Bisi Bele Bath: ನೀವು ಮಾಡಿದ್ದು ರುಚಿ ಇಲ್ವಾ? ಇಲ್ಲಿದೆ ನೋಡಿ ಪರ್ಫೆಕ್ಟ್‌ ಬಿಸಿ ಬೇಳೆ ಬಾತ್‌ ತಯಾರಿಸುವ ವಿಧಾನ; ಪುಡಿ ರೆಸಿಪಿ ಕೂಡಾ ಇದೆ

ಬೇಳೆ ಸಾಂಬಾರ್‌ ಪುಡಿಯನ್ನು ಅಕ್ಕಿ, ನೀರು, ತರಕಾರಿ ಜೊತೆ ಮಿಕ್ಸ್‌ ಮಾಡಿ ತಯಾರಿಸುವ ತಿಂಡಿ ಎಂದಿಗೂ ಬಿಸಿ ಬೇಳೆ ಬಾತ್‌ ಆಗುವುದಿಲ್ಲ. ಅದನ್ನು ತಯಾರಿಸಲು ಪ್ರತ್ಯೇಕ ವಿಧಾನ ಇದೆ. ಪರ್ಫೆಕ್ಟ್‌ ಆದ , ಬಾಯಲ್ಲಿ ನೀರೂರಿಸುವ ಬಿಸಿ ಬೇಳೆ ಬಾತ್‌ ತಯಾರಿಸುವ ವಿಧಾನ ಇಲ್ಲಿದೆ. ಜೊತೆಗೆ ಈ ರೆಸಿಪಿಗೆ ಬಹಳ ಮುಖ್ಯವಾದ ಪುಡಿ ಮಾಡುವ ವಿಧಾನವನ್ನೂ ವಿವರಿಸಲಾಗಿದೆ. ಮುಂದಿನ ಬಾರಿ ತಪ್ಪದೆ ಟ್ರೈ ಮಾಡಿ.

ಬಿಸಿ ಬೇಳೆ ಬಾತ್‌ ಪುಡಿ ತಯಾರಿಸಲು ಬೇಕಾಗುವ ಸಾಮಗ್ರಿಗಳು

ಚೆಕ್ಕೆ - 5 ಗ್ರಾಂ

ಲವಂಗ - 2 ಗ್ರಾಂ

ಕಡ್ಲೆಬೇಳೆ - 20 ಗ್ರಾಂ

ಉದ್ದಿನ ಬೇಳೆ - ಗ್ರಾಂ

ಜಾಯಿ ಕಾಯಿ - 1/2

ಇಂಗು - 10 ಗ್ರಾಂ

ಧನಿಯಾ - 50 ಗ್ರಾಂ

ಗುಂಟೂರು ಮೆಣಸಿನಕಾಯಿ - 10

ಬ್ಯಾಡಗಿ ಮೆಣಸಿನಕಾಯಿ - 150 ಗ್ರಾಂ

ಕರಿಬೇವು - 5 ಎಸಳು

ಗಸಗಸೆ - 10 ಗ್ರಾಂ

ಅರಿಶಿನ - 1 ಟೀ ಸ್ಪೂನ್‌

ಜೀರ್ಗೆ - 1 ಟೀ ಸ್ಪೂನ್‌

ಏಲಕ್ಕಿ - 2

ಎಣ್ಣೆ - 2 ಟೇಬಲ್‌ ಸ್ಪೂನ್

ಇಷ್ಟು ಸಾಮಗ್ರಿಗಳಿಂದ ಸುಮಾರು 1/4 ಕಿಲೋ ಬಿಸಿ ಬೇಳೆ ಬಾತ್‌ ಪುಡಿ ತಯಾರಿಸಬಹುದು

ಪುಡಿ ತಯಾರಿಸುವ ವಿಧಾನ

• ಒಂದು ದಪ್ಪ ತಳದ ಪಾತ್ರೆಯಲ್ಲಿ ಎಣ್ಣೆ ಬಿಸಿ ಮಾಡಿಕೊಂಡು ಇಂಗು, ಚೆಕ್ಕೆ, ಲವಂಗ ಸೇರಿಸಿ ಬಹಳ ಕಡಿಮೆ ಉರಿಯಲ್ಲಿ 30 ಸೆಕೆಂಡ್‌ ಹುರಿಯಿರಿ.
• ಜೊತೆಗೆ ಕಡ್ಲೆಬೇಳೆ, ಉದ್ದಿನಬೇಳೆ, ಏಲಕ್ಕಿ ಸೇರಿಸಿ ಕಂದು ಬಣ್ಣ ಬರುವರೆಗೂ ಹುರಿದು ಹೆಚ್ಚುವರಿ ಎಣ್ಣೆಯನ್ನು ತೆಗೆಯಿರಿ.
• ನಂತರ ಜಾಯಿ ಕಾಯಿ, ಜೀರ್ಗೆ, ಗಸಗಸೆ ಸೇರಿಸಿ ಫ್ರೈ ಮಾಡಿ, ಧನಿಯಾ, ಗುಂಟೂರು ಮೆಣಸಿನಕಾಯಿ, ಕರಿಬೇವು, ಅರಿಶಿನ ಸೇರಿಸಿ ಒಮ್ಮೆ ಫ್ರೈ ಮಾಡಿ ಒಂದು ಪ್ಲೇಟ್‌ಗೆ ಸೇರಿಸಿ ತಣ್ಣಗಾಗಲು ಬಿಡಿ.
• ಅದೇ ಪಾತ್ರೆಗೆ ಬ್ಯಾಡಗಿ ಮೆಣಸಿನಕಾಯಿ ಸೇರಿಸಿ ಗರಿ ಗರಿಯಾಗುವರೆಗೂ ಫ್ರೈ ಮಾಡಿ.
• ಎಲ್ಲಾ ಮಿಶ್ರಣ ತಣ್ಣಗಾದ ನಂತರ ಮೊದಲು ಮೆಣಸಿನಕಾಯನ್ನು ಮಿಕ್ಸಿ ಜಾರ್‌ಗೆ ಸೇರಿಸಿ ಪುಡಿ ಮಾಡಿಕೊಳ್ಳಿ.
• ನಂತರ ಉಳಿದ ಸಾಮಗ್ರಿಗಳನ್ನು ಸೇರಿಸಿ ಪುಡಿ ಮಾಡಿಕೊಂಡು ಮೆಣಸಿನಕಾಯಿ ಪುಡಿ ಹಾಗೂ ಬೇಳೆ ಪುಡಿಯನ್ನು ಮತ್ತೊಮ್ಮೆ ಜಾರ್‌ನಲ್ಲಿ ಪುಡಿ ಮಾಡಿದರೆ ಘಮ ಘಮಿಸುವ ಬಿಸಿ ಬೇಳೆ ಬಾತ್‌ ಪುಡಿ ರೆಡಿ.

ಬಿಸಿ ಬೇಳೆ ಬಾತ್‌ ತಯಾರಿಸಲು ಬೇಕಾಗುವ ಸಾಮಗ್ರಿಗಳು

ತೊಗರಿ ಬೇಳೆ - 1 ಕಪ್‌

ಅಕ್ಕಿ - 1 ಕಪ್‌

ಬಿಸಿ ಬೇಳೆ ಬಾತ್‌ ಪುಡಿ - 3 ಟೇಬಲ್‌ ಸ್ಪೂನ್‌

ಬೀನ್ಸ್‌ - 8

ಕ್ಯಾರೆಟ್‌ - 1

ಹಸಿ ಬಟಾಣಿ - 1/4 ಕಪ್

ಚಿಕ್ಕ ಟೊಮೆಟೊ - 2

ಹುಣಿಸೆ ಹಣ್ಣು - ದೊಡ್ಡ ನೆಲ್ಲಿಕಾಯಿ ಗಾತ್ರ

ಸಾಂಬಾರ್‌ ಈರುಳ್ಳಿ - 100 ಗ್ರಾಂ

ಒಣಕೊಬ್ಬರಿ ತುರಿ - 1 ಕಪ್‌

ಗೋಡಂಬಿ - 3 ಟೇಬಲ್‌ ಸ್ಪೂನ್‌

ಎಣ್ಣೆ - 4 ಸ್ಪೂನ್‌

ತುಪ್ಪ - 2 ಟೇಬಲ್‌ ಸ್ಪೂನ್‌

ಇಂಗು - ಚಿಟಿಕೆ

ಅರಿಶಿನ - ಚಿಟಿಕೆ

ಒಣಮೆಣಸಿನಕಾಯಿ - 5

ಕಡ್ಲೆಕಾಯಿ ಬೀಜ - 2 ಟೇಬಲ್‌ ಸ್ಪೂನ್‌

ಕರಿಬೇವು - 2 ಎಸಳು

ಉಪ್ಪು - ರುಚಿಗೆ ತಕ್ಕಷ್ಟು

ತಯಾರಿಸುವ ವಿಧಾನ

• ತೊಗರಿಬೇಳೆಯನ್ನು 2-3 ಬಾರಿ ತೊಳೆದು ಅದರೊಂದಿಗೆ 3 ಕಪ್‌ ನೀರು ಸ್ವಲ್ಪ ಅರಿಸಿನ , 2 ಸ್ಪೂನ್‌ ಎಣ್ಣೆ ಸೇರಿಸಿ ಮಿಕ್ಸ್‌ ಮಾಡಿ 2 ಸೀಟಿ ಕೂಗಿಸಿಕೊಳ್ಳಿ.
• ಬೇಳೆ ಕುಕ್‌ ಆದ ನಂತರ ಅದರೊಂದಿಗೆ 3 ಕಪ್‌ ನೀರು, ಸಾಂಬಾರ್‌ ಈರುಳ್ಳಿ, ಟೊಮೆಟೊ, ತರಕಾರಿ, ಹಸಿ ಬಟಾಣಿ ಅಕ್ಕಿ, ಸ್ವಲ್ಪ ಉಪ್ಪು ಸೇರಿಸಿ ಕುದಿಯಲು ಬಿಡಿ.
• ಹುಣಿಸೆಹಣ್ಣಿಗೆ ಸ್ವಲ್ಪ ನೀರು ಸೇರಿಸಿ ನೆನೆಯಲು ಬಿಟ್ಟು, ಕಿವುಚಿ ರಸ ತೆಗೆದಿಟ್ಟುಕೊಳ್ಳಿ.
• ಈ ಹುಣಿಸೆ ರಸಕ್ಕೆ ಬಿಸಿ ಬೇಳೆ ಬಾತ್‌ ಪುಡಿ ಸೇರಿಸಿ ಗಂಟುಗಳು ಇಲ್ಲದಂತೆ ಮಿಕ್ಸ್‌ ಮಾಡಿ.
• ಅಕ್ಕಿ ಮುಕ್ಕಾಲು ಭಾಗ ಕುಕ್‌ ಆದ ನಂತರ ಪುಡಿ ಸೇರಿಸಿದ ಹುಣಿಸೆ ರಸ ಸೇರಿಸಿ ತಿರುವುತ್ತಲೇ ಇರಿ, ಇಲ್ಲದಿದ್ದರೆ ಅದು ಗಂಟಾಗುತ್ತದೆ, ನಂತರ ಇನ್ನಷ್ಟು ಉಪ್ಪು, ಕೊಬ್ಬರಿ ತುರಿ ಸೇರಿಸಿ ಮಧ್ಯೆ ಮಧ್ಯೆ ಮರೆಯದೆ ತಿರುವಿ.
• ಒಮ್ಮೆ ರುಚಿ ನೋಡಿ ನಿಮಗೆ ಅಗತ್ಯ ಎನಿಸಿದರೆ ಇನ್ನಷ್ಟು ಬಿಸಿ ಬೇಳೆ ಬಾತ್‌ ಪುಡಿ ಅಥವಾ ಉಪ್ಪನ್ನು ಅಡ್ಜೆಸ್ಟ್‌ ಮಾಡಿ ಕಡಿಮೆ ಉರಿಯಲ್ಲಿ 5 ನಿಮಿಷ ಕುಕ್‌ ಮಾಡಿ ಸ್ಟೋವ್‌ ಆಫ್‌ ಮಾಡಿ.
• ಪಾತ್ರೆಯಲ್ಲಿ ತುಪ್ಪ ಬಿಸಿ ಮಾಡಿ ಇಂಗು, ಅರಿಶಿನ, ಒಣಮೆಣಸಿನಕಾಯಿ, ಕರಿಬೇವು, ಕಡ್ಲೆಕಾಯಿ ಬೀಜ, ಗೋಡಂಬಿ ಸೇರಿಸಿ ಫ್ರೈ ಮಾಡಿ
• ಈ ಒಗ್ಗರಣೆಯನ್ನು ಬಿಸಿ ಬೇಳೆ ಬಾತ್‌ ಒಳಗೆ ಸೇರಿಸಿ ಮಿಕ್ಸ್‌ ಮಾಡಿ.

ರುಚಿಯಾದ ಬಿಸಿ ಬೇಳೆ ಬಾತನ್ನು ಖಾರಾ ಬೂಂದಿ ಜೊತೆ ಸರ್ವ್‌ ಮಾಡಿ.