Amir Hussain Lone: ಛಲದಂಕಮಲ್ಲ ಈ 34 ವರ್ಷದ ಕ್ರಿಕೆಟಿಗ; ಸಿದ್ಧವಾಗ್ತಿದೆ ಪ್ಯಾರಾ ತಂಡದ ನಾಯಕನ ಬಯೋಪಿಕ್‌

ಸಾಧನೆಗೆ ನ್ಯೂನ್ಯತೆಗಳು ಅಡ್ಡಿ ಆಗಲಾರದು ಎಂಬುದಕ್ಕೆ ಬಹುದೊಡ್ಡ ಉದಾಹರಣೆ ಇವರೇ ನೋಡಿ. ಪ್ರಸ್ತುತ ಎಲ್ಲಾ ಇದ್ದವರೇ ಏನೂ ಸಾಧನೆ ಮಾಡದೆ ಕೈಕಟ್ಟಿ ಕೂರುವ ಈ ಕಾಲದಲ್ಲಿ ಜಗತ್ತಿಗೆ ಮಾದರಿ ಆಗಿದ್ದಾನೆ. ಅದೆಷ್ಟೋ ಯುವಕರಿಗೆ ಸ್ಫೂರ್ತಿ. ಸಾಧನೆಗೆ ಅಂಗವಿಕಲತೆ ಅಡ್ಡಿ ಮಾಡಲ್ಲ, ಮನಸ್ಸಿದ್ದರೆ ಏನು ಬೇಕಾದರೂ ಸಾಧಿಸಬಹುದು. ಛಲವೊಂದಿದ್ದರೆ ಸಾಕು ಎನ್ನುವ ಪದಗಳಿಗೆ ಅರ್ಥವಾಗಿದ್ದಾರೆ ಈತ.

ಇದನ್ನೂ ಓದಿ: ರನೌಟ್​ ವೇಳೆ ನಾನು ಹತಾಶನಾದೆ; ಶುಭ್ಮನ್ ಗಿಲ್​ರನ್ನು ಬೈದ ಕುರಿತು ಮಾತನಾಡಿದ ರೋಹಿತ್ ಶರ್ಮಾ

ಆತನ ಹೆಸರು ಅಮೀರ್​ ಹುಸೇನ್ ಲೋನ್ (Amir Hussain Lone). ಕಾಶ್ಮೀರದ ಪ್ರಸಿದ್ಧ ದಿವ್ಯಾಂಗ ಕ್ರಿಕೆಟಿಗನ ರೋಚಕ ಕಥೆ ಇದು. ಇಲ್ಲಿನ ವಾಘಮಾ ಗ್ರಾಮದ 34 ವರ್ಷದ ಅಮೀರ್ ಹುಸೇನ್ ಲೋನ್, ಕ್ರಿಕೆಟ್ ಜಗತ್ತಿನ ನೂತನ ಸೆನ್​ಸೇಷನ್ ಆಗಿದ್ದಾರೆ. ಜಮ್ಮು ಮತ್ತು ಕಾಶ್ಮೀರದ ಪ್ಯಾರಾ ಕ್ರಿಕೆಟ್​ ತಂಡಕ್ಕೆ ನಾಯಕತ್ವದ ಹೊಣೆಗಾರಿಕೆಯನ್ನು ಅಮೀರ್​ಗೆ ನೀಡಲಾಗಿದೆ. ಮಹತ್ವದ ಜವಾಬ್ದಾರಿ ಅಲಂಕರಿಸುವ ಮೂಲಕ ಮಹೋನ್ನತ ಸಾಧನೆ ಮಾಡಿದ್ದಾರೆ.

ಕೈ ಕಳೆದುಕೊಂಡಿದ್ದೇಗೆ ಅಮೀರ್​?

ತನ್ನ 8ನೇ ವಯಸ್ಸಲ್ಲಿ ಎರಡೂ ಕೈಗಳನ್ನು ಕಳೆದುಕೊಂಡಿದ್ದ ಅಮೀರ್, ಛಲ ಬಿಡದೆ ಕ್ರಿಕೆಟಿಗನಾಗಿದ್ದಾರೆ. ತಂದೆಯ ಗರಗಸದ ಕಾರ್ಖಾನೆ ಅಪಘಾತದಲ್ಲಿ 2 ತೋಳುಗಳನ್ನು ಕಳೆದುಕೊಂಡಿದ್ದರು. ಆದರೂ ಎದೆಗುಂದದೆ ಯಾರಿಂದಲೂ ಆಗದೇ ಇರುವುದನ್ನು ಇವರು ಸಾಧಿಸಿ ತೋರಿಸಿದ್ದಾರೆ. ಕೈ ಕಳೆದುಕೊಂಡಾಗ ಅವರ ಜೀವನವು ಛಿದ್ರವಾಗಿತ್ತು. ಆದರೆ, ಅವರು ಭರವಸೆ ಕಳೆದುಕೊಳ್ಳಲಿಲ್ಲ.

ಪಾದಗಳಿಂದ ಬೌಲಿಂಗ್​, ಕುತ್ತಿಗೆಯಿಂದ ಬ್ಯಾಟಿಂಗ್​

ಎರಡೂ ಕೈಗಳು ಇಲ್ಲದಿದ್ದರೂ ಹೇಗೆ ಬೌಲಿಂಗ್, ಬ್ಯಾಟಿಂಗ್ ನಡೆಸಲು ಸಾಧ್ಯ ಎಂದು ಆಶ್ಚರ್ಯ ವ್ಯಕ್ತಪಡಿಸಿದ್ದರು. ಕೈಗಳು ಇಲ್ಲದಿದ್ದರೂ 2013ರಲ್ಲಿ ಅಮೀರ್ ಪಾದಗಳಿಂದಲೇ ಬೌಲಿಂಗ್​ ಮಾಡುವುದನ್ನು ಕಲಿತರು. ಕುತ್ತಿಗೆ ಮತ್ತು ಭುಜದ ನಡುವೆ ಬ್ಯಾಟ್ ಹಿಡಿದುಕೊಂಡು ಬ್ಯಾಟಿಂಗ್ ಮಾಡುವ ಅವರ ಆಟ ಇತರ ಕ್ರಿಕೆಟಿಗರಿಂದ ಭಿನ್ನವಾಗಿದೆ. ಮತ್ತು ಅಷ್ಟೇ ರೋಚಕವಾಗಿದೆ ಕೂಡ.

ಇದನ್ನೂ ಓದಿ : ಚಹಲ್-ಕುಲ್ದೀಪ್​ಗಲ್ಲ, 23 ವರ್ಷದ ಈ ಆಟಗಾರನನ್ನು ಟಿ20 ವಿಶ್ವಕಪ್​ಗೆ ಅವಕಾಶ ನೀಡಿ; ಗವಾಸ್ಕರ್ ಸಲಹೆ

ಕ್ರಿಕೆಟ್ ದಿಗ್ಗಜರಾದ ಸಚಿನ್ ತೆಂಡೂಲ್ಕರ್ ಮತ್ತು ಆಶಿಶ್ ನೆಹ್ರಾ ಬ್ಯಾಟರ್ ಅನ್ನು ಶ್ಲಾಘಿಸಿದ್ದಾರೆ. ಅಮೀರ್​ ಅವರನ್ನು ನೆಹ್ರಾ ಅವರು ವಾಂಖೆಡೆಯಲ್ಲಿ ಟಿ20 ವಿಶ್ವಕಪ್ 2016 ಸೆಮಿಫೈನಲ್ ವೀಕ್ಷಿಸಲು ಆಹ್ವಾನಿಸಿದರು. 2013ರಿಂದ, ಅಮೀರ್ ವೃತ್ತಿಪರ ಕ್ರಿಕೆಟ್ ಆಡುತ್ತಿದ್ದಾರೆ. ಅವರ ಸಾಮರ್ಥ್ಯವನ್ನು ನೋಡಿದ ಆತನ ಶಿಕ್ಷಕರು ಮೊದಲು ಕ್ರೀಡೆಗೆ ಪರಿಚಯಿಸಿದರು. ಶಾರ್ಜಾದಲ್ಲಿ ನಡೆದ ಯುನೈಟೆಡ್ ಅರಬ್ ಎಮಿರೇಟ್ಸ್ ದುಬೈ ಪ್ರೀಮಿಯರ್ ಲೀಗ್‌ನಲ್ಲಿ ಪಾಲ್ಗೊಂಡಿದ್ದರು.

ಅವರ ಅಸಾಧಾರಣ ಪ್ರಯಾಣವನ್ನು ಮುಂಬೈ ಮೂಲದ ಚಲನಚಿತ್ರ ನಿರ್ಮಾಣ ಸಂಸ್ಥೆ ಪಿಕಲ್ ಎಂಟರ್‌ಟೈನ್‌ಮೆಂಟ್ ತೆರೆ ಮೇಲೆ ತರಲು ನಿರ್ಧರಿಸಿದೆ. ಅಮೀರ್ ಅವರ ಜೀವನಚರಿತ್ರೆಯ ನಿರ್ಮಾಣವನ್ನು ಘೋಷಿಸಿದೆ. ಅಮೀರ್ ಎಂಬ ಶೀರ್ಷಿಕೆಯ ಈ ಬಯೋಪಿಕ್​ಗೆ ಬಿಗ್ ಬ್ಯಾಟ್ ಫಿಲ್ಮ್ಸ್​ಗೆ ಬಂಡವಾಳ ಹೂಡುತ್ತಿದ್ದು, ಮಹೇಶ್ ವಿ ಭಟ್ ನಿರ್ದೇಶಿಸುತ್ತಿದ್ದಾರೆ. ಈ ಬಯೋಪಿಕ್​ನಲ್ಲಿ ಅಮೀರ್ ಪಾತ್ರದಲ್ಲಿ ನಟಿಸಲು ಇಷ್ಟಪಡುತ್ತೇನೆ ಎಂದು ಬಾಲಿವುಡ್ ನಟ ವಿಕ್ಕಿ ಕೌಶಲ್ ಹೇಳಿದ್ದರು.

ಇದನ್ನೂ ಓದಿ: ವಿರಾಟ್ ಕೊಹ್ಲಿ ಕಂಬ್ಯಾಕ್, ತಿಲಕ್ ವರ್ಮಾ ಔಟ್; ಅಫ್ಘನ್ ವಿರುದ್ಧದ 2ನೇ ಟಿ20ಗೆ ಭಾರತ ಸಂಭಾವ್ಯ ತಂಡ