IPL 2023: ಪ್ರತಿ ಪಂದ್ಯಕ್ಕೆ ಚಿಯರ್ ಗರ್ಲ್ಸ್ಗೆ ಸಿಗುವ ವೇತನ ಎಷ್ಟು? ಹೆಚ್ಚು ಸಂಬಳ ನೀಡುವ ತಂಡ ಯಾವುದು? ಅವರ ಆಯ್ಕೆ ಹೇಗೆ?
IPL 2023: ಕ್ಯಾಶ್ ರಿಚ್ ಲೀಗ್ನಲ್ಲಿ ಚಿಯರ್ ಗರ್ಲ್ಸ್ (Cheer Girls) ಪ್ರತಿ ಪಂದ್ಯಕ್ಕೆ ಪಡೆಯುವ ಸಂಬಳ ಎಷ್ಟು ಗೊತ್ತಾ? ಯಾವ ತಂಡವು ಹೆಚ್ಚಿನ ಸಂಭಾವನೆ ನೀಡುತ್ತವೆ? ಅವರಿಗೆ ಸಿಗುವ ಲಾಭಗಳೇನು.? ಈ ಪ್ರಶ್ನೆಗಳಿಗೆ ಉತ್ತರ ಇಲ್ಲಿದೆ.
3 ವರ್ಷಗಳ ಬಳಿಕ ಇಂಡಿಯನ್ ಪ್ರೀಮಿಯರ್ ಲೀಗ್ (Indian Premier League) ಅದ್ಧೂರಿ ಆರಂಭ ಪಡೆದುಕೊಂಡಿದೆ. ವಿಶ್ವದ ಬಹು ನಿರೀಕ್ಷಿತ ಮಿಲಿಯನ್ ಡಾಲರ್ ಟೂರ್ನಿ ದಿನದಿಂದ ದಿನಕ್ಕೆ ರಂಗೇರುತ್ತಿದೆ. ಜಿದ್ದಾಜಿದ್ದಿನ ಪೈಪೋಟಿಗೆ ಸಾಕ್ಷಿಯಾಗುತ್ತಿದೆ. ಅಭಿಮಾನಿಗಳಲ್ಲೂ ಸಂಭ್ರಮ ಹೆಚ್ಚಾಗುತ್ತಿದೆ. ಪ್ರತಿಯೊಂದು ಪಂದ್ಯದಲ್ಲೂ ಆಟಗಾರರು ಒಂದಿಲ್ಲೊಂದು ದಾಖಲೆ ನಿರ್ಮಿಸುತ್ತಿದ್ದಾರೆ. ಐಪಿಎಲ್ ಇತಿಹಾಸದಲ್ಲಿ ಚರಿತ್ರೆ ಬರೆಯುತ್ತಿದ್ದಾರೆ.
ಹಸಿರು ಅಖಾಡದಲ್ಲಿ ಬ್ಯಾಟ್ಸ್ಮನ್ಗಳು ಬೌಂಡರಿ, ಸಿಕ್ಸರ್ಗಳ ಸುರಿಮಳೆ ಸುರಿಸುತ್ತಿದ್ದರೆ, ಬೌಲರ್ಗಳು ವಿಕೆಟ್ ಬೇಟೆಯ ಮೂಲಕ ಪಂದ್ಯದ ರೋಚಕತೆಯನ್ನು ಹೆಚ್ಚಿಸುತ್ತಿದ್ದಾರೆ. ಅಭಿಮಾನಿಗಳು ಹುಚ್ಚೆದ್ದು ಕುಣಿಯುತ್ತಾರೆ. ಈ ಸಂದರ್ಭದಲ್ಲಿ ಚಿಯರ್ ಗರ್ಲ್ಸ್ (Cheer Girls) ಬೌಂಡರಿ, ಸಿಕ್ಸರ್, ವಿಕೆಟ್ ಪಡೆಯುವಾಗ ಮಿರಿ ಮಿರಿ ಮಿಂಚುವ ಉಡುಗೆಯಲ್ಲಿ ಆಯಾ ತಂಡಕ್ಕೆ ಚಿಯರ್ ಮಾಡುತ್ತಾರೆ.
ಆದರೆ, ಮೈದಾನದಲ್ಲಿ ನರೆದಿರುವ ಸಾವಿರಾರು ಪ್ರೇಕ್ಷಕರ ಮುಂದೆ ವೇದಿಕೆಯಲ್ಲಿ ಮೈಮಾಟವನ್ನು ಪ್ರದರ್ಶಿಸಿ ಅಭಿಮಾನಿಗಳನ್ನು ರಂಜಿಸುವ ಈ ಚಿಯರ್ ಗರ್ಲ್ಸ್, ಐಪಿಎಲ್ನಲ್ಲಿ ಎಷ್ಟು ಸಂಬಳ ಪಡೆಯುತ್ತಾರೆ ಗೊತ್ತಾ? ಕ್ಯಾಶ್ ರಿಚ್ ಲೀಗ್ನಲ್ಲಿ ಚಿಯರ್ ಗರ್ಲ್ಸ್ ಪ್ರತಿ ಪಂದ್ಯಕ್ಕೆ ಪಡೆಯುವ ಸಂಬಳ ಎಷ್ಟು ಗೊತ್ತಾ? ಯಾವ ತಂಡವು ಹೆಚ್ಚಿನ ಸಂಭಾವನೆ ನೀಡುತ್ತವೆ. ಅವರಿಗೆ ಸಿಗುವ ಲಾಭಗಳೇನು.? ಅದರ ವರದಿ ಇಲ್ಲಿದೆ ನೋಡಿ.
3 ವರ್ಷಗಳಿಂದ ಚಿಯರ್ ಗರ್ಲ್ಸ್ಗೆ ಬಿದ್ದಿತ್ತು ಬ್ರೇಕ್
ಮೂರು ವರ್ಷಗಳಿಂದ ಕೊರೊನಾ ಮಹಾಮಾರಿ ವಕ್ಕರಿಸಿದ್ದ ಕಾರಣ ಬಿಸಿಸಿಐ, ಐಪಿಎಲ್ನ ಎಲ್ಲಾ ಅದ್ಧೂರಿಗಳಿಗೂ ತಡೆ ಹಾಕಿತ್ತು. ಅದರಂತೆ ಅಭಿಮಾನಿಗಳನ್ನು ಹುಚ್ಚೆದ್ದು, ಕುಣಿಯುವಂತೆ ಮಾಡುವ ಚಿಯರ್ ಗರ್ಲ್ಸ್ ತಂಡಕ್ಕೆ ಬ್ರೇಕ್ ಹಾಕಿತ್ತು. ಸದ್ಯ ಕೋವಿಡ್ನಿಂದ ಪ್ರಪಂಚ, ಸಹಜ ಸ್ಥಿತಿಗೆ ತಲುಪಿದೆ. ಅದರಂತೆ, ಶ್ರೀಮಂತ ಲೀಗ್ ಅದ್ಧೂರಿಯಾಗಿ ನಡೆಯುತ್ತಿದ್ದು, ತುಂಡುಡುಗೆ ತೊಟ್ಟು ಕುಣಿಯುವ ಚಿಯರ್ ಗರ್ಲ್ಸ್ ಜೋಷ್ ಜೋರಾಗಿದೆ. ಸಾವಿರಾರು ಕ್ರೀಡಾ ಪ್ರೇಮಿಗಳನ್ನು ಸೆಳೆಯುತ್ತಿದ್ದಾರೆ. ಮತ್ತೊಂದು ವಿಶೇಷ ಅಂದರೆ ಚಿಯರ್ ಗರ್ಲ್ಸ್ ನೋಡಲೆಂದೇ ಮೈದಾನಕ್ಕೆ ಬರುತ್ತಾರೆ.
ಮೊದಲು ಪಡೆಯುತ್ತಿದ್ದದ್ದು 3000
ಮಿಲಿಯನ್ ಡಾಲರ್ ಟೂರ್ನಿಯ ವ್ಯವಹಾರ ಜೋರಾಗಿದೆ. ಪ್ರತಿ ಸೀಸನ್ಗೂ ಸಾವಿರಾರು ಕೋಟಿ ದುಡಿಯುತ್ತಿದೆ. ಆದರೆ ಈ ಹಿಂದೆ ಇಷ್ಟೆ ವ್ಯವಹಾರ ನಡೆಯುತ್ತಿರಲಿಲ್ಲ. ಹಾಗಂತ ಲಾಭ ಇರಲಿಲ್ಲ ಎಂದಲ್ಲ. ಅಂದಿನ ಖರ್ಚು ವೆಚ್ಚಗಳಿಗೆ ತಕ್ಕಂತೆ ಆದಾಯ ಬರುತ್ತಿತ್ತು. ಅದರಂತೆ ಚಿಯರ್ ಗರ್ಲ್ಸ್ ತಂಡಕ್ಕೂ, ಕಡಿಮೆ ಮೊತ್ತದ ಸಂಭಾವನೆ ಸಿಗುತ್ತಿತ್ತು. ಆರಂಭದಲ್ಲಿ ಚಿಯರ್ ಗರ್ಲ್ಸ್ ಪ್ರತಿ ಪಂದ್ಯಕ್ಕೆ ವೇತನ 3 ಸಾವಿರ ಪಡೆಯುತ್ತಿದ್ದರು. ಅಂದು ಮೈದಾನದಲ್ಲಿ ಚಿಯರ್ ಮಾಡುತ್ತಿದ್ದರು. ಈಗ ಭಾರತೀಯರು ಕಾಣಿಸಿಕೊಳ್ಳುತ್ತಿದ್ದಾರೆ.
ಚಿಯರ್ ಗರ್ಲ್ಸ್ ವೇತನ ಎಷ್ಟು?
ಕಲರ್ಫುಲ್ ಲೀಗ್ಗೆ ಚಿಯರ್ ಗರ್ಲ್ಸ್ ತಮ್ಮ ನೃತ್ಯದ ಮೂಲಕ ಮತ್ತಷ್ಟು ರಂಗು ತುಂಬುತ್ತಾರೆ. ಪ್ರಸ್ತುತ ನಡೆಯುತ್ತಿರುವ ಅಂದರೆ 16ನೇ ಆವೃತ್ತಿಯ ನಗದು ಸಮೃದ್ಧ ಲೀಗ್ನಲ್ಲಿ ಚಿಯರ್ ಗರ್ಲ್ಸ್ ಪ್ರತಿ ಪಂದ್ಯಕ್ಕೆ 14 ರಿಂದ 17 ಸಾವಿರ ವೇತನ ಪಡೆದುಕೊಳ್ಳುತ್ತಿದ್ದಾರೆ. ಇನ್ನು ಕೆಲವು ತಂಡಗಳು ಹೆಚ್ಚಿನ ಸಂಭಾವನೆಯನ್ನೂ ನೀಡುತ್ತಿವೆ. ಹೆಚ್ಚು ವೇತನ ನೀಡುವ ವಿಚಾರದಲ್ಲಿ ಕೋಲ್ಕತಾ ನೈಟ್ ರೈಡರ್ಸ್, ಮುಂಬೈ ಇಂಡಿಯನ್ಸ್, ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಅಗ್ರಸ್ಥಾನದಲ್ಲಿವೆ.
ಚೆನ್ನೈ ಸೂಪರ್‌ ಕಿಂಗ್ಸ್, ಪಂಜಾಬ್ ಕಿಂಗ್ಸ್, ಡೆಲ್ಲಿ ಕ್ಯಾಪಿಟಲ್ಸ್‌, ಸನ್‌ ರೈಸರ್ಸ್‌ ಹೈದರಾಬಾದ್‌ ತಮ್ಮ ತಂಡಗಳಿಗೆ ಚಿಯರ್ ಮಾಡುವ ಗರ್ಲ್ಸ್ಗೆ ಪ್ರತಿ ಪಂದ್ಯಕ್ಕೆ 12 ಸಾವಿರ ಸಂಬಳ ನೀಡುತ್ತಿವೆ. ಅದೇ ಕೆಕೆಆರ್ ಪಂದ್ಯಕ್ಕೆ 25 ಸಾವಿರ ವೇತನ ನೀಡುವ ಮೂಲಕ ಹೆಚ್ಚು ಸಂಭಾವನೆ ಪಾವತಿಸುವ ತಂಡವಾಗಿದೆ. ಮುಂಬೈ ಮತ್ತು ಆರ್‌ಸಿಬಿ ತಂಡಗಳು ಪಂದ್ಯಕ್ಕೆ 20 ಸಾವಿರ ನೀಡುತ್ತಿದ್ದಾರೆ.
ಬೋನಸ್ ಭಾಗ್ಯವೂ ಇದೆ
ಅಷ್ಟೇ ಅಲ್ಲ, ಅದ್ಭುತ, ಬೊಂಬಾಟ್ ಡ್ಯಾನ್ಸ್ ಮೂಲಕ ಗಮನ ಸೆಳೆದರೆ ಅಂತಹವರಿಗೆ ಬೋನಸ್ ಭಾಗ್ಯವೂ ಸಿಗಲಿದೆ. ಜೊತೆಗೆ ಗೆದ್ದ ಬಳಿಕ ತಂಡಗಳಿಂದ ಐಷಾರಾಮಿ ಉಡುಗೊರೆಗಳು ಸಹ ಸಿಗಲಿವೆಯಂತೆ. ಲೀಗ್ನಲ್ಲಿ ಪ್ರತಿ ತಂಡವೂ 14 ಪಂದ್ಯಗಳಲ್ಲಿ ಕಣಕ್ಕಿಳಿಯಲಿದ್ದು, ಚಿಯರ್ ಗರ್ಲ್ಸ್ ಒಬ್ಬರಿಗೇ ಸುಮಾರು 2 ರಿಂದ 5 ಲಕ್ಷದಷ್ಟು ಸಿಗಲಿದೆ ಎನ್ನಲಾಗಿದೆ. ಸಂಬಳದ ಹೊರತಾಗಿ, ಅವರು ಐಷಾರಾಮಿ ವಸತಿ, ಪ್ರತಿ ದಿನ ಆಹಾರ, ಇತರ ಸೌಲಭ್ಯಗಳಂತಹ ಪ್ರಯೋಜನ ಪಡೆಯುತ್ತಾರೆ.
ಚಿಯರ್ ಗರ್ಲ್ಸ್ ನೇಮಕ ಹೇಗೆ?
ಚಿಯರ್ ಗರ್ಲ್ಸ್ ಆಗಿ ದುಡ್ಡು ದುಡಿಯುವ ಆಸೆ ಎಷ್ಟೋ ಮಂದಿಗಿದೆ. ಆದರೆ ಅವರ ಆಯ್ಕೆ ಅಷ್ಟು ಸುಲಭವಲ್ಲ. ಅದಕ್ಕೆಂದೇ ಪ್ರತ್ಯೇಕ ಸಂದರ್ಶನಗಳನ್ನೂ ನಡೆಸಲಾಗುತ್ತದೆ. ಅವರ ಸಂಪೂರ್ಣ ಮಾಹಿತಿ ಪರಿಶೀಲಿಸಿದ ನಂತರವೇ ನೇಮಕ ಮಾಡುತ್ತಾರೆ. ನೃತ್ಯ, ಮಾಡೆಲಿಂಗ್, ಸಾವಿರು ಜನರ ಮುಂದೆ ಡ್ಯಾನ್ಸ್ ಮಾಡಿರುವ ಅನುಭವ ಹೊಂದಿರಬೇಕು. ಆಗ ಮಾತ್ರ ಚಿಯರ್ ಗರ್ಲ್ಸ್ ಆಗಲು ಸಾಧ್ಯ. ಇದಕ್ಕೆ ಆಡಿಷನ್ ಕೂಡ ಮಾಡಲಾಗುತ್ತದೆ.