Golden Boot Race in Fifa 2022: ಫಿಫಾ ವಿಶ್ವಕಪ್ ಫೈನಲ್: ಮೆಸ್ಸಿ vs ಎಂಬಾಪೆ; ಗೋಲ್ಡನ್ ಬೂಟ್ ಗೆಲ್ಲೋರು ಯಾರು?

ದೋಹಾ(ಕತಾರ್): ಫಿಫಾ ವಿಶ್ವಕಪ್ 2022 ಫೈನಲ್ ಪಂದ್ಯ ನಾಳೆ (ಡಿಸೆಂಬರ್ 18, ಭಾನುವಾರ) ಜಗತ್ತಿನ ಎರಡು ಬಲಿಷ್ಠ ತಂಡಗಳಾದ ಫಾನ್ಸ್ ಹಾಗೂ ಅರ್ಜೆಂಟೀನಾ ನಡುವೆ ನಡೆಯಲಿದೆ.

ಫ್ರಾನ್ಸ್ ಸತತ ಎರಡನೇ ಬಾರಿ ಚಾಂಪಿಯನ್ ಆಗುತ್ತಾ ಎಂಬ ಕುತೂಹಲದ ನಡುವೆಯೇ ಗೋಲ್ಡನ್ ಬೂಟ್ ಪ್ರಶಸ್ತಿಯನ್ನು ಯಾರು ಗೆಲ್ಲುತ್ತಾರೆ ಎಂಬುದು ಫುಟ್ಬಾಲ್ ಅಭಿಮಾನಿಗಳಲ್ಲಿ ಕುತೂಹಲ ಮೂಡಿಸಿದೆ. ಈ ಪ್ರಶಸ್ತಿಗಾಗಿ ಅರ್ಜೆಂಟೀನಾ ಸ್ಟಾರ್ ಆಟಗಾರ ಲಿಯೊನೆಲ್ ಮೆಸ್ಸಿ ಹಾಗೂ ಫ್ರಾನ್ಸ್ ಆಟಗಾರ ಎಂಬಾಪೆ ನಡುವೆ ಪೈಪೋಟಿ ಏರ್ಪಟ್ಟಿದೆ.

ಈ ವಿಶ್ವಕಪ್‌ನಲ್ಲಿ ಯಾರು ಹೆಚ್ಚು ಗೋಲು ಗಳಿಸಿ ಗೋಲ್ಡನ್ ಬೂಟ್ ಪ್ರಶಸ್ತಿ ಗೆಲ್ಲುತ್ತಾರೆ ಎಂದು ಫುಟ್ಬಾಲ್ ಅಭಿಮಾನಿಗಳು ಕಾತುರದಿಂದ ಕಾಯುತ್ತಿದ್ದಾರೆ. ಅರ್ಜೆಂಟೀನಾದ ಸ್ಟಾರ್ ಆಟಗಾರ ಮೆಸ್ಸಿ ಈ ಬಾರಿಯ ವಿಶ್ವಕಪ್‌ನಲ್ಲಿ ಐದು ಗೋಲು ಗಳಿಸಿದ್ದರು. ಇವರೊಂದಿಗೆ ಫ್ರಾನ್ಸ್ ಆಟಗಾರ ಎಂಬಾಪೆ ಕೂಡ ಮೆಸ್ಸಿಗೆ ಸಮಾನವಾದ ಐದು ಗೋಲುಗಳೊಂದಿಗೆ ಅಗ್ರಸ್ಥಾನದಲ್ಲಿದ್ದಾರೆ.

ಇವರಿಬ್ಬರಲ್ಲಿ ಯಾರಿಗೆ ಗೋಲ್ಡನ್ ಬೂಟ್ ಸಿಗಲಿದೆ ಎಂಬುದು ಅಂತಿಮ ಹೋರಾಟದಲ್ಲಿ ನಿರ್ಧಾರವಾಗಲಿದೆ. ಅವರ ನಂತರ ಜೂಲಿಯನ್ ಅಲ್ವಾರೆಜ್ (ಅರ್ಜೆಂಟೀನಾ) ಮತ್ತು ಒಲಿವಿಯರ್ ಗೆರಾಡ್ (ಫ್ರಾನ್ಸ್) ನಾಲ್ಕು ಗೋಲುಗಳೊಂದಿಗೆ ಎರಡನೇ ಸ್ಥಾನದಲ್ಲಿದ್ದಾರೆ.

ಮೆಸ್ಸಿ ಮತ್ತು ಎಂಬಾಪೆ ಗೋಲ್ಡನ್ ಬೂಟ್‌ಗಾಗಿ ಟೈ ಆಗಿದ್ದರೆ, ಗೋಲ್ಡನ್ ಬೂಟ್ ವಿಜೇತರನ್ನು ಔಟ್‌ಫೀಲ್ಡ್ ಗೋಲುಗಳ ಮೂಲಕ ಘೋಷಿಸಲಾಗುತ್ತದೆ. ಈ ರೀತಿ ನೋಡಿದರೆ ಎಂಬಾಪೆ ಗೆಲ್ಲುವ ಅವಕಾಶ ಹೆಚ್ಚಿದೆ ಅಂತಲೇ ಹೇಳಲಾಗುತ್ತಿದೆ.

ಮೆಸ್ಸಿಯ ಹೆಚ್ಚಿನ ಗೋಲುಗಳು ಪೆನಾಲ್ಟಿಗಳಿಂದ ಬಂದಿವೆ. ಅರ್ಜೆಂಟೀನಾ ನಾಯಕನಿಗೆ ಫೈನಲ್ ಪಂದ್ಯ ಕೊನೆಯ ಪಂದ್ಯವಾಗಿರುವುದರಿಂದ, ಫ್ರಾನ್ಸ್ ವಿರುದ್ಧ ಗೆದ್ದು ತಮ್ಮ ವೃತ್ತಿಜೀವನವನ್ನು ಉನ್ನತ ಮಟ್ಟದಲ್ಲಿ ಕೊನೆಗೊಳಿಸಲು ಲಿಯೊನೆಲ್ ಮೆಸ್ಸಿ ಯೋಚಿಸುತ್ತಿದ್ದಾರೆ.

ಅರ್ಜೆಂಟೀನಾ ಫೈನಲ್ ತಲುಪಿದ್ದು ಇದು ಆರನೇ ಬಾರಿ. ಇದರಲ್ಲಿ ಮೂರು ಬಾರಿ ವಿನ್ನರ್ ಹಾಗೂ ಎರಡು ಬಾರಿ ರನ್ನರ್ ಅಪ್ ಆಗಿದೆ. ಮತ್ತೊಂದೆಡೆ ಫ್ರಾನ್ಸ್ ಹಾಲಿ ಚಾಂಪಿಯನ್ ಆಗಿ ಕಣಕ್ಕೆ ಇಳಿಯುತ್ತಿದೆ. ಸತತ ಎರಡನೇ ಬಾರಿ ವಿಶ್ವಕಪ್ ಗೆಲ್ಲುವ ಉತ್ಸಾಹದಲ್ಲಿದ್ದಾರೆ. ಅಂತಿಮವಾಗಿ ಯಾರು ವಿಜಯಶಾಲಿಯಾಗುತ್ತಾರೆ ಅನ್ನೋದು ನಾಳೆ ನಿರ್ಧಾರವಾಗುತ್ತದೆ.

ಹಾಲಿ ಚಾಂಪಿಯನ್ಸ್ ಗೆ ವೈರಸ್ ಬೀತಿ

ಹಾಲಿ ಚಾಂಪಿಯನ್ ಫ್ರಾನ್ಸ್‌ ತಂಡಕ್ಕೆ ವೈರಸ್‌ ತಗುಲಿದ್ದು, ಭಾನುವಾರ ಅರ್ಜೆಂಟೀನಾ ವಿರುದ್ಧದ ವಿಶ್ವಕಪ್‌ನ ಫೈನಲ್‌ನಲ್ಲಿ ತಂಡದ ಆರಂಭಿಕ ಸೆಂಟರ್‌ಬ್ಯಾಕ್ ಜೋಡಿಯು ತಪ್ಪಿಸಿಕೊಳ್ಳಬಹುದು ಎನ್ನಲಾಗಿದೆ.

ರಾಫೆಲ್ ವರಾನೆ ವೈರಸ್‌ನ ಸೌಮ್ಯ ಲಕ್ಷಣಗಳನ್ನು ಹೊಂದಿದ್ದಾರೆ ಎಂದು ಇಎಸ್‌ಪಿಎನ್ ವರದಿ ಮಾಡಿದೆ. ಅನಾರೋಗ್ಯದ ಭಾವನೆಯಿಂದ ಸಹ ರಕ್ಷಕ ಇಬ್ರಾಹಿಮಾ ಕೊನಾಟೆ ತನ್ನ ಕೋಣೆಯನ್ನು ಹೊರಬಂದಿದಲ್ಲ ಎಂದು ಹೇಳಿದೆ. ಇದು ಫ್ರಾನ್ಸ್ ಹಿನ್ನಡೆಯಾಗುವ ಸಾಧ್ಯತೆ ಇದೆ.