Asian Games: ಪ್ರೀ ಕ್ವಾರ್ಟರ್ ಪ್ರವೇಶಿಸಿದ ಭಾರತ ಪುರುಷ ಮತ್ತು ಮಹಿಳೆಯರ ಟೇಬಲ್ ಟೆನಿಸ್ ತಂಡ

ಏಷ್ಯನ್ ಗೇಮ್ಸ್‌ನಲ್ಲಿ (Asian Games) ಶನಿವಾರ ನಡೆದ ಗುಂಪು ಹಂತದ ಪಂದ್ಯದಲ್ಲಿ ಭಾರತ ಪುರುಷರ ಮತ್ತು ಮಹಿಳೆಯರ ಟೇಬಲ್ ಟೆನಿಸ್ ತಂಡಗಳು ಪ್ರೀ ಕ್ವಾರ್ಟರ್ ಫೈನಲ್‌ಗೆ ಲಗ್ಗೆ ಇಟ್ಟಿವೆ. ಉಭಯ ತಂಡಗಳು ತಜಕಿಸ್ತಾನ ಮತ್ತು ನೇಪಾಳ ವಿರುದ್ಧ 3-0 ಅಂತರದ ಜಯ ಸಾಧಿಸಿ, ಮುಂದಿನ ಹಂತಕ್ಕೆ ಪ್ರವೇಶಿಸಿವೆ.

ಭಾರತ ಪುರುಷರ ತಂಡದ ಮಾನವ್ ಠಾಕರ್ ಅವರು ಅಫ್ಜಲ್ಖೋನ್ ಮಹ್ಮುದೋವ್ ಅವರನ್ನು 11-8, 11-5, 11-8 ರಿಂದ ಸೋಲಿಸಿ ಉತ್ತಮ ಆರಂಭ ನೀಡಿದರು. ಬಳಿಕ ಎರಡನೇ ಸುತ್ತಿನಲ್ಲಿ ಮನುಷ್ ಶಾ ಅವರು 13-11, 11-7, 11-5 ಅಂತರದಿಂದ ಉಬೈದುಲ್ಲೊ ಸುಲ್ಟೋನೊವ್ ವಿರುದ್ಧ ಜಯಗಳಿಸಿ, ಭಾರತಕ್ಕೆ 2-0 ಮುನ್ನಡೆ ತಂಡದುಕೊಟ್ಟರು. ಕೊನೆಯಲ್ಲಿ ಹರ್ಮೀತ್ ದೇಸಾಯಿ ಅವರು ಇಬ್ರೋಕಿಮ್ ಇಸ್ಮೊಯಿಲ್ಜೋಡಾ ವಿರುದ್ಧ 11-1, 11-3, 11-5 ಸುಲಭ ಜಯದೊಂದಿಗೆ ಭಾರತಕ್ಕೆ ಗೆಲುವು ತಂದುಕೊಟ್ಟರು.

ಶುಕ್ರವಾರದ ಪಂದ್ಯದಲ್ಲಿ ಸಿಂಗಾಪುರವನ್ನು ಮಣಿಸಿದ್ದ ಭಾರತದ ವನಿತೆಯರು, ನೇಪಾಳದ ದಿಯಾ ಚಿತಾಲೆ 11-1, 11-6, 11-8 ಸೆಟ್‌ಗಳಿಂದ ಸಿಕ್ಕಾ ಶ್ರೇಷ್ಠಾ ಅವರನ್ನು ಸೋಲಿಸುವ ಮೂಲಕ ಗೆಲುವಿನ ಸೂಚನೆ ನೀಡಿದರು. ಮತ್ತೊಂದೆಡೆ ನೇಪಾಳದ ನಬಿತಾ ಶ್ರೇಷ್ಠಾ ವಿರುದ್ಧ 11-3, 11-7, 11-2 ಅಂತರದಲ್ಲಿ ಜಯ ಗಳಿಸಿದ ಅಹಿಕಾ ಮುಖರ್ಜಿ ಭಾರತದ ಮುನ್ನಡೆಯನ್ನು ದ್ವಿಗುಣಗೊಳಿಸಿದರು. ಕೊನೆಯದಾಗಿ ಸುತೀರ್ಥ ಮುಖರ್ಜಿ ಅವರು ಇವಾನಾ ಥಾಪಾ ಅವರನ್ನು 11-1, 11-5, 11-2 ರಿಂದ ಸೋಲಿಸಿ ಕ್ಲೀನ್‌ ಸ್ವೀಪ್‌ ಮಾಡಿದರು.

ನಿಖತ್‌ ಜರೀನ್‌ಗೆ ಕಠಿಣ ಸವಾಲು

ಮತ್ತೊಂದೆಡೆ ಬಾಕ್ಸಿಂಗ್‌ ವಿಭಾಗದಲ್ಲಿ, ವಿಶ್ವ ಚಾಂಪಿಯನ್ ನಿಖತ್ ಜರೀನ್ ಅವರು ಏಷ್ಯನ್ ಗೇಮ್ಸ್ 2023ರ ಬಾಕ್ಸಿಂಗ್‌ನಲ್ಲಿ ಕಠಿಣ ಆರಂಭ ಪಡೆಯಲಿದ್ದಾರೆ. ಚೀನಾದ ಹ್ಯಾಂಗ್‌ಝೌನಲ್ಲಿ ಆರಂಭವಾಗಿರುವ ಕ್ರೀಡಾಕೂಟದಲ್ಲಿ, ಆರಂಭದಲ್ಲೇ ಜರೀನ್‌ ಅವರಿಗೆ ಪ್ರಬಲ ಎದುರಾಳಿ ಸಿಕ್ಕಿದ್ದಾರೆ.

ಟೂರ್ನಿಯಲ್ಲಿ ನಡೆಯಲಿರುವ ಬಾಕ್ಸಿಂಗ್‌ನ ಪಂದ್ಯಗಳ ಪಟ್ಟಿ ಅಂತಿಮಗೊಂಡಿದ್ದು, ಕಠಿಣ ಡ್ರಾ ಎದುರಿಸಿರುವ ಜರೀನ್‌ ಮೊದಲ ಸುತ್ತಿನಲ್ಲಿ ಜರೀನ್‌ ಅವರು ನ್ಗುಯೆನ್ ಥಿ ಟಾಮ್ ಅವರನ್ನು ಎದುರಿಸಲಿದ್ದಾರೆ. ಕಳೆದ ಮಾರ್ಚ್‌ನಲ್ಲಿ ನವದೆಹಲಿಯಲ್ಲಿ ನಡೆದ ವಿಶ್ವ ಚಾಂಪಿಯನ್‌ಶಿಪ್ ಫೈನಲ್‌ನಲ್ಲಿ, ವಿಯೆಟ್ನಾಂನ ಥಿ ಟಾಮ್ ವಿರುದ್ಧ ಗೆದ್ದು ನಿಖತ್‌ ಜರೀನ್‌ ಚಾಂಪಿಯನ್‌ ಆಗಿದ್ದರು. ಇದೀಗ ಇವರ ವಿರುದ್ಧ ನಿಖತ್‌ ತಮ್ಮ ಅಭಿಯಾನವನ್ನು ಪ್ರಾರಂಭಿಸಲಿದ್ದಾರೆ.

ಈ ಹಿಂದೆ ಟಾಮ್‌ ವಿರುದ್ಧ ಜರೀನ್‌ ಗೆದ್ದಿದ್ದರೂ, ಅವರು ಪ್ರಬಲ ಎದುರಾಳಿ ಎನ್ನುವುದರಲ್ಲಿ ಅನುಮಾನವಿಲ್ಲ. ಥಿ ಟಾಮ್ ಎರಡು ಬಾರಿ ಏಷ್ಯನ್ ಚಾಂಪಿಯನ್ ಆಗಿದ್ದಾರೆ. ಹೀಗಾಗಿ ಅವರು ಬಲಿಷ್ಠ ಎದುರಾಳಿ. ಒಂದು ವೇಳೆ ಜರೀನ್ ತಾಮ್ ಅವರನ್ನು ಸೋಲಿಸಿದರೆ, ಅವರು ಎರಡನೇ ಸುತ್ತಿನಲ್ಲಿ ರಿಪಬ್ಲಿಕ್ ಆಫ್ ಕೊರಿಯಾದ ಚೊರೊಂಗ್ ಬಾಕ್ ವಿರುದ್ಧ ಸೆಣಸಲಿದ್ದಾರೆ.

ಲೊವ್ಲಿನಾ ಬೊರ್ಗೊಹೈನ್‌ಗೆ ಬೈ

ಮತ್ತೊಂದೆಡೆ ಒಲಿಂಪಿಕ್ ಪದಕ ವಿಜೇತೆ ಮತ್ತು ವಿಶ್ವ ಚಾಂಪಿಯನ್ ಲೊವ್ಲಿನಾ ಬೊರ್ಗೊಹೈನ್ ಅವರಿಗೆ, ಪೂರ್ವಭಾವಿ ಪಂದ್ಯಗಳಲ್ಲಿ ಬೈ ನೀಡಲಾಗಿದೆ. ಅವರು ಸೆಪ್ಟೆಂಬರ್ 30ರಂದು ಮಹಿಳೆಯರ 70 ಕೆಜಿ ವಿಭಾಗದ ಕ್ವಾರ್ಟರ್ ಫೈನಲ್‌ನಲ್ಲಿ ಕೊರಿಯಾದ ಸಿಯೊಂಗ್ ಸುಯೆನ್ ಅವರನ್ನು ಎದುರಿಸಲಿದ್ದಾರೆ.

ಭಾರತದ ಯುವ ಬಾಕ್ಸರ್ ಪ್ರೀತಿ, 54 ಕೆಜಿ ವಿಭಾಗದ ಮೊದಲ ಸುತ್ತಿನಲ್ಲಿ ಜೋರ್ಡಾನ್‌ನ ಅಲಹಸನಾತ್ ಸಿಲಿನಾ ವಿರುದ್ಧ ಅಭಿಯಾನ ಆರಂಭಿಸಲಿದ್ದಾರೆ. ಪರ್ವೀನ್ ಹೂಡಾ ಅವರು 57 ಕೆಜಿ ವಿಭಾಗದ ಮೊದಲ ಸುತ್ತಿನಲ್ಲಿ ಚೀನಾದ ಕ್ಸು ಝೀಹುನ್ ಅವರನ್ನು ಎದುರಿಸಲಿದ್ದಾರೆ. ಇದೇ ವೇಳೆ 66 ಕೆಜಿ ವಿಭಾಗದಲ್ಲಿ ಅರುಂಧತಿ ಚೌಧರಿ ಕಠಿಣ ಡ್ರಾ ಸಾಧಿಸಿದ್ದು, ಮೊದಲ ಸುತ್ತಿನಲ್ಲಿ ಚೀನಾದ ಯಾಂಗ್ ಲಿಯು ವಿರುದ್ಧ ಕಾದಾಡಲಿದ್ದಾರೆ.