MI vs UPW: ಮುಂಬೈ ಗೆಲುವಿನ ಓಟಕ್ಕೆ ಬ್ರೇಕ್​ ಹಾಕಿದ ಯುಪಿ.. ಹರ್ಮನ್​ ಪಡೆಗೆ ಮೊದಲ ಸೋಲು!

ಮಹಿಳಾ ಪ್ರೀಮಿಯರ್​ ಲೀಗ್​​ನಲ್ಲಿ ಸತತ ಐದು ಗೆಲುವಿನೊಂದಿಗೆ ಮುನ್ನುಗ್ಗುತ್ತಿದ್ದ ಮುಂಬೈ ಇಂಡಿಯನ್ಸ್​, ಕೊನೆಗೂ ಪಲ್ಟಿ ಹೊಡೆದಿದೆ. ಯುಪಿ ವಾರಿಯರ್ಸ್​ ವಿರುದ್ಧ 6ನೇ ಗೆಲುವಿಗೆ ಪಣ ತೊಟ್ಟ ಹರ್ಮನ್​ ಪಡೆ, ಟೂರ್ನಿಯಲ್ಲಿ ಮೊದಲು ಕಂಡಿದೆ. ಈಗಾಗಲೇ ಪ್ಲೇ ಆಫ್​ಗೆ ಅರ್ಹತೆ ಪಡೆದಿರುವ ಮುಂಬೈ, ರೋಚಕ ಹಣಾಹಣಿಯಲ್ಲಿ 5 ವಿಕೆಟ್​​​ಗಳ ಸೋಲು ಅನುಭವಿಸಿದೆ. ಈ ಗೆಲುವಿನೊಂದಿಗೆ ಯುಪಿ ವಾರಿಯರ್ಸ್​​​​, ಪ್ಲೇ ಆಫ್​​​​ಗೆ ಮತ್ತಷ್ಟು ಹತ್ತಿರವಾಗಿದೆ.

ಮೊದಲು ಬ್ಯಾಟಿಂಗ್​ ಮಾಡಿದ್ದ ಮುಂಬೈ ಇಂಡಿಯನ್ಸ್​ ಬ್ಯಾಟಿಂಗ್​ ವೈಫಲ್ಯದ ಕಾರಣ 20 ಓವರ್​​ಗಳಲ್ಲಿ 127 ರನ್​ಗಳಿಗೆ ಸರ್ವಪತನ ಕಂಡಿತು. ಬೌಲಿಂಗ್​ನಲ್ಲಿ ಅದ್ಭುತ ಪ್ರದರ್ಶನ ನೀಡಿದ ಯುಪಿ, ಅಲ್ಪ ಮೊತ್ತಕ್ಕೆ ಕಟ್ಟಿ ಹಾಕಿತು. ಈ ಸುಲಭ ಗುರಿ ಬೆನ್ನಟ್ಟಿದ ಯುಪಿ, ಗೆಲುವಿಗಾಗಿ ಹರಸಾಹಸ ಪಟ್ಟಿತು. ಕೊನೆಯ ಓವರ್​​​ವರೆಗೂ ಕೊಂಡೊಯಿತು. ಅಂತಿಮ ಓವರ್​​​ನಲ್ಲಿ ಇನ್ನೂ 3 ಓವರ್​​ಗಳನ್ನೂ ಬಾಕಿ ಉಳಿಸಿ, ಟೂರ್ನಿಯಲ್ಲಿ 3ನೇ ಗೆಲುವು ದಾಖಲಿಸಿತು.

ಟಾಸ್​ ಸೋತು ಮೊದಲು ಬ್ಯಾಟಿಂಗ್​ ನಡೆಸಿದ ಮುಂಬೈ ಇಂಡಿಯನ್ಸ್​, ಮತ್ತೊಂದು ಬಿಗ್​​ ಸ್ಕೋರ್​ ಕಲೆ ಹಾಕುವ ನಿರೀಕ್ಷೆಯಲ್ಲಿ ಕಣಕ್ಕಿಳಿಯಿತು. ಆರಂಭದಿಂದಲೇ ಹೊಡಿ ಬಡಿ ಆಟಕ್ಕೆ ಕೈ ಹಾಕುತ್ತಿದ್ದ ಮುಂಬೈ ಆಟಗಾರ್ತಿಯರು, ಯುಪಿ ಬೌಲರ್​​ಗಳ ಮುಂದೆ ಪರದಾಟ ನಡೆಸಿದರು. ನಿಧಾನಗತಿ ಬ್ಯಾಟಿಂಗ್​​ ನಡೆಸಿದ ಆರಂಭಿಕ ಆಟಗಾರ್ತಿ ಯಾಸ್ತಿಕಾ ಭಾಟಿಯಾ, 15 ಎಸೆತಗಳಲ್ಲಿ 7 ರನ್​ಗಳಿಸಿ ನಿರ್ಗಮಿಸಿದರು.

ಯಾಸ್ತಿಕಾ ಜೊತೆಗೆ ಹೀಲಿ ಮ್ಯಾಥ್ಯೂಸ್​​ ಸಹ ನಿಧಾನವಾಗಿ ಬ್ಯಾಟಿಂಗ್​ ನಡೆಸಿದರು. ಬಳಿಕ ಸಿಕ್ಸರ್​ಗಳ ಸುರಿಮಳೆಗೈದರು. ಇದರ ನಡುವೆಯೂ ಪವರ್​​​ಪ್ಲೇನಲ್ಲಿ ಬಿಗ್​​ಸ್ಕೋರ್​​​​ ಹಾಕುವಲ್ಲಿ ಮುಂಬೈ ವಿಫಲವಾಯಿತು. ಕೆಲ ಹೊತ್ತು ಅಬ್ಬರಿಸಿದ ಹೀಲಿ, 35 ರನ್​ಗೆ ವಿಕೆಟ್​ ಒಪ್ಪಿಸಿದರು. ನಟಾಲಿ ಸೀವರ್​​ (5), ಹರ್ಮನ್​ ಪ್ರೀತ್​ ಕೌರ್ (25), ಅಮೆಲಿಯಾ ಕೇರ್​ (3), ಅಮಂಜೋತ್ ಕೌರ್ (5) ಯಾರೂ ಮುಂಬೈಗೆ ನೆರವಾಗಲಿಲ್ಲ.

ಆದರೆ ಕೊನೆಯಲ್ಲಿ ವಿಕೆಟ್​​​​​​ ಪತನದ ನಡುವೆಯೂ ಇಸ್ಸಿ ವಾಂಗ್​​​ ಸಿಡಿಲಬ್ಬರದ ಬ್ಯಾಟಿಂಗ್​​ ನಡೆಸಿ ತಂಡದ ಮೊತ್ತವನ್ನು 100ರ ಗಡಿ ದಾಟಿಸಿದರು. 19 ಎಸೆತಗಳಲ್ಲಿ 32 ರನ್​ ಚಚ್ಚಿದರು. ಅಂತಿಮವಾಗಿ ಮುಂಬೈ 20 ಓವರ್​​ಗಳಲ್ಲಿ 127 ರನ್​ಗೆ ಸರ್ವಪತನ ಕಂಡಿತು. ಸೋಫಿ ಎಕ್ಲೆಸ್ಟನ್​​ 3 ವಿಕೆಟ್​, ರಾಜೇಶ್ವರಿ ಗಾಯಕ್ವಾಡ್​, ದೀಪ್ತಿ ಶರ್ಮಾ ತಲಾ 2 ವಿಕೆಟ್​ ಪಡೆದರೆ, ಅಂಜಲಿ ಸರ್ವಾಣಿ ಒಂದು ವಿಕೆಟ್​ ಪಡೆದು ಮಿಂಚಿದರು.

ಸಾಧಾರಣ ಗುರಿ ಬೆನ್ನತ್ತಿದ ಯುಪಿ ವಾರಿಯರ್ಸ್​ ಕೂಡ ಪರದಾಟ ನಡೆಸಿತು. ದೇವಿಕಾ ವೈದ್ಯ (1), ನಾಯಕಿ ಅಲೀಸಾ ಹೀಲಿ (8), ಕಿರಣ್ ನವಗಿರೆ (12) ಜೀವದಾನ ಸಿಕ್ಕರೂ ಲಾಭ ಪಡೆಯದೇ ಬೇಗನೇ ಔಟಾಗಿ ತಂಡಕ್ಕೆ ಆಘಾತ ನೀಡಿದರು. ಬಳಿಕ ಜೊತೆಯಾದ ತಹ್ಲಿಯಾ ಮೆಕ್​ಗ್ರಾತ್​​​ ಮತ್ತು ಗ್ರೇಸ್​ ಹ್ಯಾರಿಸ್​​​​ ತಂಡಕ್ಕೆ ಜೀವ ತುಂಬಿದರು. 4ನೇ ವಿಕೆಟ್​ಗೆ ಅಮೂಲ್ಯ 44 ರನ್​ಗಳ ಕಾಣಿಕೆ ನೀಡಿದರು. ಪಂದ್ಯದ ಗೆಲುವನ್ನೂ ಹತ್ತಿರಕ್ಕೆ ತಂದರು.

ಆದರೆ ಮೆಕ್​ಗ್ರಾತ್​ 38 ರನ್​ ಮತ್ತು ಗ್ರೇಸ್​ ಹ್ಯಾರಿಸ್​ 39 ರನ್​ ಗಳಿಸಿದ್ದಾಗ ವಿಕೆಟ್​ ಒಪ್ಪಿಸಿದರು. ಈ ಇಬ್ಬರೂ ಔಟಾದ ಬಳಿಕ ತಂಡದ ಗೆಲುವು ಸನಿಹಕ್ಕೆ ಬಂದು ನಿಂತಿತ್ತು. ಇದರ ನಡುವೆಯೂ ದೀಪ್ತಿ ಶರ್ಮಾ ಮತ್ತು ಸೋಫಿ ಎಕ್ಲೆಸ್ಟನ್ ರನ್​ ಗಳಿಸಲು ಪರದಾಟ ನಡೆಸಿ ತಂಡದ ಹಾರ್ಟ್​​ಬೀಟ್​ ಹೆಚ್ಚಿಸಿದರು. ಅಂತಿಮ ಓವರ್​​​​ನಲ್ಲಿ ಗೆಲುವಿಗೆ 5 ರನ್​ಗಳ ಅಗತ್ಯ ಇದ್ದಾಗ, ಸೋಫಿ ಎಕ್ಲೆಸ್ಟನ್​​​ ಸಿಕ್ಸರ್​ ಸಿಡಿಸಿ ತಂಡವನ್ನು ಗೆಲುವಿನ ದಡ ಸೇರಿಸಿದರು. ಇದರೊಂದಿಗೆ 5 ವಿಕೆಟ್​​​ ರೋಚಕ ಜಯ ಸಾಧಿಸಿತು.

ಮುಂಬೈ ಇಂಡಿಯನ್ಸ್ (ಪ್ಲೇಯಿಂಗ್ XI): ಹೇಲಿ ಮ್ಯಾಥ್ಯೂಸ್, ಯಾಸ್ತಿಕಾ ಭಾಟಿಯಾ (ವಿಕೆಟ್ ಕೀಪರ್), ನ್ಯಾಟ್ ಸಿವರ್-ಬ್ರಂಟ್, ಹರ್ಮನ್‌ಪ್ರೀತ್ ಕೌರ್ (ನಾಯಕಿ), ಅಮೆಲಿಯಾ ಕೆರ್, ಇಸ್ಸಿ ವಾಂಗ್, ಹುಮೈರಾ ಕಾಜಿ, ಧಾರಾ ಗುಜ್ಜರ್, ಅಮಂಜೋತ್ ಕೌರ್, ಜಿಂಟಿಮಣಿ ಕಲಿತಾ, ಸೈಕಾ ಇಶಾಕ್

ಯುಪಿ ವಾರಿಯರ್ಜ್ (ಪ್ಲೇಯಿಂಗ್ XI): ಅಲಿಸ್ಸಾ ಹೀಲಿ(ನಾಯಕಿ), ದೇವಿಕಾ ವೈದ್ಯ, ಕಿರಣ್ ನವಗಿರೆ, ತಹ್ಲಿಯಾ ಮೆಕ್‌ಗ್ರಾತ್, ಗ್ರೇಸ್ ಹ್ಯಾರಿಸ್, ದೀಪ್ತಿ ಶರ್ಮಾ, ಪಾರ್ಶವಿ ಚೋಪ್ರಾ, ಸಿಮ್ರಾನ್ ಶೇಖ್, ಸೋಫಿ ಎಕ್ಲೆಸ್ಟೋನ್, ಅಂಜಲಿ ಸರ್ವಾಣಿ, ರಾಜೇಶ್ವರಿ ಗಾಯಕ್ವಾಡ್.