Ind vs Aus: 2ನೇ ಏಕದಿನ ಪಂದ್ಯದಲ್ಲಿ ಸೃಷ್ಟಿಯಾದ ದಾಖಲೆಗಳ ಪಟ್ಟಿ ಇಲ್ಲಿದೆ!

ಆಸ್ಟ್ರೇಲಿಯಾ ವಿರುದ್ಧದ​ 2ನೇ ಏಕದಿನ ಪಂದ್ಯದಲ್ಲಿ ಟೀಮ್​ ಇಂಡಿಯಾ, ಹೀನಾಯ ಸೋಲು ಅನುಭವಿಸಿತು. ಆಸಿಸ್​ ಆಲ್​ರೌಂಡ್​ ಆಟದ ಮುಂದೆ ರೋಹಿತ್​ ಪಡೆ ಉಸಿರೆತ್ತಲಿಲ್ಲ. ಸರಣಿ ಮೇಲೆ ಹಿಡಿತ ಸಾಧಿಸುವ ಛಲದಲ್ಲಿದ್ದ ಭಾರತ ತಂಡ, ಕಳಾಹೀನವಾಗಿ ಶರಣಾಗಿದೆ. 39 ಓವರ್​​ಗಳಿರುವಾಗಲೇ ಪಂದ್ಯವನ್ನು ಬಿಟ್ಟುಕೊಟ್ಟಿದೆ.

ಮೊದಲು ಬ್ಯಾಟಿಂಗ್​ ಮಾಡಿದ್ದ ಟೀಮ್​ ಇಂಡಿಯಾ, 26 ಓವರ್​​​​ಗಳಲ್ಲಿ ಕೇವಲ 117 ರನ್​​ಗಳಿಗೆ ಆಲೌಟ್​ ಆಯಿತು. ಮಿಚೆಲ್​ ಸ್ಟಾರ್ಕ್​​ 5 ವಿಕೆಟ್​ ಉರುಳಿಸಿ ಮೆನ್​ ಇನ್​ ಬ್ಲೂ ಪಾಲಿಗೆ ಅಕ್ಷರಶಃ ವಿಲನ್​ ಆದರು. ಈ ಗುರಿ ಬೆನ್ನಟ್ಟಿದ ಆಸ್ಟ್ರೇಲಿಯಾ, ಬರೀ 11 ಓವರ್​​​​ಗಳಲ್ಲಿ ಗೆಲುವಿನ ದಡ ಸೇರಿತು. ಆ ಮೂಲಕ ಸರಣಿ ಸಮಗೊಳಿಸುವಲ್ಲಿ ಯಶಸ್ವಿಯಾಗಿದೆ.

ಈ ಪಂದ್ಯವನ್ನು ಬಿಟ್ಟು ಕೊಟ್ಟ ಟೀಮ್​ ಇಂಡಿಯಾ ಹಲವು ಕೆಟ್ಟ ದಾಖಲೆಗಳಿಗೆ ಪಾತ್ರವಾಗಿದೆ. ಇದರೊಂದಿಗೆ ಆಸ್ಟ್ರೇಲಿಯಾ ವಿಶೇಷ ದಾಖಲೆಗಳನ್ನೂ ತಮ್ಮದಾಗಿಸಿಕೊಂಡಿದೆ. ಕಡಿಮೆ ಸ್ಕೋರ್​​, ಫಾಸ್ಟ್​ ಚೇಸಿಂಗ್​, 4 ಡಕೌಟ್​ಗಳು.. ಹೀಗೆ ಪ್ರಮುಖ ದಾಖಲೆಗಳು ಇತಿಹಾಸ ಪುಟ ಸೇರಿವೆ. ಅವುಗಳನ್ನು ಒಂದೊಂದಾಗೇ ನೋಡೋಣ.!

1. 117 ರನ್​ಗಳಿಗೆ ಆಲೌಟ್​ ಆದ ಟೀಮ್​ ಇಂಡಿಯಾ, ಆಸಿಸ್​ ವಿರುದ್ಧ ದಾಖಲಿಸಿದ ಮೂರನೇ ಕನಿಷ್ಠ ಮೊತ್ತ ಇದಾಗಿದೆ. ಈ ಹಿಂದೆಯೂ ಒಡಿಐ ಕ್ರಿಕೆಟ್​ನಲ್ಲಿ ಎರಡು ಬಾರಿ ಲೋ ಸ್ಕೋರ್​​ಗೆ ಆಲ್​ಔಟ್​ ಆಗಿದ್ದ ದಾಖಲೆ ಬರೆದಿತ್ತು. 1981ರಲ್ಲಿ 63 ಮತ್ತು 2000ರಲ್ಲಿ 100 ರನ್​ಗಳಿಗೆ ಮೆನ್​ ಇನ್​ ಬ್ಲೂ ಸರ್ವಪತನ ಕಂಡಿತ್ತು.

2. ಕಡಿಮೆ ಮೊತ್ತಕ್ಕೆ ಕುಸಿತ ಕಂಡ ಭಾರತ, ತವರಿನಲ್ಲಿ ನಾಲ್ಕನೇ ಬಾರಿಗೆ ಈ ರೀತಿ ಸಾಧನೆ ಮಾಡಿದೆ. 1986ರಲ್ಲಿ ಶ್ರೀಲಂಕಾ ಎದುರು 78 ರನ್​ಗಳಿಗೆ, 1993ರಲ್ಲಿ ವೆಸ್ಟ್​ ಇಂಡೀಸ್​ ವಿರುದ್ಧ 100 ರನ್​​ಗಳಿಗೆ, 2017ರಲ್ಲಿ ಆಸಿಸ್​ ವಿರುದ್ಧವೇ 112 ರನ್​ಗಳಿಗೆ ಭಾರತದ ನೆಲದಲ್ಲಿ ಅಲ್ಪಮೊತ್ತಕ್ಕೆ ಕುಸಿತ ಕಂಡ ದಾಖಲೆ ಬರೆದಿದೆ.

3. ಆಸ್ಟ್ರೇಲಿಯಾದ ಬೌಲರ್​​ ಮಿಚೆಲ್​ ಸ್ಟಾರ್ಕ್​​ ವಿಶೇಷ ಸಾಧನೆ ಮಾಡಿದ್ದು, ದಿಗ್ಗಜರ ಎಲೈಟ್​​​ ಲೀಸ್ಟ್​​ ಪ್ರವೇಶ ನೀಡಿದ್ದಾರೆ. ಏಕದಿನ ಕ್ರಿಕೆಟ್​​ನ ಇನ್ನಿಂಗ್ಸ್​​ವೊಂದರಲ್ಲಿ 5 ವಿಕೆಟ್​​ಗಳ ಗೊಂಚಲು ಪಡೆದವರ ಪಟ್ಟಿಯಲ್ಲಿ​ವಿಶ್ವದ 3ನೇ ಸ್ಥಾನಕ್ಕೆ ಜಿಗಿತ ಕಂಡಿದ್ದಾರೆ. ಮಿಚೆಲ್​ ಸ್ಟಾರ್ಕ್​​​ 9 ಬಾರಿ ಈ ಸಾಧನೆ ಮಾಡಿದ್ದರೆ, ಅಗ್ರಸ್ಥಾನದಲ್ಲಿರುವ ವಕಾರ್​ ಯೂನಿಸ್​​ 13 ಬಾರಿ, ಮುತ್ತಯ್ಯ ಮುರಳೀಧರನ್​ 10 ಬಾರಿ, ಶಾಹೀದ್​ ಅಫ್ರಿದಿ, ಬ್ರೆಟ್​ಲೀ ಕೂಡ 9 ಬಾರಿ ಐದು ವಿಕೆಟ್​ ಉರುಳಿಸಿದ್ದಾರೆ.

4. ಎಸೆತಗಳನನ್ನು ಉಳಿಸಿರುವ ಲೆಕ್ಕಾಚಾರದಲ್ಲೂ ಟೀಮ್​ ಇಂಡಿಯಾ, ಕಳಪೆ ಸಾಧನೆ ಮಾಡಿದೆ. 11 ಓವರ್​​​ಗಳಲ್ಲಿ ಚೇಸ್​ ಮಾಡಿದ ಆಸಿಸ್​​, ಇನ್ನೂ 39 ಓವರ್​​ಗಳನ್ನು ಅಂದರೆ 234 ಎಸೆತಗಳು ಬಾಕಿ ಇರುವಂತೆಯೇ 118 ರನ್​​​ಗಳ ಸವಾಲನ್ನು ದಾಟಿತ್ತು.

5. ಭಾರತ ನೀಡಿದ್ದ ಸುಲಭ ಗುರಿಯನ್ನು 11 ಓವರ್​​ಗಳಲ್ಲೇ ಚೇಸ್​​ ಮಾಡುವ ಮೂಲಕ, ಅತಿ ವೇಗದ ಚೇಸ್​​​​​​ ಎಂಬ ದಾಖಲೆಯನ್ನು ಆಸಿಸ್​ ತನ್ನ ಹೆಸರಿಗೆ ಬರೆದುಕೊಂಡಿತು. 2004ರಲ್ಲಿ ಯುಎಸ್​ಎಸ್​ ತಂಡ 7.5 (66 ರನ್​​) ಓವರ್​ಗಳಲ್ಲೇ ಗುರಿ ತಲುಪಿತ್ತು. ಇನ್ನು ಆಸ್ಟ್ರೇಲಿಯಾ, ವಿಂಡೀಸ್​ ಎದುರು 9.2 ಓವರ್​​​​ಗಳಲ್ಲಿ 71 ರನ್​ಗಳ ಗುರಿ ಮುಟ್ಟಿತ್ತು.

6. 2020ರ ಬಳಿಕ ಟೀಮ್​ ಇಂಡಿಯಾ 4ನೇ ಬಾರಿಗೆ 10 ವಿಕೆಟ್​ಗಳ ಸೋಲು ಕಂಡಿದೆ. ಟಿ20ಯಲ್ಲಿ ಎರಡು ಬಾರಿ ಎಂಬುದು ವಿಶೇಷ. 2020ರಲ್ಲಿ ನಡೆದ ಏಕದಿನ ಪಂದ್ಯದಲ್ಲಿ, 2021ರ ಟಿ20 ವಿಶ್ವಕಪ್​ ಲೀಗ್​​ ಪಂದ್ಯದಲ್ಲಿ ಪಾಕಿಸ್ತಾನ ಎದುರು, 2022ರ ಟಿ20 ವಿಶ್ವಕಪ್​​​​ ಸೆಮಿಫೈನಲ್​​ ಪಂದ್ಯದಲ್ಲಿ ಇಂಗ್ಲೆಂಡ್​ ಎದುರು, ಇದೀಗ ಈ ಪಂದ್ಯದಲ್ಲಿ 10 ವಿಕೆಟ್​ಗಳ ಹೀನಾಯ ಸೋಲು ಕಂಡಿದೆ.