Starkids: 2023ರಲ್ಲಿ ಬಣ್ಣದ ಲೋಕಕ್ಕೆ ಎಂಟ್ರಿ ಕೊಟ್ಟ ಬಾಲಿವುಡ್ ಸ್ಟಾರ್ ಕಿಡ್ಸ್ಗಳ್ಯಾರು? ಕ್ಲಿಕ್ ಆದವರೆಷ್ಟು?
Dec 25, 2023 10:00 AM IST
ಸುಹಾನಾ ಖಾನ್ - ಅಗಸ್ತ್ಯ ನಂದಾ - ಖುಷಿ ಕಪೂರ್
- Bollywood Starkids: ಕೆಲವು ವರ್ಷಗಳಿಂದ ನೆಲಕಚ್ಚಿದ್ದ ಬಾಲಿವುಡ್ ಸದ್ಯ ಚೇತರಿಕೆ ಕಾಣುತ್ತಿದೆ. 2023 ಬಾಲಿವುಡ್ನ ಪಾಲಿಗೆ ಹೊಸ ಪ್ರತಿಭೆಗಳ ಅನಾವರಣದ ವರ್ಷವಾಗಿದ್ದು, ಅನೇಕ ಸ್ಟಾರ್ ಕಿಡ್ಗಳು ಸಿನಿಮಾ ರಂಗಕ್ಕೆ ಪದಾರ್ಪಣೆ ಮಾಡಿದ್ದಾರೆ.
ತಂದೆ ತಾಯಿ ಸಿನಿಮಾ ಇಂಡಸ್ಟ್ರಿಯಲ್ಲಿ ಸ್ಟಾರ್ ಆಗಿ ಮೆರೆದಿದ್ದರೆ ಅವರ ಮಕ್ಕಳು ಕೂಡ ಅಪ್ಪ ಅಮ್ಮನ ಹಾದಿ ಹಿಡಿಯುವುದು ಹೊಸತೇನಲ್ಲ. ಪೋಷಕರ ದಾರಿಯನ್ನೇ ತುಳಿಯಲು ಹೋಗಿ ಸಾಧನೆಯ ಶಿಖರವನ್ನೇರಿದವರು ಒಂದೆಡೆಯಾದರೆ ಹೇಳ ಹೆಸರಿಲ್ಲದೇ ಹೋದವರು ಇನ್ನೂ ಹಲವರು. ಇನ್ನೂ ಕೆಲವರು ನೆಪೋಟಿಸಂ ಮೂಲಕ ಸಿನಿಮಾ ರಂಗದಲ್ಲಿ ಹೇಗೋ ತಮ್ಮ ಅಸ್ತಿತ್ವವನ್ನು ಉಳಿಸಿಕೊಳ್ಳುವ ಪ್ರಯತ್ನದಲ್ಲಿದ್ದಾರೆ. ಇದರ ಬಗ್ಗೆ ಈಗ ಮಾತನಾಡಲು ಕಾರಣವಿದೆ. ಬಾಲಿವುಡ್ನಲ್ಲಿ ಈ ಬಾರಿ ಸಾಲು ಸಾಲು ಸ್ಟಾರ್ ಕಿಡ್ಗಳು ಬಣ್ಣದ ಲೋಕಕ್ಕೆ ಪಾದಾರ್ಪಣೆ ಮಾಡಿದ್ದಾರೆ. ಯಾರು ಅವರೆಲ್ಲ ಅನ್ನೋದನ್ನು ತಿಳಿದುಕೊಳ್ಳೋಣ.
ಸುಹಾನಾ ಖಾನ್ : ವಿದೇಶದಲ್ಲಿ ವ್ಯಾಸಂಗ ಮಾಡುತ್ತಿದ್ದ ಶಾರೂಕ್ ಖಾನ್ ಪುತ್ರಿ ಸುಹಾನಾ ಖಾನ್ ಬಾಲಿವುಡ್ಗೆ ಬರುತ್ತಿದ್ದಾರೆ ಎಂಬ ಸುದ್ದಿ ಅನೇಕ ವರ್ಷಗಳಿಂದ ಸುದ್ದಿಯಲ್ಲಿತ್ತು. ಕೊನೆಗೂ ಈ ವದಂತಿಗಳು ನಿಜವಾಗಿದ್ದು ತಂದೆಯ ಹಾದಿಯನ್ನೇ ತುಳಿಯೋಕೆ ಸುಹಾನಾ ನಿರ್ಧರಿಸಿದಂತಿದೆ . ನವೆಂಬರ್ 7ರಂದು ನೆಟ್ಫ್ಲಿಕ್ಸ್ನಲ್ಲಿ ಜೋಯಾ ಅಖ್ತರ್ ನಿರ್ದೇಶನದ 'ದಿ ಆರ್ಚೀಸ್' ರಿಲೀಸ್ ಆಗಿದೆ. ಇದರಲ್ಲಿ ಸುಹಾನಾ ಮುಖ್ಯ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಸುಹಾನಾ ಖಾನ್ರ ಈ ಚೊಚ್ಚಲ ಸಿನಿಮಾ ಮಿಶ್ರ ಪ್ರತಿಕ್ರಿಯೆಯನ್ನು ಗಳಿಸಿದೆ. ವೆರೋನಿಕಾ ಪಾತ್ರದಲ್ಲಿ ಕಾಣಿಸಿಕೊಂಡ ಸುಹಾನಾ ನಟನೆಯನ್ನು ಬಹುತೇಕರು ಇಷ್ಟಪಟ್ಟಿಲ್ಲ.
ಖುಷಿ ಕಪೂರ್ : ಬಾಲಿವುಡ್ ನಟಿ ದಿವಂಗತ ಶ್ರೀದೇವಿ ಪುತ್ರಿ ಖುಷಿ ಕಪೂರ್ ಕೂಡ ತನ್ನ ಸಹೋದರಿ ಜಾನ್ವಿ ಕಪೂರ್ರಂತೆಯೇ ಅಮ್ಮನ ಹಾದಿಯನ್ನೇ ಹಿಡಿದಿದ್ದಾರೆ, ಅಂದಹಾಗೆ ಖುಷಿ ಕಪೂರ್ ಕೂಡ ಸುಹಾನ್ ಖಾನ್ ನಟಿಸಿರುವ 'ದಿ ಆರ್ಚೀಸ್' ಸಿನಿಮಾದ ಮೂಲಕವೇ ಬಾಲಿವುಡ್ಗೆ ಕಾಲಿಟ್ಟಿದ್ದಾರೆ. ಈ ಸಿನಿಮಾದಲ್ಲಿ ಸುಹಾನಾ ಖಾನ್ಗಿಂತ ಖುಷಿ ಕಪೂರ್ ಚೆನ್ನಾಗಿ ನಟಿಸಿದ್ದಾರೆ ಎನ್ನುವುದು ಬಹುತೇಕ ವೀಕ್ಷಕರ ಅಭಿಪ್ರಾಯವಾಗಿದೆ. ಅಲ್ಲದೇ ಅನೇಕರು ಖುಷಿ ಕಪೂರ್ಗೆ ಸಿನಿಮಾ ಇಂಡಸ್ಟ್ರಿಯಲ್ಲಿ ಭವಿಷ್ಯ ಇರುವಂತೆ ಕಾಣ್ತಿದೆ ಅಂತಾ ಮಾತನಾಡಿಕೊಳ್ಳುತ್ತಿದ್ದಾರೆ.
ಅಗಸ್ತ್ಯ ನಂದಾ : 'ದಿ ಆರ್ಚೀಸ್' ಎನ್ನುವುದು ಒಂದು ರೀತಿಯಲ್ಲಿ ಸ್ಟಾರ್ ಕಿಡ್ಗಳ ಸಿನಿಮಾ ಎಂದು ಹೇಳಬಹುದಾಗಿದೆ. ಏಕೆಂದರೆ ಇದೇ ಸಿನಿಮಾದ ಮೂಲಕ ಅಗಸ್ತ್ಯಾ ನಂದಾ ಕೂಡ ಬಾಲಿವುಡ್ಗೆ ಕಾಲಿಟ್ಟಿದ್ದಾರೆ. ಅಗಸ್ತ್ಯ ನಂದಾ ಬಾಲಿವುಡ್ ಬಿಗ್ ಬಿ ಅಮಿತಾಬ್ ಬಚ್ಛನ್ರ ಮೊಮ್ಮಗ. ಅಮಿತಾಬ್ ಹಾಗೂ ಜಯಾ ಬಚ್ಛನ್ ಪುತ್ರಿಯಾದ ಶ್ವೇತಾ ಬಚ್ಛನ್ ಹಾಗೂ ನಿಖಿಲ್ ನಂದಾ ದಂಪತಿಯ ಮಗ. ಬಚ್ಚನ್ ಕುಟುಂಬದಿಂದ ಚಿತ್ರರಂಗಕ್ಕೆ ಕಾಲಿಟ್ಟ ಮೂರನೇ ತಲೆಮಾರು ಎನಿಸಿದ್ದಾರೆ.
ಅಲಿಜೆ ಅಗ್ನಿಹೋತ್ರಿ : ಅಲಿಜೆ ಅಗ್ನಿಹೋತ್ರಿ ಸಲ್ಮಾನ್ ಖಾನ್ರ ಸೊಸೆ. ಇವರು ಸೌಮೇಂದ್ರ ಪಾದಿ ಆ್ಯಕ್ಷನ್ ಕಟ್ ಹೇಳಿರುವ 'ಫಾರೆ' ಸಿನಿಮಾದ ಮೂಲಕ ಬಣ್ಣದ ಲೋಕಕ್ಕೆ ಕಾಲಿಟ್ಟಿದ್ದಾರೆ. ನವೆಂಬರ್ 24ರಂದು ಈ ಸಿನಿಮಾ ತೆರೆ ಕಂಡಿದೆ.
ಪಲೋಮಾ ದಿಲ್ಲೋನ್ : ನಟಿ ಪೂನಂ ದಿಲ್ಲೋನ್ ಪುತ್ರಿ ಪಲೋಮಾ ದಿಲ್ಲೋನ್ ಕೂಡ ಈ ವರ್ಷ ಚಿತ್ರರಂಗದಲ್ಲಿ ತಮ್ಮ ಅದೃಷ್ಟ ಪರೀಕ್ಷೆಗಿಳಿದಿದ್ದಾರೆ, 'ಡೋನೋ' ಸಿನಿಮಾದಲ್ಲಿ ನಟಿ ಪಲೋಮಾ ದಿಲ್ಲೋನ್ ಬಣ್ಣ ಹಚ್ಚಿದ್ದಾರೆ. ಪಲೋಮಾ ದಿಲ್ಲೋನ್ ನಟನೆಯು ಸಿನಿಪ್ರಿಯರಿಗೆ ಇಷ್ಟವಾದಂತಿದೆ.
ರಾಜ್ವೀರ್ ಡಿಯೋಲ್ : ಪಲೋಮಾ ದಿಲ್ಲೋನ್ ನಟಿಸಿರುವ 'ಡೋನೋ' ಸಿನಿಮಾದಲ್ಲಿ ನಟ ರಾಜ್ವೀರ್ ಡಿಯೋಲ್ ಕೂಡ ನಟಿಸಿದ್ದಾರೆ. ರಾಜ್ವೀರ್ ಡಿಯೋಲ್ಗೂ ಇದು ಮೊದಲ ಸಿನಿಮಾವಾಗಿದೆ. ಅಂದಹಾಗೆ ಇವರು ಬಾಲಿವುಡ್ ನಟ ಸನ್ನಿ ಡಿಯೋಲ್ರ ಕಿರಿಯ ಪುತ್ರ.ರಾಜ್ವೀರ್ ನಟನೆಯು ಸನ್ನಿ ಡಿಯೋಲ್ರ ಕಾಲವನ್ನು ನೆನಪಿಸುವಂತಿದೆ ಎಂದು ಅನೇಕರು ಅಭಿಪ್ರಾಯಪಟ್ಟಿದ್ದಾರೆ.
ಪಲಕ್ ತಿವಾರಿ: ಕಿರುತೆರೆಯಲ್ಲಿ ಸಾಕಷ್ಟು ಸದ್ದು ಮಾಡಿರುವ ನಟಿ ಶ್ವೇತಾ ತಿವಾರಿ ಪುತ್ರಿ ಪಲಕ್ ತಿವಾರಿ ಕೂಡ ತಮ್ಮ ಅದೃಷ್ಟ ಪರೀಕ್ಷೆ 2023ನ್ನೇ ಆಯ್ಕೆ ಮಾಡಿಕೊಂಡಿದ್ದಾರೆ. 'ಕಿಸಿ ಕಾ ಭಾಯ್ ಕಿಸಿ ಕಾ ಜಾನ್' ಸಿನಿಮಾದಲ್ಲಿ ಪಲಕ್ ತಿವಾರಿ ನಟಿಸಿದ್ದಾರೆ. ಅಲ್ಲದೇ ಪಲಕ್ ಸಲ್ಮಾನ್ ಖಾನ್ರ ಜೊತೆಯಲ್ಲಿ ತೆರೆ ಹಂಚಿಕೊಂಡಿರೋದು ಮತ್ತೊಂದು ವಿಶೇಷ. ಆದರೆ ಪಲಕ್ ತಿವಾರಿ ಈ ಹಿಂದೆ ಬಿಜಲಿ ಬಿಜಲಿ ಎಂಬ ಹಾಡಿಗೆ ಹೆಜ್ಜೆ ಹಾಕಿದ್ದರು.