Virat Kohli: ಕಿಂಗ್ ಈಸ್ ಬ್ಯಾಕ್.. 3 ವರ್ಷ, 3 ತಿಂಗಳ ಬಳಿಕ ಟೆಸ್ಟ್ನಲ್ಲಿ ದಾಖಲೆಯ ಶತಕ ಸಿಡಿಸಿದ ಕೊಹ್ಲಿ!
Virat Kohli: ಕಿಂಗ್ ಈಸ್ ಬ್ಯಾಕ್..! ಟೆಸ್ಟ್ ಕ್ರಿಕೆಟ್ನಲ್ಲಿ ಕೊಹ್ಲಿ ಶತಕ ಯಾವಾಗ..? ಕೊಹ್ಲಿ ಶತಕ ಯಾವಾಗ.? ಅಂತ 3 ವರ್ಷಗಳಿಂದ ಕೇಳುತ್ತಿದ್ದ ಪ್ರಶ್ನೆಗಳಿಗೆ ಕೊಹ್ಲಿ ಖಡಕ್ ಉತ್ತರ ಕೊಟ್ಟಿದ್ದಾರೆ. ಕೊನೆಗೂ ಶತಕ ಸಿಡಿಸಿ, ಟೀಕೆಗಳಿಗೆ ತಿರುಗೇಟು ನೀಡಿದ್ದಾರೆ. ಆಸ್ಟ್ರೇಲಿಯಾ ವಿರುದ್ಧ ತಮ್ಮ 28ನೇ ಶತಕ ಸಿಡಿಸಿ ಮಿಂಚಿದ್ದಾರೆ.
ONCE A KING ALWAYS A KING.! ಈ ಮಾತನ್ನ ವಿರಾಟ್ ಕೊಹ್ಲಿ (Virat Kohli) ಮತ್ತೆ ನಿರೂಪಿಸಿದ್ದಾರೆ. ಟೀಕೆ, ಅವಮಾನ, ಹತಾಶೆ, ನೋವು, ಯಾತನೆ.. ಎಲ್ಲವನ್ನೂ ಮೆಟ್ಟಿ ನಿಂತ ಕಿಂಗ್, ಘರ್ಜಿಸಿದ್ದಾರೆ. 3 ವರ್ಷಗಳ ನಂತರ ಕೊಹ್ಲಿ, ಶತಕದ ಬರ ನೀಗಿದೆ. ಕಿಂಗ್ ಬ್ಯಾಟ್ ಕೊನೆಗೂ ಅಗಸದ ಕಡೆ ಮುಖಮಾಡಿ ಸಂಭ್ರಮಿಸಿದೆ. ಅದರಲ್ಲೂ ವಿಶೇಷವಾಗಿ ಕೊಹ್ಲಿ, ಅಭಿಮಾನಿಗಳು ಕಾಯುವಿಕೆ ದೊಡ್ಡ ವನವಾಸ ಕೊನೆಗೊಂಡಿದೆ. ಸೆಂಚುರಿ ಸಿಡಿಸಿಲ್ಲ, ಸೆಂಚುರಿ ಸಿಡಿಸಿಲ್ಲ.. ಅಂತ ಕ್ರಿಕೆಟ್ ಲೋಕ ಕೇಳುತ್ತಿದ್ದ ದೊಡ್ಡ ಪ್ರಶ್ನೆಗೆ ಮುಟ್ಟಿನೋಡುಕೊಳ್ಳುವಂತೆ ಉತ್ತರ ಕೊಟ್ಟಿದ್ದಾರೆ.
ಜವಾಬ್ದಾರಿಯುತ ಶತಕ ಸಿಡಿಸಿ ಕೊಹ್ಲಿ
ಬಾರ್ಡರ್ - ಗವಾಸ್ಕರ್ ಟೆಸ್ಟ್ ಸರಣಿಯ (Border - Gavaskar Trophy) ಅಂತಿಮ ಪಂದ್ಯದಲ್ಲಿ ಆಸ್ಟ್ರೇಲಿಯಾ (Australia) ವಿರುದ್ಧ ಕಿಂಗ್, ದಾಖಲೆಯ 75ನೇ ಶತಕ (Virat Kohli 75th Century) ಸಿಡಿಸಿದ್ದಾರೆ. ವಿಶ್ವ ದರ್ಜೆಯ ಬೌಲರ್ಗಳನ್ನ ಚಿಂದಿ ಉಡಾಯಿಸಿದರು. 4ನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ಕೊಹ್ಲಿ ಜವಾಬ್ದಾರಿಯುತ ಬ್ಯಾಟಿಂಗ್ ನಡೆಸಿದರು. ಅವಕಾಶ ಸಿಕ್ಕಾಗೆಲ್ಲಾ ವಿರಾಟ ರೂಪ ತೋರಿದ ಕೊಹ್ಲಿ, 241 ಎಸೆತಗಳಲ್ಲಿ ಶತಕ ಸಿಡಿಸಿ ಸಂಭ್ರಮಿಸಿದರು. ಟೆಸ್ಟ್ ಕ್ರಿಕೆಟ್ನಲ್ಲಿ ವೃತ್ತಿಜೀವನದ 28ನೇ ಶತಕ ದಾಖಲಿಸಿದರು.
ಟೆಸ್ಟ್ನಲ್ಲಿ 1,206 ದಿನಗಳ ಬಳಿಕ ಶತಕ
ಟೆಸ್ಟ್ ಕ್ರಿಕೆಟ್ನಲ್ಲಿ ಸೆಂಚುರಿ ಯಾವಾಗ ಅಂತ ಕೇಳುತ್ತಿದ್ದವರಿಗೆ ಕೊಹ್ಲಿ ಉತ್ತರ ಕೊಟ್ಟಿದ್ದಾರೆ. ವಿಶ್ರಾಂತಿ ಬಳಿಕ ರಿಫ್ರೆಶ್ ಆಗಿ ಟೆಸ್ಟ್ ಸರಣಿಯಲ್ಲಿ ಕಣಕ್ಕಿಳಿದ ಕೊಹ್ಲಿ, ಬರೋಬ್ಬರಿ 1,206 ದಿನಗಳ ಬಳಿಕ ಮೂರಂಕಿ ದಾಟಿದ್ದಾರೆ. 241ಎಸೆತಗಳಲ್ಲಿ 05 ಬೌಂಡರಿಗಳ ನೆರವಿನಿಂದ ಕೊಹ್ಲಿ, ಅಜೇಯ ಶತಕ ಸಿಡಿಸಿದ್ದಾರೆ. 3 ವರ್ಷ 3 ತಿಂಗಳು, 39 ತಿಂಗಳು, 172 ವಾರಗಳ ಬಳಿಕ ಶತಕಕ್ಕಾಗಿ ಕಾಯುವಿಕೆಯನ್ನು ಕೊನೆಗೊಳಿಸಿದ್ದಾರೆ.
ಕೊನೇ ಶತಕ ಸಿಡಿಸಿದ್ದು 2019ರಲ್ಲಿ.!
ಹೌದು..! ಕೊಹ್ಲಿ ತಮ್ಮ ಕೊನೆಯ ಅಂತಾರಾಷ್ಟ್ರೀಯ ಟೆಸ್ಟ್ ಶತಕ ಬಾರಿಸಿದ್ದು, 2019ರಲ್ಲಿ.! ಅಂದಿನಿಂದ ಕೊಹ್ಲಿ, ಬ್ಯಾಟನ್ನು ಮೇಲಕ್ಕೆತ್ತಿ ಸಂಭ್ರಮಿಸಿಯೇ ಇರಲಿಲ್ಲ. 2019ರ ನವೆಂಬರ್ 23ರಂದು ಬಾಂಗ್ಲಾ ವಿರುದ್ಧ ಪಿಂಕ್ಬಾಲ್ ಟೆಸ್ಟ್ನಲ್ಲಿ (Pink Ball Test) 136 ರನ್ ಗಳಿಸಿದ್ದರು. ಅದಾದ ಬಳಿಕ ಕೇವಲ ಅರ್ಧಶತಕಗಳನ್ನು ಸಿಡಿಸಿದ್ದ ಕೊಹ್ಲಿ, ಶತಕ ಸಿಡಿಸಲು ಒದ್ದಾಡಿದ್ದರು.
8 ತಿಂಗಳಲ್ಲಿ 5ನೇ ಶತಕ ಸಿಡಿಸಿದ ಕಿಂಗ್.!
ಕಳೆದ ವರ್ಷ ಸೆಪ್ಟೆಂಬರ್ 8ರಂದು ಟಿ20 ಕ್ರಿಕೆಟ್ನಲ್ಲಿ ಶತಕ ಸಿಡಿಸುವ ಮೂಲಕ ಫಾರ್ಮ್ಗೆ ಮರಳಿದ್ದರು. ಅದೇ ವರ್ಷ ಬಾಂಗ್ಲಾದೇಶದ ವಿರುದ್ಧದ ಏಕದಿನ ಪಂದ್ಯದಲ್ಲಿ ಶತಕ ಒನ್ಡೇ ಕ್ರಿಕೆಟ್ಗೂ ಕಂಬ್ಯಾಕ್ ಮಾಡಿದ್ದರು. ಇದರ ನಂತರ ಈ ವರ್ಷ ಏಕದಿನ ಕ್ರಿಕೆಟ್ನಲ್ಲಿ 2 ಶತಕ ಸಿಡಿಸಿ ಸಂಭ್ರಮಿಸಿದ್ದರು. ಆದರೆ ಟೆಸ್ಟ್ ಕ್ರಿಕೆಟ್ನಲ್ಲಿ ಮಾತ್ರ ಸಾಧ್ಯವಾಗಿರಲೇ ಇಲ್ಲ. ಇದೀಗ ಅದು ಕೂಡ ನೆರವೇರಿದೆ.
ಒಟ್ನಲ್ಲಿ..! ಏಕದಿನ, ಟಿ20 ಕ್ರಿಕೆಟ್ನಲ್ಲಿ ಅದ್ಭುತ ಫಾರ್ಮ್ಗೆ ಬಂದಿದ್ದ ಕೊಹ್ಲಿ, ಟೆಸ್ಟ್ನಲ್ಲಿ ಪದೆಪದೇ ಫೇಲ್ ಆಗುತ್ತಿದ್ದರು. ಇದರಿಂದ ನಿರಾಸೆಗೊಂಡಿದ್ದ ಫ್ಯಾನ್ಸ್ಗೆ ಕೊಹ್ಲಿ ಸೆಂಚುರಿ, ಫುಲ್ ಖುಷ್ ನೀಡಿದೆ. ಇಡೀ ಕ್ರಿಕೆಟ್ ಜಗತ್ತೇ ಕಾಯ್ತಿದ್ದ ದಿನಕ್ಕೆ ಬ್ರೇಕ್ ಹಾಕಿದ ಕೊಹ್ಲಿ, ಹಳೆಯ ಖದರ್ಗೆ ಮರಳಿ, ಎದುರಾಳಿ ತಂಡಗಳಿಗೆ ನಡುಕ ಹುಟ್ಟಿಸಿದ್ದಾರೆ.