಓದಿ: ಪ್ಯಾರಿಸ್ ಒಲಿಂಪಿಕ್ಸ್​​ನಲ್ಲಿ ನೀರಜ್ ಚೋಪ್ರಾ ಚಿನ್ನ ಗೆದ್ದರೆ ನಿಮಗೂ ಉಚಿತ ವೀಸಾ; ಅಟ್ಲಿಸ್ ಸಿಇಒ ಭರವಸೆ